vigor-new

 

ហង្សមាស the voice-2-2-16 cambodianidol-2 Money drop killer gotodance Hm all

ហង្សមាស

the voice-2-2-16

cambodianidol-2

Money drop

killer

gotodance

Hm all

ads-tel-true

អភិបាលខេត្តអំពាវនាវអោយមន្ដ្រីផ្ដល់ធុងអនាម័យដល់សាលារៀនក្នុងទិវាបរិស្ថានជាតិ និងទិវាបរិស្ថានអន្តរជាតិ

ត្បូងឃ្មុំ៖ នៅព្រឹកថ្ងៃទី៨ ខែមិថុនា ឆ្នាំ២០១៧ លោក អភិបាលរងខេត្តត្បូងឃ្មុំ បានស្នើសុំឲ្យមន្ទីរបរិស្ថានខេត្ត ផ្តល់ធុងអនាម័យដាក់សំរាម ចំនួន៥ ដល់វិទ្យាល័យ ហ៊ុន សែន ខ្នារ ដើម្បីជាប្រយោជន៍ធ្វើឲ្យមាន អនាម័យល្អ បរិស្ថានស្អាត និងជំរុញឲ្យលោកគ្រូ អ្នកគ្រូ សិស្សានុសិស្ស នាំគ្នាធ្វើអនាម័យបរិស្ថាន ធ្វើការប្រឡងប្រណាំងយល់ដឹងពីបរិស្ថាន សម្រាប់សិស្សវិទ្យាល័យនេះផងដែរ ។
លោក ហួរ ពិសិដ្ឋ ប្រធានមន្ទីរបរិស្ថានខេត្តបានថ្លែងថា: នៅលើពិភពលោក សកម្មភាពរបស់មនុស្សបានជះឥទ្ធិពលយ៉ាងខ្លាំង ដល់បំរែបំរួលបរិស្ថានធម្មជាតិ ។ ដូច្នេះធនធានធម្មជាតិភាគច្រើនមានកម្រិត បើយើងទាញផលពីបរិស្ថានធម្មជាតិហួសប្រមាណ វានិងអស់នៅថ្ងៃណាមួយ ។ ការបញ្ចេញសំណល់ច្រើនពេកទៅក្នុងបរិស្ថាន ក៏មានឥទ្ធិពលអវិជ្ជមានដែរ ។ ម៉្យាងវិញទៀត ការយកអ្វីផ្សេងច្រើនហួសទៅជំនួស ធនធានធម្មជាតិ ក៏មានឥទ្ធិពលអវិជ្ជមានដែរ ។ ការចោលសំរាមតាមផ្លូវថ្នល់ ទីសាធារណៈពាសវាលពាសកាល និងការដឹកសំរាមទៅចាក់ពុំចំគោលដៅ ធ្វើឲ្យទីប្រជុំជនបាត់បង់សោភ័ណ្ឌភាពបង្កើតមេរោគប៉ះពាល់សុខភាពសាធារណៈ ។ ម៉្យាងទៀតការបង្ហូរទឹកស្អុយ សំណល់រាវ តាមលំនៅដ្ឋាន សណ្ឋាគាររមណីដ្ឋានសិប្បកម្មនានា ដោយគ្មានអាងស្តុកច្រោះ ក៏ធ្វើឲ្យទឹកត្រូវបំពុលផងដែរ ។
លោកបានបន្ដថា៖និយាយរួម អ្វីៗដែលជាធនធាន និងភាពបរិសុទ្ធសំរាប់ទ្រទ្រង់ជិវិតមនុស្ស ត្រូវបានកាត់បន្ថយ និងអស់គុណភាព ជាបណ្តើរៗ ហើយឈានទៅបាត់បង់ទាំងស្រុង បើយើងជំនាន់នេះ មិនមានវិធានការរាំងខ្ទប់ស្កាត់ឲ្យបានទាន់ពេលវេលា ។
ប៉ុន្មានឆ្នាំចុងក្រោយនេះ យើងសង្កេតឃើញនៅកម្ពុជាយើងមានរដូវកាលលែងទៀងទាត់ ជាហេតុជះឥទ្ធិពលអាក្រក់ដល់ការបង្កបង្កើនផលរបស់កសិករ ។ ទន្ទឹមនោះដែរយើងសង្កេតឃើញមានការកកើតប្រភេទសត្វចង្រៃជាច្រើនអនេក បំផ្លាញដំណាំកសិកម្មរបស់កសិករយើង កើតមានខុសប្រក្រតី ។ ធនធានព្រៃឈើត្រូវបានកាប់បំផ្លាញយ៉ាងអនាធិបតេយ្យ ធ្វើឲ្យព្រៃឈើបាត់បង់ទាំងបរិមាណនិងគុណភាពដែលពុំអាចធ្វើឲ្យមានតុល្យភាពរវាង ការអភិវឌ្ឍ សេដ្ឋកិច្ច បរិស្ថាន និងសង្គម របស់ជាតិយើងបានឡើយ ។
លោក ប៉ែន កុសល្យ អភិបាលរងខេត្តបានប្រសាសន៍ថា មនុស្សគ្រប់រូបមានសិទ្ធិសេរីភាព ទទួលយកធម្មជាតិនូវខ្យល់ស្អាតសម្រាប់ដកដង្ហើម មានទឹកស្អាតសម្រាប់ទទួលទាន មានដីស្អាតសម្រាប់បង្កបង្កើនផល និងមានសមធម៌ក្នុងការបែងចែកភោគផលធម្មជាតិ ហើយមនុស្សម្នាក់ៗ មានសិទ្ធចូលរួមអនុវត្តវិធានការការពារថែរក្សាបរិស្ថាន ទាំងគុណភាព និងបរិមាណ ហើយត្រូវចាត់ថាកិច្ចគាំពាបរិស្ថាន ជាភារកិច្ចយើងទាំងអស់គ្នា ។

សេចក្តីសង្ឃឹមប្រាកដជាមានតិចតួចណាស់ ប្រសិនបើការងារនេះខ្វះការចូលរួមពីប្រជាពលរដ្ឋយើង ផ្ទុយទៅវិញវាជាការជោគជ័យ ប្រសិនបើសហគមន៍ ប្រជាជនកម្ពុជាទាំងមូលចូលរួមអនុវត្តលើកិច្ចអធ្យាស្រ័យការរស់នៅចិញ្ចឹមជីវិតរបស់ខ្លួនដោយចីរភាពជាមួយនឹងបរិស្ថាន និងធម្មជាតិតាមរយៈកាត់បន្ថយសកម្មភាពបំពុលបរិស្ថាន ការប្រែប្រួលអាកាសធាតុ និងការប្រើប្រាស់សន្សំសំចៃធនធានធម្មជាតិ ៕

 

មកលេងភ្នំស្អាងកុំភ្លេចភ្លក់ឪឡឹកអ្នកភូមិតានូ

ភ្នំពេញ៖ឪឡឹកអ្នកភូមិតានូ កំពុងទទួលបានការគាំទ្រពីអ្នកទិញ ធ្វើឱ្យកសិករសប្បាយចិ ត្តត្បិតទទួលបានចំណូលច្រើនធ្វើឱ្យជីវភាពធូរធារ ហើយអ្នកដាំកាន់តែកើនឡើង។

អ្នកស្រី សុខ ហឿន ជាអ្នកលក់ឪឡឹកម្នាក់ក្នុងចំណោមអ្នកលក់ប្រមាណកន្លែង នៅក្នុងភូមិតានូ ឃុំស្អាងភ្នំ ស្រុកស្អាង ខេត្តកណ្តាល បាននិយាយថា ៖អ្នកស្រីបានចាប់របរលក់ឪឡឹកនេះជាង២ឆ្នាំមកហើយ។ អ្នកស្រីបានឱ្យដឹងដែរថា៖ ដំបូងឡើងអ្នកស្រីធ្វើជាកម្មការិនី រោងចក្រកាត់ដែរ ប៉ុន្តែ ដោយសារឃើញអ្នកភូមិនាំគ្នាដាំឪឡឹកលក់ ហើយមានភ្ញៀវគាំទ្រច្រើនផងនោះ អ្នកស្រីក៏លាឈប់ ហើយមកដាំឪឡឹកលក់តែម្តងទៅ នៅលើផ្ទៃដីជាងកន្លះហិចតា។
អ្នកស្រី ក៏បានប្រាប់បន្ថែមដែរថា៖ ជារៀងរាល់ថ្ងៃគិតជាមធ្យមអាចលក់បានចន្លោះពី៦០០០០ទៅ៨០០០០រៀល ប៉ុន្តែ បើផ្ងៃអាទិត្យ ថ្ងៃឈប់សម្រាក ឬក៏ថ្ងៃបុណ្យជាតិផ្សេងៗនោះ គឺលក់ដាច់ជាងរាល់ថ្ងៃ អាចបានពី១០០០០ទៅ២០០០០០រៀលដែរ។
ចំពោះម៉ូយគឺភាគច្រើនជាអ្នកដំណើរដែលឆ្លងកាត់តែម្តង ព្រោះឪឡឹកនៅភូមិតានូនេះ គឺល្បីណាស់សូ ម្បីតែសម្តេចតេជោ ក៏លោកធ្លាប់ចូលទិញឪឡឹកនៅទីនេះដែរ ហើយអ្វីដែលពិសេសនោះគឺ ឪឡឹករបស់យើង គឺដាំតាមគោលការណ៍ធម្មជាតិ ប្រើជីធម្មជាតិលាមកគោ ឬក៏អាចម៍ប្រ ចៀវ និងមិនសូវប្រើជីគីមីដូចនៅតាមតំបន់ផ្សេងៗនោះទេ។
កសិករម្នាក់ដែលកំពុងបេះផ្លែ ឪឡឹក គឺលោក អ៊ុន សារឿន បានប្រាប់ថា គាត់បានចាប់ផ្តើមដាំឪឡឹកនេះ តាំងពីឆ្នាំ១៩៩៦មកម្លេះ ដែលកាលពីដើមឡើយគឺមានតែបួនប្រាំគ្រួ សារប៉ុណ្ណោះ ប៉ុន្តែ មកដល់ពេលនេះ គឺជាង៧០ភាគរយហើយដោយមានបានទុកដីឱ្យទំនេរចោលដូចកាលពីពេលកន្លងមក ធ្វើស្រែរួចមិនដាំដុះអ្វីចាំតែដល់រដូវធ្វើស្រែនោះទេ។
ក សិកររូបនេះ ក៏បានប្រាប់អំពីវិធីសាស្ត្រដាំនិងថែទាំឪឡឹកផងដែរថា មុនពេលដាំគេត្រូវភ្ជួរដី ហាលចោលពី១ខែទៅ១ខែកន្លះ គឺចាប់ភ្ជួរដីហាលចោលក្នុងខែផល្គុន រហូតដល់ធ្លាក់ភ្លៀងទើបចាប់ឆូតជាងរង និងយកគ្រាប់ឪឡឹកនៅដាំ។
ចំណែកឯការថែទាំវិញ គឺមិនមានអ្វីពិបាក នោះទេ គ្រាន់តែមើលថែកុំឱ្យស្មៅកុំឱ្យដុំលប់ឪឡឹក និងស្រោចទឹកខ្លះៗនៅពេលដែលមេ ឃរាំងប៉ុណ្ណោះ ហើយមួយវិញទៀត ឪឡឹកជាប្រភេទដំណាំត្រូវការសើមហើយស្ងួត បើក្តៅ ពេកក៏ពិបាក ហើយបើភ្លៀងច្រើនពេកក៏មានបញ្ហា។
លោកក៏បានបញ្ជាក់ដែរថា៖ ចាប់តាំងពីប្រជាកសិករបែកគំនិតនាំគ្នាងាកមកដាំឪឡឹក លែងទុកដីចោលក្រោយធ្វើស្រែមក ឃើញថាជីវភាពអ្នកភូមិមានភាពប្រសើរឡើង មិនខ្វះខាតដូចកាលពីមុនៗទៀតនោះទេ។
អ្នដំណើរម្នាក់ កំពុងដែរអង្គុយរើសផ្លែឪឡឹក គឺអ្នកស្រី ស្រីអូន រស់នៅភូមិទួលក្រូច ឃុំក្រាំងយ៉ូវ ស្រុកស្អាង បានប្រាប់ថា អ្នកស្រីចូលចិត្តទិញឪឡឹកនៅទីនេះ ព្រោះឪឡឹកនៅទីនេះ ដាំមិនសូវប្រើថ្នាំដូចឪឡឹកដែលលក់នៅឯផ្សារ ដែលយើងមិនស្គាល់ប្រភពនោះទេ ហើយមួយវិញទៀត ឪឡឹកនៅទីនេះមានរសជាតិផ្អែមឆ្ងាញ់ទៀតផង។
ហើយអ្នកស្រីមិនត្រឹមតែទិញយកទៅហូបខ្លួនឯងនោះទេ ថែមទាំងទិញយកទៅផ្ញើបងប្អូននៅឯភ្នំពេញហូបទៀតផង ព្រោះកម្ររកឪឡឹកដាំបែបធម្មជាតិបែបនេះណាស៕

 

 

ក្រសួងទេសចរណ៍ថាកម្ពុជាត្រូវការមគ្គុទ្ទេសក៍ទេសចរណ៍ភាសារចិនប្រមាណជិត៤ពាន់នាក់នៅឆ្នាំ២០២០

ភ្នំពេញ៖ក្រសួងទេសចរណ៍បង្ហាញថា នៅឆ្នាំ២០២០ខាងមុខនេះកម្ពុជាត្រូវការមគ្គុទ្ទេសក៍ទេសចរណ៍ភាសារចិនប្រមាណជិត៤ពាន់នាក់ ដើម្បីបំរើសេចក្តីត្រូវការដល់ភ្ញៀវទេសចរចិនដែលចេះតែមានការកើនឡើងជាបន្តបន្ទាប់។
លោកថោង ខុន រដ្ឋមន្ត្រីក្រសួងទេសចរណ៍បានមានប្រសាសន៍កាលពីពេលថ្មីៗនេះថា មគ្គុទ្ទេសក៍ទេសចរណ៍ភាសារចិនប្រមាណជិត៤ពាន់នាក់នោះ ជាតម្រូវការសម្រាប់តំបន់ទេសចរណ៍នៅភ្នំពេញចំនួនជាង១៥០០នាក់ , នៅសៀមរាបចំនួនជិត២១០០នាក់ ,នៅតំបន់ឆ្នេរជាង២០០នាក់ និងនៅតំបន់ភាគឥសាន្តចំនួនប្រមាណជិត៥០នាក់ ក្នុងអំឡុងរយៈពេល៣ឆ្នាំខាងមុខនេះ។
លោករដ្ឋមន្ត្រីបន្តថា៖” ដើម្បីទទួលបានមគ្គុទ្ទេសក៍ទេសចរណ៍ភាសារចិនប្រកបដោយសមត្ថភាពទាំងនោះ ក្រសួងទេសចរណ៍បានសហការជាមួយវិស័យឯកជនក្នុងការបើកវគ្គបណ្តុះបណ្តាលជំនាញមគ្គុទ្ទេសក៍ទេសចរណ៍នេះជាបន្តបន្ទាប់”។
លោកបានបញ្ជាក់ថា៖” ភ្ញៀវទេសចរចិនជាទីផ្សារទេសចរណ៍ដ៏ធំបំផុតសម្រាប់ ពិភពលោកដែលតម្រូវឲ្យបណ្តាប្រទេសទាំងអស់ក៏ដូចជាប្រទេសកម្ពុជាត្រូវ ត្រៀមខ្លួនក្នុងការទាក់ទាញ យកទេសចរចិន ដើម្បីទទួលបានកំណើនចំណូលក្នុងវិស័យទេសចរណ៍”។
ភ្នាក់ងារទីផ្សារក្រុមហ៊ុន ទេសចរណ៍ឡារូតអង្គរម្នាក់បានប្រាប់ទូរទស្សន៍រស្មីហង្សមាសនៅព្រឹកថ្ងៃទី៣០ឧសភានេះ ដោយសុំមិនបញ្ចេញឈ្មោះថា ក្រុមហ៊ុនអ្នកស្រីបច្ចុប្បន្ននេះ ធ្វើការងារជាមួយក្រុមហ៊ុនទេសចរណ៍មកពីអ៊ឺរ៉ុបដែលធ្វើឲ្យក្រុមហ៊ុនមិនសូវមានតម្រូវការមគ្គុទ្ទេសក៍ជំនាញភាសារចិននោះទេ។ យ៉ាងណាក៏ដោយអ្នកស្រី ក៏គាំទ្រចំពោះតម្រូវការមគ្គុទ្ទេសក៍ទេសចរណ៍ចិនឲ្យកាន់តែច្រើនផងដែរ។
ក្រសួងទេសចរណ៍ បានដាក់ចេញផែនការទាក់ទាញភ្ញៀវទេសចរចិនមកទស្សនាកម្ពុជាឲ្យកាន់ច្រើន តាមរយៈការដាក់ចេញយុទ្ធសាស្រ្តទាក់ទាញទេសចរចិនឆ្នាំ ២០១៦-២០២០ ហើយនិងសៀវភៅសស្តីពី China Ready សម្រាប់ទេសចរចិន។ព្រមទាំងមានយុទ្ធសាស្រ្ត៤ ទៀតរួមមាន៖ ទី១. ពង្រឹង សេវាកម្មពេលមកដល់សម្រាប់ភ្ញៀវទេសចរចិន, ទី២.ការបញ្រ្ជាបការយល់ដឹងសាធារណៈអំពី China Ready ដល់គ្រប់ភាគីពាក់ព័ន្ធក្នុងវិស័យទេសចរណ៍, ទី៣ ការពង្រឹងឧស្សាហកម្មទេសចរណ៍កម្ពុជាសម្រាប់ភ្ញៀវទេសចរចិន និងទី៤ ការបង្កើតការទ្រទ្រង់។ ក្រៅពីនេះ គឺការបង្កើនសេវាកម្មហោះហើរដោយត្រង់ពីចិនមកកាន់កម្ពុជា ដែល ធ្វើឲ្យភ្ញៀវទេសចរចិនមានភាពងាយស្រួលក្នុងការមកធ្វើដំណើរកំសាន្តនៅប្រទេសកម្ពុជាដោយគ្មានភាពស្មុគស្មាញដូចពីកាលមុន។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានបញ្ជាក់ថា ៖”ដើម្បីទទួលបានទេសចរអន្តរជាតិ ជាពិសេសភ្ញៀវទេសចរចិនឲ្យកាន់តែច្រើន រាជរដ្ឋាភិបាលត្រូវតែពង្រឹងគុណភាពបដិសណ្ឋារកិច្ចឲ្យបានកាន់តែល្អ ពិសេសការពង្រឹងគុណភាពលើវត្ថុអនុស្សាវរីយ៍ ទប់ស្កាត់ការក្លែងបន្លំគុណភាពទំនិញ ការរក្សាតម្លៃសមរម្យ ដើម្បីឲ្យ ភ្ញៀវកាន់តែមានជំនឿចិត្តមកលើកម្ពុជា”។
យោងតាមរបាយការណ៍របស់ក្រសួងទេសចរណ៍បានឲ្យដឹងថា ក្នុងត្រីមាសទី១ឆ្នាំ២០១៧នេះ ភ្ញៀវទេសចរអន្តរជាតិ ចំនួន១លាន៥សែននាក់បានមកទស្សនានៅកម្ពុជា ហើយមានកំណើនកំណើនជិត១២ភាគរយក្នុងនោះភ្ញៀវទេសចរចិនមានចំនួនជាង២៧ម៉ឺននាក់ក្នុងកំណើនជិត២៦ភាគរយដែលបរិមាណនេះធ្វើឲ្យភ្ញៀវចិនឈានដល់លំដាប់ថ្នាក់ទី១ ខណៈវៀត​ណាមលេខ២ និងភ្ញៀវទេសចរមកពីអ៊ឺរ៉ុបលេខ៣៕

ក្រុមហ៊ុនអាកាសចរណ៍ AirAsiaប្រ កាសជើងហោះហើរត្រង់ដំបូងមកក្រុងព្រះសីហនុ

ខេត្តព្រះសីហនុ៖ក្រុមហ៊ុនអាកាសចរណ៍ AirAsia នាថ្ងៃព្រហស្បតិ៍ម្សិលមិញនេះ បាន ប្រ កាសថាថ្ងៃជើងហោះហើរត្រង់តំបូងរវាងក្រុងព្រះសីហនុ របស់កម្ពុជានិងក្រុងកូឡាំពួរប្រទេស ម៉ាឡេស៊ី នឹងចាប់ផ្ដើមដំណើរការជាលើកដំបូង នៅថ្ងៃទី៩ខែសីហា ឆ្នាំ២០១៧ ខាងមុខនេះ ។
តាមការ ប្រកាស នេះ ក្រុមហ៊ុន AirAsia នឹងធ្វើការហោះហើរត្រង់ ទៅវិញ ទៅមកពី ខេត្តព្រះសីហនុ ទៅ ក្រុងកូឡាឡាំពួរ ៤ដង ក្នុងមួយសប្តាហ៍នេះបើយោងតាមការបញ្ជាក់ពី លោក Spencer Lee ប្រធាន ពាណិជ្ជ កម្ម ក្រុមហ៊ុន AirAsiaBerhad និយាយថា «ក្រុងព្រះសីហនុ ជាគោលដៅដ៏រំភើបមួយ ដោយសារ មាន ទ្រព្យសម្បត្តិត្បូងថ្មនានា ដែលមិនត្រូវបានស្រាវជ្រាវនៅឡើយ។ ក្នុងនាមជាក្រុមហ៊ុនដឹកអ្នកដំណើរផ្លូវអាកាសនាំមុខគេតម្លៃ ទាបជាងគេ ក្នុងពិភពលោកនិងជាក្រុមហ៊ុនទីមួយ ពីម៉ាឡេស៊ីបើកប្រតិបត្តិការ សម្រាប់ ផ្លូវអាកាសមានតែមួយគត់នេះ យើងចង់បន្តនាំមុខទីផ្សារនេះ ដោយបើកប្រើប្រាស់ទ្រព្យ ដ៏ មានតម្លៃ ដែលមិនទាន់ដឹងក្នុងតំបន់អាស៊ានដូចទីក្រុងមួយនេះ របស់កម្ពុជាទៅកាន់ ពិភព លោក»។ លោកបានបន្តទៀតថា «យើងមានបំណងអភិវឌ្ឍព្រះសីហនុ ឲ្យក្លាយជាចំណុចគោលដៅទេសចរណ៍ដូចគ្នា ហ្នឹងរបៀបAirAsiaបានណែនាំ អំពីរួចមកហើយនូវចំណុចគោលដៅតែមួយគត់ គួរទស្សនារួមមានតំបន់ LuangPrabang តំបន់ Banda Aceh និង Bhubaneswar រួមទាំងតំបន់ដទៃទៀត ហើយយើងខ្ញុំជឿជាក់ថា ការឧទ្ទេសនាមផ្លូវហោះហើរនេះ នឹងជាជំហានដ៏សំខាន់ទីមួយដើម្បីបើកសោនូវជម្រើសការធ្វើដំណើរពីកន្លែងផ្សេងៗច្រើនទៀត សម្រាប់អ្នកទស្សនាចូលមកកាន់ ទីក្រុងមាត់សមុទ្រមួយនេះ»។
ប្រធានមន្ទីរទេសចរណ៍ខេត្តព្រះសីហនុ លោក តាំង សុចិត្តគ្រឹស្នា បានស្វាគមន៍ចំពោះការមកដល់ នៃជើងហោះហើរត្រង់ជាងលើកដំបូងនេះ។ លោករំពឹងថា ការហោះហើរត្រង់នេះ នឹងជំរុញភ្ញៀវទេសចរម៉ាឡេស៊ី មកកាន់ខេត្តព្រះសីហនុ ក៏ដូចជាប្រទេសកម្ពុជា កាន់តែច្រើនឡើងថែមទៀត។ ដើម្បីអបអរការបើកផ្លូវថ្មីនេះ គ្រប់សំបុត្រទាំងអស់មានតម្លៃចាប់ពី៤០ដុល្លារឡើងទៅ សម្រាប់ការសំបុត្រធ្វើដំណើរមួយដង (oneway) ហើយភ្ញៀវទេសចរក៏បានកក់កៅអី ដោយការទិញសំបុត្រចាប់ពីថ្ងៃទី១៧ខែឧសភា ឆ្នាំ២០១៧ ដល់ថ្ងៃទី២១ ខែឧសភា ឆ្នាំ២០១៧សម្រាប់ការធ្វើដំណើរចាប់ពីថ្ងៃទី៩ ខែសីហា ឆ្នាំ២០១៧ ដល់ថ្ងៃទី៥ ខែមិថុនា ឆ្នាំ២០១៨។
សូមបញ្ជាក់ផងដែរថាក្រុមហ៊ុនអាកាសចរណ៍AirAsia ក៏បានបម្រើការហោះហើរផងដែរ សម្រាប់ការហោះត្រង់ពីក្រុងកូឡាឡាំពួរ មកកាន់រាជធានីភ្នំពេញ ជារៀងរាល់សប្ដាហ៍មានចំនួន១៤ដង និងទៅកាន់ក្រុងសៀមរាប រាល់សប្ដាហ៍មានចំនួន១៤ដងផងដែរ ចាប់ពីថ្ងៃទី១៨ ខែឧសភា ឆ្នាំ២០១៧ តទៅ៕

 

រដ្ឋមន្ដ្រី៖កម្ពុជាស្វាគមន៍ទេសចរឥណ្ឌាជាង១ម៉ឺននាក់ក្នុងត្រីមាសទី១

ភ្នំពេញ៖លោករដ្ឋមន្ដ្រីទេសចរណ៍បានអោយដឹងថា៖ ក្នុងឆ្នាំ២០១៦ ទេសចរជនជាតិឥណ្ឌាចេញក្រៅប្រទេសប្រមាណ២០លាននាក់ ក្នុងនោះ មកតំបន់អាស៊ានប្រមាណ ៣,៥ លាននាក់ រីឯមកកាន់កម្ពុជា ក្នុងឆ្នាំ២០១៦ទើបបាន ៤៦.១៣១ នាក់ (កើន ២៥%) ដោយឡែកក្នុងរយៈពេល ៣ខែដើមឆ្នាំ២០១៧ ទេសចរជនជាតិឥណ្ឌាមកកាន់កម្ពុជាចំនួន ១៣.៨១៦ នាក់ កើន ២០% ។ កម្ពុជាមានផែនការទាក់ទាញទេសចរឥណ្ឌាអោយបានប្រមាណ ១០ ម៉ឺននាក់ នៅឆ្នាំ២០២០។លោករដ្ឋមន្ដ្រីបានអោយដឹងនៅក្រោយកិច្ចប្រជុំជាមួយទូតឥណ្ឌាកាលពីម្សិលមិញ។

លោកថោង ខុន រដ្ឋមន្ត្រីក្រសួងទេសចរណ៍គាំទ្រ និងសូមស្វាគមន៍ការលើកឡើងរបស់លោក អគ្គរដ្ឋទូតឥណ្ឌាថា កម្ពុជាគឺជាគោលដៅទេសចរណ៍បែបអាពាហ៍ពិពាហ៍ (Wedding Tourist Destination) និងកិច្ចប្រជុំអន្តរជាតិ (MICE Destination) នៅសៀមរាប-អង្គរ និងនៅភ្នំពេញ។
លោកNaveen Srivasta ឯកអគ្គរដ្ឋទូតឥណ្ឌាប្រចាំកម្ពុជាបានថ្លែងនៅក្នុងឱកាសចូលជួបជំរាបលាឯកឧត្តម ថោង ខុន រដ្ឋមន្ត្រីក្រសួងទេសចរណ៍ កាលពីព្រឹកថ្ងៃទី២៤ ខែឧសភា ឆ្នាំ២០១៧ ដោយស្នើឱ្យឯកឧត្តមរដ្ឋមន្ត្រីបន្តជម្រុញការផ្សព្វផ្សាយទេសចរណ៍កម្ពុជាទៅកាន់ទីផ្សារឥណ្ឌា ពិសេសនៅ Mumbai និង New Delhi ដើម្បីទាក់ទាញទេសចរឥណ្ឌា ជាពិសេសទេសចរកំរិតខ្ពស់ដែលនិយមចូលចិត្តរៀបអាពាហ៍ពិពាហ៍នៅក្រៅប្រទេស។
លោកឯកអគ្គរដ្ឋទូតបានគូសបញ្ជាក់ថា៖ តំបន់សៀមរាប-អង្គរគឺជាគោលដៅសំរាប់ទេសចរណ៍បែបអាពាហ៍ពិពាហ៍ សម្រាប់ជនជាតិឥណ្ឌាដ៏ទាក់ទាញ ដោយផ្សារភ្ជាប់ទៅនឹងវប្បធម៌ ទំនៀមទំលាប់ ប្រពៃណីប្រហាក់ប្រហែលគ្នា ដែលនឹងនាំមកជាមួយនូវក្រុមគ្រួសារ សាច់ញាតិ មិត្តភ័ក្តិ និងភ្ញៀវចូលរួមយ៉ាងច្រើន ហើយពួកគេអាចតភ្ជាប់ទៅតំបន់ឆ្នេរខេត្តព្រះសីហនុ សម្រាប់រាត្រីក្រេបច័ន្ទទឹកឃ្មុំ (Honeymoon)។
ព្រមជាមួយនេះ លោករដ្ឋមន្ត្រីក៍បានស្វាគមន៍គំនិតលើកឡើងថា កម្ពុជាក៏ជាគោលដៅទេសចរណ៍សំរាប់សន្និសីទកំរិតអន្តរជាតិ (MICE-Meeting Incentive Exhibition Convention) ផងដែរ ដែលស្របបច្ចុប្បន្ននេះ អាស៊ានកំពុងជំរុញអនុវត្តស្តង់ដារ MICE អាស៊ាន។ សៀមរាប អង្គរ ភ្នំពេញ និងក្រុងព្រះសីហនុ គឹជាគោលដៅទេសចរណ៍ដ៏ល្អសំរាប់សន្និសីទអន្តរជាតិធំៗ។
លោករដ្ឋមន្ត្រីបានស្នើឱ្យឥណ្ឌាជួយបន្តជម្រុញអោយមានការហោះហើរត្រង់មកកាន់កម្ពុជា (ដែលមកដល់បច្ចុប្បន្ននេះពុំទាន់មាននៅឡើយ) ដូចអនុសាសន៍ដ៏ខ្ពង់ខ្ពស់របស់សម្តេចតេជោ ដែលបានគូសបញ្ជាក់រួចហើយ។កម្ពុជាក៏នឹងខិតខំបង្កើន និងជម្រុញសកម្មភាពឃោសនា ផ្សព្វផ្សាយទៅកាន់គោលដៅទីផ្សារធំៗនៅឥណ្ឌា ពិសេស Mumbai និង New Delhi និងខិតខំជំរុញអោយក្រុមហ៊ុនអាកាសចរជាតិ និងក្រុមហ៊ុនទេសចរណ៍ចុះបញ្ជីក្នុងស្រុកពិចារណាក្នុងការហោះហើរតភ្ជាប់ពីកម្ពុជា-ឥណ្ឌា-កម្ពុជា ផងដែរ។ កម្ពុជាក៏មានប្រជាជនចូលចិត្តធ្វើទេសចរណ៍បែបព្រះពុទ្ធសាសនាទៅកាន់ឥណ្ឌាផងដែរ៕

 

កម្ពុជា-ឥណ្ឌាជំរុញឲ្យមានការហោះហើរត្រង់ទៅវិញទៅមកដើម្បីទាក់ទាញភ្ញៀវទេសចរ

ភ្នំពេញ៖ រដ្ឋមន្ត្រីក្រសួងទេសចរណ៍កម្ពុជា និង ឯកអគ្គរដ្ឋទូតឥណ្ឌាប្រចាំនៅកម្ពុជាដែលចប់អាណត្តិបានជំរុញ មានជើងហោះហើរដោយត្រង់ពីប្រទេសឥណ្ឌាមកកម្ពុជា ឆាប់ៗខាងមុខនេះ ដើម្បីទាក់ទាញភ្ញៀវទេសចរណ៍ឥណ្ឌាឲ្យមកកម្ពុជាកាន់តែច្រើន ខណៈ ដែលចំនួនទេសចរមកពីឥណ្ឌានៅមានចំនួនតិចនៅឡើយ។
ក្នុងជំនួបពិភាក្សាជាមួយ លោក Naveen Srivastava ឯកអគ្គរដ្ឋទូតនៃសាធារណរដ្ឋឥណ្ខាប្រចាំកម្ពុជា ដែលត្រូវបញ្ចប់អាណត្តិ នាព្រឹកថ្ងៃទី២៤ ឧសភា នៅទីស្តីការក្រសួងសទេសចរណ៍ លោកថោង ខុន រដ្ឋមន្ត្រីក្រសួងទេសចរណ៍កម្ពុជាបានមានប្រសាសន៍ថា ប្រទេសកម្ពុជាកំពុងសិក្សាលទ្ធភាពក្នុងការបើកឲ្យមានការហោះហើរដោយត្រង់ពីឥណ្ឌា មកកម្ពុជា តាមរយៈក្រុមហ៊ុន ខេមបូឌាអង្គរអ័រ ,បាស្កាចេស៊ីឌើស្កាយវិង និងក្រុមហ៊ុនហោះហើរបារយ័ន្តដើម្បីឲ្យការហោះហើរនេះ អាចដំណើរការបានលឿន។
លោករដ្ឋមន្ត្រីក្រសួងទេសចរណ៍បន្ថែមថា ៖គម្រោងបើកការហោះហើរដោយត្រង់ពីកម្ពុជាទៅឥណ្ឌា ហើយពីឥណ្ឌាមកម្ពុជាវិញនេះ ភាគីទាំងពីរបានចុះហត្ថលេខារួចរាល់ហើយរង់ចាំតែអ្នកបច្ចេកទេសសិក្សាបន្ថែមប៉ុណ្ណោះ និងអាចដាក់ឲ្យក្រុមហ៊ុនហោះហើរទាំងនោះដំណើរការនៅពេលឆាប់ៗខាងមុខនេះ។
លោកបន្ថែមថា៖ បន្ទាប់ពីមានការហោះហើត្រង់រវាងប្រទេសកម្ពុជា និងឥណ្ឌា និងជំរុញឲ្យអ្នកវិនិយោគឥណ្ឌា និងអ្នកទេសចរឥណ្ឌាមកកម្ពុជាកាន់តែច្រើន ហើយវាជាសញ្ញាល្អសម្រាប់សេដ្ឋកិច្ចរបស់កម្ពុជា។
លោកថុក សុខុម ប្រធាននាយកដ្ឋានកិច្ចសហប្រតិបត្តិការអាស៊ាន នៃក្រសួងទេសចរណ៍បានប្រាប់អ្នកសារព័ត៌មានក្រោយជំនួបទ្វេភាគីរវាងរដ្ឋមន្ត្រីក្រសួងទេសចរណ៍ និងឯកអគ្គរដ្ឋទូតឥណ្ឌានោះថា ប្រទេសឥណ្ឌាស្នើឲ្យកម្ពុជាបង្កើនការផ្សព្វផ្សាយទីផ្សារទេសចរណ៍កម្ពុជាទៅកាន់ប្រជាជនខ្លួនឲ្យបានទូលំទូលាយបន្ថែមទៀត។
ជាមួយគ្នានោះឥណ្ឌានឹងជួយកម្ពុជាក្នុងការងារទាក់ទាញភ្ញៀវទេសចរនេះ ទៅកាន់ក្រុមហ៊ុនទេសចរណ៍នៅឥណ្ឌាដើម្បីធ្វើយ៉ាងណាឲ្យប្រជាជនឥណ្ឌាស្គាល់កម្ពុជាកាន់តែច្បាស់។
លោកថុក សុខុមបានបន្ដថា៖ «ឥណ្ឌាបានរាប់រាប់ថា យើងក៏មានយូហ្គាមួយក្នុងការផ្សព្វផ្សាយទេសចរណ៍ឥណ្ឌា និងសូមឲ្យកម្ពុជាជំរុញធ្វើការផ្សព្វផ្សាយទីផ្សារទេសចរណ៍កម្ពុជា ព្រោះប្រជាជនឥណ្ឌាបានស្គាល់កម្ពុជាហើយ តែស្គាល់តែអង្គរ ដោយឡែកកម្ពុជាទាំងអស់មិនទាន់ស្គាលទេ ។ អញ្ចឹងយើងត្រូវជំរុញធ្វើឲ្យមានការតាំងពិព័ណ៌ធំៗនៅទីក្រុងញូដេលី និងទីក្រុងប៊ូមបៃ ប្រទេសឥណ្ឌា ដោយប្រជាជនឥណ្ឌាចង់ចេញមុខម៉ាត់ច្រើន និងមកកម្ពុជាក្នុងរយៈពេលយូ និងចាយលុយច្រើន»។
លោកNaveen Srivastava ឯកអគ្គរដ្ឋទូតនៃសាធារណរដ្ឋឥណ្ខាប្រចាំកម្ពុជា ក៏បានស្នើឲ្យលោក ថោង ខុន អញ្ជើញទៅប្រទេសឥណ្ឌាដើម្បីសិក្សាពីទីផ្សារទេសចរនៅប្រទេសឥណ្ឌាដោយផ្ទាល់ ដើម្បីពិភាក្សាជាមួយក្រុមហ៊ុនទេសចរណ៍ និងអ្នកជំនាញឥណ្ឌាលើការងារស្រូបយកទេសចរឥណ្ឌាឲ្យមកកម្ពុជា។
លោកក៏បានសន្យាជំរុញឲ្យធនាគារដ៏ធំមួយរបស់ឥណ្ឌាជួយគាំទ្រផ្នែកហិរញ្ញវត្ថុដើម្បីបំរើដល់ការពង្រីកទីផ្សារទេសចរណ៍កម្ពុជាទៅកាន់ពិភពលោក និងប្រទេសឥណ្ឌាដោយផ្ទាល់។
តាមរបាយការណ៍ក្រសួងទេសចរណ៍បានឲ្យដឹងថា កាលពីឆ្នាំ២០១៦កន្លងមកទេសចរឥណ្ឌាបានមកលេងកម្ពុជាមានចំនួនជាង៤ម៉ឺននាក់ ខណៈដែលចំនួននេះ នៅមានកម្រិតតិចតួចនៅឡើយបើប្រៀបទៅនឹងប្រទេសផ្សេងៗនៅកៀកកម្ពុជា។
សូមបញ្ជាក់ថា រហូតមកដល់ពេលនេះ ប្រទេសដែលនៅជិតកម្ពុជា និងនៅក្នុងតំបន់មានជើងហោះហើរដោយត្រង់មកកម្ពុជា រួចមកហើយដូចជាប្រទេសថៃ វៀតណាម ជប៉ុន និងចិនជាដើម។ ក្នុងនោះបើសិនគម្រោងបើកជើងហោះហើរពីឥណ្ឌាដាក់ឲ្យដំណើរបន្ថែមការទៀត វានិងជួយជំរុញឲ្យអ្នកទេសចរអន្តរជាតិកមកម្ពុជាកាន់តែច្រើនឡើងទ្វេដង៕

ក្រសួងពាណិជ្ជកម្មចាប់ផ្តើមអនុវត្តគម្រោងជួយដោះស្រាយបញ្ហាវិបត្តិទីផ្សារកសិកម្មរបស់ប្រជាកសិករ

ភ្នំពេញ៖ ក្រសួងពាណិជ្ជកម្មចាប់ផ្តើមអនុវត្តគម្រោងជួយដោះស្រាយបញ្ហាវិបត្តិទីផ្សារកសិកម្ម របស់ប្រជាកសិករដោយគ្រោងចំណាយថវិការហូតដល់ជាង៦១លានដុល្លា តាមរយៈភ្ជាប់ ផលិតកម្មកសិកម្មទៅនឹងទីផ្សារក្នុងសុ្រកនិងទីផ្សារនាំចេញ។
ក្នុងពិធីប្រកាសដាក់ឲ្យអនុវត្តគម្រោងជំរុញទីផ្សារកសិកម្មខ្នាតតូចនៅព្រឹកថ្ងៃទី២៣ ខែ ឧសភា លោកប៉ាន់ សូរស័ក្តិ រដ្ឋមន្រ្តីក្រសួងពាណិជ្ជកម្មបានមានប្រសាសន៍ថា៖គម្រោងជំរុញទី ផ្សារកសិកម្មនេះធ្វើឡើងតាមរយៈសែ្វងរកកិច្ចសហប្រតិបត្តិការពីគ្រប់ភាគីពាក់ពន្ធ័ទំាងអស់ក្នុងខ្សែសង្វាក់តម្លៃពីអ្នកបញ្ជាទិញអ្នកលក់ ពាណិជ្ជកម្ម និងភ្នាក់ងារផ្តល់សេវាបន្ថែម។ ក្រៅពី នេះគឺការអភិវឌ្ឍន៍ខ្សែសង្វាក់តម្លៃតាមរយៈកៀងគរផ្នែកសង្គម និងអ្នកពាក់ពន្ធ័នានាដើម្បី សម្លឹងមើលការបង្កើតទីផ្សារ គំនិតច្នៃប្រឌិតថ្មីៗតាមរយៈការវិនិយោគសាធារណៈ។

លោកបន្តថា៖ គម្រោងនេះមានយុទ្ធសាស្រ្តឆ្ពោះទៅរកការបង្កើនប្រាក់ចំណូលរបស់កសិករ និងដោះ ស្រាយហានិភ័យតំលៃទីផ្សារសិកម្មដែលកសិករប្រមូលបាន ដោយមានសកម្មភាព អប់រំផ្តល់បច្ចេកទេសធនធាននិងប្រមូលផ្តុំប្រជាកសិករឲ្យដំាដំណាំប្រភេទដូចៗគ្នានៅតាមតំបន់នីមួយៗ ទៅតាម តម្រូវការទីផ្សារ ដែលងាយ​ស្រួលក្នុងការផ្គត់ផ្គង និងយន្តការដោះស្រាយ បានទាន់ពេលវេលា នៅពេលកសិករជួបវិបត្តិទីផ្សារ។
លោកបានលើកជាឧទាហរណ៍ថា សម្រាប់ខេត្តតាកែវ កណ្តាល និងខេត្តកំពត ដោយផ្តោតទៅ លើការចិញ្ចឹមមាន់ ផលិតផលសូត្រ បន្លែ និងស្រូវមួយចំនួន ចំណែកខេត្តកំពង់ចាម ត្បូងឃ្មុំ ក្រចេះ ព្រៃវែង កំពង់ធំ ព្រះវិហារ និងខេត្តមណ្ឌលគីរី គឺផ្តោតសំខាន់ទៅលើដំណាំដំឡូង ស្រូវ សេរីរាង្គ មាន់ និងបន្លែ រីឯខេត្តបាត់ដំបង ប៉ៃលិន សៀមរាប និងខេត្តបន្ទាយមានជ័យផ្តោតលើ ដំណាំស្រូវ ដំឡូង ផលិតកផលសូត្រ និង មៀនតាង៉ែនជាដើម។ ឯឧ.បញ្ជាក់ថា ការកំណត់ ប្រភេទដំណាំប្រចាំតំបន់ដូច្នេះ គឺជាការផ្សារភ្ជាប់សង្វាក់ផលិតកម្មនិងតម្លៃរវាងកសិករ ទីផ្សារ លក់ផលិតផល ឈ្មួញ និងរោងចក្រកែច្នៃប្រចាំតំបន់នីមួយៗ។

លោកបេវ័រ ធារី នាយកកម្មវិធីប្រចាំប្រទេសនៃមូលនិអន្តរជាតិសម្រាប់ការអភិវឌ្ឍន៍វិស័យ កសិកម្មបានគាំទ្រចំពោះគម្រោងដោះស្រាយវិបត្តិតម្លៃទីផ្សារកសិកម្មនេះ ថានឹងជួយធ្វើឲ្យ ប្រជាកសិករកាន់តែមានជីវភាពប្រសើរឡើងហើយជួយជំរុញកំណើនសេដ្ឋកិច្ចជាតិតាមរយៈ ការលើកកម្ពស់វិស័យកសិកម្ម។

លោកបានបញ្ជាក់ថា៖ រាជរដ្ឋាភិបាលត្រូវតែរៀបចំយន្តការនេះ ឲ្យបានច្បាស់ខណៈដែលមូលហេតុដែលនាំឲ្យកសិករតែងតែជួបវិបត្តិគ្មានទីផ្សារនៅពេលប្រមូលផលកន្លងមក ដោយសារឈ្មួញបង្អាប់តម្លៃ និងគ្មានរោងចក្រកែច្នៃផលិតផល រួមទំាងការ ដាំប្រភេទដំណាំដាច់ដោយដុំជាដើម។
យោងតាមរបាយការណ៍គម្រោងជំរុញទីផ្សារកសិកម្មខ្នាតតូចនេះមានរយៈពេល៦ឆ្នាំ ដោយ ចាប់ផ្តើមពីពាក់កណ្តាលឆ្នាំ២០១៧នេះទៅ ហើយ នឹងជួយបង្កើនប្រាក់ចំណូលសម្រាប់ប្រជា កសិករប្រមាណជាង៧ម៉ឺន៥ពាន់គ្រួសារ ខណៈដែលប្រជាកសិករប្រហែល៧៩ភាគរយនៃ ចំនួនប្រជាពលរដ្ឋសរុបកំពុងរស់នៅជនបទពឹងផ្អែកលើរបរកសិកម្ម៕

កម្ពុជាទទួលបានគម្រោងវិនិយោគជាង១ពាន់និងទឹកប្រាក់៤ពាន់លានដុល្លារអាមេរិចក្នុង៤ខែដើមឆ្នាំ

ភ្នំពេញ៖ក្នុងរយៈពេល ០៤ខែ ដើមឆ្នាំ២០១៧ នេះ រដ្ឋាភិបាលកម្ពុជាបានផ្ដល់លិខិតអនុញ្ញាតសាងសង់ចំនួន ១០២០ គម្រោង មានផ្ទៃក្រឡាសំណង់សរុបចំនួន ៥.៦០៥.០០៧ ម៉ែត្រការ៉េ មានតម្លៃប៉ាន់ស្មាន ៤.០២២.៦៥៨.០៤៣ ដុល្លារសហរដ្ឋអាមេរិក បើប្រៀបធៀបទុនវិនិយោគក្នុងរយៈពេលដូចគ្នានឹងឆ្នាំ ២០១៦ ចំនួន ៧១២ គម្រោង មានផ្ទៃក្រឡាសំណង់សរុបចំនួន ៥.៩៣១.៤៨៩ ម៉ែត្រការ៉េ មានតម្លៃប៉ាន់ស្មាន ២.៨០៥.៧៨០.២១៧ ដុល្លារសហរដ្ឋអាមេរិក គឺមានការកើនឡើងប្រមាណ ៤៣.៣៧%។ ទិន្នន័យបុរីលំនៅឋាន និងអគារខ្ពស់ៗ។នេះបើតាមសេចក្ដីប្រកាសរបស់ក្រសួងដែនដីនិងសំណង់បានប្រកាសនៅថ្ងៃនេះ។

ប្រភពបានបន្ដថា៖”គិតចាប់តាំងពីឆ្នាំ ២០០៣ ដល់ ០៤ខែ ឆ្នាំ២០១៧ មានទីក្រុងរណបបុរីលំនៅឋាន និងលំនៅឋានមានលក្ខណៈបុរីសរុបចំនួន (១៣៨/២០១៦) និង ១៤៧ទីតាំង។ គិតចាប់តាំងពីឆ្នាំ២០០៥ ដល់ ០៤ខែ ឆ្នាំ២០១៧ នៅមានអគារខ្ពស់ចាប់ពី០៥ជាន់ឡើងទៅមានចំនួនសរុប (៨៧៦/២០១៦) និង ៩០១អគារ។
គិតចាប់ពីឆ្នាំ ២០០០ ដល់ ០៤ខែ ឆ្នាំ២០១៧ ការបោះទុនវិនិយោគរបស់វិស័យឯកជនមកពីបរទេសមានចំនួន ១៨ប្រទេស មានចំនួន ៣០៤គម្រោង មានផ្ទៃក្រឡាសំណង់សរុប ១៣.២៣៨.១៧០ម៉ែត្រការ៉េ មានតម្លៃប៉ានស្មានទុនវិនិយោគសាងសង់ ៤.៥៣៩.៦០០.៩៦១ដុល្លារសហរដ្ឋអាមេរិក។

អំពីការចុះបញ្ជីក្រុមហ៊ុនប្រកបអាជីវកម្មសិក្សាគម្រោងប្លង់ និងសាងសង់គិតមកទល់រយៈពេល ០៤ខែ ឆ្នាំ២០១៧ ក្រសួងបានចុះបញ្ជីក្រុមហ៊ុនអាជីវកម្មសិក្សាគម្រោងប្លង់ និងសាងសង់ នៅមានសុពលភាពចំនួន ១០១១ក្រុមហ៊ុន ក្នុងនោះ៖ (១)-ក្រុមហ៊ុនសិក្សាគម្រោងប្លង់មានចំនួន ៤១ក្រុមហ៊ុន និង (២)- ក្រុមហ៊ុនសាងសង់ មានចំនួន ៩៧០ក្រុមហ៊ុន។រូបវន្តបុគ្គលសិក្សាគម្រោងបុ្លង់នៅមានសុពលភាពចំនួន ១១៥រូប ក្នុងនោះស្ថាបត្យករ ៨០រូប វិស្វករចំនួន ៣៥រូប។ បានចុះបញ្ជីស្ថាបត្យករក្នុងគណៈស្ថាបត្យករកម្ពុជា ចំនួន ៥៨៨រូប ក្នុងនោះស្ថាបត្យករបរទេស ០៨រូប ជនជាតិជប៉ុនចំនួន ០២រូប នៅទូទាំងប្រទេសមានស្ថាបត្យករសរុបប្រមាណចំនួន ២៥០០នាក់៕

 

សហគមន៍ស្ករត្នោតនៅខេត្ដកំពង់ស្ពឺកំពុងមានទីផ្សារលក់នៅក្នុងស្រុក និងពង្រីកក្នុងតំបន់បន្ថែមទៀត

ខេត្តកំពង់ស្ពឺ៖ប្រធានសហគមន៍កសិកម្មស្ករត្នោតកំពង់ស្ពឺ បានលើកឡើងថា បច្ចុប្បន្នផលិតផល សម្គាល់ភូមិសាស្រ្ត «GI» ស្ករត្នោតកំពង់ស្ពឺកំពុងតែបង្ហាញ ការចាប់អារម្មណ៍ និងបន្ដការ ពង្រីកទីផ្សារទាំងនៅក្នុងស្រុក និងក្នុងតំបន់ថែមទៀត។

លោក ហុង ហីន ប្រធានសហគមន៍ស្ករត្នោតខេត្ដកំពង់ស្ពឺ បានប្រាប់គេហទំព័រ អេគេភី ឱ្យដឹងនៅថ្ងៃទី១៧ ខែឧសភា ឆ្នាំ២០១៧នេះថា អ្វីដែលល្អសម្រាប់ផលិតផល ស្ករត្នោតក្នុងខេត្ដកំពង់ស្ពឺ នោះគឺវាត្រូវបានទទួលស្គាល់ និងការពារនៅក្នុងទីផ្សារ នៅក្នុងប្រទេសថៃ និងប្រទេសវៀតណាមដែលជាទីផ្សារក្នុងតំបន់មួយដ៏ល្អ។

លោកបានបន្ដថា៖" ស្ករត្នោតកំពង់ស្ពឺត្រូវបានចុះបញ្ជីសម្គាល់ភូមិសាស្រ្ដជាលើកដំ បូងកាលពីឆ្នាំ២០១០ បន្ទាប់មក ត្រូវបានទទួលស្គាល់លើផលិតផលស្ករត្នោត ដែលទទួលបានភាពពេញនិយមនៅលើទីផ្សារ និងតម្លៃក៏បន្តកើនឡើងជារៀងរាល់ឆ្នាំ។

លោកបានបន្ថែមថា៖" តាមរយៈការទទួលស្គាល់ នេះហើយបានផ្លាស់ប្តូរជីវភាព រស់នៅរបស់កសិករនៅក្នុង សហគមន៍នេះ កាន់តែប្រសើរឡើង ហើយឧស្សាហកម្មទាំងមូលបានក្លាយជាទីពេញនិយម រហូតមកដល់សព្វថ្ងៃ"។

លោកបានលើកឡើងទៀតថា ៖"តាមរយៈការចុះបញ្ជីសម្គាល់ភូមិសាស្រ្ដ និងឋានៈនេះបានផ្តល់ឱកាស ការងារជាច្រើន កាត់បន្ថយភាពក្រីក្រ និងចំណាកស្រុករបស់បងប្អូនប្រជាពលរដ្ឋ ហើយបង្កើនចំណូល ដល់គ្រួសារ និងសេដ្ឋកិច្ចជាតិ។

ជាមួយគ្នានេះ ការចុះបញ្ជីសម្គាល់ភូមិសាស្រ្ដនេះ បានរក្សាបន្ថែមនូវតម្លៃ ដល់ផលិតផលស្ករត្នោត ជារៀងរាល់ឆ្នាំដែលខុសពីផលិតផលមិនមែនGI រហូតដល់៥០ភាគរយ"។

តែទោះបីយ៉ាងនេះក្ដី បច្ចុប្បន្នការប៉ាន់ប្រមាណប្រាក់ចំណូលរបស់ កសិករមានប្រមាណ៣.០០០ដុល្លារ អាម៉េរិកក្នុងមួយឆ្នាំ ក្នុងការប្រមូលផលស្ករពីដើមត្នោត ហើយតម្រូវការទីផ្សារកំពុងកើនឡើងខ្លាំង ដែលសហគមន៍មិនអាចផ្គត់ផ្គង់ឱ្យបាន គ្រប់គ្រាន់ដល់តម្រូវការទីផ្សារបាននោះទេ។

បានប្រធានសហគមន៍បានបន្ថែមថា សព្វថ្ងៃក្នុងសហគមន៍ស្ករត្នោត ខេត្ដកំពង់ស្ពឺមានសមាជិក សរុប១៧៨នាក់ និងមានដើមត្នោតប្រមាណ ១០០.០០០ដើម៕

 

កម្ពុជារំពឹងថានឹងទទួលទេសចរចិនបានប្រមាណជា២លាននាក់នៅឆ្នាំ២០២០

ក្រុងប៉េកាំង៖កម្ពុជារំពឹងថានៅឆ្នាំ ២០២០ ខាងមុខនេះ ចំនួន ទេសចរចិននឹងកើនឡើង ២លាននាក់ក្នុង មួយឆ្នាំ ហើយទំហំពាណិជ្ជកម្មអាចនឹងកើនឡើងដល់ ៦,០០០ លានដុល្លារផងដែរ។នេះបើតាមគណនីយហ្វេសប៊ុកសម្ដេចហ៊ុនសែនបានផ្សាយនៅថ្ងៃនេះ។

នៅល្ងាចថ្ងៃ១៦ ឧសភា បន្ទាប់ពីបានអញ្ជើញជាអធិបតីក្នុង វេទិកាជំរុញផ្សព្វផ្សាយពាណិជ្ជកម្ម និងទេសចរណ៍ កម្ពុជា-ចិន រួចហើយ សម្តេចអគ្គមហាសេនាបតីតេជោ ហ៊ុន សែន បានអញ្ជើញ ធ្វើសន្និសីទកាសែតដល់អ្នកសារព័ត៌មានចិន នៅសណ្ឋាគារ China World ទីក្រុងប៉េកាំង ប្រទេសចិន។
នៅក្នុងសន្និសីទកាសែតល្ងាចនេះ សម្តេចតេជោ បានឆ្លើយបញ្ជាក់និងបំភ្លឺទៅសារព័ត៌មានចិនអំពី ចំណុចសំខាន់ៗមួយចំនួនដូចខាងក្រោម:
១)សារៈប្រយោជន៍នៃវេទិកាខ្សែក្រវ៉ាត់និងផ្លូវសម្រាប់កិច្ចសហប្រតិបត្តិការអន្តរជាតិ និងផ្លូវសូត្រសមុទ្រ ដែលជាគំនិតផ្តួចផ្តើមរបស់ លោកប្រធានាធិបតីចិន ស៊ីជិនពីង គឺផ្តល់នូវផលប្រយោជន៍សម្រាប់ ប្រទេសក្នុងតំបន់ទាំងអស់ រួមទាំងកម្ពុជាផងដែរក្នុងការកសាងសេដ្ឋកិច្ច និងអភិវឌ្ឍន៍ប្រទេស។
២)ទំនាក់ទំនងជាប្រពៃណីរវាងចិនកម្ពុជាគឺមានជាង២,០០០ឆ្នាំមកហើយ មានលក្ខណៈជាបងប្អូន និងជាមិត្តភ័ក្តិដែលជឿទុកចិត្តគ្នា។ ចិនបន្តគាំទ្រជួយកម្ពុជាទាំងសេដ្ឋកិច្ច និងសង្គមដែលជួយពង្រឹង ដល់ឯករាជ្យភាពនៃនយោបាយកម្ពុជាទៀតផង។ តាំងពីដើមមក គឺកម្ពុជាគាំទ្រ និងទទួលស្គាល់ចិន តែមួយ តាំងពីជំនាន់អតីត សម្តេចព្រះ នរោត្តម សីហនុ ព្រះមហាក្សត្រនៃព្រះរាជាណាចក្រកម្ពុជា ដែលប្រទេសយើងទាំងពីរគោរពអធិបតេយ្យភាពគ្នាទៅវិញទៅមក។ ចំពោះបញ្ហាសមុទ្រចិនភាគខាងត្បូងគឺមិនមែនជាបញ្ហាអាស៊ាន-ចិនទេ គឺជាបញ្ហារបស់ប្រទេសដែលមានការពាក់ព័ន្ឋគ្នា ដែលត្រូវដោះស្រាយដោយសន្តិវិធី ហើយអាស៊ានក៏ត្រូវយល់ដឹងរឿងនេះដែរ។
៣)ទំនាក់ទំនងនិងការតភ្ជាប់រវាងប្រជាជននិងប្រជាជនគឺមានសារៈសំខាន់ណាស់ ដែលជួយអោយ ពិភពលោកមួយមានសណ្តាប់ធ្នាប់ល្អរស់នៅដោយសុខដុមរម្យនា។ ទំនាក់ទំនងគឺអាចធ្វើបានតាម រយៈការផ្លាស់ប្តូរទស្សនៈកិច្ចរវាងយុវជននិងយុវជន តាមរយៈបញ្ញាវ័ន្ត អ្នកសិក្សាស្រាវជ្រាវ ការផ្តល់អាហារូបករណ៍ តាមរយៈកីឡា តាមរយៈពហុវប្បធម៌ តាមរយៈវិទ្យាស្ថាន និងសាកលវិទ្យាល័យ តាមរយៈវិស័យពាណិជ្ជកម្ម និងទេសចរណ៍ជាដើម។
ទន្ទឹមនឹងនោះដែរ គឺ កម្ពុជានឹងមានគម្រោងអភិវឌ្ឍន៍ ថ្មីៗបន្ថែមទៀត ដូចជា ផ្លូវល្បឿនលឿន ព្រលានយន្តហោះថ្មី និងតំបន់សេដ្ឋកិច្ចពិសេសជាដើម។
៤)តំបន់សេដ្ឋកិច្ចពិសេសនៅក្រុងព្រះសីហនុ គឺជាគំនិតផ្តួចផ្តើមរបស់ សម្តេចតេជោ ដែលបានគាំទ្រ ជំរុញអោយបង្កើតឡើង។ សព្វថ្ងៃទីនេះមានក្រុមហ៊ុនជាង១០០ កំពុងវិនិយោគនៅក្នុងតំបន់ នេះ ដែលជានិមិត្តរូបដ៏ធំនៃទំនាក់ទំនងរវាង ប្រទេសទាំងពីរកម្ពុជា-ចិន ដែលបានផ្តល់ឱកាសអោយកម្ពុជា បានកសាង និងអភិវឌ្ឍន៌ប្រទេស។
៥)សម្តេចតេជោ ហ៊ុន សែន តែងតែមកចូលរួមតាំងពិព័ណនៅប្រទេសចិនគឺ ៨ លើកមកហើយ ជាង១០ឆ្នាំមកនេះ ជាពិសេសក្នុងពិពណ៌អាស៊ាន-ចិន នៅណាននីន។ ក្នុងពេលនោះ កម្ពុជាមានតួនា ទីជាអ្នកសម្របសម្រួលអាស៊ាន-ចិន ដែលទទួលបានការគាំទ្រទាំងស្រុងអោយមានពិពណ៌នេះឡើងនៅ ណានីន។ សម្តេចតេជោ គឺជាពលរដ្ឋកិត្តិយសរបស់ណាននីនផងដែរ។
៦)ថ្ងៃនេះ សម្តេចតេជោ ហ៊ុន សែន រីករាយនិង ពេញចិត្តចំពោះលទ្ឋផលនៃកិច្ចប្រជុំពិភាក្សាជាមួយ លោកប្រធានសភាប្រឹក្សានយោបាយប្រជាជនចិន និង លោកប្រធានសភាតំណាងប្រជាជនចិន ជាពិសេស លោកនាយករដ្ឋមន្ត្រី លី ឃឺឈាំង ដែលយើងទាំងអស់គ្នាខិតខំជំរុញសេដ្ឋកិច្ច ពាណិជ្ជកម្ម វិនិយោគ និងទេសចរណ៍អោយមានសន្ទុះលឿនទៅមុខ។ ប្រទេសចិនឆ្នាំក្រោយ យល់ព្រមអោយកម្ពុជា នាំចូលអង្ករ ៣០០,០០០ តោន។ ទន្ទឹមនឹងនេះគឺកម្ពុជាទទួលបាននូវជំនួយឥតសំណងកាន់តែច្រើន ឡើងៗ ព្រមទាំងជំនួយឥណទានការប្រាក់ទាបសម្រាប់កសាងហេដ្ឋរចនាសម្ព័ន្ឋជាដើម។
៧)កម្ពុជារីករាយស្វាគមន៍អ្នកវិនិយោគិនចិនដែលមានបំណងទៅវិនិយោគនៅកម្ពុជា។ ទន្ទឹមនឹងនេះ គឺ ត្រូវយល់ដឹងអំពី នីតិវិធីច្បាប់វិនិយោគដែលមិនសាំញាំស្មុគ្រស្មាញទេ ក្រុមហ៊ុនអាចវិនិយោគគឺអាចបោះ ទុនខ្លួនឯងបាន ១០០% ។ ព័ត៌មានវិនិយោគទាំងនេះគឺអាចទទួលបានតាមរយៈស្ថានទូត អគ្គកុងស៊ុល និងវិស័យឯកជនជាដើម។ កត្តសំខាន់បំផុតនោះគឺ កម្ពុជាមានស្ថិរភាពនយោបាយ ស្ថិរភាពផ្នែកម៉ាក្រូសេដ្ឋកិច្ច ហើយកម្ពុជាមានម្ហូបអាហារចិន និងមានធនធានមនុស្សចេះភាសាចិនយ៉ាងច្រើនដែលជួយដល់ការងារវិនិយោគ៕

ព័ត៌មានផ្សាយ​ផ្ទាល់​ទាន់​ហេតុ​ការណ៍​(video)


ទេសចរណ៍

ទេសចរណ៍

ទេសចរណ៍

ទេសចរណ៍

ទេសចរណ៍

ទេសចរណ៍

ទេសចរណ៍

ទេសចរណ៍

ទេសចរណ៍

ទេសចរណ៍

ទេសចរណ៍

ទេសចរណ៍

ព័ត៌មានជាតិ​ពេល​យប់​


ទេសចរណ៍

ទេសចរណ៍

ទេសចរណ៍

ទេសចរណ៍

ទេសចរណ៍

ទេសចរណ៍

ទេសចរណ៍

ទេសចរណ៍

ទេសចរណ៍

ទេសចរណ៍

ទេសចរណ៍

ទេសចរណ៍

Angkor-10-7-2015

chipmong-lang-10-07-2015

Cambodia-10-07-2015-new

MC-col-10-7-2015

angkor-puro-10-07-2015

Pepsi-10-07-2015

22-10-2015-flora

santana-22-10-2015

8-4-2016-banner

GreenICT Technology Co., Ltd

gps-new

verte2