vigor-new

 

ហង្សមាស the voice-2-2-16 cambodianidol-2 Money drop killer gotodance Hm all

ហង្សមាស

the voice-2-2-16

cambodianidol-2

Money drop

killer

gotodance

Hm all

ads-tel-true

ព័ត៌មានជាតិ

លោកឧបនាយករដ្ឋមន្ដ្រីហោណាំហុង៖ឥណ្ឌាបានផ្ដល់ជំនួយនិងកម្ចីជិត៥០លានដុល្លារដល់កម្ពុជា”

ភ្នំពេញ៖លោកឧបនាយករដ្ឋមន្ដ្រីហោណាំហុងបានអះអាងថារដ្ឋាភិបាលឥណ្ឌាបានផ្ដល់ជំនួយនិងកម្ចីជិត៥០លានដុល្លារដល់កម្ពុជា”ក្នុងឆ្នាំកន្លងមក។

តាមបណ្ដាញសង្គមហ្វេសប៊ុកលោកឧបនាយករដ្ឋមន្ដ្រីបានសរសេរថា៖ព្រឹកថ្ងៃទី១៩ ខែឧសភា ខ្ញុំបានទទួលឯកអគ្គរដ្ឋទូតឥណ្ឌា មកសូមលាឯកឧត្តម ក្រោយពីបានបញ្ចប់បេសកកម្មការទូត របស់គាត់នៅកម្ពុជា។ក្នុងឱកាសនោះ ខ្ញុំ និងឯកឧត្តមឯកអគ្គរដ្ឋទូត បានលើក ថា រវាងកម្ពុជា និងឥណ្ឌា មានទំនាក់ទំនងវប្បធម៌ ដ៏ជ្រាលជ្រៅ និងយ៉ាងជិតស្និត។
លោកឯកអគ្គរដ្ឋទូត បានមានប្រសាសន៍ថា ក្នុងពេលបំពេញបេសកកម្មនៅ កម្ពុជា ឯកឧត្តមបាន កត់សំគាល់នូវការអភិវឌ្ឍន៍សេដ្ឋកិច្ចយ៉ាងខ្លាំងរបស់កម្ពុជា ហើយថារដ្ឋាភិបាលឥណ្ឌាតែងតែគាំទ្ររាជរដ្ឋាភិបាលកម្ពុជា។ ខ្ញុំក៏បាននិយាយថាឯកឧត្តមបានខិតខំធ្វើឲ្យទំនាក់ទំនង និងសហប្រតិបត្តិការរវាងប្រទេសយើងទាំងពីរឲ្យមានភាពរីកចំរើនខ្លាំងខ្លាថែមទៀត។ខ្ញុំ បានលើកសរសើរការខិតខំរបស់ឯកឧត្តមឯកអគ្គរដ្ឋទូត ឥណ្ឌា ដែលបានបំពេញបេសកម្មបានជោគជ័យធំធេងណាស់។
លោកឧបនាយករដ្ឋមន្ត្រី តាងនាមអោយរាជរដ្ឋាភិបាលកម្ពុជា ខ្ញុំបានថ្លែងអំណរគុណរដ្ឋាភិបាលឥណ្ឌា ដែលបានគាំទ្ររាជរដ្ឋាភិបាលកម្ពុជាព្រមទាំង៖ផ្តល់ជំនួយ
1.សម្រាប់សាលាក្តីខ្មែរក្រហមនៅឆ្នាំ២០១៦ចំនួន ៥០.០០០ម៉ឺនដុល្លារអាមេរិក
2. សម្រាប់ជួសជុលប្រាសាទតាព្រហ្មដែលមានទឹកប្រាក់ ប្រហាក់ប្រហែល ៤,៥លានដុល្លារអាមេរិក។
3. បានបណ្តុះបណ្តាលនិស្សិតកម្ពុជាចំនួន ១២៩នាក់
4. ឆ្កែហិតមីនចំនួន ១៥ក្បាល
5. ផ្តល់អណ្តូងស្នប់ចំនួន ១៥០០ ចាប់ពីខែមេសា ឆ្នាំ២០១៧។
ព្រមទាំងកម្ចីសម្រាប់គម្រោងសាងសង់អភិវឌ្ឍន៍ធនធានទឹកស្ទឹងស្វាហាប់ ដែលមានទឹកប្រាក់ជិត៣៧លានដុល្លារអាមេរិក។
កម្ពុជាបានប្រទេសទី១ដែលបានដឹកដៃប្រទេសឥណ្ឌាមកធ្វើជាដៃគូរអាស៊ានហើយកម្ពុជាជាប្រទេសសម្របសម្រួល៕

 

រន្ទះបាញ់ចំខ្សែបណ្តាញអគ្គិសនីបានបណ្ដាលដាច់ភ្លើងនៅខណ្ឌភាគខាងលិចភ្នំពេញ

ភ្នំពេញ៖យោងតាមការផ្សាយរបស់អគ្គិសនីកម្ពុជាបានអោយដឹងថា៖មានករណីដាច់ចរន្តអគ្គិសនីនៅអនុស្ថានីយទី5(GS5-F9) មូលហេតុ បណ្តាលមកពីមានរន្ទះបាញ់ចំខ្សែបណ្តាញតង់ស្យុងមធ្យម(MV) ដែលមានទីតាំងស្ថិតនៅតំបន់មួយចំនួនដូចជា៖ (1)ភូមិត្រពាំងជ្រៃ ភូមិក្បាលដំរី ភូមិព្រៃសាលា សង្កាត់កាកាប (2)ភូមិព្រៃទា ភូមិជម្ពូវ័ន ភូមិព្រៃជីសាក់ ភូមិព្រៃព្រីងខាងជើង ភូមិកន្ទោក សង្កាត់ចោមចៅ (3)ភូមិចាក់ជ្រូក សង្កាត់សំរោងក្រោម (4)ភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
ក្រុមការងារបច្ចេកទេសបានធ្វើការជួសជុល និងភ្ជាប់ចរន្តជូនអតិថិជនឲ្យមានចរន្តអគ្គិសនីប្រើប្រាស់ឡើងវិញទាំងស្រុងនៅវេលាម៉ោង 17:03នាទីល្ងាច។អគ្គិសនីបានសូមទោសពលរដ្ឋនៅក្នុងខណ្ឌនោះ៕

 

គណបក្សនយោបាយទាំង១២បង្ហាញគោលនបាយដណ្តើមកៅអីក្រុមប្រឹក្សាឃុំសង្កាត់អាណត្តិទី៤

ភ្នំពេញ៖ គណបក្សនយោបាយទាំង១២ បានបង្ហាញគោលនបាយរបស់ខ្លួនក្នុងអំឡុងពេលឃោសនាបោះឆ្នោត ដើម្បីទាញយកសន្លឹកឆ្នោតពីប្រជាពលរដ្ឋក្នុងអាណត្តិបោះឆ្នោតជ្រើសរើសក្រុមប្រឹក្សាឃុំសង្កាត់ ដែលនឹងប្រព្រឹត្តទៅនាថ្ងៃទី៤ ខែមិថុនាខាងមុខនេះ។
ចាប់ពីថ្ងៃទី២០ឩសភាមកគណបក្សនយោបាយទាំង១២ បានចេញឃោសនាបង្ហាញនូវគោលនយោបាយរបស់ខ្លួនរៀងៗខ្លួន។ គណបក្សប្រជាជនកម្ពុជា បានបង្ហាញគោលនយោបាយដែលផ្តល់ឲ្យឃុំ-សង្កាត់នូវធនធានហិរញ្ញវត្ថុយ៉ាងតិច២,៨ភាគរយ នៃចំណូលចរន្តថវិកាជាតិប្រចាំឆ្នាំ គាំទ្រការបង្កើនផលិតកម្មនិងរកទីផ្សារលក់កសិផល ដោយតម្លៃសមរម្យ ការបន្ថយអត្រាការប្រាក់មីក្រូហិរញ្ញវត្ថុក្នុងកម្រិតសមរម្យ។
ធ្វើការបែងចែកដីសម្បទានសម្រាប់លំនៅដ្ឋាននិងបង្កបង្កើនផលជូនប្រជាពលរដ្ឋអត់មានដីឬខ្វះដី ផ្តល់សេវាពិនិត្យ និងព្យាបាលជំងឺដោយមិនគិតថ្លៃនៅតាមមណ្ឌលសុខភាព នៅតាមឃុំ-សង្កាត់ត្រូវមានអនុវិទ្យាល័យមួយយ៉ាងតិច កែលម្អផ្លូវលំជនបទពីផ្លូវដីទៅជាផ្លូវចាក់កៅស៊ូ ឬផ្លូវបេតុងហើយគោលនយោបាយចុងក្រោយគឺ ប្រគល់ផ្សារនៅលើទីតាំងរដ្ឋឲ្យប្រជាពលរដ្ឋកាន់កាប់ ប្រើប្រាស់ និងអាស្រ័យផល តកូនតចៅគ្មានពេលកំណត់។
ចំណែក គណបក្សសង្គ្រោះជាតិ បានដាក់ចេញនូវគោលនយោបាយ ពង្រឹងសិទ្ធិអំណាចប្រជាពលរដ្ឋ ចូលរួមធ្វើការសម្រេចនានាក្នុងឃុំ-សង្កាត់ លើកកម្ពស់ជីវភាពប្រជាពលរដ្ឋនិងអភិវឌ្ឍន៍ដោយការពារកម្មសិទ្ធិដីធ្លីស្របច្បាប់របស់ប្រជាពលរដ្ឋនិងមិនចុះហត្ថលេខាលើការវិនិយោគ ឬសម្បទានដែលប៉ះពាល់ដល់ផលប្រយោជន៍ជាតិនិងពលរដ្ឋ។ ពង្រឹងប្រសិទ្ធភាព និងលើកកម្ពស់ការងារនគរបាល ដើម្បីឃុំ-សង្កាត់ ប្រកបដោយសុវត្ថិភាព គ្មានគ្រឿងញៀន និងគ្មានអំពើហិង្សា ធ្វើវិមជ្ឈការអំណាចប្រគល់សិទ្ធិអំណាច។ ការអភិវឌ្ឍឃុំ-សង្កាត់ ក្នុងថវិកាយ៉ាងតិច៥០ម៉ឺនដុល្លារ ក្នុង១ឆ្នាំ ស្មើនឹងប្រមាណ២០ភាគរយ នៃថវិកាជាតិ។
ដោយឡែក គណបក្ស ហ៊្វុន ស៊ិន ប៉ិច របស់សម្តេចក្រុមព្រះ នរោត្តម រណឫទ្ធិ បានសន្យាថា ខិតខំយកចិត្តទុកដាក់ពីសុខុមាលភាពជូនប្រជាពលរដ្ឋ លើកកម្ពស់ធនធានមនុស្សតាមការសិក្សាអប់រំ ទុបស្កាត់ការរំលោភយកដីធ្លីនិងផ្ទះសម្បែងពីប្រជាពលរដ្ឋ ការពារធនធានធម្មជាតិមិនឲ្យបាត់បង និងការយកចិត្តទុកដាក់ពីសន្តិសុខ សណ្តាប់ធ្នាប់សាធារណៈ។
ជាមួយគ្នានេះ គណបក្សយុវជនកម្ពុជា ដែលទើបបង្កើតថ្មី បានដាក់ចេញគោលនយោបាយចំនួន៥ ដើម្បីសង្រ្គោះម្ចាស់ឆ្នោតឲ្យរួចផុតពីទុក្ខលំបាកក្នុងជីវភាពប្រចាំថ្ងៃ តាមរយៈបង្កើតមុខរបរជូនពលរដ្ឋនៅក្នុងតំបន់ផ្ទាល់ បង្កើតទីផ្សារកសិកម្មក្នុងមូលដ្ឋានឃុំ លុបបំបាត់ការយកសេវាសាធារណៈគ្រប់ប្រភេទពីប្រជាពលរដ្ឋ បង្កើតសាលារៀនបច្ចេកទេសក្នុងមូលដ្ឋានឃុំដើម្បីផ្តល់ឱកាសដល់យុវជនក្រីក្របានសិក្សាដោយមិនបង់ថ្លៃ និងការលុបបំបាត់ការចរាចរគ្រឿងញៀនគ្រប់ប្រភេទ។
ក្រឡេកមើល គណបក្សអំណាចខ្មែរវិញ បានផ្តល់អំណាចដល់មេឃុំ-ចៅសង្កាត់ ជារដ្ឋបាលមូលដ្ឋានជួយធ្វើប្លង់គ្រប់គ្រងដីធ្លីនិងផ្ទះសម្បែងជូនប្រជាពលរដ្ឋស្របច្បាប់ដោយមិនគិតនិន្នាការគណបក្សនយោបាយ ខិតខំការពារតម្លៃកសិផលតាមរយៈការបង្កើតសភាកសិករឃុំ-សង្កាត់ និងការពារសុខ សុវត្ថិភាពជូនពលរដ្ឋនៅមូលដ្ឋាន។
រីឯ លោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យវិញ បានប្តេជ្ញាជាសំខាន់លើជីវភាព និងសេចក្តីថ្លៃថ្នូររបស់ប្រជាពលរដ្ឋនៅក្នុងមូលដ្ឋាន ដោយក្នុងនោះ គឺបោសសំអាតអំពើពុករលួយ គ្រឿងញៀន ល្បែងស៊ីសង ព្រមទាំងបម្រើសេវាសាធារណៈដោយគោរពតាមច្បាប់កំណត់ ការពារដីធ្លីលំនៅដ្ឋានប្រជាពលរដ្ឋ ទប់ស្កាត់បទល្មើសនេសាទខុសច្បាប់ អភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ និងប្រព័ន្ធធារាសាស្ត្រ បង្កើតការងារ រក្សាសន្តិសុខ បរិស្ថាន អនាម័យ ការអប់រំ មានពេទ្យព្យាបាលដោយគុណភាព និងក្រមសីលធម៌។
ទន្ទឹមនេះគណបក្សសាធារណរដ្ឋប្រជាធិបតេយ្យ គឺខិតខំបញ្ឈប់ពលកម្មកុមារបម្រើការតាមផ្ទះគ្រប់រូបភាព អនុវត្តលទ្ធិប្រជាធិបតេយ្យសេរីពិតប្រាកដ ដោះស្រាយបាតុភាពអវិជ្ជមានក្នុងឃុំ-សង្កាត់ បង្រៀនពលរដ្ឋគ្រប់ជាន់ថ្នាក់ឲ្យចេះពីច្បាប់ បង្កើតផែនការនៅឃុំ-សង្កាត់ ដើម្បីទប់ស្កាត់នូវគ្រោះធម្មជាតិ និងស្វែងរកមូលនិធិសម្រាប់ទុកដោះស្រាយបញ្ហាដែលកើតឡើង។
សម្រាប់គណបក្សសញ្ជាតិកម្ពុជាវិញ គឺប្រកាន់នូវគោលការណ៍សាមគ្គីធម៌ ធ្វើបុណ្យ រក្សាសីល និងបណ្តុះ នូវគ្រាប់ពូជព្រះនិព្វាន។ រក្សាធនធានធម្មជាតិ ដោះស្រាយបញ្ហាដីធ្លីជូនប្រជាពលរដ្ឋ ពន្លឿនការចុះបញ្ជី និងធ្វើប្លង់កម្មសិទ្ធិដីធ្លីស្របច្បាប់ជូនប្រជាពលរដ្ឋ។
ចំពោះគណបក្សសម្ព័ន្ធដើម្បីប្រជាធិបតេយ្យ គឺយកប្រជាពលរដ្ឋជាមូលដ្ឋានគ្រឹះសម្រាប់ការអប់រំសីលធម៌ផ្ទាល់ខ្លួន បម្រើប្រយោជន៍ពលរដ្ឋដោយមិនគិតប្រយោជន៍បក្ស ផ្លាស់ប្តូរគំនិត និងសកម្មភាពដែលអសកម្មនិងអសីលធម៌។ ពន្យល់ប្រជាពលរដ្ឋឲ្យយល់អំពីសង្គមប្រជាធិបតេយ្យ របៀបបង្កើតសង្គមប្រជាធិបតេយ្យ អំពីសិទ្ធិរបស់គាត់ក្នុងនាមជាម្ចាស់ប្រទេស ករណីកិច្ចក្នុងភាពជាម្ចាស់ក្នុងការចូលរួមសាងប្រទេសនិងអំណាចដែលខ្លួនត្រូវមានដើម្បីអនុវត្តសិទ្ធិ។
ចំណែកឯ គណបក្សខ្មែររួបរួមជាតិ របស់លោក ញ៉ឹក ប៊ុនឆៃ សន្យាកសាងនូវសុខដុមរមនីយ សន្តិសុខ សុវត្ថិភាព វឌ្ឍនភាព តម្លាភាព គ្មានការរើសអើង បក្ខពួក គ្រួសារនិយម ពុករលួយ ដើម្បីផលប្រយោជន៍ប្រជាពលរដ្ឋក្នុងមូលដ្ឋាន។
ទន្ទឹមនេះ គណបក្សជនជាតិដើមប្រជាធិបតេយ្យកម្ពុជា បានប្តេជ្ញាធ្វើការកែប្រែការអភិវឌ្ឍនៅមូលដ្ឋានឲ្យមានតម្លាភាព យុត្តិធម៌ សមធម៌ និងប្រកបដោយនិរន្តរភាព ព្រមទាំងយកប្រជាពលរដ្ឋជាធំ ពិសេសដោះស្រាយបញ្ហាជាក់ស្តែងនៅមូលដ្ឋាន អភិវឌ្ឍន៍ឃុំសង្កាត់ដែលនៅជាប់តាមព្រំដែន ការពារធនធានធម្មជាតិ មិនអនុញ្ញាតឲ្យបំផ្លាញបន្តពីជនខិលខូច ព្រមទាំងអនុវត្តច្បាប់ស្មើភាពគ្នា ថែរក្សាអត្តសញ្ញាណជនជាតិដើមមិនឲ្យបាត់បង់ បញ្ឈប់ការរើសអើងអ្នកនយោបាយគ្រប់រូបភាព។
ដោយឡែក គណបក្សប្រជាធិបតេយ្យមូលដ្ឋាន មានកម្មវិធីនយោបាយសម្រាប់ឃុំ-សង្កាត់ដូចជា៖ ការអភិវឌ្ឍនៅក្នុងភូមិឃុំ ផ្លូវល្អ មានទឹកស្អាត និងភ្លើងអគ្គិសនីប្រើប្រាស់ ការដោះស្រាយទំនាស់ជូនប្រជាពលរដ្ឋប្រកបដោយយុត្តិធម៌ ផ្តល់សេវាផ្នែកសុខាភិបាល សង្គមកិច្ច និងអប់រំល្អជូនពលរដ្ឋ ពិសេសកសិករ ទទួលបានទឹក ដើមទុន ទីផ្សារ និងបច្ចេកទេសសម្រាប់វិស័យកសិកម្ម។
យោងតាមគ.ជ.ប បានឲ្យដឹងថា ការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ នឹងបញ្ចប់ទៅនៅថ្ងៃទី២ ខែមិថុនាខាងមុខនេះ៕

កម្ពុជាទទួលបានគម្រោងវិនិយោគជាង១ពាន់និងទឹកប្រាក់៤ពាន់លានដុល្លារអាមេរិចក្នុង៤ខែដើមឆ្នាំ

ភ្នំពេញ៖ក្នុងរយៈពេល ០៤ខែ ដើមឆ្នាំ២០១៧ នេះ រដ្ឋាភិបាលកម្ពុជាបានផ្ដល់លិខិតអនុញ្ញាតសាងសង់ចំនួន ១០២០ គម្រោង មានផ្ទៃក្រឡាសំណង់សរុបចំនួន ៥.៦០៥.០០៧ ម៉ែត្រការ៉េ មានតម្លៃប៉ាន់ស្មាន ៤.០២២.៦៥៨.០៤៣ ដុល្លារសហរដ្ឋអាមេរិក បើប្រៀបធៀបទុនវិនិយោគក្នុងរយៈពេលដូចគ្នានឹងឆ្នាំ ២០១៦ ចំនួន ៧១២ គម្រោង មានផ្ទៃក្រឡាសំណង់សរុបចំនួន ៥.៩៣១.៤៨៩ ម៉ែត្រការ៉េ មានតម្លៃប៉ាន់ស្មាន ២.៨០៥.៧៨០.២១៧ ដុល្លារសហរដ្ឋអាមេរិក គឺមានការកើនឡើងប្រមាណ ៤៣.៣៧%។ ទិន្នន័យបុរីលំនៅឋាន និងអគារខ្ពស់ៗ។នេះបើតាមសេចក្ដីប្រកាសរបស់ក្រសួងដែនដីនិងសំណង់បានប្រកាសនៅថ្ងៃនេះ។

ប្រភពបានបន្ដថា៖”គិតចាប់តាំងពីឆ្នាំ ២០០៣ ដល់ ០៤ខែ ឆ្នាំ២០១៧ មានទីក្រុងរណបបុរីលំនៅឋាន និងលំនៅឋានមានលក្ខណៈបុរីសរុបចំនួន (១៣៨/២០១៦) និង ១៤៧ទីតាំង។ គិតចាប់តាំងពីឆ្នាំ២០០៥ ដល់ ០៤ខែ ឆ្នាំ២០១៧ នៅមានអគារខ្ពស់ចាប់ពី០៥ជាន់ឡើងទៅមានចំនួនសរុប (៨៧៦/២០១៦) និង ៩០១អគារ។
គិតចាប់ពីឆ្នាំ ២០០០ ដល់ ០៤ខែ ឆ្នាំ២០១៧ ការបោះទុនវិនិយោគរបស់វិស័យឯកជនមកពីបរទេសមានចំនួន ១៨ប្រទេស មានចំនួន ៣០៤គម្រោង មានផ្ទៃក្រឡាសំណង់សរុប ១៣.២៣៨.១៧០ម៉ែត្រការ៉េ មានតម្លៃប៉ានស្មានទុនវិនិយោគសាងសង់ ៤.៥៣៩.៦០០.៩៦១ដុល្លារសហរដ្ឋអាមេរិក។

អំពីការចុះបញ្ជីក្រុមហ៊ុនប្រកបអាជីវកម្មសិក្សាគម្រោងប្លង់ និងសាងសង់គិតមកទល់រយៈពេល ០៤ខែ ឆ្នាំ២០១៧ ក្រសួងបានចុះបញ្ជីក្រុមហ៊ុនអាជីវកម្មសិក្សាគម្រោងប្លង់ និងសាងសង់ នៅមានសុពលភាពចំនួន ១០១១ក្រុមហ៊ុន ក្នុងនោះ៖ (១)-ក្រុមហ៊ុនសិក្សាគម្រោងប្លង់មានចំនួន ៤១ក្រុមហ៊ុន និង (២)- ក្រុមហ៊ុនសាងសង់ មានចំនួន ៩៧០ក្រុមហ៊ុន។រូបវន្តបុគ្គលសិក្សាគម្រោងបុ្លង់នៅមានសុពលភាពចំនួន ១១៥រូប ក្នុងនោះស្ថាបត្យករ ៨០រូប វិស្វករចំនួន ៣៥រូប។ បានចុះបញ្ជីស្ថាបត្យករក្នុងគណៈស្ថាបត្យករកម្ពុជា ចំនួន ៥៨៨រូប ក្នុងនោះស្ថាបត្យករបរទេស ០៨រូប ជនជាតិជប៉ុនចំនួន ០២រូប នៅទូទាំងប្រទេសមានស្ថាបត្យករសរុបប្រមាណចំនួន ២៥០០នាក់៕

 

រដ្ឋាភិបាលអាមេរិចនឹងអញ្ជើញប្រតិភូអាជ្ញាធរមីនកម្ពុជាទស្សនកិច្ចនៅអាមេរិច

ភ្នំពេញ៖រដ្ឋាភិបាលអាមេរិចនឹងអញ្ជើញប្រតិភូអាជ្ញាធរមីនកម្ពុជាទស្សនកិច្ចនៅអាមេរិចនៅខែមិថុនាខាងមុខនេះដើម្បីពង្រឹងទំនាក់ទំនងនិងផ្ដល់បទពិសោធន៍ក្នុងការដោះគ្រាប់មីននិងមីនចង្កោម។នេះបើតាមប្រភពពីស្ថានទូតអាមេរិចបានអោយដឹង។

ប្រភពបានបន្ដថា៖រដ្ឋាភិបាលអាមេរិចតាំងពីឆ្នាំ១៩៩៣មករហូតមកដល់ឆ្នាំ២០១៧នេះបានផ្ដល់ជំនួយ១២០លានដុល្លារអាមេរិចនិងចាត់ថាជាប្រទេសទី១បានផ្ដល់ជំនួយច្រើនជាងគេដល់កម្ពុជា។ពលរដ្ឋកម្ពុជាជាង៤០០០នាក់ក្នុងឆ្នាំ១៩៩៣បានរបួសនិងស្លាប់ដោយសារគ្រាប់មីននិងថយចុះរហូតដល់៨៣នាក់ក្នុងឆ្នាំ២០១៦កន្លងមក។កម្ពុជាមានផែនអោយកំរិតរងរបូសនិងស្លាប់មកត្រឹមសូន្យ២០២៥៕

 

 

គោក្របីស្លាប់ជិត១០០ក្បាលនៅឃុំសេកុងស្រុកសៀមប៉ាងពលរដ្ឋព្រួយបារម្ភ

ខេត្តស្ទឹងត្រែង៖ប្រជាពលរដ្ឋក្នុង ឃុំសេកុង ស្រុកសៀមប៉ាងខេត្តស្ទឹងត្រែងព្រួយបារម្ភពីជម្ងឺឆ្លងគោក្របីដូចជាជម្ងឺ ហើមពោះ -ឈីករ-ហៀរទឹកមាត់-ហៀរសំបោ-ឈឺជើងដើរមិនរួច -ខ្លះស្លាប់ជាបណ្តើរៗមានប្រមាណជាង១០០ក្បាល ។វាបានធ្វើឱ្យកសិករបាត់បង់កម្លាំងអូសទាញ សម្រាប់ធ្វើការបង្កបង្កើនផល នៅរដូវវស្សានេះ។

ថ្មីៗនេះលោកឡាត់ថាយតំណាងប្រជាពលរដ្ឋក្នុងភូមិចន្ទុធំ ឃុំសេកុងស្រុកសៀមប៉ាង បានប្រាប់ឱ្យដឹងថា៖អ្នកចិញ្ចឹមគោក្របី ត្រូវខាតបង់ច្រើន ពីព្រោះពេលឈឺសត្វស្លាប់មិនហ៊ានយកទៅលក់ឬធ្វើជាអាហានោះទេ។ហើយកសិករខ្លះទៀតមានគោក្របីសំរាប់តែកំលាំងអូសទាញតែប៉ុណ្ណោះពេលស្លាប់ទៅទៀតត្រូវបាត់បង់កំលាំងបង្កបង្កើនផលតែម្តង។
លោកថា៖ជំងឺគោក្របីនេះចាប់កើតតាំងពីចុងខែមេសាមក ហើយពួកគាត់ចេះតែទិញថ្នាំមកចាក់ តែគ្មានប្រសិទ្ធភាព ហើយប្រជាពលរដ្ឋខ្លះមានគោក្របីស្លាប់រហូតដល់៥ទៅ៦ក្បាលក្នុងមួយគ្រួសារ ដោយសារជម្ងឺហើមពោះ-និងហើមករ-ដែលពួកគាត់ខ្វះថ្នាំនិងគ្មានបច្ចេកទេស ព្យាបាលនោះ។
លោកចាន់ សុខា មេឃុំសេកុងបានអះអាងថា៖៖គោក្របីដែលមានជម្ងឺនេះគឺបងប្អូប្រជាពលរដ្ឋយើងខ្វះការថែរក្សា ដោយភាគច្រើនពួកគាត់ចិញ្ចឹមលេងដើរពាសវាលពាសកាលតាំងពីរដូវប្រាំងមក ហើយពេលឈឺ ស្លាប់ក្នុងព្រៃ ខ្លះទៀត រក ឃើញ-ហើម ក-ហើមពោះ សល់ពីស្លាប់ កៀងពីក្នុងព្រៃ ចូលមកក្នុងភូមិវិញ ដើម្បីទិញថ្នាំមកចាក់ខ្លួនឯង ខ្លះជាបាត់ទៅវិញនិងខ្លះទៀតស្លាប់ក៏មានដែរ។
លោកថា៖ រដូវបង្កបង្កើនផលចូលមកដល់បើសិនគោក្របីមានជម្ងឺឈឺថ្កាត់ច្រើន វានិងធ្វើឱ្យប្រជាពលរដ្ឋបាត់ បង់នៅកម្លាំងអូសទាញ ពីព្រោះនៅក្នុងឃុំសេកុងនេះ ភាគច្រើនកសិករយើងមិនសូវមានជីវភាពធូរធារទិញគោយន្តមកប្រើប្រាស់ទេ។
លោកមេឃុំបន្តថា៖ពីមួយឆ្នាំទៅមួយឆ្នាំគោក្របីក្នុងភូមិតែងតែកើតជម្ងឺឈឺស្លាប់ជាហូរហែរហើយកាលពី២០១៦ក៏មានគោក្របីឈឺស្លាប់រាប់រយក្បាលម្តងរួចមកហើយ ដោយគ្រោះរាំងស្ងួតក្តៅខ្វះទឹក ចំណែកឆ្នាំនេះកើតជម្ងឺឈឺស្លាប់បន្តបន្ទាប់ទៀត ធ្វើឲ្យប្រជាពលរដ្ឋមានការព្រួយបារម្ភពីព្រោះរដូវបង្កបង្កើនផលឈានចូលមកដល់បែជាគោក្របីស្លាប់។
លោកម៉ៃ រតនា មន្ត្រីបសុព្យាបាលសត្វខេត្តបានបញ្ជាក់ថា៖ករណីជម្ងឺឆ្លងសត្វនេះលោកបានសហការជាមួយពេទ្យសត្វប្រចាំការនៅស្រុក ចុះចាក់ថ្នាំព្យាបាលគោក្របី ចំនួន៣១ក្បាលនិងចាក់ថ្នាំការពារបាន៤១៥ក្បាលជូនប្រជាពលរដ្ឋរួចមកហើយ ។
លោកបានសំណូមពរ ដល់ប្រជាពលរដ្ឋដែលចិញ្ចឹមគោក្របី បញ្ឈប់ការលែងចោលពាសវាលពាសកាល ត្រូវមើលថែវាឲ្យបានល្អ ពេលមានជម្ងឺឈឺថ្កាត់យើងអាចជួយ ព្យាបាលវាទាន់ពេលវេលា។
សូមបញ្ជាក់ថា៖ជម្ងឺឆ្លងគោក្របីនេះកើតឡើងនៅ(ភូមិចន្ទុធំ -ភូមិស្រម៉ក្រៅ-ភូមិថ្មទន្លេ-និងភូមិកាងញ៉ៃ-ក្នុងឃុំសេកុង)និងភូមិផ្សេងៗក្នុងឃុំមួយចំនួនទៀតក្នុងស្រុកសៀមប៉ាងខេត្តស្ទឹងត្រែងនេះក៍កើតមានដែរហើយបើគិតមកដល់ចុងខែឧសភាឆ្នាំ២០១៧នេះមានគោក្របីស្លាប់និងបាត់ជិត១០០ក្បាលហើយ៕

 

រដ្ឋមន្ត្រីអះអាងថា៖”កម្ពុជាមានផ្ទៃដីតំបន់ការពារធម្មជាតិបច្ចុប្បន្នប្រមាណ ៧៥លានហិកតាស្មើនឹង៤១ភាគរយនៃផ្ទៃប្រទេស”

ភ្នំពេញ៖លោក សាយ សំអាល់ រដ្ឋមន្ត្រីក្រសួងបរិស្ថានបាន អះអាងថា ក្រោយពីមានការ កែទម្រង់វិស័យបរិស្ថានក្នុងពេលថ្មីៗនេះ ផ្ទៃដីតំបន់ការពារធម្មជាតិបាន កើនឡើងរហូតដល់ ទៅ ៧៥លានហិកតា ស្មើនឹង ៤១ភាគរយនៃផ្ទៃប្រទេស ដែលចំនួននេះច្រើន ជាង២ដង នៃ គោលដៅជីវៈចម្រុះសកល ដែលបានកំណត់នៅក្នុងកិច្ចប្រជុំកំពូលលើកទី១០នៅ ប្រទេស ជប៉ុន។
នៅក្នុងទិវាជីវៈចម្រុះអន្តរជាតិ ២២ ឧសភា ឆ្នាំ២០១៧ ក្រោមប្រធានបទ “ជីវៈចម្រុះ និងទេសចរណ៍ ប្រកបដោយចីរភាព” នៅមជ្ឈមណ្ឌលកិច្ចសហប្រតិបត្តិការកម្ពុជា-ជប៉ុន (CJCC) នាព្រឹកថ្ងៃទី២២ ខែឧសភា ឆ្នាំ២០១៧នេះ លោកសាយ សំអាល់ រដ្ឋមន្ត្រីក្រសួងបរិស្ថានបានលើកឡើងថា ក្នុងអាណត្តិទី៥នេះ រាជរដ្ឋាភិបាលកម្ពុជាបាន សម្រេចគោលដៅសំខាន់ជាច្រើន ដើម្បីចូលរួមជាមួយ នឹងសហគមន៍អន្តរជាតិ លើកិច្ចការពារបរិស្ថាន។ ក្នុងនោះយើងបានរក្សាការពារនិងបង្កើនដីព្រៃអភិរក្សថ្មីៗ បន្ថែមទៀត និងលុបបំបាត់លែងឱ្យមានការផ្តល់ដីសម្បទានសេដ្ឋកិច្ចចាប់ពីពេលនេះតទៅ។
ជាមួយនេះ រាជរដ្ឋាភិបាលកម្ពុជាបានកំពុងលើកកម្ពស់ការចុះបញ្ជីដីធ្លី ដោយបានកំណត់ច្បាស់លាស់ដី ណាជាដីសាធារណៈរបស់រដ្ឋ ដីណាជាដីសម្បទានសេដ្ឋកិច្ច ដីណា ជាដីឯកជន ដីណាជាដីសហគមន៍ ដីណាជាដីបង្កបង្កើនផល ហើយការងារនេះយើង កំពុងបន្តអនុវត្តការចុះបញ្ជីដីធ្លីនេះ ឱ្យមានប្រសិទ្ធភាពថែមទៀត។
លោករដ្ឋមន្ត្រីបន្តថា៖ ដើម្បីជំរុញការគ្រប់គ្រងតំបន់ទាំងនេះឱ្យមានប្រសិទ្ធភាព ក្រសួងបរិស្ថានក៏បាន រៀបចំនូវផែនការអភិវឌ្ឍសហគមន៍ តាមរយៈសេវាកម្មអេកូទេសចរណ៍ ដោយបានធ្វើការផ្លាស់ប្តូរមុខរបរ របស់ប្រជាពលរដ្ឋពីការរុករៀនទន្ទ្រានធនធានធម្មជាតិ មកជាការចូលរួមចំណែកថែរក្សាការពារជីវៈ ចម្រុះនៅក្នុងតំបន់ការពារធម្មជាតិវិញ។
ជាក់ស្តែងរហូតមកដល់បច្ចុប្បន្ននេះ មានសហគមន៍ទេសចរណ៍ធម្មជាតិចំនួន ៩ បានបង្កើតជាផ្លូវការ និងមានគម្រោងវិនិយោគផ្នែកទេសចរណ៍ធម្មជាតិចំនួន ១៥ បាននិងកំពុងដំណើរការយ៉ាងសកម្ម។
ក្រៅពីនេះក្រសួងក៏បាន និងកំពុងរៀបចំតំបន់ដែលមានសក្តានុពល សម្រាប់បង្កើត កន្លែងទេសចរណ៍ ធម្មជាតិទាំងនៅក្នុងតំបន់ការពារធម្មជាតិ និងតំបន់របៀងអភិរក្សជីវៈ ចម្រុះផងដែរ។
ផ្អែកលើការកែទម្រង់វិស័យបរិស្ថានក្នុង ពេលថ្មីៗនេះ ផ្ទៃដីតំបន់ការពារ ធម្មជាតិបានកើនឡើងរហូត ដល់ទៅ ៧៥លានហិកតា ស្មើនឹង ៤១ភាគរយនៃផ្ទៃប្រទេស ដែលចំនួននេះ ច្រើនជាង២ដង នៃគោលដៅជីវៈចម្រុះសកល ដែលបានកំណត់នៅក្នុងកិច្ច ប្រជុំកំពូលលើកទី១០នៅប្រទេសជប៉ុន។
លោករដ្ឋមន្ត្រីបញ្ជាក់ថា៖” តម្លៃនិងសារៈប្រយោជន៍នៃធនធានជីវៈចម្រុះ និងប្រព័ន្ធ អេកូឡូស៊ី ដែលបានផ្តល់សម្រាប់ការអភិវឌ្ឍសេដ្ឋកិច្ចសង្គម និងសុខុមាលភាពមនុស្សនៅ លើភពផែនដី”។
ធនធានជីវៈចម្រុះ និងអេកូឡូស៊ីបានផ្តល់សេវាកម្មជាច្រើនសម្រាប់ទ្រទ្រង់ជី វភាពរស់នៅប្រចាំថ្ងៃ របស់យើង ដោយរួមបញ្ចូលទាំងសេវាផ្គត់ផ្គង់ជាចំណីអាហារ ទីជម្រក សម្ភារប្រើប្រាស់ ឱ្យសថព្យាបាលជំងឺ ផ្តល់ទីកន្លែងកម្សាន្តសប្បាយ ផ្តល់ខ្យល់អាកាសបរិសុទ្ធ ផ្តល់តម្លៃខាងវប្បធម៌ និងជួយសម្រួលដល់លំនឹងបរិស្ថាន បរិយាកាស អាកាសធាតុ។ល។
តាមរយៈសេវាកម្មនេះសេវាកម្មប្រព័ន្ធអេកូឡូស៊ីទាំងនោះ រួមផ្សំនិងស្ថិរភាពនយោបាយ សុខសន្តិភាព ដែលប្រទេសយើងទទួលបាន ក្នុងរយៈ៣០ឆ្នាំកន្លងមកនេះ វិស័យទេស ចរណ៍ធម្មជាតិបាន និងកំពុងដើរតួនាទីយ៉ាងសំខាន់សម្រាប់ការអភិវឌ្ឍប្រកបដោយចីរភាព។
ទេសចរណ៍ធម្មជាតិ មិនគ្រាន់តែចូលរួមចំណែកលើកស្ទួយសេដ្ឋកិច្ចជាតិប៉ុណ្ណោះទេ ថែមទាំងជំរុញ លើកទឹក ចិត្តដល់ការប្រែប្រួលឥរិយាបថរបស់ប្រជាពលរដ្ឋ ពីការប្រើប្រាស់ធនធានហួសកម្រិត មកជាការអភិរក្សជីវៈចម្រុះ និងប្រភេទកម្រ ឬជិតផុតពូជនានា នៅលើពិភពលោកផងដែរ។ ដូច្នេះអំពាវនាវសូមឱ្យស្មារតីថ្ងៃទី២២ ខែឧសភានេះ ក្លាយទៅជាកម្លាំងចលករដ៏មុតស្រួច
មកបុកទម្លុះរបាំងនៃការអភិរក្សធនធានជីវៈចម្រុះ និងជាត្រីវិស័យមួយដើម្បីនាំផ្លូវយើងទាំងអស់គ្នា ឈានទៅរកការអភិវឌ្ឍប្រកបដោយចីរភាព។
តាមរបាយការណ៍ស្វាគមន៍របស់លោក ជេត ជាលី សកលវិទ្យាធិការ នៃសកលវិទ្យាល័យភូមិន្ទភ្នំពេញ បានថ្លែងថា ទិវានេះសហការរៀបចំដោយក្រុមការងារ សកលវិទ្យាល័យភូមិន្ទភ្នំពេញ ជាមួយនាយកដ្ឋាន ជីវៈចម្រុះនៃក្រុមប្រឹក្សាជាតិអភិវឌ្ឍន៍ ដោយចីរភាព ដៃគូអភិវឌ្ឍន៍នានា ជាពិសេសកម្មវិធីអភិវឌ្ឍន៍ សហប្រជាជាតិ(UNDP) និងសហគមន៍អឺរ៉ុប(EU)ប្រចាំកម្ពុជា ក្នុងគោលបំណងដើម្បីលើកកម្ពស់ ការយល់ដឹង ជាសាធារណៈអំពីធនធានជីវៈចម្រុះ និងតម្លៃរបស់ប្រព័ន្ធអេកូឡូស៊ី ដែលជាផ្នែកមួយដ៏សំខាន់ក្នុងការទ្រទ្រង់សេដ្ឋកិច្ចជាតិ និងជីវភាពរស់នៅរបស់ប្រជាជន តាមរយៈសកម្មភាពទេសចរណ៍ប្រកបដោយនិរន្តរភាព៕អត្ថបទដើមអេគេភី

អាជ្ញាធរខេត្តសៀមរាប ចូលរួមគោរពវិញ្ញាណក្ខន្ធ សពលោក អ៊ឹម សំ ទាហា នមួកខៀវកម្ពុជាស្លាប់នៅប្រទេស អាហ្រ្វិកកណ្តាល

សៀមរាប៖លោកឃឹម ប៊ុនសុង អភិបាលខេត្ត និងលោក នូ ផល្លា ប្រធានក្រុមប្រឹក្សាខេត្ត សៀមរាបនៅព្រឹកថ្ងៃទី២២ខែឧសភានេះ បានដឹកនាំប្រតិភូជាសមាជិកសមាជិកាក្រុម ប្រឹក្សាខេត្តគណៈអភិបាលខេត្តថ្នាក់ដឹកនាំមន្ទីរអង្គភាពកងកម្លាំងប្រដាប់អាវុធ អញ្ជើញ គោរពវិញ្ញាណក្ខន្ធសពលោក អ៊ឹម សំ នៅភូមិកំពង់ក្តី ឃុំកំពង់ក្ដី ស្រុកជីក្រែង ខេត្តសៀម រា។
ការចូលរួមនេះជាការសម្តែងការសោកស្តាយយ៉ាងខ្លាំងបំផុត និងរំលែកទុក្ខដ៏ក្រៀមក្រំ ចំពោះ ការបាត់បង់អាយុជីវិតរបស់ ទាហានមួកខៀវកម្ពុជា ក្រោយមានការវាយប្រហារលើក្បួន កម្លាំងរបស់អង្គការសហប្រជាជាតិ នៅសាធារណរដ្ឋអាហ្រ្វិកកណ្តាល រួមជាមួយនឹងកងកម្លាំងកម្ពុជា៣រូបទៀត គឺក្នុងកិត្តិយស និងជាកុលបុត្រខ្មែរដ៏ឆ្នើម ដើម្បីបុព្វហេតុការពារ ថែរក្សាសន្តិសុខ សុវត្ថិភាព សន្តិភាព និងមនុស្សធម៌ ដែលនេះ គឺជាគំរូវីរភាពដ៏ថ្លៃថ្លា សម្រាប់កងកម្លាំងប្រដាប់អាវុធ និងសម្រាប់ប្រជាជនកម្ពុជានៅទូទាំងប្រទេស។
សូមរំលឹកថា កាលពីវេលាម៉ោងប្រមាណ១រំលងអាធ្រាត្រឈានចូលថ្ងៃទី០៩ ខែឧសភា ឆ្នាំ២០១៧ ម៉ោងនៅក្នុងប្រទេសកម្ពុជា កងកម្លាំងមួកខៀវរបស់កម្ពុជា បម្រើការងារនៅ ប្រទេសអាហ្រ្វិកកណ្តាល បានរងការវាយប្រហារដោយក្រុមឧទ្ទាម បណ្តាលឲ្យកម្លាំង កម្ពុជា ៤នាក់ស្លាប់ និងម្នាក់ទៀតរងរបួស។
កងទ័ពមួកខៀវកម្ពុជា ដែលបានពលីជីវិត នោះរួមមាន៖អនុសេនីយ៍ទោ អ៊ឹម សំ អាយុ ៣៧ឆ្នាំ មានស្រុកកំណើតនៅស្រុកពួក ខេត្តសៀមរាប,អនុសេនីយ៍ឯក ម៉ៅ អេង អាយុ ៣៧ឆ្នាំ មានលំនៅឋានក្នុងសង្កាត់ស្រះ ចក ខណ្ឌដូនពេញ, ព្រិន្ទបាលទោ ស៊ាង នរិន្ទ អាយុ ៣៥ឆ្នាំ មានលំនៅឋានក្នុងខេត្តស្វាយ រៀង និងលោកព្រិន្ទបាលទោ មុំ តុលា មានស្រុកកំណើតនៅស្រុកកណ្តៀង ខេត្តពោធិ៍សាត់។
សពកងកម្លាំងរក្សាសន្តិភាពរបស់កម្ពុជាក្រោមទង់អង្គការសហប្រជាជាតិ៤រូប ដែលបានពលីជីវិតព្រោះតែការបាញ់ប្រហាររបស់ក្រុមឧទ្ទាម នៅប្រទេសអាហ្រ្វិកកណ្តាលនោះ បានដឹកមកដល់កម្ពុជានៅម៉ោង៨យប់ថ្ងៃអាទិត្យទី២១ ខែឧសភាឆ្នាំ២០១៧នេះ ក្រោមភាពសោកសៅ យ៉ាងក្រៃលែងពីក្រុមគ្រួសារ និងថ្នាក់ដឹកនាំប្រទេសកម្ពុជាសម្តេចតេជោ ហ៊ុន សែន និងថ្នាក់ដឹកនាំកងកម្លាំងប្រដាប់អាវុធដទៃទៀត៕

 

គ.ជ.ប.ប្រកាសថា៖យុទ្ឋនាការឃោសនាបោះឆ្នោតរបស់គណបក្សនយោបាយប្រព្រឹត្តទៅដោយរលូន សន្តិសុខ សណ្តាប់ធ្នាប់ល្អ និងគ្មានអំពើហិង្សា

ភ្នំពេញ៖រយៈពេលពីរថ្ងៃ(ថ្ងៃទី២០-២១ ខែឧសភា ឆ្នាំ២០១៧)សភាពការណ៍ទូទៅនៃការធ្វើសកម្មភាពឃោសនាបោះឆ្នោតរបស់គណបក្សនយោបាយ សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ ឆ្នាំ២០១៧ បានប្រព្រឹត្តទៅដោយរលូន សន្តិសុខ សណ្តាប់ធ្នាប់ល្អ និងគ្មានអំពើហិង្សា ។សេចក្តីប្រកាសព័ត៌របស់គណកម្មាធិការរៀបចំការបោះឆ្នោតស្ដីពីសភាពការណ៍ទូទៅនៃការធ្វើសកម្មភាពឃោសនាបោះឆ្នោតរបស់គណបក្សនយោបាយ សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ ឆ្នាំ២០១៧។
ប្រភពបានបន្ដថា៖គណបក្សនយោបាយទាំង ១២ ដែលបានចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ មានគណបក្សប្រជាជនកម្ពុជា គណបក្សសង្រ្គោះជាតិ គណបក្ស ហ៊្វុន ស៊ិន ប៉ិច គណបក្សសម្ព័ន្ធដើម្បីប្រជាធិបតេយ្យ គណបក្ស ខ្មែររួបរួមជាតិ គណបក្សសំបុកឃ្មុំសង្គមប្រជាធិបតេយ្យ គណបក្ស សញ្ជាតិកម្ពុជា គណបក្សប្រជាធិបតេយ្យមូលដ្ឋាន គណបក្សសាធារណរដ្ឋប្រជាធិបតេយ្យ គណបក្សយុវជនកម្ពុជា គណបក្សអំណាចខ្មែរ និងគណបក្ស ជនជាតិដើមប្រជាធិបតេយ្យកម្ពុជា បានធ្វើសកម្មភាពឃោសនាតាមកម្មវិធីរៀងៗខ្លួនដូចជា៖ ជួបជុំ និងដង្ហែក្បួនឃោសនា ចាក់មេក្រូចល័តតាមឃុំ សង្កាត់ ចាក់មេក្រូនៅទីស្នាក់ការគណបក្ស ឃោសនាតាមផ្ទះ ចែកខិត្តប័ណ្ណ បិទបដា ជាដើម ។
តាមរបាយការណ៍របស់គណៈកម្មការរាជធានីភ្នំពេញរៀបចំការបោះឆ្នោត បានឱ្យដឹងថានៅរាជធានីភ្នំពេញមានគណបក្សនយោបាយចំនួន ០៦ ចូលរួមប្រកួតប្រជែងក្នុងការបោះឆ្នោតនេះ ហើយសម្រាប់រយៈពេល ០២ថ្ងៃនេះ មានគណបក្សចំនួន ០២ បានហែក្បួនជាទ្រង់ទ្រាយធំ គឺគណបក្ស ប្រជាជនកម្ពុជា និងគណបក្សសង្រ្គោះជាតិ រីឯគណបក្សចំនួន ០៤ទៀត គឺគណបក្សសម្ព័ន្ធដើម្បីប្រជាធិបតេយ្យ ហ៊្វុន ស៊ិន ប៉ិច ខ្មែររួបរួមជាតិ និងសំបុកឃ្មុំសង្គមប្រជាធិបតេយ្យ បានធ្វើសកម្មភាពហែក្បួនឃោសនា ចាក់មេក្រូចល័ត ចែកខិត្តប័ណ្ណ អាវយឺត មួក ស្លាកសញ្ញាគណបក្ស ពាក្យស្លោក នៅតាមសង្កាត់មួយចំនួនដែលខ្លួនបានចុះបញ្ជីបេក្ខជន ។

តាមរបាយការណ៍ពី គធ.ខប ចំនួន ១៩ បានបញ្ជាក់ថា ការធ្វើសកម្មភាពឃោសនាបោះឆ្នោត របស់គណបក្សនយោបាយនៅតាមបណ្តាខេត្តទាំងនោះ បានប្រព្រឹត្តទៅតាមកម្មវិធី គ្មានអំពើហិង្សា សន្តិសុខសុវត្ថិភាពមិនមានអ្វីគួរឱ្យកត់សម្គាល់ឡើយ ៕

សម្តេចហ៊ុន សែនអញ្ចើញទៅទទួលនិងគោរពវិញ្ញាណក្ខន្ធ័សពកងទ័ពមួកខៀវដោយផ្ទាល់នៅព្រលានយន្តហោះភ្នំពេញ

ភ្នំពេញ៖សម្តេចហ៊ុន សែន បានអញ្ជើញទៅទទួលនិងគោរពវិញ្ញាណក្ខ័ន្ធសពកងទ័ពមួកខៀវកម្ពុជាដោយផ្ទាល់នៅព្រលានយន្តហោះអន្តរជាតិភ្នំពេញខណៈពេលដែលសពកងកម្លាំងមួកខៀវទាំង៤ត្រូវបាននាំតាមយន្តហោះបានមកដល់មាតុប្រទេសភ្លាមនោះ។

ប្រមុខរាជរដ្ឋាភិបាលកម្ពុជាសម្តេច ហ៊ុន សែន រួមជាមួយឥស្សរជនជាន់ខ្ពស់នៃរាជរដ្ឋាភិបាល អង្គទូត អនុព័ន្ធយោធាបណ្តាប្រទេសជាមិត្តប្រចាំនៅកម្ពុជា ក្រុមគ្រួសារសាច់ញាត្តិនៃសព និងកងកម្លាំងប្រដាប់អាវុធជាច្រើនទៀត បានអញ្ជើញទៅគោរពវិញ្ញាណក្ខ័ណ្ឌសពវីរៈយុទ្ធជនមួកខៀវកម្ពុជា ទាំង៤រូប នៅអាកាសយានដ្ឋានអន្តរជាតិភ្នំពេញ ខណៈ សព ត្រូវបានដឹកតាមយន្តហោះពីអាហ្វ្រិកកណ្តាលមកដល់មាតុប្រទេសនៅវេលាម៉ោង៨និង១០ទីយប់ថ្ងៃទី២១ ឧសភានេះ។
សូមរំលឹកថា កាលពីវេលាម៉ោងប្រមាណ១រំលងអាធ្រាត្រឈានចូលថ្ងៃទី០៩ ខែឧសភា ឆ្នាំ២០១៧ ម៉ោងនៅក្នុងប្រទេសកម្ពុជាកងកម្លាំងមួកខៀវរបស់កម្ពុជាបម្រើការងារនៅប្រទេសអាហ្រ្វិកកណ្តាលបានរងការវាយប្រហារដោយក្រុមឧទ្ទាម បណ្តាលឲ្យកម្លាំងកម្ពុជាស្លាប់៤នាក់ រួមមាន អនុសេនីយ៍ទោ អ៊ឹម សំ អាយុ ៣៧ឆ្នាំ មានស្រុកកំណើតនៅស្រុកពួក ខេត្តសៀមរាប, អនុសេនីយ៍ឯក ម៉ៅ អេង អាយុ ៣៧ឆ្នាំ មានលំនៅឋានក្នុងសង្កាត់ស្រះចក ខណ្ឌដូនពេញ, ព្រិន្ទបាលទោ ស៊ាង នរិន្ទ អាយុ ៣៥ឆ្នាំ មានលំនៅឋានក្នុងខេត្តកំពត និងព្រិន្ទបាលទោ មុំ តុលា មានស្រុកកំណើតនៅស្រុកកណ្តៀង ខេត្តពោធិ៍សាត់ ដោយឡែក ម្នាក់ទៀតបានរងរបួស។
លោកឧនាយឧត្តមសេនីយ៍សែម សុវណ្ណនីអគ្គនាយកមជ្ឈមណ្ឌលជាតិ គ្រប់គ្រងកងកម្លាំងរក្សា សន្តិភាពបានឲ្យដឹងថា ចាប់តាំងពីឆ្នាំ២០០៦ ដែលរាជរដ្ឋាភិបាលកម្ពុជា បានបញ្ជូន កង ទ័ពរក្សាសន្តិភាព របស់អង្គការសហប្រជាជាតិ ឲ្យទៅចូលរួមរក្សាសន្តិភាព ក្រោមឆ័ត្ររបស់អង្គការសហប្រជាជាតិដែលមានរយៈពេលជាង១១ឆ្នាំកន្លងមកនេះកងទ័ពមួកខៀវកម្ពុជា ពុំធ្លាប់មានការវាយប្រហារបណ្តាលឱ្យស្លាប់ ដូចលើកនេះឡើយ។
ក្នុងបេសកកម្មម្តងៗ ពេលវិលត្រឡប់មកកាន់មាតុប្រទេសវិញ ទទួលបានការអបអរសាទរ ដោយភាពសប្បាយរីករាយ ញញឹម ញញែម ពីមិត្តភក្តិ និងក្រុមគ្រួសារ ។ប៉ុន្តែអ្វីដែលគួរឲ្យរន្ធត់និងតក់ស្លុតជាមួយនិងក្តីសោកសៅនៅពេលនេះ គឺការវិលត្រឡប់របស់កងទ័ពមួកខៀវយើងចំនួន៤រូបជាសាកសព ។
ផ្ទុយពីពេលមុនៗគឺយើងធ្លាប់តែលឺសំលេងហ៊ោសប្បាយ ប៉ុន្តែថ្ងៃនេះបានប្រែក្លាយជាសំរែកទួញសោក ដោយក្តីសង្វេកពីក្រុមគ្រួសារ ។
អ្នកដែលបានមកទទួលសពនៅឯចំណតអាកាសយានដ្ឋានអន្តរជាតិភ្នំពេញ ក្នុងនោះក៍មានប្រមុខរាជរដ្ឋាភិបាលកម្ពុជា ផងដែរ សុទ្ធតែបានបង្ហាញពីទឹកមុខស្រងូតស្រងាត់ អារម្មណ៍ក្តុកក្តួលស្តាយស្រណោះជាមួយក្រុមគ្រួសារនៃសព ក្នុងការបាត់បង់វីរៈយុទ្ធជនដ៍អង់អាចក្លាហានដែលបានពលីកម្ម ប្រកបដោយកិត្តិយស ដើម្បីបុព្វហេតុសន្តិភាពនិងមនុស្សធម៏នៃពិភពលោក។
ជាងនេះពលីកម្មរបស់វីរៈយុទ្ធជនទាំង៤រូប ក៍ជា ការបាត់បងកូន បង ប្អូន ឳពុក និងជាការបាត់បង់សាច់ញាតិ ដ៍ជាទីស្រឡាញ់ គឺលែងបានជួបមុខគ្នាជារៀងរហូតចាប់ពីពេលនេះទៅ។
សូមបញ្ជាក់ដែរថានៅមុនសពបានដឹកមកដល់ចំណតអាកាសយានដ្ឋានអន្តរជាតិភ្នំពេញ ប្រមុខរាជរដ្ឋាភិបាលកម្ពុជា សម្តេចតេជោហ៊ុន សែន ក៍បាន ជួប សំណេះសំណាល សួរសុខទតុក្ខ ដល់ក្រុមគ្រួសារនៃសពផងដែរ។
ក្នុងងនាមរាជរដ្ឋាភិបាលសម្តេចបានចូលរួមរំលែកមរណទុក្ខដ៍ក្រៀមក្រមនេះ និង សូមចូលរួមសោកស្តាយជាទីបំផុត ចំពោះការបាត់បង់វីរយុទ្ធជនរបស់ជាតិនាពេលយើង។
ចំពោះក្រុមគ្រួសារនីមួយៗបើទោះបីមានការសោកស្តាយអាឡោះអាល័យចំព៉កាតបាត់បង់សមាជិកគ្រួសារជាទីស្រឡាញ់របស់ខ្លួន ក៍ប៉ុន្តែ ទោះជាយ៉ាងណាពួកគាត់ក៍មានមោទនភាពផងដែរ ដោយសារការស្លាប់របស់សមាជិកគ្រួសារគាត់នេះ គឺស្លាប់ដោយកិត្តិយសក្នុងបុព្វហេតុសេចក្តីសុខសាន្តរបស់មនុស្សជាតិនៅលើពិភពលោកទាំងមូល។
ពួកគាត់ក៍បានថ្លែងអំណរគុណយ៉ាងជ្រាលជ្រៅផងដែរចំពោះសម្តេចតេជោហ៊ុន សែននាយករដ្ឋមន្ត្រីកម្ពុជា ដែលបានយកចិត្តទុកដាក់ តាំងពីទទួលបានដំណឹងដំបូងនៃការវាយប្រហាដោយពួកឧទ្ទាម ដោយបានស្នើឲ្យអង្គការសហប្រជាជាតិ យកការទទួលខុសត្រូវខ្ពស់លើករណីនេះ។
សូមបញ្ជាក់ថាសពកងកម្លាំងមួកខៀវទាំង៤រូបនេះត្រូវបានដឹកតាមរថយន្តយកទៅធ្វើបុណ្យតាមប្រពៃណីខ្មែរ នៅឯលំនៅដ្ឋានរៀងៗខ្លួនរួចហើយ សម្រាប់សពម្នាក់ ទទួលបានសំណង ប្រមាណ៧ម៉ឺនដុល្លារ ពីអង្គការសហប្រជាជាតិ៕

ព័ត៌មានផ្សាយ​ផ្ទាល់​ទាន់​ហេតុ​ការណ៍​(video)


ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ​ពេល​យប់​


ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

ព័ត៌មានជាតិ

Angkor-10-7-2015

chipmong-lang-10-07-2015

Cambodia-10-07-2015-new

MC-col-10-7-2015

angkor-puro-10-07-2015

Pepsi-10-07-2015

22-10-2015-flora

santana-22-10-2015

8-4-2016-banner

GreenICT Technology Co., Ltd

gps-new

verte2