vigor-new

 

ហង្សមាស the voice-2-2-16 cambodianidol-2 Money drop killer gotodance Hm all

ហង្សមាស

the voice-2-2-16

cambodianidol-2

Money drop

killer

gotodance

Hm all

ads-tel-true

ព្យុះទីហ្វុងតាលីមបានវាយប្រហារប្រទេសជប៉ុននិងជើងយន្ដហោះ៨០០បានលបចោល

ជប៉ុន៖ ព្យុះទីហ្វុង Talim បានបោកបក់លើភាគខាងត្បូងប្រទេសជប៉ុន ដោយធ្វើឲ្យមានភ្លៀងធ្លាក់ជោគជាំ រថភ្លើងត្រូវផ្អាកដំណើរការ និងមានផលប៉ះពាល់យ៉ាងខ្លាំងលើភ្ញៀវទេសចរណ៍។យោងតាមទីភ្នាក់ងារឧតុនិយមជាតិជប៉ុនបានឲ្យដឹងថា ព្យុះទីហ្វុង Talim នេះ បានបោកបក់លើកោះ Kyushu នៅម៉ោង១១និង៣០នាទីម្សិលមិញ ហើយដោយសារមានខ្យល់ខ្លាំង ចរន្តអគ្គិសនីនៅក្នុងខេត្ត Kagoshima ខេត្ត Kumamoto និងខេត្ត Miyazakiត្រូវបានកាត់ផ្តាច់ ដោយប៉ះពាល់ដល់ផ្ទះរបស់ប្រជាពលរដ្ឋជាង៣ពាន់ខ្នង។

ជើងហោះហើរជិត៨០០ក៏ត្រូវបានលុបចោលដែរនៅកោះKyushu និងកោះ Shikoku ដោយធ្វើមានផងប៉ះពាល់ដល់ភ្ញៀវទេសចរណ៍យ៉ាងច្រើន។ភ្ញៀវទេសចរណ៍ជនជាតិចិនម្នាក់បាននិយាយថា គាត់មិនដែលជួបអាកាសធាតុបែបនេះទេ ហើយក៏មិនដែលឃើញខ្យល់ខ្លាំងបែបនេះដែរ។

ប្រព័ន្ធផ្សព្វផ្សាយក្នុងស្រុកមួយបានរាយការណ៍ថា ព្យុះទីហ្វុង Talim នេះក៏បានធ្វើឲ្យមនុស្សបួននាក់បាត់ខ្លូន និង១៧នាក់ផ្សេងទៀតរងរបួសផងដែរ ខណៈអាជ្ញាធរព្រមានពីការបាក់ដី និងរលកធំៗនៅសមុទ្រ។រីឯភ្ញៀវទេសចរណ៍ម្នាក់ទៀតដែលជាជនជាតិជប៉ុនផ្ទាល់បាននិយាយថា គាត់មកពីតំបន់ Sendai ហើយមានគម្រោងត្រឡប់ទៅវិញនៅថ្ងៃស្អែក ប៉ុន្តែត្រូវជាប់គាំងទៅណាមិនរួចឡើយដោយសារព្យុះ Talim នេះ។ ទីភ្នាក់ងារឧតុនិយមជាតិជប៉ុនបានឲ្យដឹងបន្តថា ព្យុះទីហ្វុង Talim នេះ ក្រោយមកបានបោកបក់បន្តទៅភាគខាងជើងកោះ Hokkaido ដោយធ្វើឲ្យមានភ្លៀងធ្លាកយ៉ាងខ្លាំងនៅថ្ងៃច័ន្ទនេះ៕ ស៊ុយឈាង

 

កម្ពុជា-ថៃគ្រោងនឹងដាក់ដំណើរការផ្លូវការនៃច្រកអន្តរជាតិស្ទឹងបទ-នងអាន់នៅចុងឆ្នាំ២០១៧

ភ្នំពេញ: មន្រ្តីជាន់ខ្ពស់នៃប្រទេសកម្ពុជានិងថៃ អះអាងថា នឹងបើកអោយដំណើរការ នៃច្រកអន្តរជាតិស្ទឹង បទ ខេត្តបន្ទាយមានជ័យជាមួយច្រកនងអាន់ ខេត្តស្រះកែវ ជាផ្លូវការនៅចុងឆ្នាំ២០១៧ ក្នុងបំណងបង្កើនការដឹកជញ្ជូនទំនិញឆ្លងកាត់ព្រំដែនប្រទេសទាំងពីរ។
ក្នុងសិក្ខាសាលាស្តីពីការពង្រីកសក្តានុពលពាណិជ្ជកម្មព្រំដែនកម្ពុជា-ថៃ នៅសណ្ឋាគារកាំបូឌីយ៉ាណា នាព្រឹកថ្ងៃទី១២ ខែកញ្ញា នេះ ឯកឧត្តម កឹម ស៊ីថន រដ្ឋមន្រ្តីស្តីទីក្រសួងពាណិជ្ជកម្ម ថ្លែងថា “ពេលដែលច្រកអន្តរជាតិស្ទឹងបទ នឹងបើកអោយដំណើរការនៅចុងឆ្នាំ២០១៧នេះ នឹងជួយកាត់បន្ថយ ការកកស្ទះទំនិញជាច្រើន នៅតាមច្រកអន្តរជាតិប៉ោយប៉ែត ខេត្តបន្ទាយមានជ័យ និងច្រកអន្តរជាតិអូស្មាច់ ខេត្តឧត្តរមានជ័យ”។
ឯកឧត្តមថ្លែងទៀតថា “បច្ចុប្បន្ន ច្រកអន្តរជាតិស្ទឹងបទកំពុងដំណើរការសាងសង់ស្ពាន ដើម្បីភ្ជាប់រវាងព្រំដែននៃប្រទេសទាំងពីរ កម្ពុជា និងថៃ។ ច្រកនេះ នឹងមានទំនិញច្រើនប្រភេទ ត្រូវឆ្លងកាត់ទៅមក ដូចជាកសិផលកសិកម្ម ទំនិញផ្នែកឧស្សាហ៍កម្ម និងប្រភេទទំនិញផ្សេងទៀត”។ ឯកឧត្តមបន្តថា ក្នុងយុទ្ធសាស្រ្តអភិវឌ្ឍន៍សេដ្ឋកិច្ចពាណិជ្ជកម្ម ប្រមុខដឹកនាំប្រទេសទាំងពីរបានដាក់ចេញនូវផែនការបង្កើនទំហំពាណិជ្ជកម្មសរុប អោយសម្រេចបានទឹកប្រាក់ចំនួន១៥ពាន់លានដុល្លាអាមេរិក នៅឆ្នាំ២០២០។
ចំពោះការបើកច្រកអន្តរជាតិស្ទឹងបទ-នងអាន់ ឯកឧត្តម Nuttavudh Photisaro ឯកអគ្គរាជទូតថៃប្រចាំកម្ពុជា ថ្លែងថា “ការដឹកជញ្ជូនទំនិញឆ្លងកាត់រវាងប្រទេសទាំងពីរកម្ពុជា-ថៃ នឹងមានកំណើន កើនឡើងច្រើនថែមទៀត ដោយសារមានភាពងាយស្រួលចរាចរណ៍ទំនិញ”។

ឯកឧត្តមបញ្ជាក់បន្ថែម បន្ទាប់ពីបើកច្រកអន្តរជាតិស្ទឹងបទ នៅចុងឆ្នាំ២០១៧នេះរួច ប្រទេស ទាំងពីគ្រោងបើកច្រកអន្តរជាតិចំនួន៤ផ្សេងទៀត ទី១គឺមានច្រក អានសេះ ខេត្តព្រះវិហារ ជាមួយច្រកអានម៉ា ខេត្តវលាក់ចាក់ថានីប្រទេសថៃ ទី២ ច្រកជប់គគី ខេត្តឧត្តមមានជ័យ និងជាមួយច្រក សែតាគូ ខេត្តបូរីរាំ ទី៣ ច្រកភ្នំដី ខេត្តបាត់ដំបង និងជាមួយច្រកខៅឌិន ខេត្តស្រះកែវ និងទី៤ ច្រកថ្មដា ខេត្ត ពោធិសាត់ ជាមួយច្រកថាសិន ខេត្តត្រាដ ប្រទេសថៃ។
បើយោងតាមរបាយការណ៍របស់ក្រសួងពាណិជ្ជកម្មកម្ពុជា បានបង្ហាញថា ទំហំពាណិជ្ជកម្ម កម្ពុជា និងថៃ ក្នុងឆ្នាំ២០១៥ សម្រេចបានចំនួន៥៥១៨លានដុល្លា និងឆ្នាំ២០១៦ សម្រេចបាន៥៥៥១ លានដុល្លាអាមេរិក មានការកើនឡើង០,៦%។ ការនាំចេញរបស់កម្ពុជា ទៅប្រទេសថៃក្នុងឆ្នាំ២០១៥ មានចំនួន៦៣៨លានដុល្លា និងឆ្នាំ២០១៦មានចំនួន៩៤៤លានដុល្លា មានការកើនឡើង៤៧,៩៦% ចំពោះការនាំចូលពីប្រទេសថៃវិញ ក្នុងឆ្នាំ២០១៥ មានចំនួន៤៨៨០លានដុល្លា និងឆ្នាំ២០១៦ មានចំនួន៤៦០៧លានដុល្លា មានការថយចុះ៥,៥៩%៕

កូរ៉េខាងត្បូងផ្ដល់ឥណទានសម្បទានជាង១១លានដុល្លារសម្រាប់សាងសង់ផ្លូវជាតិលេខេ២១

ទីក្រុងសេអ៊ូល៖ សាធារណរដ្ឋកូរ៉េបានផ្តល់នូវឥណទានសម្បទានប្រមាណជាង ១១,៥ លានដុល្លារអាមេរិក សម្រាប់គម្រោងធ្វើឲ្យប្រសើរឡើងផ្លូវជាតិលេខ២១ ជំហានទី២ (តាខ្មៅ-ជ្រៃធំ) ដើម្បីបង្ហើយការសាងសង់ផ្លូវជាតិលេខ២១នេះ។ ពិធីចុះហត្ថលេខាលើកិច្ចព្រមព្រៀងឥណទានសម្បទាននេះ បានប្រព្រឹត្តទៅនៅថ្ងៃទី០៦ ខែកញ្ញា ឆ្នាំ២០១៧ នៅទីក្រុងសេអ៊ូល សាធារណរដ្ឋកូរ៉េ ដោយឯកឧត្តម វង្សី វិស្សុត រដ្ឋលេខាធិការនៃក្រសួងសេដ្ឋកិច្ចនិងហិរញ្ញវត្ថុ តំណាងរាជរដ្ឋាភិបាលកម្ពុជា និងខាងភាគីកូរ៉េ តំណាងដោយឯកឧត្តម Chang Young-hoon នាយកប្រតិបត្តិនៃធនាគារធនាគារនីហរ័ណ-អាហរ័ណកូរ៉េ នៅក្នុងឱកាសដែលសាធារណកូរ៉េកំពុងតែរៀបចំនូវខួបលើកទី៣០នៃការបង្កើតមូលនិធិសហប្រតិបត្តិការអភិវឌ្ឍន៍សេដ្ឋកិច្ច (EDCF) របស់ខ្លួន ដែលប្រព្រឹត្តទៅចាប់ថ្ងៃទី៥-៦ ខែកញ្ញា ឆ្នាំ២០១៧ នៅទីក្រុងសេអ៊ូល សាធារណរដ្ឋកូរ៉េ ។

ដោយមានគណៈប្រតិភូមកពីបណ្តាប្រទេសជាច្រើនចូលរួម។ គម្រោងធ្វើឲ្យប្រសើរឡើងផ្លូវជាតិលេខ២១ ជំហានទី២ (តាខ្មៅ-ជ្រៃធំ) នេះ គឺជាការងារបន្តពីជំហានទី១ ចាប់ពី PK 55+000 ដល់ PK 63+440 មានប្រវែងសរុប ៨,៦ គ.ម ដោយនឹងធ្វើការសាងសង់ជាផ្លូវ ២ គន្លង ទទឺង ១១ ម៉ែត្រ ជាប្រភេទ A/C ក្នុងនោះ មានស្ពានចំនួន ១១ កន្លែង ប្រវែងសរុប ៤២៣ ម៉ែត្រ ព្រមទាំងមានដាក់លូជ្រុង ០១ កន្លែង និងផ្លូវប្រសព្វ ០១ កន្លែង។

គួរបញ្ជាក់ដែរថា គម្រោងធ្វើឲ្យប្រសើរឡើងផ្លូវជាតិលេខ២១ ចាប់ពីរង្វង់មូលក្រុងតាខ្មៅ ដល់ជ្រៃធំ ខេត្តកណ្តាល មានប្រវែងសរុប ៦៣,៦ គ.ម ក្នុងនោះ ជំហានទី១ លើកំណាត់ផ្លូវប្រវែង ៥៥ គ.ម ចាប់ពី PK 0+000 ដល់ PK 55+000។ ក្នុងនាមរាជរដ្ឋាភិបាលកម្ពុជា ឯកឧត្តម វង្សី វិស្សុត បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនកូរ៉េ ដែលបានរួមចំណែកផ្តល់ហិរញ្ញប្បទានដល់កិច្ចអភិវឌ្ឍន៍សេដ្ឋកិច្ច-សង្គមកម្ពុជា ។

ដោយពីឆ្នាំ២០០១ ដល់ឆ្នាំ២០១៧ (ត្រឹមខែសីហា) សាធារណរដ្ឋកូរ៉េបានសន្យាផ្តល់ហិរញ្ញប្បទានដល់កម្ពុជា ទាំងហិរញ្ញប្បទានឥតសំណង និងឥណទានសម្បទាន សម្រាប់គម្រោងអភិវឌ្ឍន៍នានានៅកម្ពុជា សរុបចំនួនប្រមាណ ៩៧៩ លានដុល្លារអាមេរិក ក្នុងនោះ ហិរញ្ញប្បទានឥតសំណងមានចំនួនប្រមាណ ២៩១,២១ លានដុល្លារអាមេរិក និងឥណទានសម្បទានមានចំនួនប្រមាណ ៦៨៧,៧១ លានដុល្លារអាមេរិក៕

 

នាយករដ្ឋមន្ដ្រីថៃទស្សនកិច្ចនៅកម្ពុជាព្រឹកនេះនិងចូលរួមពិធី សម្ពោធសួនមិត្តភាពកម្ពុជាថៃនៅក្រុងភ្នំពេញ

ភ្នំពេញ៖នាយករដ្ឋមន្ដ្រីថៃលោកប្រយុទ្ឋចន្ទអូឆានឹងទស្សនកិច្ចនៅកម្ពុជាព្រឹកនេះនិងចូលរួមពិធី សម្ពោធសួនមិត្តភាពកម្ពុជា ថៃនៅក្រុងភ្នំពេញនិងនឹងអញ្ជើញធ្វើជាសហប្រធានកិច្ច ប្រជុំចង្អៀតគណៈរដ្ឋមន្រ្តីចម្រុះកម្ពុជា-ថៃ លើកទី៣ក្រោមមូលបទ “ពង្រឹងភាពជាដៃគូ ដើម្បីសន្តិភាព និងវិបុលភាព” ។នេះបើតាមសេចក្ដីប្រកាសរបស់ក្រសួងការបរទេសកម្ពុជាបានអោយដឹង។
យោងតាមសេចក្ដីប្រកាសព័ត៌មាន របស់ក្រសួងការបរទេសនៅថ្ងៃទី១កញ្ញានេះបានឲ្យដឹងថា តបតាមការអញ្ជើញ របស់សម្តេចតេជោ ហ៊ុន សែន នាយករដ្ឋមន្រ្តី នៃ ព្រះរាជាណាចក្រកម្ពុជា ឧត្តមសេនីយ៍ ប្រាយុទ្ធ ច័ន្ទអូឆា (Prayut Chan-o-cha) នាយករដ្ឋមន្រ្តីថៃ នឹងដឹកនាំគណៈប្រតិភូអញ្ជើញមកបំពេញ ទស្សនកិច្ចផ្លូវការនៅកម្ពុជា និងជួបពិភាក្សាទ្វេភាគី ជាមួយ សម្តេចតេជោ ហ៊ុន សែន នាថ្ងៃទី ៧ ខែកញ្ញា ឆ្នាំ២០១៧ ។
ក្នុងអំឡុងពេលដំណើរទស្សនកិច្ច ផ្លូវការ នេះ សម្តេចតេជោ ហ៊ុន សែន និង ឧត្តមសេនីយ៍ ប្រាយុទ្ធ ច័ន្ទអូឆា នឹងអញ្ជើញធ្វើជាសហប្រធានកិច្ច ប្រជុំចង្អៀតគណៈរដ្ឋមន្រ្តីចម្រុះកម្ពុជា-ថៃ លើកទី៣ក្រោមមូលបទ “ពង្រឹងភាពជាដៃគូ ដើម្បីសន្តិភាព និងវិបុលភាព” ។កិច្ចប្រជុំចង្អៀតគណៈរដ្ឋ មន្រ្តីចម្រុះកម្ពុជា-ថៃ លើកទី៣ នេះ នឹងផ្ដល់មគ្គុទេសក៍និងទិសដៅក្នុងការជម្រុញ បន្ថែមទៀតនូវទំនាក់ទំនង និងកិច្ចសហប្រតិបត្តិការ ដ៏ល្អប្រសើរ ដែលនឹងផ្តល់ ផលប្រយោជន៍ ថែមមួយកម្រិតទៀតដល់ ព្រះរាជាណាចក្រទាំងពីរ។
នៅចុងបញ្ចប់ នៃកិច្ចប្រជុំចង្អៀតគណៈរដ្ឋមន្រ្តីចម្រុះកម្ពុជា-ថៃលើកទី៣ នេះ សម្តេច តេជោ ហ៊ុន សែន និង ឧត្តមសេនីយ៍ ប្រាយុទ្ធ ច័ន្ទអូឆា នឹងអញ្ជើញធ្វើជាអធិបតី ក្នុងពិធីចុះហត្ថលេខាលើ ឯកសារសំខាន់ៗ មួយចំនួន។សេចក្តីប្រកាសព័ត៌មាន រួមគ្នាមួយ នឹងត្រូវធ្វើឡើង បន្ទាប់ពីពិធីចុះហត្ថលេខា។ឧត្តមសេនីយ៍ ប្រាយុទ្ធ ច័ន្ទអូឆា ក៏នឹងជួបសំដែងការគួរសម ជាមួយ សម្តេចវិបុល សេនាភក្តី សាយ ឈុំ ប្រធានព្រឹទ្ធសភា និងជាប្រមុខរដ្ឋស្តីទី៕

ក្រុមហ៊ុនយក្សរបស់ប្រទេសចិន បោះទុនវិនិយោគសណ្ឋាគារលំដាប់អន្តរជាតិនៅភ្នំពេញ

ភ្នំពេញ: ក្រុមហ៊ុនយក្សរបស់ប្រទេសចិនមួយ បានសម្រេចវិនិយោគលើគម្រោងសាងសង់សណ្ឋាគារលំដាប់អន្តរជាតិ នៅតំបន់កោះពេជ្រ រាជធានីភ្នំពេញ បន្ទាប់ពីសម្លឹងឃើញសក្តានុពលផ្នែកសេដ្ឋកិច្ច និងទេសចរណ៍។ 

ក្នុងពិធីចុះកិច្ចសន្យាលើគម្រោងសាងសង់សណ្ឋាគារ មានឈ្មោះថា ហ្រ្គីនលែន ផ្លាទីនីម(Greenland Platinum) កាលពីល្ងាចថ្ងៃទី៥ ខែកញ្ញា ក្នុងរាជធានីភ្នំពេញ លោក Yuliang Zhang អគ្គនាយកក្រុមហ៊ុនGreenland Group មានប្រសាសន៍ថា ការសម្រេចវិនិយោគលើផ្នែកសណ្ឋាគារនេះ ដោយសារមើលឃើញពីសក្តានុពលរបស់រាជធានីភ្នំពេញ ដែលជាមជ្ឈមណ្ឌលសេដ្ឋកិច្ចដ៏សំខាន់ ហើយកំពុងមានការអភិវឌ្ឍខ្លាំង ព្រមទាំងជាតំបន់ដែលមានទេសចរណ៍វប្បធម៍ល្អបំផុត។ លោកជឿជាក់ថា ការវិនិយោគនេះ នឹងក្លាយជាផ្នែកមួយនៃការរីកចម្រើនដ៏សំខាន់របស់ម៉ាក់សញ្ញាសណ្ឋាគារហ្រ្គីនលែនរបស់ខ្លួននៅក្រៅប្រទេស។
សូមបញ្ជាក់ថា គម្រោងវិនិយោគលើសណ្ឋាគារដ៏ប្រណីតរបស់ក្រុមហ៊ុនដ៏ធំបំផុតមួយដែលមានមូលដ្ឋាននៅទីក្រុងសៀង ហៃប្រទេសចិននេះ ត្រូវបានសហការជាមួយក្រុមហ៊ុនJixiang Investment Cambodia ដែលជាម្ចាស់គម្រោងឌីអាយរីវើរ៉ា(D.I.Riviera)។ ទោះជាយ៉ាងណាក៏ដោយ ក្រុមហ៊ុនទាំងពីរមិនបានបង្ហាញឲ្យដឹងពីការបរិច្ឆេទច្បាស់លាស់ និងចំនួនទឹកប្រាក់ក្នុងការបោះទុនវិនិយោគលើគម្រោងសណ្ឋាគារមួយនេះទេ។
លោកជំទាវឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច ដែលបានអញ្ជើញជាអធិបតីក្នុងពិធីចុះហត្ថលេខានេះ បានលើកទឹកចិត្តឲ្យក្រុមហ៊ុនទាំងពីរអនុវត្តនូវគម្រោងនេះឲ្យបានឆាប់ ដើម្បីរួមចំណែកនូវចំណូលទេសចរ និងសេដ្ឋកិច្ចរបស់ប្រទេសកម្ពុជា។
យោងតាមសេចក្តីប្រកាសព័ត៌មាន បានឲ្យដឹងថា ក្រុមហ៊ុនGreenland Group មានទ្រព្យសម្បត្តិសរុបជាង១០០ប៊ីលានដុល្លារអាមេរិក ដោយបានវិនិយោគនៅក្នុងប្រទេសជាង១០ ក្នុងនោះមានប្រទេសចិន សហរដ្ឋអាមេរិក កាណាដា អូស្ត្រាលី និងចក្រភពអង់គ្លេស ជាដើម។ រហូតមកដល់ពេលនេះ ក្រុមហ៊ុនមួយនេះ បានបង្កើត និងកំពុងសាងសង់សណ្ឋាគារជាង៧០កន្លែង និងបានក្លាយជាក្រុមហ៊ុនមួយក្នុងចំណោមក្រុមហ៊ុន ដែលមានសណ្ឋាគារច្រើនជាងគេក្នុងប្រទេសចិន៕

ទំហំពាណិជ្ជកម្មរវាងអាមេរិចនិងកម្ពុជាឆ្នាំ២០១៦មានទឹកប្រាក់ជាង៣ពាន់លានដុល្លារ

ភ្នំពេញ៖ពាណិជ្ជកម្មទ្វេភាគីរវាងសហរដ្ឋអាមេរិក និងប្រទេសកម្ពុជាមានចំនួនសរុប ៣,២ ពាន់លានដុល្លា នៅឆ្នាំ ២០១៦។ ទំនិញនាំចេញរបស់អាមេរិកមានតំលៃសរុប ៣៦១ លានដុល្លា ដែលមានដូចជារថយន្ត គ្រឿងម៉ាស៊ីន អាហារសំណល់សំរាប់យកទៅកែច្នៃ ចំណីសត្វ សំលៀកបំពាក់ធ្វើពីរោមសត្វ និងវាយនភណ្ឌមិនមែនតម្បាញ។នេះបើតាមរបាយការណ៍ស្ថានទូតអាមេរិច។

ប្រភពបានបន្ដថា៖ ទំនិញនាំចូលរបស់សហរដ្ឋអាមេរិកពីប្រទេសកម្ពុជាមានតំលៃសរុប ២,៨ ពាន់លានដុល្លា ដែលរួមដូចជាសំលៀកបំពាក់ ស្បែកជើង ប្លាស្ទិក និងផលិតផលស្បែក។ កាលពីឆ្នាំទៅ សហរដ្ឋអាមេរិកនាំចូលផលិតផលកសិកម្មពីប្រទេសកម្ពុជាមានតំលៃ ២៣ លានដុល្លា ដូចជាផ្លែឈើ បន្លែ អង្ករ និងផលិតផលដទៃទៀត។ចំណែក៦ខែដើមឆ្នាំនេះទំហំពាណិជ្ជកម្មមានទឹកប្រាក់១៥៤៦លានដុល្លារក្នុងកម្ពុជានាំចេញទៅអាមេរិចមានទឹកប្រាក់ជាង១៣៦២លានដុល្លារ។
ប្រទេសកម្ពុជានិងសហរដ្ឋអាមេរិកមានទំនាក់ទំនងពាណិជ្ជកម្មរឹងមាំ ហើយពិធីមួយដែលរៀបចំដោយលោកឯកអគ្គរដ្ឋទូត Heidt បានទាញការចាប់អារម្មណ៍ លើបុគ្គលិកសំខាន់ៗដែលធ្វើការលើបញ្ហានេះ ព្រមទាំងផលិតផលដ៏ល្បីមួយរបស់អាមេរិក ដែលមានលក់នៅភ្នំពេញក្នុងពេលឆាប់ៗនេះ។
នៅថ្ងៃសុក្រ លោកឯកអគ្គរដ្ឋទូតបានរៀបចំពិធីមួយដើម្បីអោយសមាជិកសំខាន់ៗនៃអ្នកជំនួញនៃប្រទេសកម្ពុជាបានជួបជាមួយលោក Michael Newbill អនុប្រធានទូតអាមេរិកថ្មី និងលោក David Sequeira មន្រ្តីទូតទទួលបន្ទុកផ្នែកសេដ្ឋកិច្ច ដែលទើបនឹងមកដល់ប្រទេសកម្ពុជា។
តែអ្វីដែលគេចាប់អារម្មណ៍ពិតប្រាកដនោះគឺម៉ូតូ Harley-Davidson ។ ហាងលក់ម៉ូតូ Harley-Davidson រាយដំបូង នៅភ្នំពេញ គ្រោងនឹងបើកនៅចុងឆ្នាំនេះ ហើយភ្ញៀវនៅក្នុងពិធីនោះ អាចសាកអង្គុយលើម៉ូតូនោះដែលចតនៅស្ងៀម ដើម្បីរោទ៍សាកមើលថាតើវាមានកំលាំងខ្លាំងយ៉ាងណាដែរ៕

 

រដ្ឋមន្ដ្រី៖កម្ពុជា នឹងមានប្រព័ន្ធអ៊ិនធឺណិត ប្រើបា្រស់១០០% នៅតំបន់ប្រជុំជន និង៧០% នៅតំបន់ជនបទ នាឆ្នាំ២០២០

ភ្នំពេញ៖ រដ្ឋមន្រី្តក្រសួងប្រៃសណីយ៍ និងទូរគមនាគមន៍ អះអាងថា៖ កម្ពុជា នឹងមានប្រព័ន្ធអ៊ិនធឺណិត ប្រើបា្រស់១០០% នៅតំបន់ប្រជុំជន និង៧០% នៅតំបន់ជនបទ នាឆ្នាំ២០២០ ។
ឯកឧត្តម ត្រាំ អ៊ីវតឹក បានថ្លែងយ៉ាងដូច្នេះ នៅក្នុងកិច្ចប្រជុំកំពូលអន្តរជាតិស្តីពីហេដ្ឋារចនាសម្ព័ន្ធ កម្ពុជា រៀបចំដោយក្រុមហ៊ុន អេ ដ កូ (Edotco) នាព្រឹកថ្ងៃទី២៨ ខែសីហា ឆ្នាំ២០១៧នេះ ។

ឯកឧត្តម បន្តថា៖ មហិច្ឆតា របស់កម្ពុជា ក្នុងការតភ្ជាប់ទំនាក់ទំនងតាមប្រព័ន្ធឌីជីថល នៅត្រឹមឆ្នាំ២០២០ ហើយបានទទួលស្គាល់ពីតួនាទីដ៏សំខាន់ មិនអាចខ្វះបាន នៃភាពជាដៃគូរវាងស្ថាប័នរដ្ឋ និងវិស័យឯកជន ក្នុងការសម្រេចបាននូវការត្រៀមខ្លួនជាស្រេចក្នុងវិស័យ ICT ។ កិច្ចប្រជុំកំពូលនេះ ជាការជួបជុំផ្លាស់ប្តូរ ចែករំលែកចំណេះដឹង បទពិសោធន៍ និងមតិយោបល់រវាងមន្រី្តជាន់ខ្ពស់ និងតួអង្គសំខាន់ៗ ក្នុងឧស្សាហកម្មទូរគមនាគមន៍ ដោយវាបានបង្កើតឲ្យមានជាការពិភាក្សាគ្នា ដើម្បីរិះរកវិធីសាស្រ្តយ៉ាង សម្រេចឲ្យបាននូវចក្ខុវិស័យ ICT នៃរបស់កម្ពុជា ។

ឯកឧត្តម រដ្ឋមន្រី្ត បានបន្ថែមថា៖ តាមរយៈគំនិតផ្តួចផ្តើមរបស់ អេ ដ កូ ក្នុងការនាំមកនូវការតភ្ជាប់តាមរយៈហេដ្ឋា រចនាសម្ព័ន្ធទូរគមនាគមន៍ និងដំណោះស្រាយប្រកបដោយភាពច្នៃប្រឌិតនេះ វាពិតជាបានបង្ហាញឲ្យឃើញកាន់តែច្បាស់ ពីការគាំទ្រចំពោះចក្ខុវិស័យ ICT របស់ប្រទេសកម្ពុជា ។

អគ្គនាយកក្រុមហ៊ុន អេ ដ កូ គ្រុប(Edotco Group) លោក ស៊ូរេស ស៊ីហូ (Suresh Sidhu) បានគាំទ្រដល់ចក្ខុ វិស័យ ICT ឆ្នាំ២០២០របស់ប្រទេសកម្ពុជា តាមរយៈការផ្តល់នូវវេទិកាដ៏មានតម្លៃនាពេលនេះ សម្រាប់ការភ្ជាប់ទំនាក់ទំនង រវាងភាគីសំខាន់ៗដែលត្រូវការជាចាំបាច់ ដើម្បីបង្កើនការយល់ដឹងអំពីការតភ្ជាប់ និងការអភិវឌ្ឍហេដ្ឋារចនាសម្ព័ន្ធទូរគមនាគមន៍នៅក្នុងប្រទេស ហើយនឹងរិះរកពីដំណោះស្រាយ ប្រកបដោយភាពច្នៃប្រឌិត ដែលមាននៅក្នុងវិស័យនេះ ។

លោក ភីលីប វ៉ង (Phillip Wong) នាយកគ្រប់គ្រង នៃក្រុមហ៊ុន អេ ដ កូ ប្រចាំព្រះរាជាណាចក្រកម្ពុជា បានលើកឡើងដែរ ថា៖ ថ្ងៃនេះក្រុមហ៊ុនបានឃើញពីការគាំទ្រ និងតួនាទីដ៏សំខាន់របស់ក្រុមហ៊ុន បង្គោលអង់តែនដែលមានឯករាជ្យ ភាពដូចជា ក្រុមហ៊ុន អេ ដ កូ និងភាគីពាក់ព័ន្ធសំខាន់ជាច្រើនទៀត សុទ្ធសឹងតែអាចធ្វើជាដៃគូដ៏ល្អ និងទុកចិត្តបានក្នុងការ ឈានទៅសម្រេចនូវមហិច្ឆតានេះ ៕

 

ប្រមុខរដ្ឋាភិបាលរំលឹក”៣កុំ”និង”៣សុំ”

ភ្នំពេញ៖ប្រមុខរដ្ឋាភិបាលសម្ដេចហ៊ុនសែននាយករដ្ឋមន្ដ្រីកាលពីម្សិលមិញបានបន្ដរំលឹក”៣កុំ”និង”៣សុំ”ដល់កម្មករដើម្បីអោយកម្មករកម្មការិនីបានដឹងក្នុងស្ថានភាពប្រទេសជាតិសព្វថ្ងៃ។ក្នុងកម្មវិធីជួបជាមួយកម្មករជាង៤ពាន់សម្ដេចបានបញ្ជក់ថា៖ដោយសារស្ថេរភាពនយោបាយនិងសន្តិសុខសណ្តាប់ធ្នាប់ល្អព្រមទាំងការអនុគ្រោះដល់ការវិនិយោគទុនពីបរទេសគឺចំនួនរោងចក្រត្រូវបានកើនឡើងជាបន្តបន្ទាប់ដែលបានផ្តល់ការងារដល់បងប្អូនប្រជាពល ហើយក្នុងនោះប្រាក់ខែក៏ត្រូវបានតម្លើងជាបន្តបន្ទាប់ដែលនៅឆ្នាំ២០១៨ខាងមុខនេះ តិចបំផុតគឺអាចឡើងដល់១៦៨ដុល្លារក្នុងមួយខែបូកនឹងប្រាក់អត្ថប្រយោជន៍ផ្សេងៗទៀតគឺច្រើន។ សម្តេចតេជោ ហ៊ុន សែន បានមានប្រសាសន៍អំពីការខិតខំរបស់រាជរដ្ឋាភិបាល ក្រោមការដឹកនាំរបស់គណបក្សប្រជាជន ដែលតែងតែយកចិត្តទុកដាក់និងរួមសុខរួមទុក្ខជាមួយកម្មករមិនដូចមួយក្រុមទៀតដែលបានតែមាត់តែការពិតមិនបានជួយអ្វីដល់កម្មករឡើយ។ ទន្ទឹមនឹងការខិតខំរបស់រដ្ឋាភិបាលក្នុងការទាក់ទាញវិនិយោគគិនដើម្បីបង្កើនការងារដល់បងប្អូនកម្មករ គឺក្រុមមាននោះ(?) បានអនុវត្តិយុទ្ឋសាសស្រ្តគោលនយោបាយ ៣-កុំ ដែលសំដៅលើ ទី១)កុំផ្តល់ជំនួយអោយប្រទេសកម្ពុជា ២)កុំមកវិនិយោគនៅកម្ពុជា និង ៣)កុំទិញទំនិញពីកម្ពុជា។ តើនេះគឺជាទង្វើស្នេហាជាតិឬជាទង្វើក្បត់ជាតិ?ព្រោះបានធ្វើអោយបងប្អូនកម្មករកម្មការនីបាត់បង់ការងារដែលប៉ះពាល់ដល់ជីវភាពរស់នៅយ៉ាងធ្ងន់ធ្ងរដែលផ្ទុយស្រឡះពីរាជរដ្ឋាភិបាលក្រោមការដឹកនាំរបស់គណបក្សប្រជាជនដែលបាននិងកំពុងខិតខំជួយកម្មករ ៣-សុំ គឺ១)សុំអោយបរទេសជួយនិងផ្តល់ជំនួយមកកម្ពុជា ២)សុំអោយបរទេសមកវិនិយោគនៅកម្ពុជា និង ៣)សុំអោយបរទេសជួយទិញទំនិញពីកម្ពុជា។ សម្តេចតេជោនាយករដ្ឋមន្រ្តីបានខិតខំធ្វើកិច្ចការទាំងនេះទាំងនៅក្នុងប្រទេសនិងក្រៅប្រទេសគ្មានពេលសម្រាកឡើយ ដើម្បីគៀងគរអ្នកវិនិយោគិន មកវិនិយោគ បង្កើតការងារដល់កម្មករអោយមានប្រាក់ចំណូល និងជីវភាពរស់នៅកាន់តែល្អប្រសើ។សន្តិភាពនិងការអភិវឌ្ឍគឺជាកត្តាសំខាន់បំផុតក្នុងការធ្វើអោយប្រទេសជាតិមានការរីកចម្រើនហើយសន្តិភាពនិងការអភិវឌ្ឍមិនអាចកាត់ផ្តាច់ពីគ្នាបានទេជាពិសេសត្រូវរក្សានូវស្ថិរភាពនយោបាយ ស្ថិរភាពម៉ាក្រូសេដ្ឋកិច្ច ។

សម្ដេចបានអោយដឹងដែរថា៖កាលពីឆ្នាំ ១៩៩៧ យើងមានរោងចក្រតែ៦៤ប៉ុណ្ណោះ តែឥឡូវនេះរោងចក្រកាត់ដេរកើនដល់ ១,១១៧ ហើយបើសរុបរោងចក្រសហគ្រាសទាំងអស់គឺមានប្រមាណ ១១,១៦៨ ដែបានផ្តល់ការងារដល់ពលរដ្ឋកម្ពុជាប្រមាណជាង១លាននាក់៕

 

កម្ពុជានឹងមានលំនៅឋានថ្មីប្រមាណជាង៨ម៉ឺនខ្នងនៅមុនឆ្នាំ២០៣០

 

 ភ្នំពេញ ៖ ក្រសួងសេដ្ឋកិច្ច និងហិរញ្ញវត្ថុបានសន្និដ្ឋាន និងវាយតម្លៃថា ត្រឹមឆ្នាំ ២០៣០ កម្ពុជាមានតម្រូវការលំនៅឋានថ្មីប្រមាណជាង ៨០.០០០ខ្នងបន្ថែមទៀត ជាមធ្យមជារៀងរាល់ឆ្នាំ ដោយមិនរាប់រាប់បញ្ចូលកង្វះលំនៅឋាននាពេលបច្ចុប្បន្នផងទេ ហើយតម្រូវការនេះមានកាន់តែ ច្រើននៅទីប្រជុំជន។នេះបើតាមរបាយការណ៍រដ្ឋាភិបាលបានផ្សាយកាលពីម្សិលមិញ។

រាជរដ្ឋាភិបាលបានរៀបចំគោលនយោបាយជួយសម្រួល ពលរដ្ឋឱ្យមានលទ្ធភាពទទួលបានលំនៅឋាន រស់នៅសមរម្យទោះបីអ្នកមាន កម្រិតចំណូលមធ្យម និងទាប យ៉ាងណាក៏ដោយ ដែលគោលនយោបាយនេះ ធ្វើឡើងតាមរយៈការផ្តល់កញ្ចប់ លើកទឹកចិត្ត ដល់វិស័យឯកជន។

ក្នុងកិច្ចប្រជុំគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ ពិភាក្សាលើ “សេចក្តីព្រាងឯកសារ គោលនយោបាយស្តីពីការលើកទឹកចិត្ត និងការបង្កើតកម្មវិធីជាតិ សម្រាប់ការអភិវឌ្ឍលំនៅឋានតម្លៃ សមរម្យ” នាព្រឹកថ្ងៃទី២១ ខែសីហា ឆ្នាំ២០១៧ នៅទីស្ដីការក្រសួងសេដ្ឋកិច្ច ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ទេសរដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុបានមានប្រសាសន៍ថា គោលនយោបាយនេះ គឺឧបករណ៍ថ្មីបន្ថែមមួយទៀតរបស់រាជរដ្ឋាភិបាលកម្ពុជា ដើម្បីជួយសម្រួល និងលើកកម្ពស់ជីវភាពរស់នៅ និងសេចក្តីថ្លៃថ្នូររបស់ប្រជាជន ដែលមានកម្រិត ចំណូលមធ្យម និងទាប តាមរយៈការផ្តល់កញ្ចប់លើកទឹកចិត្តដល់វិស័យឯកជន ដើម្បីសង់លំនៅឋានដែលមានតម្លៃសមរម្យ ដែលអាចឱ្យប្រជាជនមានលទ្ធភាពទិញបាន និងមានការងារធ្វើច្បាស់លាស់។

ឯកឧត្តមបានបញ្ជាក់ថា រាជរដ្ឋាភិបាលជួយកសាងប្រព័ន្ធហេដ្ឋារចនា សម្ព័ន្ធតភ្ជាប់ឆ្ពោះទៅតំបន់ អភិវឌ្ឍលំនៅឋានតម្លៃសមរម្យ ដូចជា ផ្លូវ, ទឹក, ភ្លើង, សាលារៀន, មន្ទីរពេទ្យ និងផ្តល់ការលើកទឹកចិត្តផ្នែកសារពើពន្ធ អារក និងកម្រៃផ្សេងៗដូចជា ពន្ធប្រថាប់ត្រា, ពន្ធលើប្រាក់ចំណេញ, ពន្ធលើអចលនទ្រព្យ, អាករលើតម្លៃបន្ថែម និងពន្ធកាត់ទុក ជាដើម។

ឯកឧត្តមបានបន្ដថា ក្រសួងពាក់ព័ន្ធនឹងជួយសម្រួលនូវនីតិវិធីក្នុងការទទួលបានអាជ្ញាប័ណ្ណសាងសង់ និងការសម្រួលនូវនីតិវិធីទទួលបានអាជ្ញាប័ណ្ណ។

ឯកឧត្ដមទេសរដ្ឋមន្រ្ដីបានបន្ថែមថា ជារួម គោលនយោបាយនេះ មិនត្រឹមតែចូលរួមចំណែកដល់ការផ្តល់ លំនៅឋាន ក្នុងតម្លៃសមរម្យសម្រាប់គ្រួសារដែលមានចំណូលមធ្យម និងទាប នោះទេប៉ុន្តែថែមទាំង លើកកម្ពស់សុវត្ថិភាព នៃការកាន់កាប់លំនៅឋាន, ពង្រឹងគុណភាពលំនៅឋាន និងបង្កើនការទទួលបាន គេហសេវា ដូចជា ទឹកស្អាត អគ្គិសនី និងសេវាសង្គមនានា។

ទន្ទឹមនឹងនេះដែរ រាជរដ្ឋាភិបាលកំពុងខិតខំបង្កើនប្រាក់ឈ្នួលអប្បបរមាជូនកម្មករ និយោជិត និងប្រាក់បៀវត្សរ៍មន្រ្តីរាជការ គ្រូបង្រៀន ទាហាន និងប៉ូលិស ការគិតគូរអំពីកម្មវិធីលំនៅឋាន គឺជាកាលានុវត្តភាពមួយសម្រាប់ផ្តល់លំនៅឋានតម្លៃសមរម្យជូនដល់ពួកគាត់ ពិសេសសម្រាប់យុវជន ដែលមានសក្កានុពល តាមរយៈការដាក់ ចេញនូវក្របខ័ណ្ឌការងារអភិវឌ្ឍលំនៅឋានថ្មីៗ។

ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ទេសរដ្ឋមន្រ្តី ប្រធានអង្គប្រជុំ បានស្នើឱ្យក្រុមការងាររៀបចំ “សេចក្តីព្រាងឯកសារគោលព្រាងឯកសារគោលនយោបាយស្តីពីការលើកទឹកចិត្ត និងការបង្កើតកម្មវិធីជាតិ សម្រាប់ការអភិវឌ្ឍលំនៅឋានតម្លៃសមរម្យ”នេះ បន្តធ្វើការកែលម្អដោយដាក់បញ្ជូលមតិយោបល់ របស់អង្គប្រជុំ ដើម្បីឱ្យឯកសារនេះកាន់តែមានលក្ខណៈ ពេញលេញ និងគ្រប់ជ្រុងជ្រោយ មុននឹងបញ្ជូនសេចក្តីព្រាងទៅដាក់ឆ្លងកិច្ចប្រជុំគណៈរដ្ឋមន្រ្តីនាពេលឆាប់ៗខាងមុខនេះ។

 

សេចក្តីប្រកាសព័ត៌មានដដែលបានឱ្យដឹងថា ការផ្គត់ផ្គង់លំឋានរបស់វិស័យ ឯកជនកំពុងកើនឡើងខ្ពស់ ជាងតម្រូវការ ប៉ុន្តែតម្លៃលំនៅឋានកាន់តែឡើងខ្ពស់ លើសពីកំណើនប្រាក់ចំណូល ដែលជាក្តីកង្វល់របស់រាជរដ្ឋាភិបាល អំពីលទ្ធភាពទិញលំនៅឋានរបស់ប្រជាជពលរដ្ឋកម្ពុជានៅទីប្រជុំជន ជាពិសេសគ្រួសារ ដែលមានប្រាក់ចំណូលមធ្យម និងទាប ។

ចំពោះគោលនយោបាយលើកទឹកចិត្ត និងគំនិតផ្តួចផ្តើមបង្កើតកម្មវិធីជាតិអភិវឌ្ឍលំនៅឋានតម្លៃសមរម្យ ត្រូវបានរៀបចំឡើងជា ការសាកល្បង ក្នុងគោលដៅរួមចំណែកដោះស្រាយបញ្ហាលំនៅឋា ន ជាពិសេសនៅទីក្រុង និងប្រជុំជនសម្រាប់ក្រុមគ្រួសារមានចំណូលមធ្យម និងទាប។

សម្រាប់ជំហានបន្ទាប់ ក្នុងរយៈពេលមធ្យម និងវែង កម្មវិធីសាកល្បងសម្រាប់ការអភិវឌ្ឍលំនៅឋាន តម្លៃសមរម្យនឹងត្រូវវិវត្តទៅជាកម្មវិធីជាតិសម្រាប់ការអភិវឌ្ឍលំនៅឋាន ដើម្បីឆ្លើយតបទៅនឹងតម្រូវ ការចាំបាច់ និងសំណូមពរនៃការអភិវឌ្ឍសង្គម និងសេដ្ឋកិច្ច។

ក្រៅពីមានវិសាលភាពទួលំទូលាយ និងទូទាំងប្រទេសកម្មវិធីជាតិអភិវឌ្ឍលំនៅឋាន តម្លៃសមរម្យនឹងត្រូវ រៀបចំឡើង ដោយប្រើប្រាស់យន្តការអចិន្រ្តៃយ៍ និងមានការចូលរួមពីវិស័យឯកជន និងរដ្ឋ ព្រមទាំងការគាំទ្រពីវិស័យហិរញ្ញវត្ថុផងដែរ៕

 

ចៅហ្វាយក្រុងចុះពិនិត្យការបាក់ស្រុតការដ្ឋានគម្រោងសាងសង់អាគារកម្ពស់២២ជាន់ "ប៊ូយ៉ុងថោន”ជាប់មហាវិថីសហព័ន្ធរុស្ស៊ី

ភ្នំពេញ៖ចៅហ្វាយក្រុងភ្នំពេញចុះពិនិត្យបាក់ស្រុតការដ្ឋានគម្រោងសាងសង់អាគារកម្ពស់២២ជាន់ "ប៊ូយ៉ុងថោន”​ជាប់​មហាវិថីសហព័ន្ធរុស្ស៊ីនៅម្ដុំជិតស្ពានអាកាសពេទ្យលោកសង្ឃនាក្រុងភ្នំពេញ។ព្រឹកមិញនេះអភិបាល នៃគ​ណៈ​អភិបាលរាជធានីភ្នំពេញលោក ឃួង ស្រេង បានបញ្ជាទៅក្រុមហ៊ុនប៊ូយ៉ុងឲ្យចាត់វិធានការជាបន្ទាន់ ដើម្បីទប់ស្កាត់ធ្វើយ៉ាងណាកុំឲ្យមានការបាក់ដីនៅការដ្ឋានសំណង់កំពុងជីកគ្មានបច្ចេកទេសនេះបន្តទៀត បើមិនដូច្នេះទេវានឹងឈានដល់បាក់ផ្តាច់ផ្លូវសហព័ន្ធរុស្ស៊ី ដែលប៉ះពាល់យ៉ាងធ្ងន់ធ្ងរចំពោះរាជធានីភ្នំពេញ ព្រោះជាផ្លូវអន្តរជាតិយ៉ាងសំខាន់។
លោកបានអំពាវនាវ ខាងក្រុមហ៊ុនពិនិត្យ មិនឲ្យហេតុការណ៍នេះបន្តកើតមានបន្តទៀត។និងបានដាក់អោយអភិរងក្រុងម្នាក់តាមដានមើលគម្រោងនេះក្លាយហេតុការណ៍កើតជាថ្មីមានគ្រោះថ្នាក់ដល់ពលរដ្ឋនិងកម្មករ។លោកអភិក្រុងបានមានប្រសាសន៍ថាកម្ពុជាគ្មានអនុវត្ដច្បាប់ស្ដារដារពីរនោះទេចំពោះគម្រោងអភិវន្ឍនានាក្នុងក្រុង។

គួរបញ្ជាក់ផងដែរថា ក្រុមហ៊ុនប៊ូយ៉ុងថោនដែលគេស្គាល់ថាជាក្រុមហ៊ុនសំណង់របស់ប្រទេសកូរ៉េ មានទីតាំងនៅតាមបណ្តោយផ្លូវសហព័ន្ធរុស្សី (ខាងលិចស្ពានអាកាស៧មករា) ស្ថិតក្នុងសង្កាត់ទឹកថ្លា ខណ្ឌសែន សុខបានចាប់ផ្តើមបើកការដ្ឋានជីកដីធ្វើចំណតជាច្រើនឆ្នាំមកហើយ ហើយកាលពីល្ងាចថ្ងៃអាទិត្យ ទី១៣ ខែសីហា ឆ្នាំ២០១៧កន្លងមកនេះ ខណៈមានភ្លៀងធ្លាក់ខ្លាំងក៏ស្រាប់តែការដ្ឋានមួយនេះបាក់ដី និងរបងការដ្ឋានជាច្រើនម៉ែត្រចូលទៅក្នុងការដ្ឋានតែម្តង ដែលនឹងមានការបាក់រហូតដល់មហាវិថីសហព័ន្ធរុស្សីបន្ថែមទៀត៕

 

ព័ត៌មានផ្សាយ​ផ្ទាល់​ទាន់​ហេតុ​ការណ៍​(video)


អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

ព័ត៌មានជាតិ​ពេល​យប់​


អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

អចលនទ្រព្យ-សំណង់

Angkor-10-7-2015

chipmong-lang-10-07-2015

Cambodia-10-07-2015-new

MC-col-10-7-2015

angkor-puro-10-07-2015

Pepsi-10-07-2015

22-10-2015-flora

santana-22-10-2015

8-4-2016-banner

idol-2

 

killer-2

 

singer

GreenICT Technology Co., Ltd

gps-new

verte2