vigor-new

 

ហង្សមាស the voice-2-2-16 cambodianidol-2 Money drop killer gotodance Hm all

ហង្សមាស

the voice-2-2-16

cambodianidol-2

Money drop

killer

gotodance

Hm all

ads-tel-true

យោងតាមរូបភាពវីដេអូបង្ហាញថា រុស្ស៊ីប្រហែលជាអ្នកផ្តល់អាវុធដល់ក្រុមតាលីបង់

v9

ក្រុងកាប៊ុល៖ យោងតាមរូបភាពវីដេអូដែលបណ្តាញសារព័ត៌មាន CNN ទទួលបានបង្ហាញថា រដ្ឋាភិបាលរុស្ស៊ីប្រហែលជាអ្នកផ្គត់ផ្គង់អាវុធទៅឲ្យក្រុមបះបោរតាលីបង់នៅក្នុងប្រទេសអាហ្វហ្គានីស្ថានជាច្រើនឆ្នាំកន្លងមកនេះ។


ខ្សែវីដេអូនេះ បានបន្ថែមទម្ងន់មួយទៀតលើការចោទប្រកាន់ពីសំណាក់មន្ត្រីអាហ្វហ្គានីស្ថាននិងសហរដ្ឋអាមេរិកដែលថា រដ្ឋាភិបាលក្រុងមូស្គូ ធ្លាប់បានផ្តល់អាវុធទៅឲ្យក្រុមបះបោរតាលីបង់ដើម្បីប្រយុទ្ធនៅក្នុងសង្គ្រាមនាពេលកន្លងមក។


នៅក្នុងវីដេអូនេះ គេឃើញក្រុមបះបោរតាលីបង់ប្រើប្រាស់កាំភ្លើងវែង និងកាំភ្លើងយន្តជាច្រើនប្រភេទ ដែលអ្នកជំនាញខាងអាវុធបានលើកឡើងថា មិនបានបង្ហាញសញ្ញាសម្ពាស់ពីប្រភពដើមនោះឡើយ។


ប៉ុន្តែក្រុមបះបោរតាលីបង់ដែលចែកតំបន់គ្នាកាន់កាប់ នៅភាគខាងជើង និងភាគខាងលិចប្រទេសអាហ្វហ្គានីស្ថានបានអះអាងថា អាវុធដែលខ្លួនប្រើប្រាស់ ដំឡូងឡើយ គឺប្រភពពីរដ្ឋាភិបាលរុស្ស៊ីជាអ្នកផ្គត់ផ្គង់។


ទោះជាយ៉ាងណា នៅក្នុងវីដេអូនេះ គ្មានភស្តុតាងបញ្ជាក់ពីសកម្មភាពជួញដូរអាវុធនោះទេ ហើយប្រទេសរុស្ស៊ីក៏បានបដិសេធម្តងហើយម្តងទៀតថា ខ្លួនមិនជាប់ពាក់ព័ន្ធក្នុងសកម្មភាពបែបនេះដែរ។


ប៉ុន្តែបើយោងតាមទីតាំងប្រយុទ្ធនិងកន្លែងហូចូលអាវុធ វាបានធ្វើឲ្យរដ្ឋាភិបាលអាហ្វហ្គានីស្ថាននិងរដ្ឋាភិបាលអាមេរិក មានការព្រួយបារម្ភខ្លាំងអំពីការជាប់ពាក់ព័ន្ធរបស់រុស្ស៊ី។


លោក Sediq Sediqi អ្នកនាំពាក្យរដ្ឋាភិបាលអាហ្វហ្គានីស្ថានបានលើកឡើងថា មានពលរដ្ឋរុស្ស៊ីមួយចំនួនបានបង្ហើបថា រដ្ឋាភិបាលរបស់ខ្លួននៅរក្សាទំនាក់ទំនងជាមួយក្រុមតាលីបង់នៅឡើយ ហើយថាបើគ្មានភ្លើងក៏គ្មានផ្សែងដែរ។


រីឯលោក Joseph Votel ដែលជាមេបញ្ជាការកងទ័ពសហរដ្ឋអាមេរិកមួយរូប បានលើកឡើងកាលពីខែមីនាថា លោកជឿជាក់ថា រដ្ឋាភិបាលរុស្ស៊ីកំពុងស្វះស្វែងបញ្ជ្រាបឥទ្ធិពលរបស់ខ្លួននៅក្នុងប្រទេសអាហ្វហ្គានីស្ថាននេះ។


ដោយឡែកបើយោងតាមអ្នកជំនាញខាងអាវុធមួយក្រុមទៀត បានលើកឡើងថា ផ្អែកលើស្ថានភាពនៃអាវុធមានទាំងចាស់មានទាំងថ្មី ហើយខ្លះថែមទាំងមានលក់តាមអ៊ីនធឺណិតទៀតផង៕

ជំងឺផ្តាសាយជ្រូក H1N1 សម្លាប់មនុស្សជាង៦៣០នាក់នៅឥណ្ឌា

v2

ឥណ្ឌា៖ ជំងឹគ្រុនផ្តាសាយជ្រូក H1N1 បានសម្លាប់មនុស្សជាង៦៣០នាក់ នៅទូទាំងប្រទេសឥណ្ឌា បើគិតចាប់តាំងពីដើមឆ្នាំមក។


យោងតាមបណ្តាញសារពត៌មាន Zee News នៅឥណ្ឌាបានឲ្យដឹងថា បើគិតចាប់តាំងពីដើមឆ្នាំរហូតដល់ថ្ងៃទី១៦ ខែក្កដា មេរោគ H1N1 បានឆ្លងទៅលើមនុស្សចំនួន១៣.១៨៨ និងបណ្តាលឲ្យមនុស្សចំនួន៦៣២នាក់បានស្លាប់ នៅទូទាំងប្រទេសឥណ្ឌា ពោលគឺធ្ងន់ធ្ងរជាងឆ្នាំមុន ដែលមានមនុស្សត្រឹមតែ១.៧៨៦ បានឆ្លងនិង២៦៥នាក់បានបាត់បង់ជីវិតនោះ។


រដ្ឋ Tamil Nadu ដែលស្ថិតនៅភាគខាងត្បូងប្រទេសឥណ្ឌា មានករណីឆ្លងមេរោគ H1N1 ជិត៣.០០០ករណី បើគិតចាប់តាំងពីដើមឆ្នាំមក ជាតួលេខដែលខ្ពស់ជាងគេបើធៀងនឹងតំបន់ផ្សេងៗ។


ប៉ុន្តែបើនិយាយពីចំនួនអ្នកស្លាប់វិញ គឺរដ្ឋ Maharashtra ធ្ងន់ធ្ងរជាងគេ ដោយមានអ្នកស្លាប់ចំនួន៣០០នាក់ ក្នុ្ងចំណោមករណីឆ្លងដែលត្រូវបានរាយការណ៍ចំនួន ២.៧៣៨ ករណី។


រដ្ឋ Gujarat មានអ្នកស្លាប់ចំនួន ៧៥នាក់ ក្នុងចំណោមអ្នកឆ្លងចំនួន២៨៩នាក់ រីឯនៅក្នុងទីក្រុង Delhi មានអ្នកស្លាប់ចំនួន៤នាក់ ក្នុងចំណោមមនុស្ស២៤១នាក់ដែលធ្វើតេស្តរកឃើញថា មានឆ្លងមេរោគ H1N1។


លោក វេជ្ជបណ្ឌិត Atul Kakar ដែលជាអ្នកពិគ្រោះយោបល់ជាន់ខ្ពស់មកពីមន្ទីរពេទ្យ Sir Ganga Ram បានលើកឡើងថា ជាធម្មតា ជំងឹងគ្រុនផ្តាសាយផ្ទុះឡើងនៅអំឡុងរដូវភ្លៀងមូសុង ប៉ុន្តែជំងឹគ្រុនផ្តាសាយជ្រូកមិនសមនឹងរីករាលខ្លាំងទេអំឡុងរយៈពេលនេះ ហេតុដូច្នេះវាជារឿងដ៏គួរឲ្យភ្ញាក់ផ្អើល។


លោក Atul Kakar បានលើកឡើងបន្តថា ទោះជាយ៉ាងណា រដ្ឋាភិបាលឥណ្ឌា បានបញ្ជូនក្រុមគ្រូពេទ្យទៅកាន់តំបន់ដែលមានករណីស្លាប់និងឆ្លងខ្លាំងហើយ ដើម្បីតាមដានថា តើករណីផ្ទុះឡើងនេះបណ្តាលមកពីកត្តាអ្វីឲ្យពិតប្រាកដ។


មេរោគ H1N1ដែលបង្កឲ្យកើតជំងឺគ្រុនផ្តាសាយជ្រូកដែលដំបូងឡើយឆ្លងតែក្នុងចំណោមសត្វជ្រូកនោះ បានឆ្លងពីមនុស្សម្នាក់ទៅមនុស្សម្នាក់តាមយៈទឹកមាត់ និងសំបោរ ឬក៏ស្លេស៕

នាវាចម្បាំងរបស់អាមេរិកបាញ់ព្រមាននាវាចម្បាំងរបស់អ៊ីរ៉ង់នៅដែនទឹកអន្តរជាតិ

v1

អ៊ីរ៉ង់៖ នាវាចម្បាំងរបស់សហរដ្ឋអាមេរិកបានបាញ់ព្រមាននាវាចម្បាំងរបស់អ៊ីរ៉ង់នៅក្នុងឈូងសមុទ្រពែក ក្នុងហេតុការណ៍ដែលទើបតែកើតឡើងជាលើកដំបូងប៉ុណ្ណោះចាប់តាំងពីលោក ដូណាល់ ត្រាំ បានឡើងកាន់តំណែងប្រធានាធិបតីកាលពីខែមករាមក។


មន្ត្រីសហរដ្ឋអាមេរិក ដែលនិយាយក្នុងលក្ខខណ្ឌអនាមិក បានលើកឡើងថា នាវាល្បាតឈ្មោះ Thunderbolt ដែលមានអមដំណើរដោយនាវាល្បាតមួយចំនួនទៀតបានបាញ់ព្រមាន បន្ទាប់ពីនាវាចម្បាំងរបស់អ៊ីរ៉ង់បានបើកយ៉ាងលឿនចូលមកក្បែរ ពោលគឺនៅសល់តែ១៣៧ម៉ែត្រទៀតប៉ុណ្ណោះ ដោយមិនខ្វល់នឹងការឲ្យសញ្ញាតាមវទ្យុទាក់ទង ការបាញ់ភ្លើងបញ្ចាំង និង ការឲ្យសញ្ញាតាមរយៈស៊ីផ្លេនោះទេ។


មន្ត្រីដដែលនេះបានឲ្យដឹងបន្តថា នាវាចម្បាំងរបស់អ៊ីរ៉ង់គឺមកពីកងបដិវត្តអ៊ិស្លាម ប៉ុន្តែថាពេលកើតហេតុមិនមាននរណានៅបញ្ជាកាំភ្លើងនោះឡើយ។


ក្រោយមកមិនយូរប៉ុន្មាន កងទ័ពជើងទឹកនៃកងបដិវត្តអ៊ិស្លាមបានចេញសេចក្តីថ្លែងការណ៍ដោយគូសបញ្ជាក់ថា នាវាចម្បាំងរបស់សហរដ្ឋអាមេរិកទេ ដែលជាអ្នកបើកសំដៅទៅរកកាណូតល្បាតមួយរបស់ខ្លួននៅក្នុងដែនទឹកអន្តរជាតិ នាភាគខាងជើងនៃឈូងសមុទ្រពែក ហើយបានបាញ់ព្រមានពីគ្រាប់ឡើងលើ នេះបើយោងតាមគេហទំព័រព័ត៌មានដែលមានសម្ព័ន្ធភាពជាមួយរដ្ឋាភិបាលអ៊ីរ៉ង់។


ស្របពេលដំណាលគ្នានេះ លោកប្រធានាធិបតី ដូណាល់ ត្រាំ ក៏បានប្រើពាក្យគំរាមលើអ៊ីរ៉ង់ផងដែរ ដោយព្រមានរដ្ឋាភិបាលក្រុងតេហេរ៉ង់ថា នឹងប្រឈមបញ្ញាធំ ប្រសិនបើមិនគោរពតាមកិច្ចព្រមព្រៀងនុយគ្លេអ៊ែរដែលអ៊ីរ៉ង់បានព្រមព្រៀងជាមួយប្រទេសមហាអំណាចចំនួន៦ទេនោះ។


លោកដូណាល់ ត្រាំ បានលើកឡើងយ៉ាងដូច្នេះកាលពីម្សិលមិញ នៅក្នុងទីក្រុង Youngstown រដ្ឋ Ohio ជាកន្លែងដែលលោកចុះទៅជួបអ្នកគាំទ្រ អំឡុងពេលចុះបំពេញទស្សនកិច្ចរយៈពេលមួយសប្តាហ៍នៅតំបន់ភាគកណ្តាលនៃទឹកដីសហរដ្ឋអាមេរិក៕

ចោរពីរនាក់ ពាក់របាំងមុខលោកដូណាល់ត្រាំ ចូលប្លន់យកលុយពីម៉ាស៊ីនអេធីអឹមតាមសាច់រឿងហូលីវូដ

v11

អ៊ីតាលី៖ នគរបាលអ៊ីតាលី បានចាប់ខ្លួនបងប្អូនប្រុសពីរនាក់ ដោយសង្ស័យថា បានចូលដាក់គ្រាប់បែកបំផ្ទុះយកលុយពីម៉ាស៊ីនដកប្រាក់ អេធីអឹម នៅភាគខាងជើងទីក្រុង Turin ដោយពាក់របាំមុខក្លែងធ្វើជាប្រធានាធិបតីសហរដ្ឋអាមេរិក លោក Donald Trump ។


យោងតាមហេតុការណ៍នេះបានធ្វើអោយគេសន្និដ្ឋាន បងប្អូនទាំងពីរនាក់បានយកតម្រាប់តាមខ្សែភាពយន្តហូលីវូដឆ្នាំ១៩៩១ដែលមានចំណងជើងថា Point Break ដោយមានតួអង្គសំខាន់ពីររូបគឺ Keanu Reeves និង Patrick Swayze ដែលដើរតួជាជនពាលក្លែងខ្លួនធ្វើជាអតីតប្រធានាធិបតីសហរដ្ឋអាមេរិកដើម្បីប្លន់ធនាគារ។


តែនៅក្នុងរបាយការណ៍មួយទៀតរបស់នគរបាលអ៊ីតាលីបានអោយដឹងថា បងប្អូនពីរនាក់នេះ បានធ្វើតាម ខ្សែរភាពយន្ត មួយផ្សេងទៀតដែលមានចំណងជើងថា The Jackal សម្តែងដោយ Bruce Willis ដែលបានប្តូរពណ៌រថយន្តរបស់ខ្លួន ដោយសារតែនគរបាលតាមចាប់ ចំណែកពីរនាក់បងប្អូនដែលជាជនសង្ស័យវិញ ក៏បានប្តូរពណ៌រថយន្តម៉ាកសឺដេសពណ៌សរបស់ខ្លួនទៅជាពណ៌ខ្មៅផងដែរ។


បងប្អូនប្រុសទាំងពីរនាក់នេះម្នាក់មានអាយុ២៦ឆ្នាំនិងម្នាក់ទៀត៣០ឆ្នាំ ត្រូវបានគេសង្ស័យថា មានគោលដៅចូលប្លន់យកលុយពីម៉ាស៊ីនដកប្រាក់នៅជិតទីក្រុង Turin ភាគខាងជើងប្រទេសអ៊ីតាលី។


នៅក្នុងរូបភាពវីដេអូកាមេរ៉ាសុវត្ថិភាពគេឃើញ បុរសម្នាក់ដែលពាក់មុខក្លែងជាលោកដូណាល់ ត្រាំ បានដើរគ្របកាមេរ៉ាសុវត្ថិភាព រួចបុរសរូបនោះនិងបុរសម្នាក់ទៀតបាននាំគ្នាយកឧបករណ៍មកគាស់ម៉ាស៊ីនដកប្រាក់ដើម្បីដាក់គ្រាប់បែក ហើយក្រោយពេលដាក់គ្រាប់បែករួច ពួកគេក៏បានដុតបំផ្ទុះឡើងតែម្តង៕

បន្ទាប់ពីមានជម្លោះពាក់ព័ន្ធការល្បាតរបស់ចិន កោះតៃវ៉ាន់ប្រកាសចាត់វិធានការការពារខ្លួន

v10

កោះតៃវ៉ាន់ប្រកាសចាត់វិធានការការពារខ្លួនប្រសិនបើចាំបាច់ ដើម្បីឆ្លើយតបទៅនឹងការហោះល្បាតក្នុងពេលថ្មីៗរបស់នាវាចម្បាំងចិនក្បែរដែនកោះរស់ខ្លួន។


ការប្រកាសចាត់វិធានការត្រៀមខ្លួនយ៉ាងដូច្នេះធ្វើឡើងដោយលោក Chen Chung-chi អ្នកនាំពាក្យក្រសួងការពារជាតិកោះតៃវ៉ាន់ នៅក្នុងថ្ងៃអង្គារនេះ អំឡុងសន្និសីទកាសែតមួយក្នុងទីក្រុងតៃប៉ិ។


លោក Chen Chung-chi បានថ្លែងអំឡុងសន្និសីទកាសែតនេះថា យោធាចិនបានបញ្ចេញយន្តហោះចម្បាំងមួយចំនួនមកហោះល្បាតនិងហោះឈ្លបយកការណ៍ក្បែរកោះតៃវ៉ាន់ក្នុងរយៈពេលប៉ុន្មានថ្ងៃថ្មីៗនេះក្នុងគោលបំណងហឹ្វកហាត់ ហើយថា ប្រទេសចិនជាប្រទេសស្រលាញ់សន្តិភាព ប៉ុន្តែកោះតៃវ៉ាន់ក៏ត្រូវមានវិធានការការពារខ្លួនដែរប្រសិនបើចាំបាច់។


ប្រទេសចិននៅមិនទាន់បានធ្វើការបញ្ជាក់នៅឡើយទេពាក់ព័ន្ធនឹងការធ្វើសមយុទ្ធក្នុងពេលថ្មីៗនេះ ប៉ុន្តែកងទ័ពអាកាសរបស់ខ្លួនបានលើកឡើងកាលពីដើមខែនេះថា យន្តហោះចម្បាំងនិងយន្តហោះទម្លាក់គ្រាប់របស់ខ្លួនពិតជាបានធ្វើសមយុទ្ធក្នុងពេលថ្មីៗមែន ក្នុងនោះមានរួមទាំងការហោះហើរក្បែរកោះតៃវ៉ាន់ និងប្រទេសជប៉ុនផងដែរ។


រហូតមកទល់ពេលនេះប្រទេសចិននៅតែចាត់ទុកកោះតៃវ៉ាន់ ជាខេត្តដែលផ្តាច់ចេញពីខ្លួន ហើយនៅតែរក្សាបំណងប្រើកម្លាំងដណ្តើមយកមកវិញ ប្រសិនបើកោះនេះចាត់វិធានការណាមួយឆ្ពោះទៅរកឯករាជ្យផ្លូវការនោះ៕

ចិនកំពុងបង្កើតរោងចក្រថាមពលបន្ទះសូឡារាងដូចខ្លាឃ្មុំ panda លើផ្លូវសូត្រថ្មី

v9

ចិន៖ ក្រុមហ៊ុនថាមពលចិន កំពុងបង្កើតរោងចក្រថាមពលបន្ទះសូឡាចំនួន១០០ ដែលមានរាងដូចខ្លាឃ្មុំ panda តាមបណ្តោយផ្លូវដែលស្ថិតនៅក្នុងគំនិតផ្តួចផ្តើមខ្សែក្រវាត់មួយផ្លូវមួយ។


ក្រុមហ៊ុន Panda Green Energy Group បានតភ្ជាប់រោងចក្រថាមពលបន្ទះសូឡាកម្លាំង៥០មីហ្គាវ៉ាត់មួយក្នុងចំណោមរោងចក្រទាំង១០០រួចហើយ ទៅកាន់ស្ថានីយនៅក្នុងខេត្ត Shanxi ហើយនេះជាជំហានដំបូងដែលនឹងជួយឲ្យសេដ្ឋកិច្ចរបស់ប្រទេសចិនរីកចម្រើនមួយកម្រិតទៀត។


សាងសង់ឡើយដោយបន្ទះសូឡាពណ៌ខ្មៅហើយមានទម្ងន់ស្រាល រោងចក្រថាមពលនេះមើលទៅមានរាងដូចខ្លាឃ្មុំ Panda បើមើលពីលើអាកាស។


បច្ចុប្បន្ន ក្រុមហ៊ុន Panda Green Energy Group ដែលមានមូលដ្ឋាននៅក្នុងទីក្រុងហុងកុងកំពុងពិភាក្សាជាមួយក្រុមហ៊ុនមកពីប្រទេសកាណាដា អូស្រ្តាលី អាល្លឺម៉ង់ និងអ៊ីតាលី ដើម្បីបង្កើតរោងចក្រថាមពលរាងដូចខ្លាំឃ្មុំ Panda បន្ថែមទៀត ឲ្យស្របតាមគោលនយោបាយខ្សែក្រវាត់មួយផ្លូវមួយរបស់លោកប្រធានាធិបតី ស៊ី ជីនភីង។


គោលនយោបាយខ្សែក្រវាត់មួយផ្លូវមួយ គឺជាគម្រោងលើកកម្ពស់ផ្លូវសូត្រចាស់ តាមរយៈការបើកឲ្យមានឱកាសពាណិជ្ជកម្មថ្មីទូទាំងពិភពលោក ដោយប្រើប្រាស់ផ្លូវ បណ្តាញថាមពល កំពុងផែរ និងបណ្តាញបំពង់បង្ហូរឧស្ម័នឆ្លងកាត់ពីតំបន់មួយទៅតំបន់មួយ។


យោងតាមតាមក្រុមហ៊ុន Panda Green Energy Group បានឲ្យដឹងថា រោងចក្រថាមពលបន្ទះសូឡារាងដូចខ្លាឃ្មូំ Panda នេះ អាចបង្កើតថាមពលកម្លាំង៣,២ ពាន់លានគីឡូវ៉ាត់-ម៉ោងក្នុងរយៈពេល២៥ឆ្នាំ ហើយអាចផ្គត់ផ្គង់អគ្គិសនីដល់ប្រជាពលរដ្ឋាជាងមួយម៉ឺនគ្រួសារជារៀងរាល់ឆ្នាំ។


ក្រុមហ៊ុន Panda Green Energy Group នេះកំពុងបោះទុនវិនិយោគ និងគ្រប់គ្រងរោងចក្រថាមពលបន្ទះសូឡានៅក្នុងតំបន់សេដ្ឋកិច្ចសំខាន់ៗដូចជា តំបន់ស្វយ័ត Xinjiang និងខេត្ត Qinghai ជាដើម ហើយក៏កំពុងគ្រប់គ្រងគម្រោងមួយចំនួននៅចក្រភពអង់គ្លេសផងដែរ៕

អ្នកតវ៉ានៅជប៉ុននាំគ្នាតវ៉ាប្រឆាំងលោក Shinzo Abe ជុំវិញរឿងអាស្រូវបើកសាលាពេទ្យសត្វ

v1

ជប៉ុន៖ សកម្មជននាំគ្នាតវ៉ានៅក្នុងទីក្រុងតូក្យូប្រឆាំងនឹងលោកនាយករដ្ឋមន្ត្រី Shinzo Abe ដោយសារលោកបដិសេធការចោទប្រកាន់ដែលថា លោកបានប្រើឥទ្ធិពលរបស់ខ្លួនមិនត្រឹមត្រូវដើម្បីជួយមិត្តភត្តិបើកសាលាពេទ្យសត្វមួយកន្លែងនៅភាគខាងលិចប្រទេសជប៉ុន។


ការតវ៉ានេះកើតមានឡើង បន្ទាប់ពីមានការបើកសម័យប្រជុំពិសេសមួយនៅក្នុងសភាជប៉ុនដើម្បីសាកសួរលោក Shinzo Abe ពាក់ព័ន្ធនឹងរឿងអាស្រូវដ៏រស៊ើបនេះ។


អំឡុងការតវ៉ា គេក៏ឃើញសកម្មជនកាន់បដាដែលមានសរសេរអក្សរទាមទារឲ្យ លោក Shinzo Abe ចុះចេញពីតំណែងផងដែរ ខណៈអ្នកតវ៉ាផ្សេងៗទៀតលើកផ្ទាំងតវ៉ាទាមទារឲ្យមានការស៊ើបអង្កេតឲ្យបានហ្មត់ចត់លើរឿងអាស្រូវបើកសាលាពេទ្យសត្វនេះ។


អំឡុងសម័យប្រជុំពិសេសកាលពីម្សិលមិញ លោកនាយករដ្ឋមន្ត្រី Shinzo Abe បានបដិសេធម្តងទៀតចំពោះការចោទប្រកាន់ដែលថា លោកបានធ្វើអន្តរាគមន៍ដើម្បីជួយមិត្តភក្តិរបស់លោក ឈ្មោះ Kotaro Kake ឲ្យទទួលបានសិទ្ធិសាងសង់សាលាពេទ្យសត្វថ្មីមួយ។


អ្នកតវ៉ាដែលនាំគ្នាជួបជុំនៅខាងក្រៅសភាបានលើកឡើងថា ពួកគេមិនពេញចិត្តនឹងការឆ្លើយបដិសេធរបស់លោក Shinzo Abe ឡើយ ហើយថាការដែលមន្ត្រីមួយចំនួនឆ្លើយថា គ្មានឯកសារបញ្ជាក់ច្បាស់លាស់គឺគ្រាន់តែជាលេសប៉ុណ្ណោះ។


ក្រុមអ្នកវិភាគបានលើកឡើងថា ការឆ្លើយបដិសេធរបស់លោកនាយករដ្ឋមន្ត្រី Shinzo Abe បានធ្វើឲ្យកើតមានការមិនពេញចិត្តក្នុងចំណោមសាធារណៈជនទូទៅ ហើយថាការតវ៉ាកាលពីម្សិលមិញ គឺជាទឡ្ហីករបង្ហាញឲ្យឃើញពីកង្វល់របស់ប្រជាពលរដ្ឋចំពោះស្ថានភាពនយោបាយសព្វថ្ងៃនៅក្នុងប្រទេសជប៉ុន។


រឿងអាស្រូវផ្តល់ក្តីអនុគ្រោះនេះលេចមានឡើងកាលពីខែឧសភា ហើយក្រៅពីរឿងអាស្រូវនេះ លោក Shinzo Abe ក៏កំពុងប្រឈមនឹងការចោទប្រកាន់មួយផ្សេងទៀតផងដែរនៅក្នុងឆ្នាំនេះ ពាក់ព័ន្ធនឹងការកាត់បន្ថយថ្លៃជួលដីរដ្ឋនៅក្នុងខេត្ត Osaka ទៅឲ្យអ្នកគ្រប់គ្រងសាលាម្នាក់ទៀតឈ្មោះ Moritomo Gakuen៕

មនុស្ស៩នាក់ស្លាប់នៅក្នុងរថយន្តដឹកទំនិញក្នុងរដ្ឋតិចសាស ដោយសង្ស័យថាមកពីការជួញដូរមនុស្ស

v14

រដ្ឋតិចសាស៖ មនុស្សប្រាំបួននាក់ត្រូវបានរកឃើញថាស្លាប់កាលពីថ្ងៃអាទិត្យនៅក្នុងរថយន្តដឹកទំនិញមួយគ្រឿងដែលចតចោលនៅបរិវេណផ្សារទំនើប Walmart ក្នុងក្រុង San Antonio រដ្ឋតិចសាស ដោយអាជ្ញាធរសង្ស័យថា អាចមានជាប់ពាក់ព័ន្ធទៅនឹងការជួញដូរមនុស្ស។


បើយើងតាមមន្ត្រីពន្លត់អគ្គិភ័យក្នុងក្រុង San Antonio បានអោយដឹងថា មនុស្ស៣០នាក់ផ្សេងទៀតស្ថិតនៅក្នុងស្ថានភាពធ្ងន់ធ្ងរដោយសារកម្តៅខ្លាំងធ្វើអោយហប់និងអស់កម្លាំង ខណៈដែលពួកគេក៏ស្ថិតនៅក្នុងរថយន្តនោះដូចគ្នា ហើយខ្វះខ្យល់អុកស៊ីសែននិងគ្មានទឹកបរិភោគ ដោយសារអាកាសធាតុនៅខាងក្រៅឡើងកម្តៅរហូតដល់៣៧.៨អង្សារ។


ដោយឡែកបើយោងតាមមេធាវីក្នុងសង្កាត់ Western បានអោយដឹងថា អ្នកបើករថយន្តត្រូវបានចាប់ខ្លួន ហើយនឹងត្រូវប្រឈមចំពោះមុខច្បាប់ដោយសារករណីនេះអាចជាប់ពាក់ព័ន្ធនឹងការជួញដូរមនុស្ស។


សពទាំងប្រាំបួននាក់នោះត្រូវបានរកឃើញបន្ទាប់ពីបុរសម្នាក់ដែលទៅសុំទឹកបុគ្គលិកផ្សារទំនើប Walmart ហូប បាននាំមន្ត្រីនរគរបាលសហរដ្ឋអាមេរិកទៅកាន់កន្លែងដែលរថយន្តចតនៅស្ងៀម។


ទីក្រុង San Antonio មានចម្ងាយប្រហែល២៤០គីឡូម៉ែត្រពីភាគខាងជើងព្រំដែនប្រទេសម៉ិកស៊ិក ហើយអាកាសធាតុនៅក្នុងតំបន់នោះមានកម្រិត៣៧.៨អង្សារនៅម៉ោង៦ល្ងាចថ្ងៃសៅរ៍ហើយបានបន្តក្តៅរហូតដល់ថ្ងៃអាទិត្យម្សិលមិញ។


ក្នុងរយេះពេលប៉ុន្មានខែថ្មីៗនេះ នៅសហរដ្ឋអាមេរិកមានការចាត់វិធានការបង្ក្រាបជនអន្តោរប្រវេសន៍ខុសច្បាប់ទូទាំងប្រទេស បន្ទាប់ពីលោកប្រធានាធិបតីដូណាល់ ត្រាំ បានប្តេជ្ញារថា បិទមិនឲ្យជនអន្តោប្រវេសន៍ចូលក្នុងទឹកដីរបស់ខ្លួនដោយគ្មានការអនុញ្ញាត រឺក៏ស្នាក់នៅលើសពីការកំណត់៕

សពសមាជិកក្រុមអាយស៊ីសរាប់រយនាក់រង់ចាំការធ្វើមាតុភូមិនិវត្តពីលីប៊ី

v3

លីប៊ី៖ ៧ខែបន្ទាប់ពីកងកម្លាំងលីប៊ីយកឈ្នះលើក្រុមអាយស៊ីសនៅក្នុងទីក្រុង Sirte សពសមាជិកក្រុមអាយស៊ីសរាប់រយនាក់កំពុងស្ថិតនៅក្នុងទូរក្លាស្សេនៅឡើយ ខណៈអាជ្ញាធរលីប៊ីកំពុងចរចាជាមួយរដ្ឋាភិបាលផ្សេងៗថា តើត្រូវធ្វើយ៉ាងម៉េចចំពោះសពទាំងនេះ។


សពសមាជិកក្រុមអាយស៊ីសទាំងនេះ ដែលមួយចំនួនធំជាជនបរទេស ត្រូវបានដឹកយកទៅទុកនៅក្នុងទីក្រុង Misrata ក្រោយពេលកងកម្លាំងលីប៊ីបានយកឈ្នះលើក្រុមអាយស៊ីសកាលពីខែវិច្ឆិកា។


ការអនុញ្ញាតឲ្យមានការបញ្ជូនសពទៅកាន់ប្រទេសកំណើតវិញដូចជាប្រទេសទុយនីស៊ី សូដង់ និងអេហ្ស៊ីបជាដើម នឹងជាបញ្ហាដ៏រសើបសម្រាប់រដ្ឋាភិបាលទាំងឡាយណាដែលពាក់ព័ន្ធ ដោយសារមិនដឹងច្បាស់ថា តើពលរដ្ឋរបស់ខ្លួនប៉ុន្មាននាក់បានទៅចូលរួមជាមួយក្រុមរដ្ឋអ៊ិស្លាមជីហាដនៅក្នុងប្រទេសអ៊ីរ៉ាក់ ស៊ីរី និងលីប៊ី។


ដោយបិទមុខដើម្បីសន្តិសុខផ្ទាល់ខ្លួន សមាជិកម្នាក់នៃអង្គភាពប្រឆាំងបទឧក្រិដ្ឋក្រុង Misrata បានប្រាប់ទីភ្នាក់ងារព័ត៌មានរ៉យទ័រថា ឥឡូវសពរាប់រយកំពុងក្លាស្សេក្នុងទូរត្រជាក់ ខណៈអាជ្ញាធរកំពុងរៀបចំឯកសារ ថតរូប និងប្រមូលសំណាក DNA ដើម្បីបញ្ជាក់អត្តសញ្ញាណ។


លោកបានបន្តថា ឥឡូវនេះអង្គភាពរបស់លោកក៏កំពុងតែរង់ចាំសេចក្តីសម្រេចពីអគ្គរដ្ឋអាជ្ញាផងដែរពាក់ព័ន្ធនឹងបញ្ហានេះ។


ក្រុមអាយស៊ីសទាក់ទាញបានសមាជិកជាច្រើនមកពីតំបន់មជ្ឈឹមបូព៌ា អាហ្វ្រិកខាងជើង និងតំបន់អឺរ៉ុប ក្នុងនោះគ្រាន់តែប្រទេសទុយនីស៊ីតែមួយគត់មានមនុស្សជាង៣ពាន់នាក់ទៅហើយបានទៅចូលរួមជាមួយក្រុមនេះនៅក្នុងប្រទេសស៊ីរី អ៊ីរ៉ាក់ និងលីប៊ី។


ក្រុមអាយស៊ីសបានចូលកាន់កាប់ទីក្រុង Sirte របស់ប្រទេសលីប៊ីកាលពីឆ្នាំ ២០១៥ ដោយឆ្លៀតឱកាសពេលកងកម្លាំងប្រដាប់អាវុធនៅលីប៊ីកំពុងតែប្រយុទ្ធគ្នាដើម្បីក្តោបក្តាប់អំណាចរៀងៗខ្លួន ហើយបានប្រើប្រាស់ទីក្រុងនេះ ជាមូលដ្ឋានដើម្បីវាយប្រហារលើទីតាំងសម្បូរប្រេងនិងក្រុងផ្សេងៗទៀតនៅក្បែរនោះ៕

ការបំផ្ទុះគ្រាប់បែកអត្តឃាតសម្លាប់មនុស្ស២៤នាក់នៅទីក្រុងកាប៊ុល

v2

ក្រុងកាប៊ុល៖ ការបំផ្ទុះគ្រាប់បែកអត្តឃាតដោយប្រើរថយន្តបានសម្លាប់មនុស្សយ៉ាងតិច២៤នាក់ និងធ្វើឲ្យមនុស្ស៤០នាក់ផ្សេងទៀតរងរបួសនៅក្នុងទីក្រុងកាប៊ុល ប្រទេសអាហ្វហ្គានីស្ថាន។


យោងតាមលោក Najib Danish អ្នកនាំពាក្យស្តីទីក្រសួងមហាផ្ទៃអាហ្វហ្គានីស្ថានបានឲ្យដឹងថា ហេតុការណ៍បំផ្ទុះគ្រាប់បែកអត្តឃាតនេះកើតឡើងនៅព្រឹកថ្ងៃច័ន្ទនេះ ហើយថាតួលេខនៃអ្នកស្លាប់បានកើនឡើងទ្វេរដងពីចំនួនដែលបានកំណត់ក្នុងជំហានដំបូង។


រីឯនគរបាលវិញបានលើកឡើងថា មានជនបំផ្ទុះគ្រាប់បែកអត្តឃាតម្នាក់បានបំផ្ទុះរថយន្តមួយគ្រឿងនៅភាគខាងលិចទីក្រុងកាប៊ុល ប៉ុន្តែគោលដៅពិតប្រាកដនៃការវាយប្រហារនេះគេនៅមិនទាន់ដឹងច្បាស់នៅឡើយទេ។


ហេតុការណ៍បំផ្ទុះគ្រាប់បែកអត្តឃាតចុងក្រោយបំផុតនេះ កើតមានឡើងស្របពេលមានជនស៊ីវិលចំនួន១.៦៦២នាក់បានស្លាប់នៅក្នុងរយៈពេល៦ខែដំបូងនៃឆ្នាំនេះ ដោយសារអំពើហិង្សាដែលកំពុងញុំាញីប្រទេសអាហ្វហ្គានីស្ថានស្រាប់។


ហេតុការណ៍នេះផងដែរ កើតមានឡើងត្រឹមតែពីរសប្តាហ៍ប៉ុណ្ណោះ បន្ទាប់ពីក្រុមរដ្ឋអ៊ិស្លាម បានអះអាងទទួលខុសត្រូវចំពោះការវាយប្រហារលើព្រះវិហារមួយនៅក្នុងទីក្រុងកាប៊ុលដដែលនេះដោយបណ្តាលឲ្យមនុស្សយ៉ាងតិច៤នាក់បានបាត់បង់ជីវិតនោះ។


យោងតាមតួលេខពីអង្គការសហប្រជាជាតិបានបញ្ជាក់ថា ត្រឹមតែទីក្រុងកាប៊ុលតែមួយគត់មានមនុស្សស្លាប់យ៉ាងតិច២០ភាគរយទៅហើយនៃចំនួនជនស៊ីវិលដែលបានបាត់បង់ជីវិតទូទាំងប្រទេសនៅក្នុងឆ្នាំនេះ ក្នុងនោះរួមទាំងមនុស្សយ៉ាងតិច១៥០នាក់ដែលបានស្លាប់ក្នុងហេតុការណ៍បំផ្ទុះគ្រាប់បែកមួយកាលពីចុងខែឧសភាផងដែរ៕

ព័ត៌មានផ្សាយ​ផ្ទាល់​ទាន់​ហេតុ​ការណ៍​(video)


អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

ព័ត៌មានជាតិ​ពេល​យប់​


អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

Angkor-10-7-2015

chipmong-lang-10-07-2015

Cambodia-10-07-2015-new

MC-col-10-7-2015

angkor-puro-10-07-2015

Pepsi-10-07-2015

22-10-2015-flora

santana-22-10-2015

8-4-2016-banner

GreenICT Technology Co., Ltd

gps-new

verte2