vigor-new

 

ហង្សមាស the voice-2-2-16 cambodianidol-2 Money drop killer gotodance Hm all

ហង្សមាស

the voice-2-2-16

cambodianidol-2

Money drop

killer

gotodance

Hm all

ads-tel-true

លោក អភិបាលខេត្ត លែងកូនត្រី ចំនួន ២០ ០០០ក្បាល ក្នុងត្រពាំងទំលាយ ខេត្តត្បូងឃ្មុំ

ខេត្តត្បូងឃ្មុំ៖ លោក អភិបាលខេត្តត្បូងឃ្មុំ បានសសើរដល់ប្រជាពលរដ្ឋនៅតំបន់ត្រពាំងទំលាយ ចេះរក្សាការពារ អភិរក្ស ត្រពាំងបូរាណនេះបាន ហើយលោកក៏បានប្រលែងកូនត្រី ឆ្ពិន ត្រីប្រា អន្ទង់ និងវារីសត្វផ្សេងៗ ចំនួន ២០ ០០០ ក្បាល ចូលក្នុងត្រពាំងទំលាយ ដើម្បីបង្កើនផលស្តុកនៅក្នុងធម្មជាតិឲ្យកាន់តែសម្បូរច្រើនឡើងថែមទៀត ។

ធ្វើនៅព្រឹកថ្ងៃទី២០ ខែកក្កដា ឆ្នាំ២០១៧ ចំណុចត្រពាំងទំលាយស្ថិតក្នុងភូមិស្ទឹងតាថុក ឃុំចុងជាច ស្រុកតំបែរ ខេត្តត្បូងឃ្មុំ ។ លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទ បានបញ្ជាក់ឲ្យដឹងថា យើងបានផ្សព្វផ្សាយច្បាប់ស្តីពីជលផល និងលិខិតបទដ្ឋានដែលពាក់ព័ន្ធទៅនឹងការគ្រប់គ្រងវិស័យជលផល បានចំនួន៦វគ្គ ដែលមានអ្នកចូលរួមមាន ចំនួន១៤៦នាក់ ។

កន្លែងអភិរក្សជលផលមានចំនួន១កន្លែង ស្ថិតនៅចំណុចបឹងត្រែង ក្នុងភូមិយាយសរ ឃុំទន្លេបិទ ស្រុកត្បូងឃ្មុំ ទំហំ៥៦ហិចតា និងកន្លែងអភិរក្សត្រីសហគមន៍នេសាទមានចំនួន៩កន្លែង ។ ការងារអភិវឌ្ឍសហគមន៍នេសាទមានចំនួន១៥កន្លែង ដែលសហគមន៍នេសាទចំនួន៦ បានចុះបញ្ជីទទួលស្គាល់ពីក្រសួងកសិកម្ម រុក្ខាប្រមាញ់ និងនេសាទ និងផុតអាណត្តិចំនួន ១០សហគមន៍ ។

សហគមន៍នេសាទចំនួន៣ កំពុងរៀបចំឯកសារពាក់ព័ន្ធ សម្រាប់យកទៅចុះបញ្ជីនៅក្រសួងកសិកម្ម រក្ខាប្រមាញ់ និងនេសាទ ។ សហគមន៍ស្រះជម្រកត្រី ក្នុងខេត្ត សរុបមានចំនួន ១៣សហគមន៍ដែលស្ថិតក្នុងស្រុកតំបែបចំនួន៣ស្រះ ស្រុកអូរាំងឪចំនួន៤ស្រះ ស្រុកពញាក្រែកចំនួន១ស្រះ ក្រុងសួងចំនួន១ស្រះ ស្រុកត្បូងឃ្មុំចំនួន៣ស្រះ និងស្រុកក្រូចឆ្មារចំនួន១ស្រះ ។

លោក លី ឡេង អភិបាលនៃគណៈអភិបាលខេត្ត បានថ្លែងកោតសសើរដល់ប្រជាពលរដ្ឋ និងអជ្ញាធរនៅតំបន់នេះ ដែលបានចេះ ថែរក្សា ការពារ អភិរក្ស ត្រពាំងទំលាយនេះបានគង់វង្ស គឺដោយសារបងប្អូនប្រជាពលរដ្ឋរបស់យើង ចេះរួបរួម សាមគ្គីគ្នា ឯកភាពគ្នា មិនរំលោភចូលយកផ្ទៃត្រពាំងធ្វើជាកម្មសិទ្ធិ វាជារឿងល្អ គ្មានអ្នកណាខ្លាំងជាងប្រជាជនយើងជាម្ចាស់នោះទេ ។

សូមឲ្យអាជ្ញាធរ ភូមិ ឃុំ ប្រជាពលរដ្ឋទាំង៥ភូមិដែលរស់នៅជុំវិញត្រពាំងទំលាយនេះ កុំលក់ដូរ អភិវឌ្ឍ តំបន់នេះ វាអាចធ្វើឲ្យបាត់លក្ខណៈដើម ព្រោះត្រពាំងបូរាណនេះ យើងអាចយកទឹកស្រោចស្រពលើផ្ទៃដីកសិកម្មក្នុងតំបន់នេះបាន ជាងនេះទៀត ការប្រលែងកូនត្រី ចំនួន ២០ ០០០ក្បាល ចូលក្នុងត្រពាំងទំលាយ ដើម្បីបង្កើនផលស្តុកនៅក្នុងត្រពាំងធម្មជាតិឲ្យកាន់តែសម្បូរច្រើនឡើងថែមទៀត ទុកជាប្រយោជន៍ដល់ប្រជាជន និងសហគមន៍ក្នុងតំបន់នេះផងដែរ ៕ សាន វិឡែម

 

មន្ដ្រី៖កូនសត្វទោចម្កុដទី៣ បានចាប់កំណើតហើយក្នុងឧទ្យានអង្គរ

សៀមរាប៖គិតត្រឹមថ្ងៃទី ០៧ ខែកក្កដា ឆ្នាំ២០១៧នេះ សត្វទោចម្កុដចំនួន២គូ ដែលបានព្រលែងក្នុងតំបន់អង្គរ ដោយអាជ្ញាធរជាតិអប្សរា សហការជាមួយអង្គការសម្ព័ន្ធមិត្តសត្វព្រៃ(Wildlife Alliance) និងក្រុមហ៊ុនខ្សែយោងអេកូទេសចរណ៍ (Angkor Zip line) បានបង្កើតកូន៣ក្បាលហើយ។
អាជ្ញាធរជាតិអប្សរា បានព្រលែងទោចម្កុដគូដំបូងនៅតំបន់ប្រាសាទតានៃ នាខែមិថុនា ឆ្នាំ២០១៣ និងមួយគូទៀត នៅថ្ងៃទី៣០ ខែមិថុនា ឆ្នាំ២០១៥ នៅខ្លោងទ្វារខ្មោចខាងកើតប្រាសាទបាយ័នដែលបង្កើតបានកូនមួយកាលពីថ្ងៃទី២៩ ខែមិថុនា២០១៦។ ចំណែកទោចម្កុដមួយគូនៅម្តុំប្រាសាទតានៃ បានបង្កើតកូនចំនួនពីរលើក គឺកូនទីមួយជាកូនញី នៅអំឡុងខែកញ្ញា ឆ្នាំ២០១៥ និងកូនទី២លើកនេះ កើតនៅថ្ងៃទី ០៧ ខែកក្កដា ឆ្នាំ២០១៧។
តាមលោក Todd Anthony អគ្គនាយកក្រុមហ៊ុនខ្សែយោងអេកូទេសចរណ៍នៅក្បែរប្រាសាទតានៃបានឱ្យដឹងថា កូនទោចម្កុដដែលទើបកើតថ្មីនេះមានសម្បុរស តែគេមិនទាន់ដឹងថាជាញី ឬឈ្មោលនៅឡើយទេ។ លោកបញ្ជាក់ថា គេអាចនឹងដឹងភេទរបស់វាបាននៅពេលដែលវាមានអាយុប្រហែល១ឆ្នាំ។
ផ្អែកតាមរបាយការណណ៍របស់មជ្ឈមណ្ឌលស្រាវជ្រាវដីព្រៃ និងសត្វព្រៃ ក្នុងឆ្នាំ២០១៦ បានឱ្យដឹងថា ទោចម្កុដត្រូវបានចុះក្នុងបញ្ជីក្រហមរបស់អង្គការអភិរក្សសត្វព្រៃពិភពលោក (IUCN) ជាប្រភេទសត្វជិតផុតពូជ។ សត្វដ៏កម្រមួយនេះ មានវត្តមាននៅលើទឹកដីកម្ពុជាមិនដល់ ១ម៉ឺនក្បាលទេ។
តាមការសិក្សាជំរឿនសត្វព្រៃកន្លងមក រមណីយដ្ឋានអង្គរធ្លាប់មានសត្វព្រៃជាច្រើនប្រភេទរស់នៅ។ ដោយឡែក សត្វព្រៃប្រភេទទោចម្កុដនេះក៏ធ្លាប់មានវត្តមានក្នុងតំបន់អង្គរផងដែរ។ ប៉ុន្តែក្នុងចន្លោះនៃសង្រ្គាមស៊ីវិលមកដល់ពេលបច្ចុប្បន្ននេះ ពួកទោចបានស្លាប់ផុតពូជពីព្រៃនេះទៅហើយ។ ដូចច្នេះហើយទើបនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថានរបស់អាជ្ញាធរជាតិអប្សរា សហការជាមួយរដ្ឋបាលព្រៃឈើ និងអង្គការសម្ព័ន្ធមិត្តសត្វព្រៃ ធ្វើការសិក្សាស្រាវជា្រវលម្អិតអំពីលក្ខណៈព្រៃ ដែលមានអំណោយផលដល់ការរស់នៅរបស់ពួកសត្វទោច និងបាននាំមកព្រលែងនៅក្នុងតំបន់អង្គរនេះឡើងវិញ ដើម្បីលើកតម្លៃទេសភាពវប្បធម៌ និងធម្មជាតិ ក្នុងតំបន់អង្គរ ឲ្យកាន់តែវិសេសវិសាលថែមទៀត៕

សម្តេចហ៊ុន សែន ជួបកុមារឆ្នើមខាងគណិតវិទ្យាហ៊ឺ ទៀងគីមហុង

ភ្នំពេញ៖តាមបណ្ដាញសង្គមហ្វេសប៊ុកសម្ដេចហ៊ុនសែនប្រមុខរដ្ឋាភិបាលបានអោយដឹងថា៖នៅព្រឹកថ្ងៃទី ១៩ កក្កដា ឆ្នាំ២០១៧ នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា អញ្ជើញជួប ចៅប្រុស ហ៊ឺ ទៀង គីមហុង អាយុ ៧ឆ្នាំ ឪពុក ម្ដាយក្រុមគ្រួសារ និងលោកគ្រូប្រចាំថ្នាក់របស់ គីមហុង ព្រមទាំងលោកគ្រូ ដែលបានធ្វើតេស្ត គីមហុង លើសមត្ថភាពគណិតវិទ្យាកន្លងមក។ សព្វថ្ងៃនេះ កុមារា គីមហុង កំពុងរៀននៅសាលាបឋមសិក្សាហ៊ុនសែនអនុវត្ត ដែលមានទីតាំងនៅភូមិ ៣ សង្កាត់រកាក្នុង ក្រុងដូនកែវ ខេត្ត តាកែវ។ ឪពុកម្តាយរបស់កុមារា គីមហុង សព្វថ្ងៃគឺកំពុងរស់នៅទីតាំងខាងលើនេះផងដែរ។ ការជួបជុំសំណេះសំណាលនេះគឺនៅភូមិគ្រឹះសម្តេចតេជោផ្ទាល់កាលពីព្រឹកមិញ។

កុមារា គីម ហុង គឺជាកុមារដែលមានសមត្ថភាពពិសេសយល់ដឹងលើភាសាខ្មែរ និងគណិតវិទ្យា។ គីមហុង មានសមត្ថភាពពិសេសចេះអានអក្សរ និងរៀបអក្សរខ្មែរ និងអក្សរឡាតាំងកាលពីអាយុជាង ២ឆ្នាំ។ អាយុបានពីរឆ្នាំកន្លះ កុមារ គីមហុង ចេះអានសារជូនពរសម្តេចតេជោ ហ៊ុន សែន បានយ៉ាងល្អ។

នៅក្នុងពេលអញ្ជើញជួបសំណេះសំណាលជាមួយចៅ គីមហុង សម្តេចតេជោ បានប្រគល់កំព្យូទ័អោយកុមារប្រើប្រាស់ស្រាវជ្រាវក្នុង Internet និងបានអោយចៅស្រីសម្តេច និយាយសន្ទនាជាភាសាអង់គ្លេសជាមួយគ្នាផងដែរ។ សម្តេចតេជោ ក៏បានប្រាប់អោយចៅ គីមហុង ស្រាវជ្រាវរកផែនទីកម្ពុជា និងទីតាំងមួយចំនួន ហើយវាស់ចំងាយរកចំនួនប្រវែងគីឡូម៉ែត្រ។ គីមហុង ធ្វើបានយ៉ាងល្អគួរអោយកោតសរសើរ។ ដោយសារកុមារនេះមានសមត្ថភាពពិសេស គឺសម្តេចតេជោ បានស្នើអាហារូបករណ៍ពិសេសពីសាលា Belti ដល់គីមហុងបានសិក្សាចំណេះដឹងទូទៅ។ គីមហុង អាចនឹងចាប់សិក្សាពីថ្នាក់ទី ៨ឡើងទៅ ប្រសិនបើសាលាធ្វើតេស្តសមត្ថភាពរួចហើយនោះ។ ទន្ទឹមនឹងនេះ គឺសម្តេចតេជោ បានស្នើអោយ លោក ដួង តារា ជំនួយការសម្តេចតេជោ នឹងក្រុមគ្រួសារពិភាក្សាគ្នាជាមួយក្រសួងអប់រំ យុវជន និងកីឡា ដើម្បីរកគ្រឹះស្ថានល្អដែលសមស្របទៅនឹងសមត្ថភាពពិសេសរបស់កុមារគីមហុង។ សម្តេចតេជោនាយករដ្ឋមន្រ្តីនឹងទទួលបន្ទុករាល់នូវការចំណាយក្នុងការសិក្សាសម្រាប់កុមារា គីម ហុង ទាំងស្រុង។

បន្ទាប់ពីបានសំណេះសំណាលជាមួយចៅប្រុស ក្រុមគ្រួសារ និងលោកគ្រូរួចមក សម្ដេចតេជោ ហ៊ុន សែន បានឧបត្ថម្ភនូវ កុំព្យូទ័រយួរដៃ ០១គ្រឿង iPad ០១ សម្រាប់សិក្សាស្រាវជ្រាវ និងកង់ ០១គ្រឿង សម្រាប់ចៅប្រុសធ្វើដំណើរទៅសាលា រួមនឹងថវិកាមួយចំនួនផងដែរ។

 សម្ដេចតេជោ ហ៊ុន សែន បានកោតសរសើរ ដល់ឪពុកម្ដាយ លោកគ្រូអ្នកគ្រូ ដែលបានខិតខំយកចិត្តទុកដាក់ចញ្ចឹមបីបាច់ថែរក្សា និងអប់រំបង្រៀនកុមារ ហ៊ឺ ទៀងគីមហុង ដែលទើបមានអាយុ ៧ ឆ្នាំ មានសមត្ថភាពធ្វើគណិតវិទ្យាថ្នាក់ទី ១២ បានយ៉ាងល្អ។ សម្តេចតេជោ នឹងឧបត្ថម្ភគ្រប់បែបយ៉ាង ដល់ការសិក្សារបស់ គីមហុង ដើម្បីទទួលបានជោគជ័យទៅថ្ងៃអនាគត។ គីមហុង គឺជាធនធានដ៏មានសារៈសំខាន់បំផុតសម្រាប់ប្រទេសកម្ពុជា៕

កម្ពុជាស្នើឲ្យបារាំងនិងជប៉ុនពង្រីកវិសាលភាពICC-Angkor ឲ្យបានគ្របដណ្តប់ទៅដល់តំបន់ប្រាសាទសំបូរព្រៃគុកបន្ថែមទៀត

ភ្នំពេញ៖កម្ពុជាស្នើសុំសហប្រធានICC-Angkorពង្រីកវិសាលភាពលើការងារវប្បធម៌ឲ្យគ្រប​ដណ្តប់លើ​តំបន់ប្រាសាទសំបូរ​ព្រៃគុកបន្ថែម​ទៀត បន្ទាប់​​​ពី​តំ​​​បន់​ប្រាសាទសម្បូរ៍ព្រៃគុក ទើបបានសម្រេចចុះក្នុងបញ្ជីសម្បត្រិបេតិកភណ្ឌពិភពលោក កាលពីថ្ងៃទី៨ កក្កដា ​​ឆ្នាំ២០១៧ ថ្មីៗនេះ។

ប្រមុខរាជរដ្ឋាភិបាលកម្ពុជាសម្តេចតេជោហ៊ុន សែន មានប្រសាសន៍នៅ ក្នុងពិធី​អបអរ​សាទ​រ​ការ​​ដាក់​​​​​បញ្ចូល «តំបន់ប្រាសាទសម្បូរ៍ព្រៃគុក» ជា​សម្បត្តិ​បេតិកភណ្ឌ​ពិភពលោកនៅពហុកីឡាដ្ឋានជាតិអូឡាំពិកនាល្ងាចថ្ងៃទី១៧ខែកក្កដាម្សិល​ម៉ិញថានឹងស្នើទៅរដ្ឋាភិបាលបាំរាំង​និងជប៉ុនដែល​ជា​​​​​សហប្រធានគណកម្មាធិការអន្តរជាតិ​ដើម្បីសម្របសម្រួលកិច្ចគាំពារនិងអភិវឌ្ឍន៍រមនីយដ្ឋាន​ប្រវត្តិសាស្ត្រអង្គរហៅកាត់​ថា(ICC-Angkor) ​​ដើម្បី​ពិនិត្យលើ​លទ្ធ​ភាព​​​​ពង្រីកការងារអភិរក្សថែរក្សានិងការពារដល់តំបន់ប្រាសាទសម្បូរ៍ ព្រៃគុកបន្ថែមទៀត។

 សម្តេចក៍នឹងលើកបញ្ហានេះទៅកាន់នាយករដ្ឋមន្ត្រីជប៉ុន ឯ.ឧស៊ិន ស៊ូអាបេ នៅក្នុងដំណើរអញ្ចើញទៅបំពេញទស្សនកិច្ចផ្លូវការនៅប្រទេស​ជប៉ុន​ដែលនឹងធ្វើឡើងចាប់​ពីថ្ងៃ​ទី៦ដល់ថ្ងៃទី៩​ខែ​សី​​ហា​​ខាង​មុខ​នេះផងដែរ។ជាមួយគ្នានេះ​​សម្តេច​ ក៍បានលើកទឹកចិត្តដល់ផ្នែកពាក់ព័ន្ធទាំងអស់ឲ្យ​ធ្វើការ​ពិភាក្សា​គ្នាផង​ដែរ​ជា​មួយអង្គការយូណេស្កូ ដោយសម្តេចបានបង្ហាញនូវ ជំនឿថា មិត្តភ័ក្ត បរទេសនឹងបន្តជួយឧបត្ថមគាំទ្រកម្ពុជាតទៅទៀត ក្នុងការជួយ​ពង្រី​ក​​វិសាល​ភាពអភិរក្ស​និង​ការពារ​តំបន់​ប្រសាទសម្បូរព្រៃគុកដែលជាសម្បត្តិវប្បធម៌របស់មនុស្សជាតិនេះ ។

សម្តេចមានប្រសាសន៍ទៀតថាកិច្ចការវប្បធម៌នេះជាកិច្ចការដ៍ធំមិនត្រឹមតែការដាក់បញ្ចូលក្នុងបញ្ជីបេតិកភណ្ឌពិភពលោកហើយអាចចប់នោះ​​ទេ​គឺ​ទាម​ទារ​​ឲ្យយើងរួ​មគ្នាធ្វើកិច្ចការនេះជាច្រើនទៀតដើម្បីថែរក្សាការពារមរតកវប្បធម៌របស់ដូនតាយើងដែលបានបន្សល់ទុកឲ្យបានគង់វង្សផង និង​ដើម្បី​​​​​​​នាំ​មកផលប្រយោជន៍យ៉ាងសំខាន់សម្រាប់សង្គមជាតិផង។ តាមរយៈ​សម្បត្តិវប្បធម៌នេះនឹងនាំមកនូវទេសចរផ្តល់ការងារជូន​ប្រ​​ជា​​ពលរដ្ឋ  ប្រាក់​ចំណូលចូលថវិកាជាតិដែលជាការ​រួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ចសង្គម និងកាត់បន្ថយភាពក្រីក្រពី​ប្រជា​ពលរដ្ឋ។

​  សម្តេចបានយកឱកាសនេះអរគុណមិត្តភក្ដិបរទេស និងអង្គការអន្តរជាតិនានាដែលតែងបានផ្តល់ការគាំទ្រដល់កម្ពុជា ក្នុងការចុះបញ្ជីសម្បត្តិ​បេតិកភណ្ឌ​ទាំងរូបិយនិ​ងអរូបិយប្រកបដោយជោគជ័យជាបន្តបន្ទាប់ហើយបើគ្មានការចូលរួមគាំទ្រពីខាងក្រៅនិងការខិត​ខំប្រឹងប្រែងផ្ទាល់​ដោយ​កម្ពុជា​​​​​ខ្លួន​ឯងនោះទេ អ្វីៗក៍មិនអាចសម្រេចបានជោគជ័យដូចថ្ងៃនេះដែរ។

ក្នុងនាមរាជរដ្ឋាភិបាលកម្ពុជាសម្តេចក៍បាន ថ្លែងអំណរគុណដល់គ្រប់តួអង្គពាក់ព័ន្ធ និងប្រិយមិត្តបរទេសទាំងអស់ ដែលក្នុងរយៈពេលកន្លងទៅ​មាន​បណ្តា​ប្រទេសមួយចំនួនបានជួយជួសជុលប្រាសាទនានា​​និងជួយអភិរក្សនូវគំនូរ ឬផ្នែក​​សិល្បះ​ផ្សេងៗដើម្បីកុំឲ្យបាត់បង់។

សម្តេចក៍បានបង្ហាញពីមោទនភាពផងដែរ ដែលតំបន់ប្រាសាទអង្គរ មានបារាំងនិងជប៉ុនធ្វើជាសហប្រធានគណៈកម្មាធិការអន្តរជាតិ​ដើម្បី​សម្រប​សម្រួលកិច្ចគាំពារនិងអភិវឌ្ឍន៍រមនីយដ្ឋានប្រវត្តិសាស្ត្រអង្គរហៅកាត់ថា(ICC-Angkor)និង ICC​ព្រះ​វិហារ ​មានប្រទេសធំៗ២ ដែលមាន​ប្រ​ជា​​​ជន​៣ពាន់​លាននាក់គឺចិននិងឥណ្ឌាមកធ្វើ​ជាសហប្រធានដើម្បីគាំទ្រនូវ​ការអភិរក្ស​ប្រា​ង្គ​ប្រាសាទព្រះវិហារនេះ។​ចំណុចទាំងនេះបង្ហាញ​ឲ្យ​ឃើញ​​ពីគោលនយោបាយការបរទេសដ៍ត្រឹមត្រូវរបស់រាជរដ្ឋាភិបាលកម្ពុជាដែលកំពុងទទួលបានការជួយគាំទ្រពីប្រិយមិត្តបរទេសលើការអភិរក្ស​សម្បត្តិ​វប្បធម៌​ដែលជាកេរ្ត៍មរតករបស់ដូនតាខ្មែរឲ្យបានស្ថិតស្ថេគង់វង្សជាអង្វែងតទៅ ។

សម្តេចក៍បានយកឱកាសនេះអំពាវនាវដល់ប្រជាពលរដ្ឋកម្ពុជាជំនាន់ក្រោយៗឲ្យចូលរួមធ្វើជាកូនកតញ្ញូទាំងអស់គ្នា ដើម្បីជួយដល់ការថែរក្សាការពារសម្បត្តិវប្បធម៌ ដែលដូនតាបានបន្សល់ឱ្យសម្រាប់មោទភាពជាតិផង និងក៍ដើម្បីតបស្នងដល់គុណព្រះរាជា និងបុព្វបុរសគ្រប់ជំនាន់ ដែលបាន បន្សល់កេរ្តិ៍មរតកនេះ សម្រាប់កូនចៅ ជំនាន់ក្រោយៗ។

សម្តេចតេជោ ហ៊ុន សែន ក៍បានឲ្យដឹងដែរថាក្រៅពីតំបន់ប្រាសាទសម្បូរ៍ព្រៃគុកនេះត្រូវបានដាក់បញ្ចូលទៅក្នុង បញ្ចីសម្បត្តិបេតិកភណ្ឌ ពិភពលោករួច យើងក៍នៅមានការងារវប្បធម៌ជាច្រើនទៀតដែលត្រូវបន្តធ្វើមិនទាន់ចប់ត្រឹមនេះទេ  ពោលគឺយើងនៅមានប្រាសាទកោះកេរ ប្រាសាទបន្ទាយឆ្មារ និងនៅមានភ្នំគូលែន រួមទាំងកន្លែងដទៃទៀតដែលត្រូវខិតខំធ្វើ ក្នុងតួនាទីយើងជាកូនខ្មែរដែល បានកើតលើទឹក ដីវប្បធម៌​ដ៍សម្បូរ៍បែបមួយនេះ ក្នុងការជួយថែរក្សាការពារនូវសម្បត្តិដូនតាដែលព្រះរាជាគ្រប់ជំនាន់ បានដឹកនាំកសាង ជាមួយនឹងបុព្វបុរសជាតិ របស់យើង បានបន្សល់ទុកឱ្យ ដល់យើងជាអ្នកជំនាន់ក្រោយគឺត្រូវតែខិតខំការពារឲ្យបានគង់វង្ស។

  សូមបញ្ជាក់ថា ប្រាសាទសំបូរព្រៃគុក មានទីតាំងស្ថិតនៅក្នុងភូមិសំបូរ ឃុំសំបូរ ស្រុកប្រាសាទសំបូរ ខេត្តកំពង់ធំ ដែល​មានចំ​ងាយ​ប្រមាណ៣០គីឡូម៉ែត្រ ពីទីរួមខេត្តកំពង់ធំ តាមផ្លូវជាតិលេខ៦៤។ ប្រាសាទនេះ ជារាជធានីចាស់បុរាណឈ្មោះ ថាឥសានបុរៈ ដែលកាល​ពីសម័យ​នោះ ជាមជ្ឈមណ្ឌល នៃសាសនា ឧទ្ទិសថ្វាយដល់សិវៈនិយម។ ក្រុមប្រាសាទ នេះសាង សង់អំពីឥដ្ឋតាន់ ថ្មបាយក្រៀម និងថ្មភក់ ដែលលំអរ​លើ​ជញ្ជាំង​ប្រាសាទ ហើយ ត្រូវបានកសាងឡើង នៅរជ្ជកាលព្រះបាទ ឥសានវរ្ម័នទី១ ក្នុង សតវត្សទី៧។ តាមការស្រាវជ្រាវបានឲ្យដឹងថា នៅទីនោះ មាន ប្រាសាទ ប្រមាណ ជាង១០០ប្រាសាទ ដែលចែកចេញជា៤ក្រុមធំៗ៕

 

ខេត្តកំពង់ធំដាំដើមឈើប្រណីត៧ម៉ឺនដើមនិងកូនឈើហូបផ្លែ៥ម៉ឺនដើម

ខេត្តកំពង់ធំ៖អាជ្ញាធរខេត្តកំពង់ធំនិងមន្ទីរបរិស្ថានប្រារព្វរុក្ខទិវាជាតិដាំកូនឈើព្រៃចំនួន៧០០០០ដើមក្នុងតំបន់ព្រៃការ​ពារ​សហគមន៏ជាំធ្លក និងចែកកូនឈើហូបផ្លែចំនួន៥០០០០ដើម ដល់សហគមន៏ប្រជាពលរដ្ឋនៅស្រុកសណ្តាន់។នេះមន្ដ្រីបានថ្លែងនៅក្នុងពិធី រុក្ខទិវាជាតិ ដាំកូនឈើព្រៃនិងចែកកូនឈើហូបផ្លែ នៅក្នុងសហគមន៍តំបន់ការពារធម្មជាតិ ជាំធ្លក ស្ថិតក្នុងឃុំងន ស្រុកសណ្តាន់ ខេត្តកំពង់ធំ ថ្ងៃទី១៥ខែកក្តដាឆ្នាំ២០១៧នេះ។

លោក យិន គឹមសៀន រដ្ឋលេខាធិការក្រសួងបរិស្ថានមានប្រសាសន៍ថា៖បន្ទាប់ពីមានការចូលរួមយ៉ាងសស្រាក់សស្រាំពីកម្លាំងមន្ត្រីជំនាញ សមត្ថកិច្ចនិងប្រជាពលរដ្ឋ ក្នុងពិធីដាំកូនឈើព្រៃនិងចែកកូនឈើហូបផ្លែថ្ងៃនេះ។លោកក៏សូមអំពាវនារឲ្យអាជ្ញាធរនិងសមត្ថកិច្ចពាក់ព័ន្ធ ព្រមទាំងសហគមន៏ការពារព្រៃឈើ យកចិត្តទុកដាក់ក្នុងការការពារព្រៃឈើឲ្យបានតឹងរឹងបំផុតដោយមិនបណ្តែត បណ្តោយដូចមុនទៀតឡើយ ហើយម្យ៉ាងវិញទៀតត្រូវរកមុខ មេឈ្មួញដឹកជញ្ជូនឈើធំៗ ចាប់យកទៅផ្ទន្ទាទោសតាមច្បាប់ឲ្យអស់ ហើយធ្វើដោយយកចិត្តទុកដាក់ ធ្វើឲ្យស្មើភាពគ្នា កុំចាប់តែប្រជាពលរដ្ឋតូចតាចតែបើជាអ្នកដឹកឈើធំៗខុសច្បាប់ ធ្វើមិនដឹងមិនលឺ តែត្រូវសហការចូលរួមជាមួយប្រជាពលរដ្ឋ និងសមត្ថកិច្ចពាក់ព័ន្ធក្នុងការ ទប់ស្កាត់ការកាប់បំផ្លាញព្រៃឈើខានតែបាន។
លោក កែវវិបុល ប្រធានសហគមន៍ព្រៃឈើជាំធ្លក បានលើករបាយការណ៏និងស្ថានភាពសហគមន៍ជាំធ្លក មានផ្ទៃដី សរុបប្រមាណ ៥២០៤ហិចតា ហើយនៅក្នុងឆ្នាំ២០១៧ យើងបានធ្វើការដាំកូនឈើព្រៃ និងឈើហូបផ្លែបានចំនួន២ដងក្នុងមួយឆ្នាំ លើកទី១ នៅថ្ងៃទី២៨ ខែមិថុនា ឆ្នាំ២០១៧ និងលើកទី២នេះ ដែលមានបីសហគមន៍ព្រៃឈើចូលរួមដំាផងដែរ ក្នុងមាននោះមាន សហគមន៍ព្រៃឈើ ជាំធ្លក សហគមន៏ស្ករក្រូច និងសហគមន៏ជីអោក ដែលមានកូនឈើព្រៃ ចំនួន៧០.០០០ដើមនិងឈើហូបផ្លែចំនួន៥០.០០០ដើម។
លោក សុខលូ មានប្រសាសន៍លើកឡើងថា៖ ព្រៃឈើជាប្រភពធនធម្មជាតិដ៏សំខាន់សម្រាប់ប្រទេសយើង ដូច្នេះសូមបងប្អូនប្រជាសហគមន៍ព្រៃឈើ ត្រូវនាំគ្នាបំផុសស្មារតីប្រជាពលរដ្ឋគ្រប់រូប ឲ្យចេះស្រឡាញ់ព្រៃឈើ ចូលរួមដាំដុះ និងការពារព្រៃឈើ ក៏ដូចជាជួយជម្រុញផលប្រយោជន៍ ដល់ប្រជាពលរដ្ឋក្នុងជីវភាពរស់នៅ ការបង្កបង្កើនផលកសិកម្ម និងបង្កើនសុខមាលភាពគ្រួសារ ព្រមទាំងជួយលើកស្ទួយបរិស្ថានសង្គមទៀតផង។

លោកបន្ថែមទៀតថា៖ «ការប្រារព្ធពិធីរុក្ខទិវានេះ គឺជាការឆ្លុះបញ្ចាំងឲ្យឃើញ នូវការខិតខំប្រឹងប្រែងយ៉ាងសកម្ម របស់រាជរដ្ឋាភិបាលក្នុងការចាត់វិធានការយ៉ាងម៉ឹងម៉ាត់ ដើម្បីគ្រប់គ្រង អភិរក្សធនធានព្រៃឈើ ធនធានធម្មជាតិជីវចម្រុះ ដើម្បីជួយថែរក្សាដំណើរការប្រព័ន្ធអេកូឡូស៊ី កាត់បន្ថយឥទ្ធិពលអវិជ្ជមាន នៃការប្រែប្រួលអាកាសធាតុ កាត់បន្ថយគ្រោះធម្មជាតិនានា និងការស្រូបយកឧស្ម័នកាបូនិចពីបរិយាកាស»។

 

ទន្ទឹមនោះដែរ លោកមានជំនឿយ៉ាងមុតមាំថា ពលរដ្ឋទាំងអស់ ត្រូវចាប់ផ្ដើមដោយមិនបង្អែរបង្អង់នូវផែនការសា្ដរព្រៃឈើ និងដាំឈើឡើងវិញ ដើម្បីរក្សាបាននូវលំនឹងបរិស្ថាន ធម្មជាតិ និងភោគសម្បត្ដិឲ្យកាន់តែមានសម្រស់ស្រស់បំព្រង សម្រាប់សង្គមជាតិទាំងមូល។

ជាមួយគ្នានេះ លោក ក៏បានសំណូមពរដល់អ្នកការពារព្រៃសហគមន៍ មិនត្រូវកាប់ឈើខ្លួនឯង ហើយយកដីទៅលក់ នេះជាបញ្ហាគ្រោះថ្នាក់បំផុត និងបានសំណូមពរដល់ មន្ទីរអង្គភាពទាំងអស់ចូលរួម ដាំដើមឈើតាមអង្គភាព ទីសាធារណៈ តាមដងផ្លូវ ហើយធ្វើជាគំរូដល់ប្រជាពលរដ្ឋ៕

 

បវរកញ្ញាពិភពលោកចែកសម្ភារៈសិក្សាដល់សិស្សក្រីក្រ

កណ្តាល៖សិស្សានុសិស្សក្រីក្រនៃសាលាបឋមសិក្សាដៃចាប់ដៃ ក្នុងភូមិកោះរំដូល ឃុំរកាខ្ពសោះ ស្រុកស្អាង ទទួលបានសម្ភារៈសិក្សាម្នាក់១ឈុតពីបវរកញ្ញាពិភពលោក២០១៦៖ ពិធិចែកអំណោយនេះ ធ្វើឡើងកាលពីព្រឹកថ្ងៃទី១៦ កក្តដា ២០១៧ ក្នុងនោះសិស្សម្នាក់ៗទទួលបាននូវកាបូបស្ពាយ១ សៀវភៅអង់គ្លេស១ក្បាល សៀវភៅសរសេរ១ក្បាល ខ្មៅដៃ១ ប៊ិច១ បន្ទាត់១ និងជ័រលុប១ ព្រមទាំងរូបថតដែលចុះហត្ថលេខារបស់បវរកញ្ញាពិភ ពលោកឆ្នាំ២០១៦ កញ្ញា Angela Boniiia ១សន្លឹកផងដែរ។

លោកVan M Phan អ្នកចាត់ចែងកម្មវិធីរបស់កញ្ញាឯកពិភពលោក និងលោក Ratanak Roth Oeurn ប្រធានទំនាក់​ទំនងអន្តរជាតិកម្មវិធីកញ្ញាឯកពិភពលោក បានប្រាប់ថា ការងារមនុស្សធម៌ គឺជាផ្នែកមួយនៃកម្មវិធីប្រកួតបវរ​កញ្ញា​ពិភពលោក។ ក្រុមការងារចុះមកប្រទេសកម្ពុជានៅពេលនេះ គឺដើម្បីទំនាក់ទំនងជាមួយរាជរដ្ឋាភិ បាល ក៏ដូច​ជាដៃគូឯកជនដើម្បីប្រារព្ធពិធីប្រឡងបវរកញ្ញាពិភពលោកឆ្នាំ២០១៧ ហើយឆ្លៀតពេលនេះដែរ យើងនាំគ្នាធ្វើការងារមនុស្សធម៌នេះតែម្តងទៅ ហើយនិងបន្តទៅទៀតនៅពេលក្រោយៗផ ងដែរ។

កញ្ញា Angela Bonilla បវរកញ្ញាពិភពលោកឆ្នាំ២០១៦បានសម្តែងនូវអារម្មណ៍រីករាយថា កញ្ញាពិតជាមានសេចក្តីត្រេក​​អរណាស់ នៅពេលដែលបានជួបប្រជាពលរដ្ឋខ្មែរដែល ប្រកបដោយភាពរីករាយរាគ់ទាក់យ៉ាងដូច្នេះ និងជួបជាមួយប្អូនតូចៗគួរឱ្យស្រឡាញ់ដូចនេះ។

កញ្ញាក៏បានបន្ថែមដែរថា តាមពិតនាងមានពេលតិចណាស់ ព្រោះយើងមកប្រទេសកម្ពុជាត្រឹមតែ២សប្តាហ៍ប៉ុណ្ណោះ ដើម្បីទំនាក់ទំនងក្នុងកម្មវិធីប្រកួតបវរកញ្ញាពិភពលោកប្រ ចាំឆ្នាំ២០១៧ ហើយបន្ទាប់ពីកន្លែងនេះ យើងនឹងបន្តដំណើរទៅខេត្តកំពតបន្តទៀត ហើយសន្យាថា នឹងត្រឡប់មកជួបក្មេងដ៏គួរឱ្យស្រឡាញ់នេះសារជាថ្មីទៀតផងដែរ។ នាយកគ្រប់គ្រង់សាលាបឋមសិក្សាដៃចាប់ដៃ Side By Side បានឱ្យដឹងដែរថា លោ កពិតជាសប្បាយរីករាយណាស់ នៅ​​ពេលដែលបវរកញ្ញាពិភពលោក បានចុះមកទស្សនៈកិច្ចនិងនាំអំណោយមកចែកជូនដល់កុមារ កុមារី នៅទីនេះ។ លោកបានបន្តថា នៅសាលាដៃចាប់ដៃ លើកោះរំដួល នេះមានសិស្សចាំង១០០នាក់ ហើយសិស្សដែលមករៀននៅសា លានេះ ទទួលបានអាហារថ្ងៃត្រង់១ពេលផងដែរ។ ចំណែកឯការចំណាយ ក្នុងការផ្តត់ផ្គង់ដល់សម្ភារៈសិក្សា ក៏ដូចជាចំណីអាហាររបស់សិស្ស គឺបានមកពីការជួយឧបត្ថមពីសប្បុរសជន ជាពិសេសភ្ញៀវបរទេសដែលបានអញ្ជើញមកធ្វើទស្សនៈកិច្ចនៅទីនេះដោយផ្ទាល់៕(EML)July-140July-141July-143July-142

សម្ដេចហ៊ុនសែននឹងមហាជនប្រមាណជាមួយម៉ឺននាក់ចូលរួមពិធីអបអរសាទរការចុះបញ្ជីប្រាសាទសំបូរព្រៃគុកជាសម្បត្តិបេតិកភណ្ឌនៅសា្ដតអូឡាំពិក

ភ្នំពេញ៖សម្ដេចហ៊ុនសែននាយករដ្ឋមន្ដ្រីនឹងចូលរួមជាមួយមហាជនប្រមាណជាមួយម៉ឺននាក់ប្រារព្ឋពិធីអបអរសាទរការចុះបញ្ជីប្រាសាទសំបូរព្រៃគុកជាសម្បត្តិបេតិកភណ្ឌនៅសា្ដតអូឡាំពិកថ្ងៃទី១៧កក្ដដា។នេះបើតាមសេចក្ដីប្រកាសរបស់សាលាក្រុងភ្នំពេញបានចេញផ្សាយកាលពីម្សិលមិញ។ប្រភពបានបន្ដថាដើម្បីជៀសកកស្ទះចរាចរណ៍និងដើម្បីសន្ដិសុខអ្នកដំណើរអាចបញ្ជៀសជាបណ្ដោះអាសន្នការធ្វើដំណើរទៅកាន់ទីតាំងនេះ៕

មន្ដ្រី៖"កម្មវិធីផ្តល់អាហារតាមសាលារៀននឹងបញ្ចប់នៅត្រឹមឆ្នាំ២០២១"

ខេត្តសៀមរាប៖តំណាងអង្គការស្បៀងអាហារពិភពលោកប្រចំានៅកម្ពុជាបានអះអាងថា កម្មវិធីផ្តល់អាហារតាមសាលារៀនដែលជាជំនួយរបស់អង្គការស្បៀងអាហារពិភពលោកនិងត្រូវបញ្ចប់នៅត្រឹមឆ្នំា២០២១ដោយប្រគល់កម្មវិធីនេះទៅឲ្យរាជរដ្ឋាភិបាលកម្ពុជាជាអ្នកគ្រប់គ្រងទំាងស្រុងវិញ។
ថ្លែងនៅក្នុងកិច្ចប្រជុំថ្នាក់ជាតិស្តីពីកម្មវិធីស្បៀងអាហារតាមសាលារៀននៅខេត្តសៀមរាបនៅព្រឹកថ្ងៃទី១៤ខែកកដ្កានេះលោកស្រី Francesca Erdelmann នាយករងនៃអង្គការស្បៀងអាហារពិភពលោកបានមានប្រសាសន៍ថា៖" កម្មវិធីស្បៀងអាហារពិភពលោកនៃអង្គការសហប្រជាជាតិ បានជួយប្រទេសកម្ពុជាតាំងពីឆ្នាំ១៩៧៩ ដើម្បីសង្រ្គោះដល់ប្រជាជនក្រីក្រ ជួបបញ្ហាអត់ឃ្លាន និងអសន្តិសុខស្បៀង"។ ចំពោះកម្មវិធីស្បៀងអាហារតាមសាលារៀន រួមមានកម្មវិធីអាហារពេលព្រឹក កម្មវិធីអាហារូបករណ៍សិស្សជាស្បៀងនិងអាហារូបករណ៍សិស្សជាសាច់ប្រាក់បានចាប់អនុវត្តតាំងពីឆ្នាំ១៩៩៩ក្នុងគោលបំណងបង្កើនជាសំណាញ់សុវត្ថិភាពសម្រាប់កុមារមកពីគ្រួសារងាយរងគ្រោះបំផុត ដែលកំពុងប្រឈមនឹងអសន្តិសុខស្បៀង។

កម្មវិធីស្បៀងអាហារនៅតាមសាលារៀន បានជួយឱ្យកុមារបំបាត់ភាពស្រេកឈ្លានរយៈពេលខ្លី និងទទួលបានការរៀនសូត្របានល្អ បង្កើនវត្តមាននៃការសិក្សារបស់សិស្ស កាត់បន្ថយការបោះបង់ការសិក្សា និងបង្កើនអត្រាបញ្ចប់ការសិក្សានៅកម្រិតបឋមសិក្សា។កម្មវិធីនេះបានរួមចំណែកពង្រឹងគុណភាពអប់រំនៅតាមមូលដ្ឋាន និងសាលារៀនគោលដៅនានា លើការប្រមូលកុមារឱ្យចូលរៀន គុណភាពនិងប្រសិទ្ធភាពនៃការបង្រៀននិងរៀន និងការចូលរួមរបស់សហគមន៍ស្របតាមគោលនយោបាយសាលាកុមារមេត្រីផែនការយុទ្ធសាស្រ្តអភិវឌ្ឍន៍ជាតិ ផែន ការយុទ្ធសាស្រ្តវិស័យអប់រំ។
លោកស្រីបានបញ្ជាក់ថា៖" កម្មវិធីស្បៀងអាហារតាមសាលារៀនដែលជាជំនួយរបស់អង្គការស្បៀងអាហារពិភពលោក និងបញ្ចប់គម្រោងរបស់ខ្លួនត្រឹមឆ្នំា២០២១ដោយប្រគល់កម្មវិធីនេះទៅឲ្យរាជរដ្ឋាភិបាលកម្ពុជាជាអ្នកគ្រប់គ្រងទំាងស្រុងវិញ"។លោកស្រីពន្យល់ថា មូលហេតុនៃការបញ្ចប់គ្រោងនេះ គឺដោយសារមើលឃើញថា បច្ចុប្បន្ននេះជីវភាពរស់នៅរបស់ប្រជាពល រដ្ឋកម្ពុជាមានភាពល្អប្រសើរជាងមុន រីឯអត្រាភាពក្រីក្រក៍មានការថយចុះមកនៅត្រឹម១៣%ស្ថានការចូលរៀនរបស់កុមារនៅកម្ពុជាក៍ខ្ពស់មានរហូតដល់ប្រមាណ៩០% ចំពោះរាជរដ្ឋាភិបាលក៍មានភាពរឹងមំាដែលអាចធ្វើឲ្យវិស័យអប់រំនៅកម្ពុជាមានការរីកចំរើនបាន។
លោកអ៊ីន វីរជាតិ រដ្ឋលេខាធិការទទួលបន្ទុកទីស្តីការគណៈរដ្ឋមន្រ្តីបានថ្លែងអំណរគុណយ៉ាងជ្រាលជ្រៅចំពោះដៃគូអភិវឌ្ឍទាំងអស់ ពិសេសកម្មវិធីស្បៀងអាហារពិភពលោក របស់អង្គការសហប្រជាជាតិប្រចាំនៅកម្ពុជា ដែលបានរួមចំណែកជាមួយរាជរដ្ឋាភិបាល ជួយបណ្តុះបណ្តាលនិងអភិវឌ្ឍធនធានមនុស្សក្នុងការជួយធ្វើឱ្យសម្រេចគោលដៅជាច្រើនសម្រាប់ វិស័យអប់រំនៅកម្ពុជា។
លោកបានបញ្ជាក់ថា៖ ផ្អែកតាមលទ្ធផលនិងមេរៀនពិសោធជាច្រើន ទាក់ទងនឹងកម្មវិធីស្បៀងអាហារនៅតាមសាលារៀន ក្រសួងអប់រំ យុវជន និងកីឡា នៅតែចាត់ទុកជាកម្មវិធីអាទិភាពមួយដ៏សំខាន់ រួមចំណែកជួយដល់កុមារក្នុងសហគមន៍ក្រីក្រ ក្នុងការលើកកម្ពស់ការចូលរៀន និងការទទួលបានគុណភាពពីការរៀន ផ្តល់លទ្ធភាព ដល់កុមារទាំងនោះបានបញ្ចប់ការសិក្សានៅបឋមសិក្សា និងឈានទៅបន្តការសិក្សានៅមធ្យមសិក្សា។ ហើយចំពោះកម្មវិធីស្បៀងអាហារតាមសាលារៀនដែលជាជំនួយរបស់អង្គការស្បៀងអាហារពិភពលោកដែលនិងបញ្ចប់គម្រោងរបស់ខ្លួនត្រឹមឆ្នំា២០២១ខាងមុខនេះរាជរដ្ឋា​ភិបាលកម្ពុជានិងបន្តអនុវត្តកម្មវិធីប្រកបដោយភាពជោគជ័យបន្តទៀត៕

សមាគមរោងចក្រកាត់ដេរកម្ពុជាជំរុញឲ្យអ្នកវិនិយោគសង់រោងចក្រចេញពីទីប្រជុំជនទៅតាមបណ្តាខេត្តវិញ

ភ្នំពេញ៖សមាគមរោងចក្រកាត់ដេរកម្ពុជាបានជំរុញឲ្យអ្នកវិនិយោគសាងសង់រោងចក្រថ្មីៗចេញពីទីប្រជុំជនទៅតាមបណ្តាខេត្តវិញដើម្បីចូលរួមចំណែកលើកកម្ពស់ដល់ជីវភាពរស់នៅរបស់ប្រជាពលរដ្ឋនៅតាមជនបទឲ្យកាន់តែប្រសើរឡើង។
ថ្លែងប្រាប់ទូរទស្សន៍រស្មីហង្សមាសនៅព្រឹកថ្ងៃទី១៣កក្តដា លោក ខេន លូ អគ្គលេខាធិការសមាគមរោងចក្រកាត់ដេរកម្ពុជាបានមានប្រសាសន៍ថាការជំរុញឲ្យអ្នកវិនិយោគសាងសង់រោងចក្រថ្មីៗឲ្យបានច្រើននៅតាមបណ្តាខេត្តនេះដោយសារតែតំលៃដីធ្លីនៅរាជធានីភ្នំពេញខ្ពស់ពេកដែលធ្វើឲ្យមានការលំបាកក្នុងការស្វែងរកទីតាំងឲ្យបានធំទូលាយនិងដើម្បីចូលរួមកាត់បន្ថយការកកស្ទះចរាចរណ៍នៅរាជធានីភ្នំពេញផងដែរ។
លោកបានបន្តថា៖”នៅក្នុងរយៈពេល២ឆ្នាំចុងក្រោយនេះការពង្រីករោងចក្រកាត់ដេរនិងរោងចក្រផលិតកាបូបថ្មីៗនៅតាមបណ្តាខេត្តដែលមានសក្តានុពលបានរីកដុះដាលច្រើនឡើងៗពិសេសនៅតាមបណ្តោយផ្លូវជាតិលេខ១ លេខ២ លេខ៤និងលេខ៥ដែលបានជួយដល់បងប្អូនប្រជាពលរដ្ឋរស់នៅតំបន់ទាំងនោះទទួលបានការងារធ្វើនិងទទួលបានប្រាក់ចំណូលក្នុងការលើកកម្ពស់សេដ្ឋកិច្ចគ្រួសារនិងអភិវឌ្ឍន៍តំបន់ទាំងនោះឲ្យមានការរីកចំរើនផងដែរ”។
លោកហេង សួរ អ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈបានមានប្រសាសន៍ថាក្រសួងស្វាគមន៍និងលើកទឹកចិត្តឲ្យវិនិយោគិនសង់រោងចក្រថ្មីៗនៅតាមបណ្តាខេត្តដែលស្របទៅនឹងគោលនយោបាយរបស់រាជរដ្ឋាភិបាលក្នុងការចូលរួមកាត់បន្ថយភាពក្រីក្ររបស់ប្រជាពលរដ្ឋនៅតាមជនបទនិងប្រែក្លាយតំបន់ជនបទទៅជាតំបន់ដែលមានសក្តានុពលសេដ្ឋកិច្ចមួយដ៏ប្រសើរ។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាដែលហៅកាត់ថាស៊ីខាឌូបានប្រាប់ទូរទស្សរស្មីហង្សមាសនៅព្រឹកថ្ងៃទី១៣កក្តដាដោយបង្ហាញការគាំទ្រក្នុងការពង្រីករោងចក្រថ្មីៗនៅតាមបណ្តាខេត្តព្រោះថាវាមានសារៈប្រយោជន៍ជាច្រើនដល់កម្មកររស់នៅនៅតាមជនបទដូចជាចំណេញពេលវេលា កាត់បន្ថយការចំណាយថវិកាប្រចាំថ្ងៃ កាត់បន្ថយការធ្វើដំណើររបស់កម្មករដែលប្រឈមនឹងគ្រោះថ្នាក់ចរាចរណ៍ ព្រមទាំងបានជួបជុំក្រុមគ្រួសារនិងអាចមានពេលវេលាក្នុងការរកស៊ីចិញ្ចឹមគ្រួសារបន្ថែមទៀតផងដែរ។
លោកបានបន្តថារោងចក្រដែលបង្កើតនៅតាមបណ្តាខេត្តនានាមានមួយចំនួនជារោងចក្របើកថ្មីនិងមួយចំនួនទៀតជារោងចក្រចាស់ដែលបិទពីភ្នំពេញឬពីតាមបណ្តាខេត្តផ្សេងៗទៀត។
តែយ៉ាងណាក៏ដោយលោក អាត់ ធន់បានស្នើដល់រោងចក្រដែលបង្កើតថ្មីៗនៅតាមតំបន់សេដ្ឋកិច្ចពិសេសមួយចំនួនឬទីប្រជុំជននៅតាមខេត្តព្រះស៊ីហនុ ស្វាយរៀង កំពង់ឆ្នាំងគួរតែមានបង្កើតជាផ្សារឬកន្លែងកំសាន្តនិងកន្លែងស្នាក់នៅសម្រាប់កម្មករដោយឥតគិតថ្លៃ។តែសម្រាប់រោងចក្រនៅតាមជនបទវិញត្រូវផ្តល់លក្ខខណ្ឌការងារនិងអត្ថប្រយោជន៍ផ្សេងៗដូចកម្មករបម្រើការងារនៅតាមរោងចក្រនៅរាជធានីភ្នំពេញឬតាមទីប្រជុំជនដ៏ទៃទៀតដែរ។
គួរបញ្ជាក់ថាបច្ចុប្បន្ននេះនៅកម្ពុជាមានរោងចក្រកាត់ដេរចំនួនជាង១១៥០រោងចក្រដោយមានកម្មករប្រមាណ៧៣ម៉ឺននាក់និងផ្នែកផ្សេងៗទៀតសរុបប្រមាណ១លាន២សែននាក់៕

អគារសហកម្មសិទ្ធិប៊ូឌីងសនឹងត្រូវព័ទ្ធរបងវាយចោលនៅថ្ងៃទី១៧កក្តដានេះ

ភ្នំពេញ៖ ក្រសួងរៀបចំដែនដីនគរូបនីយ៍កម្មនិងសំណង់ និងក្រុមហ៊ុនជប៉ុន Arakawa នឹងធ្វើការវាយអគារសហកម្មសិទ្ធិប៊ូឌីងស បានសាងសង់ឡើងនាឆ្នាំ១៩៦៣ ដែលមានសភាពចាស់ទ្រុឌ​ទ្រោម នៅថ្ងៃទី១៧ ខែកក្តដា ឆ្នាំ២០១៧នេះ បន្ទាប់ពីធ្វើការទូទាត់ប្រាក់ជូនដល់ប្រជាពលរដ្ឋចប់សព្វគ្រប់ នឹងត្រូវការអភិវឌ្ឍន៍ឡើងវិញ។ តែមានប្រជាពលរដ្ឋប្រមាណ៧គ្រួសារមិនទាន់សម្រេចចិត្ត រើចេញនៅឡើយទេ។
​យោងតាមសេចក្តីជូនដំណឹងរបស់ ក្រសួងរៀបចំដែនដីនគរូបនីយ៍កម្មនិងសំណង់ ចេញផ្សាយកាលពីថ្ងៃទី១០ ខែកក្តដា ដែលទូរទស្សន៍ហង្សមាសទទួលបាននៅថ្ងៃទី១២ ខែ កក្តដា ឆ្នាំ២០១៧នេះ បានអោយដឹងថា អគារប៊ូឌីងស មានទីតាំងស្ថិតនៅតាមផ្លូវសយធារស សង្កាត់ទន្លេបាសាក់ ខណ្ឌចំការមន រាជធានីភ្នំពេញ ត្រូវបានសាងសង់ឡើងនាឆ្នាំ១៩៦៣ បច្ចុប្បន្នមានសភាពចាស់ទ្រុឌទ្រោម ត្រូវការអភិវឌ្ឍន៍ឡើងវិញ នឹងតម្រូវអោយធ្វើការរុះរើ នឹងព័តរបងដើម្បីវាយអគារចាស់ចោល នៅថ្ងៃទី១៧ ខែកក្តដា ខាងមុខនេះ”។ សេចក្តីជូនដំណឹងដដែលនេះបានបញ្ជាក់ថា នឹងមានការរំខានដល់ប្រជាពលរដ្ឋ រស់នៅជុំវិញទីតាំងនេះ ក៏ដូចជា អ្នកធ្វើដំណើរអោយមានការប្រុងប្រយ័ត្នខ្ពស់ និងសហការ។
ការដែលក្រសួង និងក្រុមហ៊ុនដាក់កំណត់នៃការវាយអគារសហកម្មសិទ្ធិនេះចោល អ្នកនាំពាក្យក្រសួងរៀបចំដីនគរូបនីយ៍កម្មនិងសំណង់ លោក សេង ឡូត បានបញ្ជាក់អោយដឹងថា ទី១ប្រជាពលរដ្ឋ ៩៨%បានសម្រេចចិត្តទទួលយកតម្លៃ១៤០០ដុល្លាក្នុង១ម៉ែត្រការ៉េ ទី២ អគារនេះមានសភាពចាស់ទ្រុឌទ្រោម ប្រឈមនឹងការបាក់ធ្លាក់ចុះ ទី៣ ក្រុមហ៊ុនតម្រូវការសាងសង់អោយបាន​ឆាប់រហ័ស ដើម្បីចូលរួមអភិវឌ្ឍន៍វិស័យសំណង់។
​ទោះបីជាការមានជូនដំណឹងរបស់ក្រសួងរៀបចំដែនដី អំពីការបិទរបងវាយសំណង់ចោលយ៉ាងណាក៏ដោយ ក៏ប្រជាពលរដ្ឋនៅសល់ប្រប្រមាណ៧គ្រួសារ មិនទាន់បានយល់ព្រម ក្នុងការចាកចេញនោះទេ ដោយពួកគាត់អះអាងថា លុយដែលក្រុមហ៊ុនអោយតាមរយៈក្រសួងដែនដីគឺមានចំនួនតិចពេក មិនអាចយកទៅទិញផ្ទះថ្មីបាន។
​អ្នកស្រី​ វង ប៊ុនថាយ អាយុ៤០ឆ្នាំ កំពុងស្នាក់នៅផ្ទះជាន់ផ្ទាល់ដីមានទំហំតែ១៧ម៉ែត្រការ៉េ នៃអគារសហកម្មសិទ្ធិប៊ូឌីង មានមុខរបលក់ចាប់ហួយផងនោះ បានប្រាប់ហង្សមាស នាព្រឹក​មិញនេះថា “បន្ទប់មានតែ១៧ការ៉េ បើគិតជាលុយជាង២ម៉ឺនដុល្លា ដូច្នេះមិនអាចយកលុយនេះ ទៅទិញផ្ទះថ្មីបាននៅនោះទេ”។ អ្នកស្រីបានបញ្ជាក់ថា គឺសុំអោយរដ្ឋមន្រ្តីក្រសួងដែនដី ផ្តល់អោយគាត់នូវទឹកបា្រក់៥ម៉ឺនដុល្លា ទើបអាចចេញទៅទិញផ្ទះថ្មីបាន។
……………………………………………..គ្លីប វង ប៊ុនថាយ…………………………………………………..
ដោយគេចេញទៅមុននេះគឺ………………………អាចទៅទិញផ្ទះបាននៅដើម្បីប្រកបមុខរប​រកស៊ីស្រួល ចិញ្ចឹមកូនផង។
​អ្នកស្រី វង ប៊ុនថាយ បានអោយដឹងទៀតថា ពីមុនគាត់សុខចិត្តយកការអភិវឌ្ឍន៍ នៅនឹងកន្លែង តែដោយសារមានអ្នកយល់ព្រមយកការអភិវឌ្ឍន៍នៅកន្លែងមានភាគរយតិច ដូច្នេះក្រសួង ក៏ដូចជាក្រុមហ៊ុនមិនបានអនុវត្តទៅតាមគោលការណីនេះទេ។
​បុរសម្នាក់ដែលសុំមិនប្រាប់ឈ្មោះមានមុខរបជាអ្នកលក់អាហារនៅជាន់ក្រោម នៃអគារប៊ូឌីងសនេះដែរ អោយដឹងថា គាត់នឹងបង្ខំចិត្តក្នុងការចាកចេញ ដោយសារក្រសួង គេបានកំណត់ថ្ងៃនៃការរុះរើ និងវាយអគារនេះចោល។ តែគាត់បញ្ជាក់ថា “ក្រសួងដូចជាមិនមានតុល្យភាពសោះ គឺមានម្ចាស់ដែលតសំយ៉ាបថែមប្រមាណ៥គ្រួសារ គឺបានវាស់ហើយគិតលុយអោយ ដោយគាត់មានសំយ៉ាបសង់ជាថ្មរឹងមាំផង ក្រសួងមិនបានវាស់គិតលុយអោយ​នោះទេ។
​លោក អ៊ឹង គន្ធា មន្រ្តីក្រសួងរៀបចំដែនដីនគរូបនីយ៍កម្មនិងសំណង់ ដែលប្រចាំការនៅអគារសហកម្មសិទ្ធិប៊ូឌិងស បានលើកឡើងថា រហូតមកដល់ថ្ងៃទី១២ កក្តដា នេះ មានប្រជា​ពលរដ្ឋតែ៧គ្រួសារទេ ដែលមិនទាន់សម្រេចចាកចេញពីអគារសហកម្មសិទ្ធិនេះ ដោយពួក គាត់ទាមតម្លៃរហូតទៅដល់២០០០ដុល្លាអាមេរិកក្នុងមួយម៉ែត្រការ៉េ។ លោកបានបញ្ជាក់បន្ថែម ចំពោះសំយ៉ាបដែលប្រជាពលរដ្ឋសាងសង់ថែម គឺក្រសួងក៏មិនបានវាស់គិតលុយអោយ ពួកគាត់នោះដែរ។ លោកបន្លែមថា មានអ្នកខ្លះថា ក្រសួងវាស់សំយ៉ាបគិតលុយ នោះគឺមិនពិតទេ។
​នៅថ្ងៃទី១៧ ខែកក្តដា ឆ្នាំ២០១៧ ខាងមុខនេះ លោក អ៊ឹង គន្ធា ប្រាប់អោយដឹងថា ក្រសួងនឹងធ្វើការព័តរបងស័ង្ខសី​ រួចវាយអគារប៊ូឌីងស ដែលចាស់ទ្រុឌទ្រោមនេះចោល ទៅតាមអ្វីដែលក្រសួងរៀបចំដែនដី​បានជូនដឹណងកាលពីថ្ងៃទី១១ ខែកក្តដា ឆ្នាំ២០១៧នោះ។
​គិតត្រឹមម៉ោង ៥:០០ ល្ងាច ថ្ងៃទី ១១ ខែកក្កដា ឆ្នាំ២០១៧ ប្រជាពលរដ្ឋជាម្ចាស់ចំណែកឯកជនក្នុងអគារសហកម្មសិទ្ធិប៊ូឌីងស ចំនួន ៤៦៨ បន្ទប់ស្នាក់នៅ នៃចំនួនសរុប៤៩២បន្ទប់ បានទទួលប្រាក់ទូទាត់រួច និងបានប្រគល់បន្ទប់ជូនក្រុមហ៊ុន ដោយបានចាកចេញពីបន្ទប់ស្នាក់នៅ ទៅតាំងទីលំនៅថ្មី តាមបំណងប្រាថ្នារបស់ពួកគាត់។ ដោយឡែកអ្នកដែលយល់ព្រមចាកចេញគេនឹងមកបន្តបន្ទាប់ទៀត។
សូមបញ្ជាក់ថា គម្រោងអភិវឌ្ឍន៍អគារប៊ូឌីងស គឺ​ក្រុមហ៊ុនជប៉ុន Arakawa គ្រោងចំណាយថវិកាប្រមាណ៧០-៨០លានដុល្លារ នៃការសង់អគារថ្មីមានកម្ពស់២១ជាន់៕

 

ព័ត៌មានផ្សាយ​ផ្ទាល់​ទាន់​ហេតុ​ការណ៍​(video)


មនុស្សធម៌

មនុស្សធម៌

មនុស្សធម៌

មនុស្សធម៌

មនុស្សធម៌

មនុស្សធម៌

មនុស្សធម៌

មនុស្សធម៌

មនុស្សធម៌

មនុស្សធម៌

មនុស្សធម៌

មនុស្សធម៌

ព័ត៌មានជាតិ​ពេល​យប់​


មនុស្សធម៌

មនុស្សធម៌

មនុស្សធម៌

មនុស្សធម៌

មនុស្សធម៌

មនុស្សធម៌

មនុស្សធម៌

មនុស្សធម៌

មនុស្សធម៌

មនុស្សធម៌

មនុស្សធម៌

មនុស្សធម៌

Angkor-10-7-2015

chipmong-lang-10-07-2015

Cambodia-10-07-2015-new

MC-col-10-7-2015

angkor-puro-10-07-2015

Pepsi-10-07-2015

22-10-2015-flora

santana-22-10-2015

8-4-2016-banner

idol-2

 

killer-2

 

singer

GreenICT Technology Co., Ltd

gps-new

verte2