vigor-new

 

ហង្សមាស the voice-2-2-16 cambodianidol-2 Money drop killer gotodance Hm all

ហង្សមាស

the voice-2-2-16

cambodianidol-2

Money drop

killer

gotodance

Hm all

ads-tel-true

ព័ត៌មានជាតិ

អាកាសចរណ៍ AirAsiaចាប់ផ្ដើមហោះបើកឆាករវាងក្រុងកូឡាឡាំពួរមកក្រុងព្រះសីហនុ

ភ្នំពេញ៖អាកាសយានដ្ឋានអន្តរជាតិខេត្តព្រះសីហនុនៅថ្ងៃទី៩ ខែសីហា ឆ្នាំ២០១៧នេះ បានទទួលស្វាគមន៍ ការហោះហើរដំបូងរបស់ AirAsia ពីទីក្រុងកូឡាឡាំពួរ ប្រទេសម៉ាឡេស៊ី។
យោងតាមសេចក្តីប្រកាស ព័ត៌មានរវាង Cambodia Airport និង Vinci Airport បានឲ្យដឹងថា ការតភ្ជាប់នេះ ដើម្បីបង្ហាញឲ្យច្បាស់លើវិស័យទេសចរណ៍ចម្រុះ ដ៏សម្បូរបែបរបស់កម្ពុជា និងជាពិសេសតម្រូវការកើនឡើងគោលដៅឆ្នេរសមុទ្ររបស់កម្ពុជា។ សេវាកម្មថ្មីនេះ បើកដំណើរការនៅថ្ងៃចន្ទ ពុធ សុក្រ និងថ្ងៃអាទិត្យ។ ពេលវេលាមកដល់គឺម៉ោង១ ហើយ៤០នាទីក្រោយ នឹងចាកចេញ ទៅកាន់ទីក្រុងកូឡាឡាំពួរវិញ។
លោក Spencer Lee ប្រធានផ្នែកពាណិជ្ជកម្ម ក្រុមហ៊ុន AirAsia Berhad បាននិយាយថា “យើងមានក្តីរំភើបរីករាយចំពោះជើងហោះហើរដំបូងរបស់យើង នៅខេត្តព្រះសីហនុ ដែលទទួលបាន លទ្ធផលដ៏ជោគជ័យ ជាមួយអ្នកដំណើរពេញ សម្រាប់ផ្លូវហោះហើរលើកទី៥០របស់យើង”។
លោកថា ឆ្នេរសមុទ្រកម្ពុជា បានបង្ហាញពី សក្តានុពល និងឱកាសថាមវន្តធំ នៅក្នុងលក្ខខណ្ឌនៃវិស័យទេសចរណ៍ ពាណិជ្ជកម្ម និងសេដ្ឋកិច្ច ក្នុងដំណើរឆ្ពោះទៅកាន់ ការអភិវឌ្ឍខេត្តព្រះសីហនុ។
លោកបញ្ជាក់ថា ខេត្តព្រះសីហនុ ជាគោលដៅទី១២០ របស់ក្រុមហ៊ុន ហើយសង្ឃឹមថា ខេត្តនេះ នឹងអភិវឌ្ឍន៍ទៅជាគោលដៅទេសចរណ៍មួយ ដ៏មានប្រជាប្រិយភាពដែលអាចឲ្យភ្ញៀវទេសចរ ក្នុងតំបន់ បានទទួលនូវពិភពដ៏អាថ៌កំបាំងរបស់អាស៊ានដែលមិនទាន់ត្រូវបានរកឃើញ។ តាមរយៈផ្លូវហោះហើរនេះ ចង់បើកដំណើរតាមផ្លូវអាកាសសម្រាប់ប្រជាជន នៃខេត្តនេះ ដើម្បីពង្រីកខ្លូនក្នុងតំបន់អាស៊ាន ពិភពលោកដោយប្រើការ តភ្ជាប់ដ៏ធំទូលាយនៅទូទាំង២៧ប្រទេស។
លោក Eric Delobel នាយកប្រតិបត្តិរបស់ក្រុមហ៊ុន អាកាសយានដ្ឋានកម្ពុជា បានឲ្យដឹងថា “ភាពជាដៃគូដ៏ជោគជ័យ របស់យើងជាមួយ AirAsia ត្រូវបានផ្លាស់ប្តូរឡើងមួយជំហានទៀត ហើយជាគន្លឹះក្នុងការភ្ជាប់កម្ពុជាទៅនឹង ពិភពលោក”៕

 

 

ជប៉ុន ផ្តល់​កប៉ាល់​ប្រដេញ ២គ្រឿង ឲ្យ​គយកម្ពុជា

ភ្នំពេញ៖រដ្ឋាភិបាលជប៉ុនបានប្រកាស ផ្តល់​កប៉ាល់​ប្រដេញ ២គ្រឿង ឲ្យ​គយកម្ពុជានិងរដ្ឋាករកម្ពុជាដើម្បីរួមចំណែកពង្រឹងការប្រឆាំងអំពើរត់ពន្ឋនៅផ្ទៃសមុទ្រកម្ពុជា។ការប្រកាសផ្ដល់នេះធ្វើឡើងក្នុងដំណើរទស្សនកិច្ចនៅប្រទេសជប៉ុនដោយសម្ដេចហ៊ុនសែននាយករដ្ឋមន្ដ្រី។

រដ្ឋមន្រ្តី​ក្រសួង​សេដ្ឋកិច្ច និង​ហិរញ្ញវត្ថុ លោក អូន ព័ន្ធមុន្នីរ័ត្ន បាន​អរគុណ​ដល់ ​ក្រសួង​ហិរញ្ញវត្ថុ​ជប៉ុន ដែល​បាន​ផ្តល់​កប៉ាល់​ប្រដេញ​២គ្រឿង ឲ្យ​អគ្គ​នាយកដ្ឋាន​គយ និង​រដ្ឋាករ​កម្ពុជា។កប៉ាលប្រដេញនេះនឹងចូលរួមចំណែកក្នុងការប្រយុទ្ឋប្រឆាំងអំពើរត់ពន្ឋនៅលើផ្ទៃសមុទ្រ។ ការថ្លែង​អំណរ​គុណ​នេះ ធ្វើឡើង​ក្នុង​ជំនួប​រវាង លោក អូ ព័ន្ធមុន្នីរ័ត្ន និង​លោក Taro Aso រដ្ឋមន្រ្តី​ហិរញ្ញវត្ថុ​ជប៉ុន កាលពី​ថ្ងៃទី៨​សីហា នៅក្រុង​តូក្យូ៕

 

ក្រសួងការពារជាតិ​នឹងតាមកំចាត់ក្រុមបដិវត្ដពណ៍ដើម្បីរក្សាសន្តិសុខនិងសន្តិភាពសម្រាប់ប្រទេសកម្ពុជា

ភ្នំពេញ៖ ក្រសួងការពារជាតិ​បានចូលរួមយ៉ាងសកម្មដើម្បីរក្សាសន្តិសុខនិងសន្តិភាពសម្រាប់ប្រទេសកម្ពុជាក្រោយពេលដែលបានចេញផុតពីរបបខ្មែរក្រហម ដើម្បី ស្វែងរកសុខសន្តិភាពជូនប្រជាជនទូទាំងប្រទេសនិងតាមកំចាត់ក្រុមមនុស្ស មានគំនិតបង្កើតឡើងបដិវត្តន៍ពណ៍។
​ក្នុងពិធីផ្សព្វផ្សាយសភាពការណ៍វិវត្តន៍ថ្មីៗ លើវិស័យនយោបាយ សន្តិសុខការពារជាតិ សំរាប់ឆ្ពោះទៅកាន់ឆ្នាំ២០១៨ នាព្រឹកថ្ងៃទី៩ ខែសីហា ឆ្នាំ២០១៧ នៅទីស្តីការក្រសួង សម្តេចពិជ័យសេនា ទៀ បាញ់ ឧបកនាយករដ្ឋមន្រ្តី រដ្ឋមន្រ្តីក្រសួងការពារជាតិ ថ្លែងថា “បច្ចុប្បន្ន ប្រទេសកម្ពុជា គឺទទួលបាននូវសុខសន្តិភាពពេញលេញទូទាំងប្រទេស ក្នុងចំណែកនេះ គឺក្រសួងការពារជាតិ បានចូលរួមយ៉ាងសំខាន់ ក្នុងការស្វែងរកសន្តិភាព ទៅតាមយុទ្ធសាស្រ្តឈ្នះឈ្នះ របស់សម្តេចតេជោ ហ៊ុន សែន នាយករដ្ឋមន្រ្តី”។
​សម្តេចពិជ័យសេនា បានបញ្ជាក់ថា កន្លងទៅក្រសួងការពារជាតិ​បានដើរ តួរយ៉ាងសំខាន់ ក្នុងរក្សាសន្តិសុខប្រទេស​ ជាពិសេសបញ្ហានៅតាមព្រំដែននៃប្រទេសជិតខាង គឺបានចូលរួមទប់ស្កាត់ការឆ្លងដែនខុសជាច្រើនករណី និងទប់ស្កាត់បានដាច់ខាតចំពោះការរំលោភបូរណៈភាពទឹកដីពីប្រទេសជិតខាង។
​ក្រសួងការពារជាតិមានស្នាដៃជាច្រើនក្នុងការចូលរួមក្នុងកិច្ចការអាស៊ាន ទាន់ទិនទៅ​នឹងសន្តិសុខតំបន់ ក្នុងកិច្ចការសន្តិសុខលម្ហរសមុទ្រ សន្តិសុខប្រឆាំងភេវរកម្មឆ្លងដែន និងការ ចូលរួមរៀបចំកិច្ចប្រជុំថ្នាក់រដ្ឋមន្រ្តីការពារជាតិអាស៊ានផងដែរ។
​ចំពោះការជោគជ័យនេះ ឯកឧត្តម នាយឧត្តមសេនីយ៍ ណឹម សុវត្ថិ អគ្គនាយក អគ្គនាយកដ្ឋាននយោបាយនិងកិច្ចការបរទេស នៃក្រសួងការពារជាតិ ថ្លែងថា “ក្រសួងការពារជាតិ បានចូលរួមដោះស្រាយនូវបញ្ហា និងទប់ស្កាត់បានទាំងស្រុងចំពោះក្រុមមនុស្ស មានគំនិតបង្កើតឡើងបដិវត្តន៍ពណ៍ ដែលមានបំណងចង់ផ្តួលរំលំរដ្ឋាភិបាលស្របច្បាប់បច្ចុប្បន្ន​នេះ”។ ក្រសួងការពារជាតិបានការពារនូវសន្តិសុខ និងរៀបចំសណ្តាប់ធ្នាប់បានល្អ អំឡុង​នៃយុទ្ធនាការបោះឆ្នោតក្រុមប្រឹក្សាឃុំសង្កាត់ ដោយមិនមានបញ្ហាអ្វីកើតមានឡើងនោះទេ។
ឯកឧត្តម បានបញ្ជាក់បន្ថែមថា ក្រុមមនុស្សដែលអនុវត្តបដិវត្តន៍ពណ៌នេះ គឺបានធ្វើអោយប៉ះពាល់យ៉ាងខ្លាំង ក្នុងការអភិវឌ្ឍន៍ប្រទេស នឹងមានការធ្លាក់នៃកំណើនសេដ្ឋកិច្ច និងមានអសន្តិសុខសង្គមកើតឡើងផងដែរ។
ឯកឧត្តមបញ្ជាក់ថា ក្រៅពីការពារប្រទេស កងទ័ពកម្ពុជា បានចេញទៅបំពេញបេសកកម្មស្វែងរកសន្តិភាពជូនប្រទេសចំនួន៨ ដែលមានជម្លោះផ្ទៃរាំរ៉ៃ រូមមានប្រទេស ស៊ូដង់ខាងត្បូង​ ស៊ូដង់ លីបង់ អាហ្វ្រិកកណ្តាល ម៉ាលី ឆាដ សឺរ៉ី និងប្រទេសសាយប្រឹស ដែលមានកម្លាំងកងទ័ពមួកខៀវជិត៥ពាន់នាក់៕

 

ជំនួប៖សម្តេច ហ៊ុន សែន និងនាយករដ្ឋមន្រ្តីជប៉ុន Shinzo Abe

ភ្នំពេញ៖នៅរសៀលថ្ងៃទី ៧ ខែ សីហា នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រ កម្ពុជា បានអញ្ជើញបំពេញទស្សនកិច្ចផ្លូវការលើកទី២១ នៅប្រទេសជប៉ុន គិតចាប់តាំងពី ឆ្នាំ១៩៩០មក។ នៅពេល អញ្ជើញមកដល់វិមានរដ្ឋាភិបាលជប៉ុន សម្តេចតេជោ ត្រូវបានទទួលគារវកិច្ចស្វាគមន៍យ៉ាងកក់កក្តៅ និងស្និទ្ធស្នាល រាក់ទាក់បំផុតពីលោកនាយករដ្ឋមន្រ្តី Shinzo Abe រួមទាំង ឯកឧត្តម លោកជំទាវ ជាថ្នាក់ដឹកនាំ ជាន់ខ្ពស់នៃរដ្ឋា ភិបាលជប៉ុន។

បន្ទាប់ពីបញ្ចប់ពិធីត្រួតពលផ្លូវការហើយ សម្តេចតេជោនាយករដ្ឋមន្រ្តី បានអញ្ជើញចូលរួមកិច្ចប្រជុំកំពូលដែលប្រព្រឹត្តិ នៅវិមានរដ្ឋាភិបាលជប៉ុន។ លោក Shinzo Abe បានស្វាគមន៍យ៉ាងកក់ក្តៅបំផុតចំពោះដំណើរទស្សនកិច្ចផ្លូវការការងាររបស់សម្តេចតេជោនាពេលនេះ។ លោកបានចាត់ទុក សម្តេចតេជោ គឺជាមិត្តចាស់របស់ប្រទេស និងប្រជាជនជប៉ុន។ នេះគឺជាលើកទី៨ហើយ ដែលលោក Shinzo Abe បានជួបប្រជុំកំពូលជាមួយ សម្តេចតេជោ។ លោកនាយករដ្ឋមន្រ្តីជប៉ុនបានសន្យានឹងបន្តចូលរួមចំណែកជួយកសាងនិងអភិវឌ្ឍន៍កម្ពុជាដូចដែលជប៉ុនធ្លាប់បានជួយនាពេល កន្លងមក ដើម្បីអោយកម្ពុជាក្លាយទៅជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០។
ជាមួយគ្នានេះដែរ សម្តេចតេជោបានមានប្រសាសន៍ថា ឆ្នាំ២០១៧នេះគឺជាខួបលើកទី ៦០ នៃទំនាក់ទំនងការទូត រវាងប្រទេសទាំងពីរដែលកាលពីឆ្នាំ ១៩៥៧ គឺលោកអតីតនាយករដ្ឋមន្រ្តីជប៉ុនដែលត្រូវជាជីតារបស់លោកនាយករដ្ឋមន្រ្តី Shinzo Abe បានទៅទស្សនកិច្ចនៅកម្ពុជា ជាលើកដំបូង។ នៅឆ្នាំ២០១៧ នេះដែរក៏ជាខួប ២៥ឆ្នាំ នៃការចូលបញ្ជូនកងកម្លាំងជប៉ុនលើកដំបូងទៅកាន់ប្រទេសកម្ពុជា ដើម្បីរក្សាសន្តិភាព និងរៀបចំការបោះឆ្នោត ក្រោមឆ័ត្រអង្គការសហប្រជាជាតិ (UNTAC)។
សម្តេចតេជោ ហ៊ុន សែន បានអញ្ជើញលោកនាយករដ្ឋមន្រីជប៉ុន Shinzo Abe និងលោកជំទាវ ទៅបំពេញទស្សនកិច្ចនៅកម្ពុជាក្នុងពេលវេលាសមស្របណាមួយ។
បន្ទាប់ពីបានបញ្ចប់នូវកិច្ចប្រជុំកំពូលរួចមក សម្តេចតេជោ ហ៊ុន សែន និងលោកនាយករដ្ឋមន្រ្តីជប៉ុន Shinzo Abe បានអញ្ជើញធ្វើជាសាក្សីក្នុងពិធីចុះហត្ថលេខាលើឯកសារចំនួនពីរគឺ ១)ការផ្តល់ហិរញ្ញប្បទានឥតសំណងមានទឹក ប្រាក់សរុប ចំនួន 3,948 លានយ៉េន (ប្រមាណ$35លានដុល្លារអាមេរិក) សម្រាប់អនុវត្តគម្រោងការធ្វើឲ្យប្រសើរ ឡើងវិញនូវប្រព័ន្ធការពារទឹកជំនន់ក្នុងរាជធានីភ្នំពេញ ដំណាក់កាលទី៤ និង ទី២)ការផ្តល់ឥណទានសម្បទាន ចំនួន 23,502 លានយ៉េន (ប្រមាណ$209លានដុល្លារអាមេរិក) សម្រាប់អនុវត្តន៍គម្រោងអភិវឌ្ឍន៍ចំណតផែកុង តឺន័រថ្មីរបស់កំពង់ផែនស្វ័យ័តក្រុងព្រះសីហនុ។
បន្ទាប់មក សម្តេចតេជោនាយករដ្ឋមន្រ្តី និងលោកនាយករដ្ឋមន្រ្តីជប៉ុន បានអញ្ជើញធ្វើសន្និសីទកាសែតរួមគ្នា ស្តីពីលទ្ធផលនៃកិច្ចប្រជុំកំពូល។ ក្រោយពីបញ្ចប់សន្និសីទសារព័ត៌មានហើយ សម្តេចតេជោនាយករដ្ឋមន្រ្តី និង គណៈប្រតិភូជាន់ខ្ពស់នៃរាជរដ្ឋាភិបាលកម្ពុជា បានអញ្ជើញចូលរួមក្នុងពិធីលៀងសាយភោជន៍ដែលរៀបចំដោយ លោកនាយករដ្ឋមន្រ្តី Shinzo Abe។
ឆ្លៀតក្នុងឱកាសនៃពិធីលៀងសាយភោជន៍ដ៏ស្និទស្នាលនេះ លោកនាយករដ្ឋមន្រ្តីជប៉ុន Shinzo Abe បានរៀប ចំនំខួបកំណើតដ៏ភ្ញាក់ផ្អើលមួយជូនសម្តេចតេជោ ហ៊ុន សែន ប្រកបដោយបរិយាកាសរីករាយបំផុត៕

 

ស្ដ្រីចំនួនជិត៤សែនាក់នៅតំបន់អាស៊ាននឹងទទួលអត្ថប្រយោជន៍ពីគម្រោងសេវាឥណទានរបស់សហរដ្ឋអាមេរិច

 

ភ្នំពេញ៖ស្រ្តីប្រមាណ ៣៨៥,០០០នាក់ពីកម្ពុជា វៀតណាម និង ហ្វីលីពីន ត្រូវបានគេរំពឹងថានឹងទទួលបានផលប្រយោជន៍ពីគម្រោងសញ្ញាប័ណ្ណជីវភាពសម្រាប់ស្ត្រីមានតម្លៃ ៨លានដុល្លារ ដែលផ្តល់ដោយទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID)។នេះបើតាមសេចក្ដីប្រកាសរបស់ស្ថានទូតអាមេរិចនៅថ្ងៃនេះ។​

ប្រភពបានបន្ដថា៖សញ្ញាប័ណ្ណនេះនឹងផ្តល់ឲ្យស្ត្រីអាចទទួលបាននូវសេវាឥណទាន ការតភ្ជាប់ទៅកាន់ទីផ្សារ ព្រមទាំងទំនិញ និងសេវាមួយចំនួនទៀតដែលមានតម្លៃសមរម្យ ដើម្បីជួយឲ្យក្រុមហ៊ុនរបស់ពួកគេរីកលូតលាស់។ គម្រោង​សញ្ញាប័ណ្ណជីវភាពសម្រាប់ស្ត្រីនឹងផ្តល់មូលធនទៅដល់វិទ្យាស្ថានមីក្រូហិរញ្ញវត្ថុ និងសហគ្រាសសង្គមមួយក្រុម ដែលនឹងជួយប្រែក្លាយស្ត្រីដែលមានប្រាក់ចំណូលទាបពីជីវភាពសមល្មមគ្រាន់តែចិញ្ចឹមជីវិតទៅកាន់ជីវភាពប្រកបដោយចីរភាព ហើយនឹងជួយស្ត្រីទាំងនោះឲ្យធន់ទៅនឹងភាពតានតឹងផ្នែកសេដ្ឋកិច្ច និងសង្គមកិច្ច។

បន្ថែមលើភាពជោគជ័យលើមុខជំនួញដែលគ្រប់គ្រងដោយស្ត្រី មានផលប្រយោជន៍រយៈពេលវែងជាច្រើនទៀតដែលពួកគេនឹងទទួលបានដោយក្នុងនោះរួមមាន៖ ការកើនឡើងនូវការចូលរួមរបស់ស្ត្រីក្នុងកម្លាំងពលកម្ម ជីវភាពរស់នៅកាន់តែប្រសើរឡើង ព្រមទាំងមានឱកាសកាន់តែច្រើនសម្រាប់ស្ត្រី និងកុមារក្នុងការទទួលបាននូវឱកាសអប់រំ និងសុខាភិបាល។ 

លោក Todd Sorenson អនុប្រធានបេសកកម្មនៃទីភ្នាក់ងារអភិវឌ្ឍប្រចាំតំបន់អាស៊ីរបស់ទីភ្នាក់ងារ USAID ដែលមានទីតាំងនៅទីក្រុងបាងកកបានមានប្រសាសន៍ថា៖ “ទីភ្នាក់ងារ USAID មានសេចក្តីសោមនស្សរីករាយក្នុងការជួយគាំទ្រដល់គម្រោងសញ្ញាប័ណ្ណជីវាភាពសម្រាប់ស្រ្តីជាមួយកម្ចីដែលមានការធានា។”

សញ្ញាប័ណ្ណនេះផ្តល់ប្រយោជន៍ដល់ស្ត្រីដែលរស់នៅតាមបណ្តារដ្ឋក្នុងតំបន់អាស៊ាន និងត្រូវបានរៀបចំឡើងដោយក្រុមហ៊ុនមួយដែលមានមូលដ្ឋានក្នុងតំបន់អាស៊ាន។ អាស៊ាន គឺជាសហគមន៍ប្រជាជាតិអាស៊ី-អាគ្នេយ៍។
គម្រោងរយៈពេលបួនឆ្នាំ ដែលមានអាត្រាការប្រាក់ ៥.៦ភាគរយ ត្រូវបានរៀបចំដោយក្រុមហ៊ុន Impact Investment Exchange (IIX) ដែលមានមូលដ្ឋាននៅប្រទេសសិង្ហបុរី ត្រូវបានគេរំពឹងថានឹងចុះបញ្ជីរក្នុងទីផ្សារមូលប័ត្រសិង្ហបុរីក្នុងខែនេះ។ គម្រោងនេះនឹងក្លាយជាសញ្ញាប័ណ្ណនិរន្តរភាពសង្គមដំបូងគេដែលផ្តោតលើចំណូលសង្គម និងហិរញ្ញវត្ថុដែលនឹងត្រូវចុះបញ្ជីរលើទីផ្សារមូលប័ត្រធំមួយ។

ទីភ្នាក់ងារ USAID កំពុងផ្តល់ប្រាក់ធានាចំនួន ៥០ភាគរយនៃគោលការណ៍ទំហ៊ំប្រាក់កម្ចី ដើម្បីកាត់បន្ថយហនិភ័យ ទាក់ទាញអ្នកវិនិយោគ និងគាំទ្រដល់ការអភិវឌ្ឍ។ ដោយសង្កេតឃើញថាគម្រោងសញ្ញាប័ណ្ណជីវភាពសម្រាប់ស្ត្រីត្រូវបានគាំទ្រដោយស្ថាប័នសាធារណៈ ស្ថាប័នឯកជន និងអង្គការមនុស្សធម៌មួយចំនួនដូចជា៖ ធនាគារ DBS ធនាគារ ANZ មូលនិធិ Rockefeller អង្គការគំនិតផ្តួចផ្តើមសកលរបស់គ្លីនតុន និងក្រសួងការបរទេស និងពាណិជ្ជកម្មអូស្ត្រាលី លោក Durreen Shahnaz ស្ថាបនិកក្រុមហ៊ុន IIX បានមានប្រសាសន៍ថា៖ “គម្រោងនេះនាំយើងខិតកាន់តែជិតមួយជំហ៊ានថែមទៀតទៅកាន់ពេលវេលាមួយដែលទីផ្សារហិរញ្ញវត្ថុរបស់យើងគិតគូរអំពីផលប៉ះពាល់សង្គម និងបរិស្ថាន ដូចគ្នាទៅនឹងចំណូលហិរញ្ញវត្ថុ”។

តាមសេចក្ដីប្រកាសបានអោយដឹងថា៖៦០ភាគរយនៃមូលធនសម្រាប់សញ្ញាប័ណ្ណនេះត្រូវបានផ្តល់ដោយអ្នកវិនិយោគអាស៊ី ដែលភាគច្រើនជាអតិថិជនរបស់ធនាគារឯកជន។ ក្រុមហ៊ុន IIX កំពុងមានផែនការអភិវឌ្ឍសញ្ញាប័ណ្ណនិរន្តរភាពសង្គមបន្ថែមទៀតនាពេលអនាគត។
ចាប់តាំងពីឆ្នាំ ១៩៩៩ តាមរយៈអាជ្ញាធរឥណទានអភិវឌ្ឍ ទីភ្នាក់ងារ USAID បានរៀបចំឥណទានជាង ៣៥០លានដុល្លារតាមរយៈអ្នកធានាចំនួន ៦៣ ក្នុងប្រទេសអាស៊ីចំនួន ១៣។ អ្នកធានាកម្ចីរបស់ទីភ្នាក់ងារ USAID សម្រាប់គម្រោងសញ្ញាប័ណ្ណជីវភាពស្ត្រី គឺជាផ្នែកមួយនៃការប្តេជ្ញាចិត្តរបស់ខ្លួនក្នុងការអភិវឌ្ឍតំបន់អាស៊ាន។ សហរដ្ឋអាមេរិកចាប់ដៃគូជាមួយអាស៊ានដើម្បីគាំទ្រសមាហរណកម្មសេដ្ឋកិច្ច ពង្រីកកិច្ចសហប្រតិបត្តិការលំហរសមុទ្រ បណ្តុះបណ្តាលអ្នកដឹកនាំជំនាន់ក្រោយ លើកកម្ពស់កាលានុវត្តភាពសម្រាប់ស្ត្រី ព្រមទាំងដោះស្រាយបញ្ហាប្រឈមឆ្លងដែននានា៕

 

រាជរដ្ឋាភិបាលប្រារព្ធពិធីរំឭកគុណបុព្វបុរសខ្មែរដែលបានកសាងទុក​ប្រាសាទ​សំបូរ​ព្រៃ​គុក

ខេត្តកំពង់ធំ៖រាជរដ្ឋាភិបាលកម្ពុជា បានប្រារព្ធពិធីរំឭកគុណបុព្វបុរសខ្មែរ ដែលបានកសាងទុក​ប្រាសាទ​សំបូរ​​ព្រៃ​គុក នៅខេត្តកំពង់ធំ ទុកជាកេរដំណែលវប្បធម៌ដ៏ល្អឯកសម្រាប់មនុស្សជាជំនាន់ក្រោយ។

សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​​ ប្រធានកាកបាទក្រហមកម្ពុជា​ និងជាតំណាងដ៏ខ្ពង់ ខ្ពស់​សម្តេចតេជោ ហ៊ុន សែន នាយករដ្ឋមន្ត្រីកម្ពុជា ព្រមទាំងមន្ត្រីជាន់ខ្ពស់​ និង​​​ប្រជាពលរដ្ឋ​​ជាច្រើន​នាក់​ កាលពីថ្ងៃទី៦សីហា បានប្រារព្ធពិធី​ក្រុង​ពាលី​នៅ​យាយ​ព័ន្ធ ដើម្បីបួង​សួង​រំឭក​គុណ​​ដល់​បុព្វ​បុរស​​ខ្មែរ និង​អបអរសាទរ«តំបន់​ប្រាសាទ​សំបូរ​ព្រៃ​គុក​» ដែលត្រូវបានអង្គការយូណេស្កូ សម្រេច​ចុះ​បញ្ជី​​ជា​បេតិក​​​​ភណ្ឌ​​​​​ពិភពលោក។

 នៅព្រឹកថ្ងៃទី៧សីហានេះ សម្ដេចកិត្ដិព្រឹទ្ធបណ្ឌិត ព្រមទាំងគណៈប្រតិភូ មន្ត្រីរាជការ​គ្រប់លំដាប់​ថ្នាក់​ ​ បានអុជធូបនៅប្រាសាទជ្រៃ អាស្រមឥសី ប្រាសាទ​សំបូរ និង​ប្រាសាទតោ ដើម្បីរំឭក​​វិញ្ញាណនក្ខន្ត​​បុព្វបុរសខ្មែរនៅតំបន់ប្រាសាទ​សំបូរ​ព្រៃគុក ដែល​​​បាន​កសាង​​ប្រាង្គ​ប្រាសាទដ៏​ស្រស់​បំព្រង សម្រាប់​ទុកឲ្យកូនចៅជំនាន់ក្រោយ ក៏ដូចជាផ្នែកមួយនៃការ​បួង​​​សួង​​សុំសុខ​សន្តិភាព​​​ឲ្យនៅតែ​កើត​​មាន​​​​ដល់​កម្ពុជា ព្រមទាំងបញ្ចៀសនូវ​គ្រោះមហន្តរាយធម្មជាតិ​នានា។

នៅក្នុងពិធីនេះដែរ ក៏មានការគោះស្គរជ័យ ទូងស្គរជ័យ ព្រមទាំងមាន​ការ​សម្តែង​ផ្ទាំង​ទស្សនីយ​ភាពសិល្បៈ របាំប្រពៃណី ការសម្តែងក្បាច់គុណខ្មែរ ល្បុក្កតោ ល្បែងប្រជាប្រិយ និងការ​តាំង​ពិព័រណ៍ផលិតក្នុងស្រុករបស់ប្រជាពលរដ្ឋក្នុងភូមិទៀតផង។ យុវជនខ្មែរ និងភ្ញៀវបរទេស ដែលបានចូលរួមក្នុងពិធីនេះ បានសម្តែងមតិយល់ឃើញផ្សេងៗ គ្នា ជុំវិញសក្តានុពលទេសចរណ៍នៅតំបន់ប្រាសាទសំបូរព្រៃគុកនេះ។

យោងតាមឯកសាររបស់ក្រសួងវប្បធម៌ និងវិចិត្រសិល្បៈ បានឲ្យដឹងថា ប្រាសាទសំបូរព្រៃគុក ស្ថិតនៅក្នុងខេត្តកំពង់ធំ ត្រូវបានសង់ឡើងនៅអំឡុងស​វត្ស​​ទី៧ នៃ​គ្រឹស្ត​​សករាជ ហើយបាន​​ក្លាយ​ជា​មជ្ឈ​មណ្ឌលសាសនាដ៏សំខាន់ក្នុងសម័យមុនអង្គរ និងសម័យអង្គរ។

បច្ចុប្បន្ន សំណល់បុរាណដ្ឋានពីអតីតរាជធានី ដែលមានអាយុកាលជាង៥០០ឆ្នាំ និង​​ហ៊ុមព័ទ្ធ​​​ទៅដោយទេសភាព​​ព្រៃឈើប្រមាណ៣.០០០ហិកតានេះ បានបន្សល់កេរតំណែល​ដូចជា៖ ប្រាសទ​ឥដ្ឋ កសិណទឹក កំពែង សំណង់ធារាសាស្ត្រ សម្រាប់​​ការ​ប្រើ​​ប្រាស់ និងជំនឿ​​សាសនា។

ក្រុម​ប្រាសាទ​សំបូរ​ព្រៃគុក​ ​ដែលត្រូវ​បាន​សាង​សង់អំ​ពីឥដ្ឋតាន់ ​ថ្មបាយ​ក្រៀម ​និង​ថ្ម​ភក់​ ព្រម​ទាំង​​មាន​លម្អលើ​ជញ្ជាំង​ប្រាសាទ ​ ​កសាង​ឡើង​នៅរជ្ជកាល​ព្រះបាទ​ឥសាន​វរ្ម័នទី​១ ដោយមាន​ស្ថាបត្យ​កម្ម​នៃប្រាង្គប្រាសាទ​ មានរូបរាង​៣ប្រភេទដូចជា​៖​ រាងចតុកោណ​បួនជ្រុងស្មើ​ ចតុកោណ​បួន​ជ្រុងទ្រវែង និងអដ្ឋកោណប្រាំបីជ្រុងស្មើ ដោយតួប្រាង្គប្រាសាទមួយចំនួន មានឆ្លាក់រូបប្រាសាទនិម្មិត មានក្បូរក្បាច់រចនាលម្អលើជញ្ជាំងប្រាសាទ និងផ្នែកផ្សេងៗ សម្រាប់​បូជា​ចំពោះអាទិទេព​ហិណ្ឌូ​​និយម​។

មន្ត្រីទេសចរណ៍ខេត្តកំពង់ធំ រំពឹងថា ក្រោយពីមានពិធីនេះហើយ នឹងធ្វើឲ្យតំបន់ប្រាសាទ​សំបូរ​​​​​ព្រៃគុក កាន់តែមានប្រជាប្រិយភាពទាក់ទាញទេសចរជាតិ និងទេសចរបរទេស​ឲ្យទៅ​​ទស្សនា​កាន់តែច្រើន​ឡើងបន្ថែម​​ទៀត បន្ទាប់ពីហេដ្ឋារចនាសម្ព័ន្ធផ្លូវគមនាគមន៍​​កាន់តែត្រូវបានកែ​​លម្អ​ប្រសើរ​ឡើង៕ អត្ថបទ៖ សឿន សោម

 

ខេត្តសាន់ស៊ី នៃប្រទេសចិនប្រកាសបង្កើតខ្សែហោះហើរត្រង់ឆ្ពោះមកកាន់ប្រទេសកម្ពុជា

ភ្នំពេញ៖ខេត្តសាន់ស៊ីនៃប្រទេសចិនប្រកាសបង្កើតខ្សែហោះហើរត្រង់ឆ្ពោះមកកាន់ប្រទេស​​ កម្ពុជាដើម្បីឆ្លើយតបទៅនឹងតំរូវការរបស់ភ្ញៀវទេសចរចិនកាន់តែមានចំនួនកើនឡើង​មកលេង​នៅប្រទេសកម្ពុជា។រដ្ឋាភិបាលចិនបាន ឯកភាពជំរុញការតភ្ជាប់ជើងហោះហើរត្រង់ថ្មីមួយបន្ថែមទៀតពី​ក្រុង​​ស៊ីអាន ខេត្តសាន់ស៊ីមកកាន់កម្ពុជាដែលបានជួយគាំទ្រដល់គម្រោងវិនិ​យោគផលិតផល​ទេស​ចរណ៍ចិននៅកម្ពុជា។

ការឯកភាពគ្នាបង្កើតខ្សែហោះហើរត្រង់ពីចិនមកកាន់កម្ពុជានេះ បាន ធ្វើឡើងបន្ទាប់ពី​ឯឧ.ថោង ខុន រដ្ឋមន្រ្តីក្រសួងទេសចរណ៍បានបំពេញទស្សនកិច្ចផ្លូវការទៅ​កាន់ប្រទេសចិន​កាល​ពីចុងសប្តាហ៍នេះហើយបានជួបពិភាក្សាការងារជាមួយលោក Hu Heping អភិបាលខេត្ត​សាន់ស៊ី នៃសាធារណរដ្ឋប្រជាមានិតចិន ។
លោកអភិបាលខេត្តបានគាំទ្រគម្រោងការហោះហើរត្រង់ និងទៀងទាត់ពីខេត្តសាន់ស៊ីម​ក​កាន់​កម្ពុជានេះ ដែលបច្ចុប្បន្នទើបមានការហោះហើរជាប្រភេទ Charter flight ប៉ុណ្ណោះ។ ព្រមជាមួយនោះលោកអភិបាលខេត្តក៏បានស្នើឲ្យក្រសួងទេសចរណ៍កម្ពុជាជួយគាំទ្រ​គម្រោង​​​​វិនិយោគ​ផលិផល​ទេសចរណ៍នានា ពីខេត្តសាន់ស៊ីមកកម្ពុជាផងដែរ។
ឯឧ.ថោង ខុន រដ្ឋមន្រ្តីទេសចរណ៍ បានបង្ហាញពីការត្រៀមលក្ខណៈដ៏ល្អរបស់កម្ពុជា ក្នុងការ​ទទួល​ទេសចរចិន តាមនយោបាយ China-Ready ។ ឯឧ.អៈអាងថា គម្រោងហោះហើរត្រង់​នេះគឺជាសញ្ញាដ៏ល្អក្នុងការចាប់យកភ្ញៀវទេសចរមកកាន់កម្ពុជាឲ្យបានកាន់តែច្រើនឡើង​បន្ថែមទៀត ខណៈ​ដែល​ភ្ញៀវទេសចរចិននៅតែរក្សាតំណែងស្ថិតនៅលំដាប់លេខ១​ហើយ​ក៏ដោយ។
របាយកាណ៍បានបង្ហាញថា ការកើនឡើងចំនួនភ្ញៀវទេសចរចិននេះ ដោយសារកម្ពុជាបាន​ដាក់ចេញនូវយុទ្ធសាស្រ្តទាក់ទាញទេសចរចិនឆ្នាំ ២០១៦-២០២០ តាមរយៈសៀវភៅស ស្តីពី China Ready សម្រាប់ទេសចរណ៍កម្ពុជា។ សៀវភៅសនេះបានផ្តោតលើផែនការយុទ្ធ សាស្រ្ត​៤រួមមាន៖ទី១.ពង្រឹងសេវាកម្មពេលមកដល់សម្រាប់ភ្ញៀវទេសចរចិន, ទី២. ការបញ្រ្ជាប ការ​យល់ដឹងសាធារណៈអំពី China Ready ដល់គ្រប់ភាគីពាក់ព័ន្ធក្នុងវិស័យទេសចរណ៍, ទី៣ ការពង្រឹងឧស្សាហកម្មទេសចរណ៍កម្ពុជាសម្រាប់ភ្ញៀវទេសចរចិន និងទី៤ ការបង្កើតការទ្រ ទ្រង់។
លោកធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិចកម្ពុជា បានរីករាយចំពោះការបង្កើតខ្សែហោះហើរត្រង់នេះថានឹងធ្វើឲ្យភ្ញៀវទេសចរចិនកាន់តែមានភាពងាយស្រួលក្នុងការធ្វើដំណើរកំសាន្តនៅប្រទេសកម្ពុជា ដោយគ្មានភាពស្មុគស្មាញដូចពីមុន។
យ៉ាងណាក៏ដោយលោងចង់ឲ្យរាជរដ្ឋាភិបាលបង្កើនការហោះហើរត្រង់ជាមួយបណ្តាប្រទេស សំខាន់ៗនៅតំបន់អ៊ឺរ៉ុប និងអាមេរិកបន្ថែមទៀត ដើម្បីកុំអោយរំខានដល់អារម្មណ៍ភ្ញៀវទេសចរ ដែលចង់មកលេងស្រុកខ្មែរ ខណៈបច្ចុប្បន្នភ្ញៀវនៅតំបន់អ៊ឺរ៉ុបដែលចង់មកស្រុកខ្មែរត្រូវធ្វើ ដំណើរផ្លាស់ប្តូរជើងហោះហើរច្រើនដង។
សូមបញ្ជាក់ថា មកដល់បច្ចុប្បន្ននេះ មានក្រុមហ៊ុនអាកាស ចរណ៍ចំនួន១២ហើយ ដែលបាន​ធ្វើការហោះហើរត្រង់ភ្ជាប់ពី ចិនទៅកម្ពុជាឬ ពីកម្ពុជាទៅចិន ក្នុងនោះក្រុមហ៊ុនអាកាសចរណ៍​ចិន​​មានចំនួន៨ ក្រុមហ៊ុន និង៤ក្រុមហ៊ុនទៀត ជាអាកាសចរណ៍របស់ កម្ពុជាដោយបាន​ចុះបញ្ជី​នៅក្នុងស្រុក។ក្នុងរយៈ៦ ខែឆ្នាំ ២០១៧ កម្ពុជាទទួលបានភ្ញៀវទេសចរមានចំនួនជាង៥សែន២ម៉ឺននាក់ ក្នុង ចំណោមភ្ញៀវទេសចរសរុបជាង ២លាន២សែននាក់៕

 

លោកកឹមសុខា៖“បើមិនដឹងថានៅខ្វះខាតអ្វី ក៏គ្មានថ្ងៃធ្វើឲ្យប្រសើរឡើងវិញបានឡើយ”

ភ្នំពេញ៖លោកកឹមសុខាប្រធានគណបក្សសង្គ្រោះជាតិនៅថ្ងៃនេះថា៖“បើមិនដឹងថានៅខ្វះខាតអ្វី ក៏គ្មានថ្ងៃធ្វើឲ្យប្រសើរឡើងវិញបានឡើយ”។លោកបានថ្លែងទៅកាន់ ថ្នាក់ដឹកនាំ និងសកម្មជនគណបក្សនៅមូលដ្ឋាន ក្នុងស្រុកសំរោងទង និងក្រុងច្បារមន ខេត្តកំពង់ស្ពឺ។

តាមបណ្ដាញសង្គមហ្វេសប៊ុកលោកកឹមសុខបានលើកឡើងដែរថា៖”ដើម្បីដឹកនាំឲ្យបានជោគជ័យ ត្រូវមាន “ចក្ខុវិស័យ និងយុទ្ធសាស្រ្ដ ច្បាស់លាស់”។ ដើម្បីអនុវត្តនូវយុទ្ធសាស្រ្ដឲ្យបានល្អ ត្រូវមានផែនការសកម្មភាពជាក់ស្ដែង។ ដើម្បីកសាងផែនការសកម្មភាពជាក់ស្ដែង ហើយអនុវត្តឲ្យមានប្រសិទ្ធិភាព ត្រូវស្វែងយល់នូវ “ចំណុចខ្វះខាត ឬ កំហុសឆ្គង” របស់យើងកន្លងមក។ហេតុនេះហើយ ទោះបីជាត្រូវចំណាយពេល ហើយនឿយហត់យ៉ាងណាក៏ដោយ សម្រាប់ខ្ញុំ ភាពស្និទ្ធស្នាល ជាមួយថ្នាក់ដឹកនាំ និងសកម្មជនគណបក្សនៅមូលដ្ឋាន ដើម្បី “ស្វែងយល់ពីបញ្ហានានា” ជាការចាំបាច់ ព្រោះនេះជាមូលដ្ឋាន ដើម្បី “ធ្វើសេចក្ដីសម្រេចចិត្តក្នុងការដឹកនាំឲ្យប្រសើរឡើង” ៕

 

រដ្ឋមន្រ្តីក្រសួងអប់រំស្នើកុំឲ្យមានការដំឡើងថ្លៃផ្ទះសំណាក់សម្រាប់សិស្សដែលមកប្រឡងបាក់ឌុប

ភ្នំពេញ៖ សល់តែប៉ុន្មានថ្ងៃទៀតប៉ុណ្ណោះការប្រលងសញ្ញាបត្រមធ្យមសិក្សាទុតិយភូមិ ឬហៅថា ប្រឡងបាក់ឌុប នឹងចូល​មក​ដល់ហើយនៅពេលខាងមុខនេះ រដ្ឋមន្រ្តីក្រសួងអប់រំ យុវជន និងកីឡា បានស្នើសុំកុំឲ្យ​មានការដំឡើង​ថ្លៃជួល​សណ្ឋាគារ និងផ្ទះសំណាក់ ​ចំពោះ​សិស្ស​ដែល​មកប្រឡងសញ្ញាបត្រនេះ។

ក្នុងលិខិតដាក់ជូនអភិបាលរាជធានីខេត្តនៅទូទាំងប្រទេស ចុះថ្ងៃទី៣ ខែសីហា ឆ្នាំ២០១៧ ឯកឧត្តម ហង់ ជួនណារ៉ុន រដ្ឋមន្រ្តី​ក្រសួង​អប់រំ យុវជន និងកីឡា បានលើកឡើងថា សំណើនេះ គឺដើម្បីចូលរួមជួយសម្រាលបន្ទុកដល់បេក្ខជន ដែលមកពីគ្រួសារ​មានជីវភាពលំបាកនៅតាមជនបទ ហើយត្រូវឡើងមក​ប្រឡងនៅតាមទីប្រជុំជន ។

ឯកឧត្តមរដ្ឋមន្រ្តី បានបន្តថា សិស្សដែលជាបេក្ខជន ព្រមទាំងមាតាបិតា អ្នកអាណាព្យាបាល នឹងមកប្រមូលផ្តុំស្នាក់នៅតាមទីរួមខេត្ត រាជធានី ដែលជាទីតាំងរបស់មណ្ឌលប្រឡង ចាប់តាំងពីមុនដំណើរការប្រឡងមួយថ្ងៃ រហូតដល់ការប្រឡងត្រូវបានបញ្ចប់។

ឯកឧត្តម ក៏​សុំឲ្យអភិបាលរាជធានីខេត្តទូទាំងប្រទេស​ជួយ ជួយសម្រួលសណ្តាប់ធ្នាប់ ចរាចរណ៍​នៅជុំវិញមណ្ឌលប្រឡង, ការផ្ញើកង់ ម៉ូតូ និងស្ថិរភាពចរន្តអគ្គិសនីនៅតាមមណ្ឌលប្រឡងជាដើម។

ឆ្លើយតបនិងបញ្ហានេះ លោក ទិត្យ សុធា អ្នកចាត់ការទូទៅផ្ទះសំណាក់ឡាក់គី ក្នុងសង្កាត់បឹង ព្រលិត ខណ្ឌ៧មករា រាជធានីភ្នំពេញ បានបង្ហាញការសាទរចំពោះការស្នើរបស់រដ្ឋមន្រ្តីក្រសួងអប់រំនេះ។

លោក បន្តថា ជារៀងរាល់ឆ្នាំផ្ទះសំណាក់របស់លោក គឺមិនដែលដំឡើងថ្លៃជួលបន្ទប់​លើសពីការកំណត់ធម្មតានោះទេ សម្រាប់សិស្សដែលគាត់មកប្រឡងបាក់ឌុប បូករួមទាំងលោកគ្រូអ្នកគ្រូដែលពួកគាត់ឡើងមកធ្វើកំណែសិស្សសម្រាប់ការប្រឡងនេះផងដែរ។

គួរបញ្ជាក់ថា សម្រាប់ការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និង​បំពេ​ញ​វិជ្ជា ឆ្នាំ២០​១៧ ដែលនឹងចាប់ផ្តើមនៅថ្ងៃទី២១​ ខែសីហា ឆ្នាំ២០១៧ ខាងមុខ​នេះ គឺមានបេក្ខជនប្រឡងសរុបចំនួនជាង ១០៣ពាន់នាក់ ដែលមានមណ្ឌលប្រឡងចំនួន ១៧៨ មណ្ឌ​ល ចែកចេញជាជាង ៤០០០ បន្ទប់ នៅរាជធានី ខេត្ត ចំនួន ២៥។

ការប្រឡងនេះ នឹងត្រូវប្រកាស​លទ្ធផលនៅតាមមណ្ឌលប្រឡងនីមួយៗ នៅរសៀលថ្ងៃទី ១២ ខែ​កញ្ញា ឆ្នាំ២០១៧ សម្រាប់មណ្ឌល ប្រឡងនៅរាជធានីភ្នំពេញ និងខេត្តកណ្តាល និង​នៅថ្ងៃ​ទី​១៣ ខែ​កញ្ញា ឆ្នាំ២០១៧ សម្រាប់មណ្ឌលប្រឡងនៅខេត្តផៀងៗទៀត៕ (អត្ថបទ៖ ចាន់ សុធីវង្ស 

 

 

លោក ម៉ម សូណង់ដូប្រកាសលាលែងពីប្រធានគណបក្សសម្បុកឃ្មុំសង្គមប្រជាធិបតេយ្យ

ភ្នំពេញ៖ប្រធានគណបក្សសម្បុកឃ្មុំសង្គមប្រជាធិបតេយ្យ លោក ម៉ម សូណង់ដូ បានប្រកាសជាផ្លូវការលាលែងពីប្រធានគណបក្សដោយសារគណបក្សមិនបានទទួលលទ្ឋផលល្អពីការបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់កាលពីថ្ងៃតី៤មិថុនាកន្លងមកនិង មិនសមដូចបំណងដែលលោកចង់បាន ។
បើតាមលិខិតរបស់លោកម៉មសូណងដូរនិងជាប្រធាននាយកវិទ្យុសម្បុកឃ្មុំ FM105 ផ្ញើជូនសមាជិកគណៈកម្មាធិការអចិន្ត្រៃយ៍បក្សនិងដែលត្រូវបានគេផ្សព្វផ្សាយជាសាធារណៈនៅរសៀលថ្ងៃទី០៤ ខែសីហា ឆ្នាំ២០១៧នេះបានបញ្ជាក់ទៀត​ថា ដើម្បីឲ្យការលាលែងរបស់លោកចាប់ពីរសៀលថ្ងៃសុក្រនេះស្របតាមលក្ខន្តិកៈនិងបទបញ្ជាផ្ទៃក្នុងបក្ស លោកទុកពេល​១ខែឲ្យសមាជិកគណៈកម្មាធិការអចិន្ត្រៃយ៍រកដំណោះស្រាយតាមនីតិវិធីច្បាប់ ។

លោក ម៉ម សូណង់ដូប្រធានគណបក្សសម្បុកឃ្មុំសង្គមប្រជាធិបតេយ្យ  ធ្លាប់ដឹកនាំគណបក្សចូលប្រកួតប្រជែងការបោះឆ្នោសភាតែមិនបានទទួលអសន្នសូម្បីតែមួយកៅអីរកមិនបានផង៕

 

 

ព័ត៌មានផ្សាយ​ផ្ទាល់​ទាន់​ហេតុ​ការណ៍​(video)


ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ​ពេល​យប់​


ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

Angkor-10-7-2015

chipmong-lang-10-07-2015

Cambodia-10-07-2015-new

MC-col-10-7-2015

angkor-puro-10-07-2015

Pepsi-10-07-2015

22-10-2015-flora

santana-22-10-2015

8-4-2016-banner

GreenICT Technology Co., Ltd

gps-new

verte2