vigor-new

 

ហង្សមាស the voice-2-2-16 cambodianidol-2 Money drop killer gotodance Hm all

ហង្សមាស

the voice-2-2-16

cambodianidol-2

Money drop

killer

gotodance

Hm all

ads-tel-true

សិល្បៈកម្សាន្ត

សិស្សសាលា៧នាក់ពុលក្រោយហូបផ្លែឪឡឹក

 

ព្រះវិហារ៖សិស្សសាលាបឋមសិក្សាស្រុកឆែប ខេត្តព្រះវិហារ ប្រុសស្រីចំនួន៧នាក់ ក្រោយពេលដល់ ម៉ោងចេញ លេង បាននាំគ្នាទៅទិញផ្លែឪឡឹកមកហូបរួមគ្នា ស្រាប់តែពេលនោះហូបបាន មួយសន្ទុះ ចាប់ផ្តើម មាន អាការៈពុល ក្អូតចង្អោ ញ័រដៃជើង ត្រូវបានលោកគ្រូ អ្នកគ្រូនៅទីនោះ បានបញ្ជូនទៅសង្រ្គោះភ្លាមៗនៅមណ្ឌលសុខភាពស្រុកឆែប នៅវេលាម៉ោង៩ព្រឹកថ្ងៃទី ១៣ ខែ មិថុនា ឆ្នាំ២០១៧នេះ ។
បើតាមការបញ្ជាក់ពីលោកវរៈសេនីយ៍ឯក ឆយ បូរិន នាយសេនាធិការដ្ឋាន នៃស្នងការ ដ្ឋាននគរបាលខេត្តព្រះវិហារ បានឲ្យដឹងនៅរសៀលថ្ងៃទី១៣ ខែមិថុនា ឆ្នាំ២០១៧នេះថា៖” បន្ទាប់ ពីមានករណីក្មេងសិស្សសាលាពុលផ្លែឪឡឹកភ្លាម សមត្ថកិច្ចក៏បានចុះទៅដល់គោលដៅ នឹង បានយកសំបកឪឡឹកដែលក្មេងៗហូបរួច យកមកពិនិត្យ ឃើញថាវាពិតជាមានសារជាតិ ថ្នាំ ធម្មជាតិ សម្រាប់ស្រោចផ្លែឪឡឹកនៅតាមចម្ការ “។
លោកបន្តថា៖ បន្ទាប់មកសមត្ថកិច្ចក៏បាន ចុះទៅពិនិត្យដល់ទីតាំងលក់ផ្លែឪឡឹកផ្ទាល់តែម្តង ដើម្បីត្រួតពិនិត្យ នឹងពុំបានរកឃើញផ្លែ ឪឡឹកផ្សេងទៀតមានសារជាតិថ្នាំពុលនោះទេ រីឯផ្លែឪឡឹកដែលក្មេងៗទិញយកទៅបរិភោគនោះ វាពិតជាចៃដន្យណាស់ ផ្លែឪឡឹកមួយគោយន្ត ប៉ះចំផ្លែឪឡឹក១ផ្លែដែលក្មេងៗទិញយកទៅហូប មានជាតិថ្នាំ បណ្តាលឲ្យពុល ។
សូមបញ្ជាក់ថា ក្រោយពីបាននាំយកក្មេងៗរងគ្រោះទាំង៧នាក់ប្រុសស្រី ទៅសង្រ្គោះទាន់ ពេលវេលា មកដល់ពេលនេះ ក្មេងៗទាំងអស់នោះមានសភាពធូរស្បើយវិញហើយ នឹងត្រូវបាន អាណាព្យាបាលមកទទួលយកទៅផ្ទះរៀងៗខ្លួនវិញនៅថ្ងៃដដែល ។

អ្នកជំនាញថាដើម្បីជៀសវាងពុលអ្នកលក់គួរលាងទឹកផ្លែឪឡឹកមុនយកទៅលក់៕

 

លោកកឹមសុខា៖”គណបក្សសង្គ្រោះជាតិនឹងកើនសមាជិកព្រឹទ្ឋសភាច្រើន​ជាង២ដង”

ភ្នំពេញ៖លោកកឹមសុខាប្រធានគណបក្សសង្គ្រោះជាតិបានអះអាងថា៖តាមលទ្ធផលបណ្ដោះអាសន្នក្រៅផ្លូវការនៃការបោះឆ្នោតឆ្នាំ២០១៧នេះ បានបង្ហាញថាគណបក្សសង្គ្រោះជាតិ កើនចំនួនក្រុមប្រឹក្សាឃុំ-សង្កាត់ ប្រមាណជា៥០០០រូប គឺជិតពាក់កណ្ដាល ក្នុងចំណោមចំនួនក្រុមប្រឹក្សាឃុំ-សង្កាត់សរុប ក្នុងប្រទេសកម្ពុជា។លោកថ្លែងនៅក្នុង វេទិកា ជួបជាមួយបេក្ខជនក្រុមប្រឹក្សាឃុំ-សង្កាត់ជាប់ឆ្នោត ខេត្តសៀមរាបកាលពីម្សិលមិញ។
លោកបន្ដថា៖បើយោងតាមកំណើននេះ គឺអាចធ្វើឲ្យគណបក្សសង្គ្រោះជាតិ មានចំនួនសមាជិកព្រឹទ្ធសភាកើនឡើងជាង២ដង នៃចំនួនសមាជិកព្រឹទ្ធសភា ដែលយើងមានបច្ចុប្បន្ន។ បន្ទាប់មក គណបក្សសង្គ្រោះជាតិ អាចនឹងកាន់កាប់ជា ប្រធានក្រុមប្រឹក្សា រាជធានី ខេត្ដ ក្រុង ស្រុក ខណ្ឌ ជាច្រើនផងដែរ។ នេះជាធនធានដ៏មានសក្ដានុពលរបស់គណបក្សសង្គ្រោះជាតិ៕គណបក្សប្រឆាំងមានសមាជិកព្រឹទ្ឋសភាចំនួន១១រូបក្នុងចំណោមសមាជិក៦១រូប។តាមច្បាប់សមាជិកព្រឹទ្ឋសភា២រូបតែងតាំងដោយព្រះមហាក្សត្រនិង២រូបតែងតាំងដោយរដ្ឋសភា៕

ក្រសួងដែនដីកំណត់អោយពលរដ្ឋប៊ូឌីងសចំនួន៤៩៣គ្រួសារចាកចេញអោយអស់ត្រឹមថ្ងៃទី១៥កក្តដាក្រោយចុះកិច្ចសន្យាលក់

ភ្នំពេញ៖ ក្រសួងរៀបចំដែនដីនគរូបនីយកម្មនិងសំណង់ បានកំណត់អោយប្រជាពលរដ្ឋរស់នៅអគារ សហកម្មសិទ្ធិប៊ូឌីងស ដែលមានចំនួនសរុប៤៩៣គ្រួសារ តម្រូវអោយចាកចេញ អោយអស់ត្រឹមថ្ងៃទី១៥ ខែកក្តា ឆ្នាំ២០១៧ ដើម្បីអោយក្រុមហ៊ុនជប៉ុន Arakawa ធ្វើការវាយកម្ទេចអគារចាស់ចោល។
នៅព្រឹកថ្ងៃទី១២ ខែមិថុនា ឆ្នាម២០១៧ លោកសេង ឡូត អ្នកនាំពាក្យក្រសួងរៀបចំដែនដី នគរូបនីយកម្មនិងសំណង់ ថ្លែងប្រាប់ទូរទស្សន៍ហង្សមាសតាមទូរស័ព្ទថា៖ “ក្រសួងបានកំណត់ត្រឹមថ្ងៃទី១៥ ខែកក្តា ឆ្នាំ២០១៧ ដើម្បីអោយប្រជាពលទាំង៤៩៣គ្រួសារចាកចេញពីអគារសហកម្មសិទ្ធិ ប៊ូឌីងស អោយអស់”។
លោកបញ្ជាក់ថា ៖”បន្ទាប់ពីប្រជាពលរដ្ឋធ្វើការចាកចេញអស់ក្រុមហ៊ុន Arakawa នឹងវាយអគារចាស់ចោល រួចចាប់ផ្តើសាងសង់អគារថ្មីទំនើបកំពស់២១ជាន់។
អ្នកនាំពាក្យក្រសួងរៀបចំដែនដីដដែលបានបញ្ជាក់ថា រហូតមកដល់ថ្ងៃទី១១ ខែមិថុនា ឆ្នាំ២០១៧ ម្សិលមិញនេះ ប្រជាពលរដ្ឋចំនួន២៨៤គ្រួសារ បានទូទាត់ថវិការួចហើយ ហើយក៏បានទៅ រកលំនៅដ្ឋានថ្មីផងដែរ ដែលមានពួកគាត់ខ្លះទៅតាំងលំនៅដ្ឋានថ្មី នៅក្នុងខណ្ឌមានជ័យ ខណ្ឌដង្កោ ខណ្ឌព្រែកព្នៅ និងមានគ្រួសារខ្លះ រកទិញដីសង់ផ្ទះនៅតាមស្រុកជុំវិញរាជធានីភ្នំពេញផងដែរ។
ក្រោយពីប្រជាពលរដ្ឋរស់នៅអគារសហកម្មសិទ្ធិប៊ូឌីងស ទាំង៤៩៣គ្រួសារ សម្រេចចិត្តទទួលយកថវិកា១៤០០ ដុល្លាអាមេរិក ក្នុង១ម៉ែត្រការ៉េ នៅកាលពីថ្ងៃទី១០ មិថុនា រដ្ឋមន្រ្តីក្រសួងរៀបចំដែន ដីនគរូបនីយកម្មនិងសំណង់ ឯកឧត្តម ទេសរដ្ឋមន្រ្តី ជា សុផារ៉ា បានទិញនំបញ្ចុក២តោនដើម្បីជប់លៀងជូនពួកគាត់ ដើម្បីចូលរួមអបអរសាទរ ក្នុងការផ្លាស់ប្តូរលំនៅថ្មី និងជីវភាពថ្មី។
ដោយលោក បញ្ជាក់ទៅកាន់ពួកកាត់ថា “រាជរដ្ឋាភិបាលកម្ពុជា គឺបានយកចិត្តទុកដាក់ខ្លាំងណាស់ ចំពោះប្រជាពលរដ្ឋ។ ហើយប្រជាពលរដ្ឋទាំង៤៩៣គ្រួសារនេះ នឹងមានជីវភាពកាន់តែប្រសើរថែម ទៀត ដោយសារមានលុយខ្លះនៅក្នុងដៃ ដើម្បីបើកមុខរបរកស៊ី ក្រោយពីបានទិញលំនៅឋានថ្មីហើយ នោះ។
អ្នកស្រី ទុយ ចាន់ណា ដែលបានសម្រេចចិត្តផ្លាស់ប្តូលំនៅទៅកាន់ផ្ទះថ្មីរបស់គាត់ នៅចាក់អង្រែលើ ក្នុងខណ្ឌមានជ័យ ដែលបានចូលរួមក្នុងពិធីជប់លៀងនេះ បានអោយដឹងថា “គាត់បានទទួលសំណងរួចហើយ ដែលមានថវិកាសរុប៦ម៉ឺនដុល្លា ហើយបានទិញផ្ទះថ្មីតម្លៃត្រឹម៥ម៉ឺនដុល្ល”។ គាត់អោយដឹងទៀតថា ថវិកាដែលសល់ពីការទិញផ្ទះថ្មីនេះ នឹងបើកមុខរបរកស៊ីសមរម្យមួយ ដើម្បីទ្រទ្រង់ជវិភាពបន្តទៀត។
គួរបញ្ជាក់អោយដឹងដែរថា អគារសហកម្មសិទ្ធិប៊ូឌីងស គឺក្រុមហ៊ុនជប៉ុន Arakawa សហការជាមួយក្រសួងរៀបចំដែនដីនគរូបនីយកម្មនិងសំណង់ ដែលគ្រោងចំណាយថវិកា ប្រមាណ ពី៧០ ទៅ៨០ម៉ឺនដុល្លាអាមេរិក ដើម្បីសាងសង់អគារទំនើបថ្មីមួយដែលមានកំពស់២១ជាន់ដែលគ្រោងនឹងចាប់ផ្តើមសាងសង់នៅចុងឆ្នាំ២០១៧នេះ.។
មកដល់ម៉ោង ១១:៣០ ថ្ងៃទី ១២ ខែមិថុនា ឆ្នាំ២០១៧ ប្រជាពលរដ្ឋអគារប៊ូឌីញ ស បានទទួល ប្រាក់ទូទាត់រួច បានប្រគល់បន្ទប់ជូនក្រុមហ៊ុន និងបានចាកចេញពីបន្ទប់ស្នាក់នៅ ទៅទីតាំងថ្មី សរុប២៩៩បន្ទប់៕

កម្ពុជាគ្រោងស្នើដាក់បញ្ជូលទីក្រុងសំខាន់ចំនួន៣ជាទីក្រុងបេតិកភណ្ឌផ្សាភ្ជាប់នឹងទេសចរណ៍

សៀមរាប៖កម្ពុជាគ្រោងនឹងស្នើសុំដាក់បញ្ជូលទីក្រុងសំខាន់ៗចំនួនបីជាទីក្រុងបេតិក ភណ្ឌផ្សាភ្ជាប់នឹងទេសចរណ៍ក្នុងនោះមាន ក្រុងបាត់ដំបង ក្រុងកំពត និងក្រុងក្រចេះ ដែលការដាក់បញ្ជូលក្រុងទំាងបីនេះគឺដើម្បីផ្សព្វផ្សាយទាក់ទាញអ្នកទេសចរណ៍ទៅទស្ស នាទីក្រុងទាំងនោះឲ្យបានកាន់តែច្រើនហើយវាក៏ជាការរំលេចឲ្យមានការចាប់អារម្មណ៍ឲ្យមានការថែរក្សានិង អភិរក្សធនធានបេតិកភណ្ឌទាំងនោះផងដែរ។ លោកទិត ចន្ថា រដ្ឋលេខាធិការក្រសួងទេសចណ៍បានមានប្រសាសន៍ថានៅក្នុងកិច្ចប្រជុំ រដ្ឋមន្ត្រីទេសចរណ៍នៃដៃគូរសន្ទនាសហប្រតិបត្តិការអាស៊ីលើកទី២និងសន្និសីទអន្តរជាតិលើកទី១ស្តីពីទេសចរណ៍ប្រកបដោយនិរន្តរភាពនិងទីក្រុងបេតិកភណ្ឌជាផ្លូវការនៅថ្ងៃទី ១២ខែមិថុនានេះ។

ថ្លែងនៅក្នុងកិច្ចប្រជុំឧត្តមមន្ត្រីអាស៊ីACDនៅព្រឹកថ្ងៃទី១១ខែមិថុនានេះនៅខេត្តសៀមរាបលោកបញ្ជាក់ថា៖ ក្នុងកិច្ចប្រជុំរដ្ឋមន្ត្រីទេសចរណ៍នៃដៃគូរសន្ទនាសហប្រតិបត្តិការអាស៊ី លើកទី២និងសន្និសីទអន្តរជាតិលើកទី១ស្តីពីទេសចរណ៍ប្រកបដោយនិរន្តរភាពនិងទីក្រុងបេតិកភណ្ឌក៏នឹងពិភាក្សាអំពីគំរូថ្មីៗនៃភាពជាដៃគូនិងតួនាទីអភិបាលកិច្ចល្អក្នុងការគ្រប់គ្រងការពារអភិរក្សនិងការអភិវឌ្ឍទីក្រុងបេតិកភណ្ឌប្រកបដោយនិរន្តរភាព។ហើយសន្និសិទនេះផ្តល់សារៈសំខាន់ណាស់សម្រាប់កម្ពុជា ក្នុងការធ្វើឲ្យថ្នាក់នាំប្រទេសលើពិភពលោក បានស្គាល់នូវប្រាសាទបុរាណដ៍អស្ចារ្យរបស់កម្ពុជា និងជួយផ្សព្វផ្សាយតំបន់ទេសចរណ៍ កម្ពុជាទៅលើកឆាកអន្តរជាតិធ្វើកម្ពុជាកាន់តែល្បីល្បាញបន្ថែមទៀត។

សូមបញ្ជាក់ថា ប្រទេសកម្ពុជាត្រូវបានពិភពលោកទទួលស្គាល់ថា ជាព្រះរាជាណាចក្រ នៃវប្បធម៌។តាមរយៈការទទួលស្គាល់នេះបានធ្វើឲ្យកំណើននៃភ្ញៀវទេសចរចូលមកទស្សនាកម្ពុជាមានចំនួនកើនឡើងជាលំដាប់ជាក់ស្តែងសម្រាប់ត្រីមាសទី១នៃឆ្នាំ២០១៧នេះចំនួនភ្ញៀវទេសចរណ៍មានការកើនឡើងចំនួន១២ភាគរយបើធៀបនឹងរយៈពេលដូចគ្នានាឆ្នាំ ២០១៦៕

 

ប្រឡងប្រណាំងចម្អិនម្ហូបអាហារប្រកបដោយសុវត្ថិភាព អនាម័យក្នុងកម្មវិធីស្បៀងអាហារតាមសាលារៀន

ខេត្តកំពង់ធំ៖ក្រោមការឧបត្ថម្ភពីអង្គការសហប្រជាជាតិនៃកម្មវិធីស្បៀងអាហាពិភពលោក នាយកដ្ឋានសុខភាពសិក្សានៃក្រសួងអប់រំយុវជននិងកីឡា បានរៀបចំការប្រឡងប្រណាំងចម្អិនម្ហូបអាហារផ្តាច់ព័ត្រតាមសាលារៀនក្នុងខេត្តកំពង់ធំ នាព្រឹកថ្ងៃទី០៩ខែមិថុនាឆ្នាំ២០១៧នៅសាលាបឋមសិក្សាឥន្ទកុមារ ភូមិឥន្ទកុមារ ឃុំកំពង់ស្វាយ ស្រុកកំពង់ស្វាយខេត្តកំពង់ធំ មានចូលរួមពីលោកលោកស្រីប្រតិភូមកពីខេត្តបាត់ដំបង ខេត្តសៀមរាប តំណាងអង្គការស្បៀងអាហារពិភពលោកលោកនាយក នាយិកាសាលានិងចុងភៅចំនួន២១នាក់។
លោក អ៊ិតវុឌ្ឍី អនុប្រធានមន្ទីរអប់រំយុវជននិងកីឡាខេត្តកំពង់ធំបានថ្លែងថា ចុងភៅទាំង២១នាក់មកពីតាមសាលាទាំង២១ក្នុងស្រុកទាំង៧ ក្នុងនោះស្រុកបារាយណ៏ ៣នាក់ ស្រុកសន្ទុក៣នាក់ ស្រុកស្ទោង៣នាក់ ស្រុកប្រាសាទសំបូរ៣នាក់ ស្រុកប្រាសាទបល្ល័ង្ក ៣នាក់ ស្រុកសណ្តាន់៣នាក់ និងស្រុកកំពង់ស្វាយ៣នាក់ ធ្លាប់បានប្រឡងជ្រើសរើសតាមស្រុករួចហើយពេលនេះនិងធ្វើការប្រកួតនៅថ្នាក់ខេត្ត។
លោកស្រីវេជ្ជបណ្ឌិត ឆាយគឹម សុទ្ធាវី បានថ្លែងអំណរគុណដល់អង្គការសហប្រជាជាតិនៃកម្មវិធីស្បៀងអាហាពិភពលោកនាយកដ្ឋានសុខភាពសិក្សានៃក្រសួងអប់រំយុវជននិងកីឡាដែលបានបង្កើតកម្មវិធីការប្រឡងប្រណាំងចម្អិនម្ហូបអាហារនេះ ហើយកម្មវិធីនេះបានបង្កើតឡើងជាលើកដំបូងសម្រាប់ចុងភៅនៅទូទាំងប្រទេសដែលបានអនុវត្តកម្មវិធីស្បៀងអាហារពិភពលោកនៅតាមសាលារៀន។

លោកស្រីបានបន្តថា៖កម្មវិធីនេះបង្កើតឡើងក្នុងគោលបំណងលើកទឹកចិត្តដល់ចុងភៅស្ម័គ្រចិត្តនិងចង់បង្ហាញពីថ្នាក់ជាតិពីសកម្មភាពចូលរួមរបស់ចុងភៅក្នុងការចម្អិនអាហារដល់សិស្ស ព្រមទាំងជួយដល់ចុងភៅឲ្យយល់ពីសារៈសំខាន់នៃអនាម័យផ្ទះបាយ និងសុវត្ថិភាពចំណីអាហារ ហើយក៏ជាឱកាសល្អសម្រាប់ពួកគាត់បានជួបចុងភៅមកពីសាលារៀនផ្សេងៗទៀតដើម្បីផ្លាស់ប្តូរបទពិសោធរវាងគ្នានិងគ្នា ។

លោកស្រីបានផ្តាំផ្ញើដល់ចុងភៅទាំងអស់ត្រូវយកចិត្តទុកដាក់ដោយយកទៅអនុវត្តក្នុងជីវភាពរស់នៅប្រចាំថ្ងៃនិងអនុវត្តតាមបទបញ្ជាផ្ទៃក្នុងរបស់កម្មវិធីប្រឡងប្រណាំងចម្អិនអាហារទៅតាមតារាងលម្អិតដែលមានអនាម័យខ្លួនប្រាណ សម្លៀកបំពាក់ចម្អិនត្រឹមត្រូវ លាងសម្អាតអាហារឆៅ លាងសម្អាតនិងកន្លែងចម្អិនបានល្អ ភាពស្រស់ស្រូបអាហារឆៅ ភាពស្មុកស្មាញក្នុងការរៀបចំ ការប្រើប្រាស់អាហារបីក្រុម ដោយទាន់ពេលវេលា ភាពច្នៃប្រឌិតសម្រស់នៃម្ហូប រសជាតិក្លិនឈ្ងុយ។

គួរបញ្ជាក់ផងដែរថាការប្រឡងបានចាប់ផ្តើមនៅវគ្គផ្តាច់ព្រ័ត្តចំពោះចុងភៅដែលបានឈ្នះជ័យលាភីលេខ១ បានទៅលើឈ្មោះ លី មីអូ ភេទប្រុស មកពីសាលាបឋមសិក្សាខ្សាច់ជីរស់ ឃុំកំពង់គោ ស្រុកកំពង់ស្វាយ លេខ២បានទៅលើឈ្មោះ មាស ផាន់ណា ភេទស្រី មកពីសាលាបឋមសិក្សា អង់ឃ្លាំ ឃុំប្រឡាយ ស្រុកស្ទោង និង លេខ៣ បានទៅលើឈ្មោះ ប៉ាត យក់ហៀង មកពីសាលាបឋមសិក្សាតាញ៉ោក ឃុំតាំងក្រសាំង ស្រុកសន្ទុក ។

សម្រាប់អ្នកឈ្នះជ័យលាភីលេខ១ទទួលបានថវិកា ១៥០$ លេខ២ទទួលបានថវិកា ១២០$ លេខ៣ទទួលបានថវិកា ១០០$ ចំណែកឯសាលារៀនដែលបានទទួលជ័យលាភីនិងទទួលបានថវិកា១០០$បន្ថែមសម្រាប់យកទៅប្រើប្រាស់ផ្គត់ផ្គង់ចម្អិនអាហារនៅតាមសាលារៀន រាល់ពេលព្រឹក៕

 

 

 

ឥណ្ឌាសន្យាជូយវិស័យកិសកម្មកម្ពុជានិងបណ្ដុះបណ្ដាលអ្នកអ្នកវិទ្យាសាស្រ្ត និងមន្រ្តីកសិកម្ម

សៀមរាប៖ឥណ្ឌាសន្យាជូយវិស័យកិសកម្មកម្ពុជានិងបណ្ដុះបណ្ដាលអ្នកអ្នកវិទ្យាសាស្រ្ត និងមន្រ្តីកសិកម្ម។នេះបើតាមរដ្ឋមន្ដ្រីមន្ដ្រីកសិកម្មវេងសាខុនបានអោយដឹងនៅថ្ងៃនេះ។នៅវេលាម៉ោង៦:៣០ ល្ងាច ថ្ងៃទី៨ ខែមិថុនា ឆ្នាំ២០១៧ នៅសណ្ឋាគារបុរីអង្គរ ទីក្រុងសៀមរាប មានការរៀបចំប្រជុំទ្វេភាគី រវាង កម្ពុជា និងឥណ្ឌា លើការងារពង្រឹងកិច្ចសហប្រតិបត្តិការលើវិស័យកសិកម្ម ។

សូមបញ្ជាក់ថា ដោយសារតែប្រទេសឥណ្ឌា មានបទពិសោធន៍ច្រើន និងមានប្រព័ន្ធគ្រប់គ្រងពូជដំណាំយ៉ាងច្បាស់លាស់ ដូច្នេះហើយបានជាកម្ពុជាត្រូវការនូវជំនួយគាំទ្រពីភាគីឥណ្ឌា ដើម្បីធានាដល់ការអនុវត្តគោលនយោបាយពូជដំណាំកម្ពុជាប្រកបដោយប្រសិទ្ធភាព ។

ទន្ទឹមនឹងនេះយើងក៏ត្រូវការនូវការជួយគាំទ្រពីភាគីឥណ្ឌាផងដែរ នូវការងារសំខាន់ៗមួយចំនួន ដើម្បីជំរុញដល់ការអភិវឌ្ឍពូជដំណាំជាពិសេស និងវិស័យកសិកម្មទូទៅ ដើម្បីជំរុញកំណើនសេដ្ឋកិច្ចកម្ពុជា ជាពិសេសការជំរុញការនាំចេញអង្កររបស់កម្ពុជាទៅទីផ្សារអន្តរជាតិ។ តាមរយៈកិច្ចប្រជុំនេះ ភាគីឥណ្ឌាបានសន្យាថានឹងផ្តល់ការគាំទ្រដល់វិស័យកសិកម្ម នៅកម្ពុជា ក្នុងនោះរួមមាន៖
1) ទទួលយកអ្នកវិទ្យាសាស្រ្ត និងមន្រ្តីកសិកម្ម ពីកម្ពុជាក្នុងការបណ្តុះបណ្តាលនៅប្រទេសឥណ្ឌានូវជំនាញសំខាន់ៗ ដូចជា ផលិតកម្មគ្រាប់ពូជ ការគ្រប់គ្រងនិងវិភាគគុណភាពពូជដំណាំ និងវិញ្ញាបនបត្របញ្ជាក់ពីគុណភាពគ្រប់ពូជ ។
2) ធ្វើកិច្ចសហប្រតិបត្តការលើការស្រាវជ្រាវ និងអប់រំវិស័យកសិកម្ម និងការផ្លាស់ប្តូរអ្នកជំនាញ រួមទាំងការអភិវឌ្ឍសមត្ថភាពនិស្សិតកសិកម្ម ។
3) បង្កើតក្រុមជំនាញរួមគ្នារវាងកម្ពុជា និងឥណ្ឌាដែលមានការគាំទ្រពីអ្នកជំនាញរបស់អ៊ីរី (IRRI)ក្នុងការកំណត់យុទ្ធសាស្រ្ត និងផែនការសកម្មភាពសម្រាប់ការជួយគាំទ្រដល់ការស្រាវជ្រាវ និងការអប់រំនិងអភិវឌ្ឍន៍វិស័យនៅកម្ពុជា។
4) ការផ្លាស់ប្តូរបទពិសោធន៍លើការងារភូតគាមអនាម័យ និងការទាក់ទាញចំណាប់អារម្មណ៍ពីទីផ្សារអន្តរជាតិ ។
5) ភាគីឥណ្ឌារង់ចាំទទួលយកនូវសំណើគម្រោងមួយចំនួនទៀតទាក់ទងទៅ ជំនួយបច្ចេកទេស ដំណាំ ការបង្កើតមន្ទីរពិសោធន៍គុណភាពពូជដំណាំ មជ្ឈមណ្ឌលកែច្នៃគ្រាប់ពូជ និងគម្រោងមួយចំនួនទៀត ដោយត្រូវលើកសំណើតាមរយៈស្ថានទូតឥណ្ឌាប្រចាំនៅកម្ពុជា ៕

 

 

កូនបំណុលរបស់ធនាគារអាស៊ីវឌ្ឍនៈចំកាត់(ABA)កំពុងប្រឈម ភ័យខ្លាចធនាគារលក់ឡៃឡុងផ្ទះរបស់គាត់ក្នុងតម្លៃទាប

ខេត្តកំពង់ធំ៖គ្រួសារកូនបំណុលរបស់ធនាគារអាស៊ីវឌ្ឃនៈចំកាត់(ABA) នៅភូមិត្រស់ ឃុំបល្ល័ង្កស្រុកបារាយ ខេត្តកំពង់ធំ កំពុងភ័យខ្លាចរងការលក់ឡៃឡុងផ្ទះរបស់ខ្លួន ព្រោះខ្លួនជាកូនបំណុលមិនបានបង់ប្រាក់ប្រចាំខែឲ្យបានទៀងទាត់តាមកិច្ចសន្យារបស់ធនាគារ(ABA)សាខាស្រុកបារាយណ៏។

លោកពូថោងឡូញ និងមីងកែសេងហន ជាគ្រួសារកូនបំណុលរបស់ធនាគារអាស៊ីវឌ្ឍនៈដែលបានខ្ចីលុយចងការធនាគារ(ABA)ចំនួនសរុប២៨០០០$ (២ម៉ឺនប្រាំបីពាន់ដុល្លាអាមេរិក)ដោយបានសន្យាបង់រំលួសជាប្រចាំខែក្នុង១ខែៗមានទឹកប្រាក់ចំនួន៧០០$ ហើយមានរយៈពេល៦ឆ្នាំទើបចប់ តែមកដល់ដើមខែឧសភាឆ្នាំ២០១៧នេះ គ្រួសារកូនបំណុលបានបង់ប្រាក់ប្រចាំខែចំនួន១២ខែហើយ ចំនែកប្រាក់ត្រូវបង់ប្រចាំខែឧសភានេះ ពួកគាត់មិនទាន់មានប្រាក់ទេ! ព្រោះគ្រួសាររបស់គាត់ធ្លាក់ខ្លួនឈឺ ហើយមុខរបរ គាត់រាល់ថ្ងៃគឺលក់ទឹកកកនៅផ្ទះសម្រាប់ចិញ្ចឹមជីវិត។
គ្រួសារកូនបំណុលនេះបានបន្តថា៖ប្រាក់ដែលគាត់បានខ្ចីធនាគារ ចំនួន២៨០០០$នេះ គឺគាត់បានយកសង់ផ្ទះសម្រាប់បង្កើតដេប៉ូលក់ទឹកកកបោះដុំនិងលក់រាយ តែចូលមកដល់ខែវស្សា ទឹកកកលក់មិនសូវដាច់សោះជាហេតុផលធ្វើឲ្យគាត់រកប្រាក់ពុំសូវបានទើបបណ្តាលខកខានដល់ការបង់លុយប្រចាំខែ! ដោយសារតែភាពយឺតយ៉ាវនេះហើយ ទើបខាងធនាគារ(ABA)បានចេញលិខិត១ច្បាប់ឲ្យគ្រួសាររបស់គាត់ យកប្រាក់ប្រចាំឧសភាទៅបង់ឲ្យធនាគារនៅត្រឹមរសៀលថ្ងៃទី៩ខែមិថុនា បើពុំដូច្នេះទេធនាគារនិងអនុវត្តទៅតាមច្បាប់។
ជាមួយគ្នានេះ មីងកែសេងហន ជាគ្រួសារកូនបំណុលបានសូមសំណូមពរដល់ធនាគារថា! សូមឲ្យពន្យាពេលដល់គាត់ចំនួន៥ខែដើម្បីលក់ផ្ទះរបស់គាត់ទំហំ៤;៥មx១២មតម្លៃ៤៥០០០$ ហើយរយៈពេល៥ខែគាត់សុំបង់តែការប្រាក់ បើផុតរយៈពេលនេះគាត់ព្រមប្រគល់ឲ្យតែម្តង។
លោកឌុលវិចិត្រ ប្រធានសាខាធនាគារស្រុកបារាយណ៏បានប្រាប់អ្នកយកពត៍មានថា៖ រឿងចេញលិខិតនេះគឺមិនមែន លិខិតសម្រេចលក់ឡៃឡុងផ្ទះទេ គឺគ្រាន់តែជាលិខិតជូនដំណឹងឲ្យកូនបំណុលត្រូវយកប្រាក់ទៅបង់ ព្រោះគាត់បានហួសការកំណត់បង់ប្រាក់២០ថ្ងៃហើយជូនដំណឹងលើកទី២ មានអាជ្ញាធរចូលរួមចុះវាយតម្លៃនិងលើកទី៣មានមេធាវី របស់ធនាគារនិងស្ថាប័នតុលា ទើបអាចសម្រចបាន ហើយភាគីធនាគារចង់កូនបំណុលនិយាយល័ក្ខណាមួយឲ្យបានលាស់ដើម្បីខាងធនាគារ ឆ្លងយោបល់ទៅថ្នាក់លើជួយបន្ធូបន្ថយដល់កូនបំណុ៕

មន្ដ្រីអះអាងថា៖”កងកម្លាំងមួកខៀវកម្ពុជាកំពុងស្ថាបនាផ្លូវ១០៦គីឡូម៉ែត្រជូនពលរដ្ឋអាហ្វ្រិកកណ្តាល”

ភ្នំពេញ: កងកម្លាំងវិស្វកម្ម នៃកងកម្លាំងមួកខៀវកម្ពុជា បំពេញបេសកកម្មរបស់អង្គការសហប្រជាជាតិនៅសាធារណរដ្ឋអាហ្វ្រិកកណ្តាល កំពុងស្ថាបនាផ្លូវ ដែលមានប្រវែងជាង១០០គីឡូម៉ែត្រ នៅតំបន់ Bangassou ទៅកាន់តំបន់ Malaka ជូនប្រជាជនអាហ្វ្រិកកណ្តាលជាប្រទេស កំពុងមានសង្គ្រាមស៊ីវិល។
លោកវរសេនីយឯក ពេជ្រ សម្បត្តិ មេបញ្ជាការកងកម្លាំងវិស្វកម្ម លេខ៤៥៩ នៃកម្លាំងរក្សាសន្តិភាពរបស់កម្ពុជា កំពុងបេសកកម្មនៅសាធារណរដ្ឋអាហ្វ្រិកកណ្តាល បានប្រាប់ហង្សមាស តាមសារអេឡិកត្រូនិច្ច នៅថ្ងៃទី៨ ខែមិថុនា ឆ្នាំ២០១៧មកថា ៖“កម្លាំងមួកខៀវកម្ពុជា បច្ចុប្បន្នកំពុងបន្តសាងសង់ផ្លូវ និងស្ពានឈើ ដែលមានចំងាយ១០៦គីឡូម៉ែត្រ ជូនដល់ប្រជាពលរដ្ឋអាហ្វ្រិកកណ្តាល ងាយស្រួល ក្នុងការធ្វើដំណើឆ្លងកាត់ពីតំបន់ Bangassou ទៅ Malaka ជាចំណុចដែលមានសង្រ្គាមស៊ីវិល រវាងអ្នកកាន់សាសនាគ្រីស្ទ និងអ្នកកាន់សាសនាមូស្លីម”។
លោកបានបញ្ជាក់បន្ថែមថា “កងយោធាមួកខៀវកម្ពុជាដែលបាននិងកំពុងបំពេញបេសកកម្មរក្សាសន្តិភាពក្រោមឆត្ររបស់អង្គការសហប្រជាជាតិ នៅសាធារណរដ្ឋអាហ្វ្រិក កណ្តាល បានបង្ហាញនូវឆន្ទៈមុតស្រួចក្នុងការបំពេញបេសកកម្មរបស់ខ្លួនដោយគ្មានការរាថយឡើយ ទោះបីជាមានកម្លាំងមួកខៀវកម្ពុជា៤នាក់ បានពលីជីវិតនាពេលថ្មីៗកន្លងទៅក្នុងពេលកំពុងបំពេញបេសកកម្មដោយសកម្មភាពពួនស្ទាក់វាយប្រហារ ដោយក្រុមពួកឧទ្ទាមAnti Balaka (ពួកសានាគ្រីស្ទជ្រុលនិយម) ច្រើនរយនាក់នៅក្នុងតំបន់បេសកកម្ម MINUSCA កាលពីយប់ថ្ងៃទី៨ ខែឧសភា ឆ្នាំ២០១៧ ក៏ដោយ។
លោកមេបញ្ជាកងយោធាមួកខៀវកម្ពុជាវិស្វកម្មលេខ៤៥៩រូបនេះ បានអោយដឹងថា ស្ពានដែលត្រូវស្ថាបនាតាមបណ្តោយផ្លូវពីតំបន់Bangassou ឆ្ពោះទៅកាន់តំបន់Malaka មានចំនួនបីកន្លែង ប៉ុន្តែជាញឹកញាប់បន្ទាប់ពីកងកម្លាំងវិស្វកម្មស្ថាបនារួចត្រូវរងការបំផ្លាញពីសំណាក់ពួកឧទ្ទាមជានិច្ច។ ចាប់តាំងពីក្នុងអំឡុងឆ្នាំ២០១៦កន្លងទៅកងកម្លាំងវិស្វកម្មមួកខៀវកម្ពុជាបានសម្រេចស្ថាបនាបានរួចរាល់នូវផ្លូវប្រវែង២០៨គីឡូម៉ែត្រ។
ដោយឡែកក្នុងឆ្នាំ២០១៧នេះ កងកម្លាំងមួកខៀវវិស្វកម្មកម្ពុជាបានបន្តការងារក្នុងការស្ថាបនាផ្លូវនៅសាធារណរដ្ឋអាហ្វ្រិកកណ្តាលចាប់ពីដើមឆ្នាំ មកទល់នឹងដំណាច់ខែឧសភា ឆ្នាំ២០១៧កន្លងទៅនេះ សម្រេចបានលទ្ធផលប្រវែងផ្លូវ ១០៦គីឡូម៉ែត្រ ហើយបាននិងកំពុងបន្តការងារស្ថាបនាផ្លូវខាងលើនេះ ជាបន្តទៀត។
សាធារណរដ្ឋអាហ្វ្រិកកណ្តាល ជាប្រទេសកំពុងពើបប្រទះនូវសង្គ្រាមស៊ីវិល រវាងពួកឧទ្ទាម និងកម្លាំងរដ្ឋាភិបាលអាហ្វ្រិកកណ្តាល នៅបណ្តាច់ខែឧសភា ឆ្នាំ២០១៧ លោក វរសេនីយ៍ឯក ពេជ្រ សម្បត្តិ អោយដឹងថា កងកម្លាំងមួកខៀវកម្ពុជាក្នុងកងឯកភាពកង វរសេនាតូចសំណង់ផ្តេកនៅBangassou ដែលរងការវាយប្រហារពីក្រុមឧទ្ទាម នាពេលថ្មីៗនៅឡើយនោះ បានចេញធ្វើសកម្មភាពស្ថាបនាស្ពានចំនួនបីកន្លែងនៅតំបន់Malakaដែលមានចម្ងាយពីទីតាំងប៉ុស្តិ៍ប៉ម ជួរមុខBangassou ប្រមាណជា១២៥គីឡូម៉ែត្រ។ ប៉ុន្តែអ្វីដែលគួរឱ្យកត់សម្គាល់នោះក្បួនដំណើរចេញទៅស្ថាបនាស្ពាននាពេលនោះ ដោយមានកងកម្លាំងយោធាមួកខៀវបង់ក្លាដេសជាអ្នកបើកផ្លូវនាំមុខ និងកងយោធាមួកខៀវម៉ារ៉ុកជាអ្នកការពារពីខាងក្រោយក្តី ក៏នៅតែត្រូវបានរងការពួនស្ទាក់វាយប្រហារពីសំណាក់ឧទ្ទាម Balaka ដដែលផងដែរ។
ចំពោះការវាយប្រហារពីក្រុមឧទ្ទាមខាងលើនេះ លោក នាយឧត្តមសេនីយ៍ សែមសុវណ្ណនី អគ្គនាយកមជ្ឈមណ្ឌលជាតិរក្សាសន្តិភាព បានប្រាប់ហង្សមាសតាមទូរស័ព្ទមកថា “ពុំមានកម្លាំងយោធាមួកខៀវណាម្នាក់រងគ្រោះថ្នាក់ ពីសកម្មភាពវាយប្រហារខាងលើនេះ ឡើយ”។ ហើយកម្លាំងមួកខៀវកម្ពុជា នៅតែបន្តការងារបមពេញបេសកកម្ម និងស្ថាបនាផ្លូវនេះដដែល ជាមួយគ្នាកម្លាំងកម្ពុជាក៏រកយុទ្ធសាស្រ្តដើម្បីពិភាក្សាចរចារណាមួយជាមួយកម្លាំងឧទ្ទាម ដើម្បីស្វែករកសន្តិភាពទាំងអស់អ្នក គឺលុបបំបាត់នូវជម្លោះផ្ទៃក្នុង៕

 

មន្ដ្រី៖ភ្នំពេញមានតំបន់បូរីសរុបចំនួន១៣៤កន្លែងឯអគារកំពស់៥ជាន់មានចំនួន៧៩១

ភ្នំពេញ៖ក្រសួងរៀបចំដែនដីនគរូបនីយកម្មនិងសំណង់បានជំរុញឲ្យមានការប្រកួតប្រជែងលើវិស័យសំណង់ស្ថាបត្យកម្មនិងការតុបតែងក្នុងអគារឲ្យបានទូលំទូលាយបន្ថែមទៀតដើម្បីបង្កើនកិត្យានុភាពផ្នែកវិស័យនេះទៅលើឆាកអន្តរជាតិ។
លោកភឿង សុភ័ណរដ្ឋលេខាធិការក្រសួងរៀបចំដែនដីនគរូបនីយកម្មនិងសំណង់បានជំរុញឲ្យមានការរៀបចំការប្រកួតប្រជែងផ្នែក ស្ថាបត្យកម្មដើម្បីឲ្យវិស្វករម្នាក់ៗខិតខំស្រាវជ្រាវរិះរកនូវគំនិតថ្មីៗបន្ថែមទៀតធ្វើយ៉ាងណារក្សាឲ្យបាននូវអត្ថសញ្ញាណជាតិខ្មែរតាមបែបសម័យទំនើប។
មានប្រសាសន៍នៅក្នុងពិព័រណ៍អន្តរជាតិស្តីពីស្ថាបត្យករនិងតុបតែងកម្ពុជាឆ្នាំ២០១៧លើកទី២នៅមជ្ឈមណ្ឌលកោះពេជ្រនៅព្រឹកថ្ងៃទី៨ឧសភាលោកបានឲ្យដឹងទៀតថាការប្រកួតប្រជែងលើវិស័យសំណង់ស្ថាបត្យកម្មនិងតុបតែងក្នុងអគារនេះបានជួយច្រើនណាស់ដល់ប្រទេសកម្ពុជាដោយបានបង្ហាញនូវអត្ថសញ្ញាណខ្មែរ ខណៈភ្លៀវទេសចរអន្តរជាតិជាច្រើនមកទស្សនានៅប្រទេសកម្ពុជាដោយសារតែគេចង់ឃើញសំណង់ស្ថាបត្យកម្មរបស់ខ្មែរពិតៗហើយនឹងផ្តល់អត្ថប្រយោជន៍ជាច្រើនទៀតដល់សេដ្ឋកិច្ចជាតិ។
លោកបានបន្ថែមថា៖”បច្ចុប្បន្ននេះវិស័យសំណង់នៅកម្ពុជាមានការរីកចំរើនយ៉ាងខ្លាំងក្នុងនោះគ្រាន់តែអគារខ្ពស់ៗនៅរាជធានីភ្នំពេញចាប់ពី៥ជាន់ឡើងទៅមានរហូតដល់ទៅ៧៩១អគារនិងបណ្តុំលំនៅឋានមានលក្ខណៈជាបូរីមានចំនួន១៣៤ទីតាំង”។
តែយ៉ាងណាក៏ដោយឯកឧត្តមបានបញ្ជាក់ថាសំណង់ខ្ពស់ៗនិងបូរីទាំងនោះសាងសង់ដោយស្ថាបត្យករ វិស្វករនិងពលករភាគច្រើនជាជនជាតិបរទេសដូចជាថៃ សឹង្ហបូរី ចិន ជប៉ុន អាឡឺម៉ង់ បារាំងនិងអង់គ្លេសជាដើម។ចំណែកឯវិស្វករ ស្ថាបត្យករនិងកម្មករខ្មែរមានតិចតួចទេដោយសារយើងខ្វះធនធានននិងជំនាញច្បាស់លាស់។ជាក់ស្តែងក្នុងចំណោមអ្នកធ្វើការខាងវិស័យសំណង់នេះជាង២០ម៉ឺននាក់មានតែវិស្វករ ស្ថាបត្យករនិងកម្មករខ្មែរប្រមាណពី៤ទៅ៦ម៉ឺននាក់ប៉ុណ្ណោះកំពុងធ្វើការនៅទីក្រុងភ្នំពេញ។
លោក ស៊ិន សុជាតិ ប្រធានសមាគមស្ថាបត្យករកម្ពុជាបានមានប្រសាសន៍ថា ស្ថាបត្យករជាអ្នកមានទំនួលខុសត្រូវខ្ពស់ក្នុងការពារអាយុជីវិតមនុស្សក្នុងការប្រើប្រាស់អគារតូចធំ។ដូចនេះស្ថាបត្យករត្រូវយកចិត្តទុកដាក់លើក្រមសីលធម៌ឲ្យបានខ្ជាប់ខ្ជួនពិសេសត្រូវផ្តោតការយកចិត្តទុកដាក់លើសុវត្តិភាពមនុស្ស សុវត្តិភាពសង្គមនិងសុវត្តិភាពបរិស្ថាននិងវប្បធម៌ជាតិផងដែរ៕

ជម្រើសជាតិកម្ពុជាចាញ់ឥណ្ឌូនេស៊ី២ដល់សូន្យ

ភ្នំពេញ៖ម្ចាស់ផ្ទះ ជម្រើសជាតិជាតិកម្ពុជា រហ័សនាម គោព្រៃកម្ពុជា បានប្រកួតចាស់ក្រុមភ្ញៀវ ជម្រើសជាតិ ឥណ្ឌូណេស៊ី ដោយលទ្ធផលបច្ចេកទេស ០ទល់២ ដោយ១គ្រាប់ នៅតង់ទី១ និង១គ្រាប់ទៀត នៅចុងតង់ទី២។
នេះជាការប្រកួតកម្តៅសាច់ដុំរបស់កម្ពុជា ដើម្បីត្រៀមការប្រកួតផ្លូវការ វគ្គជម្រុះក្នុងពូលC ជាមួយជម្រើសជាតិ អាហ្គានីស្ថាន នាថ្ងៃទី១៣ មិថុនា ២០១៧ ខាងមុខនេះ នៅពហុកីឡដ្ឋានជាតិកម្ពុជា នៃព្រឹត្តិការណ៍បាល់ទាត់ទ្វីបអាស៊ី AFC ASIAN Cup ២០១៩ នៅអារ៉ាប់រួម
ក្រុមជម្រើសជាតិកម្ពុជា ក្រោមការដឹកនាំពីគ្រូបង្វឹកសញ្ជាតិប្រេស៊ី លោក Leonardo Vitorino ដែលបាន ប្រមូលផ្តុំហ្វឹកហាត់នេះមានសមាជិកចំនួន២៥រូប ក្នុងនោះមានកីឡាករខ្សែប្រយុទ្ធ ចាន់ វឌ្ឍនាកាផងដែរ ដែល ទើបនឹងវិលត្រឡប់មកពីប្រកបអាជីពបាល់ទាត់ លំដាប់ទី៣ នៅប្រទេសជប៉ុន។
ក្រុមកម្ពុជា ដែលនឹងត្រូវកម្តៅសាច់ដុំជាមួយឥណ្ឌូណេស៊ី នេះជាជំនួបដ៏សំខាន់មួយ សម្រាប់ការប្រកួត ជាមួយក្រុមអាហ្គានីស្ថាន វគ្គជម្រុះពានរង្វាន់ AFC Asian Cup 2019 ពូលC នាថ្ងៃទី១៣ មិថុនា ឆ្នាំ២០១៧។ ចំណែកឯក្រុមជម្រើសជាតិឥណ្ឌូណេស៊ីក៏បានមកដល់ទឹកដីកម្ពុជារួចហើយដែរ កាលពីល្ងាចថ្ងៃចន្ទម្សិលមិញ ដើម្បីជួបជាមួយក្រុមម្ចាស់ផ្ទះកម្ពុជា នៅពហុកីឡដ្ឋានជាតិ អូឡាំពិក។ សម្រាប់ព្រឹត្តិការណ៍បាល់ទាត់ទ្វីបអាស៊ី វគ្គចែកពូល AFC ASIAN Cup 2019 Qualifier Final Round នេះ មាន៦ពូល។
ដោយឡែកសម្រាប់វគ្គជម្រុះ ក្នុងពូល C មាន៤ក្រុមដែរ គឺកម្ពុជា, អាហ្គានីស្ថាន, វៀតណាម និងក្រុមហ្សកដង់ ដោយក្រុមទាំងអស់នឹងត្រូវជួបគ្នាវិលជុំក្នុងពូលចំនួន២ជើង ដែលត្រូវប្តូរទឹកដីគ្នាម្តងម្នាក់។ ក្រុមទាំង៤ ក្នុងពូល C នេះលេងបាន១ប្រកួតដូចគ្នា ដោយក្រុមម្ចាស់ផ្ទះហ្សកដង់ធ្លាប់បានបំបាក់ក្រុមភ្ញៀវ កម្ពុជាយ៉ាងចាស់ដៃ ដោយលទ្ធផល ៧ទល់០ កាលពីថ្ងៃទី២៨ មីនា ឆ្នាំ២០១៧ ខណៈអាហ្គានីស្ថាន និងក្រុម វៀតណាម ចែកគ្នាម្នាក់១ពិន្ទុ បន្ទាប់ពីរក្សាលទ្ធផលស្មើគ្នា ១ទល់១. សូមបញ្ជាក់ថា ប្រវត្តិជួបគ្នារវាងក្រុមជម្រើសជាតិទាំង២ កម្ពុជា-ឥណ្ឌូនេស៊ី ធ្លាប់បានជួបគ្នាចំនួន២៣ លើក ចាប់តាំងពីឆ្នាំ១៩៦៥ មក ទាំងក្នុងជំនួបមិត្តភាពអន្តរជាតិ និងជំនួបពានរង្វាន់ផ្លូវការនានាផងដែរ ដោយក្នុងនោះជម្រើសជាតិឥណ្ឌូនេស៊ី ឈ្នះរហូតដល់១៩ដង និងជម្រើសជាតិកម្ពុជាធ្លាប់ឈ្នះ ២ដង និងក្រៅពី នេះស្មើចំនួន២ដង៕

ព័ត៌មានផ្សាយ​ផ្ទាល់​ទាន់​ហេតុ​ការណ៍​(video)


សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

ព័ត៌មានជាតិ​ពេល​យប់​


សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

សិល្បៈកម្សាន្ត

Angkor-10-7-2015

chipmong-lang-10-07-2015

Cambodia-10-07-2015-new

MC-col-10-7-2015

angkor-puro-10-07-2015

Pepsi-10-07-2015

22-10-2015-flora

santana-22-10-2015

8-4-2016-banner

GreenICT Technology Co., Ltd

gps-new

verte2