vigor-new

 

ហង្សមាស the voice-2-2-16 cambodianidol-2 Money drop killer gotodance Hm all

ហង្សមាស

the voice-2-2-16

cambodianidol-2

Money drop

killer

gotodance

Hm all

ads-tel-true

កងទ័ពជើងទឹកសហរដ្ឋអាមេរិកនឹងដាក់វិន័យលើមន្ត្រីមួយចំនួនក្រោយកើតហេតុការណ៍នាវាបុកគ្នា

v15

សហរដ្ឋអាមេរិក៖ កងទ័ពជើងទឹកសហរដ្ឋអាមេរិកនឹងដាក់វិន័យលើមន្ត្រីមួយចំនួន ក្រោយកើតហេតុការណ៍នាវាបុកគ្នាដែលបណ្តាលឲ្យទាហានជើងទឹក៧នាក់បាត់បង់ជីវិតនៅលើនាវាចម្បាំង USS Fitzgerald។


នាវាចម្បាំង USS Fitzgerald នេះ បានបុកជាមួយនាវាដឹកកុងទឺន័រចងទឹកជាតិហ្វីលីពីននៅក្នុងដែនទឹកនៃប្រទេសជជប៉ុនកាលពីខែមិថុនា។


លោកឧត្តមនាវីឯក Bill Moran ដែលជាមេបញ្ជាការរងផ្នែកប្រតិបត្តិនៃកងទ័ពជើងទឹកសហរដ្ឋអាមេរិក បានលើកឡើងថា មន្ត្រីមានមុខងារជាមេបញ្ជាការ និងមន្ត្រីកងទ័ពជើងទឹកជាន់ខ្ពស់ពីររូបផ្សេងទៀត នឹងត្រូវដកតួនាទីលែងឲ្យឈរជើងនៅលើនាវាពិឃាតនេះតទៅមុខទៀត ព្រោះរដ្ឋាភិបាលអស់ជំនឿចិត្តលើពួកគេហើយ។


នាវាដឹកកុងទឺន័រមានចងទង់ជាតិហ្វីលីពីនឈ្មោះ ACX Crystal បានបុកគ្នាជាមួយនាវាពិឃាត USS Fitzgerald ពេលទៀបភ្លឺឈានចូលព្រឹកថ្ងៃទី១៧ ខែមិថុនានៅក្នុងឈូងសមុទ្រតូក្យូ ដោយធ្វើឲ្យនាវាពិឃាត USS Fitzgerald រងការខូចខាតអស់មួយផ្នែក រីឯនាវាដឹកកុងទឺន័រ ACX Crystal ក៏រងការខូចខាតអស់មួយផ្នែកដែរ។


យោងតាមសេចក្តីរាយការណ៍ព័ត៌មានមួយបានឲ្យដឹងថា ទាហានជើងទឹកដែលបាត់បង់ជីវិតមានអាយុចន្លោះពី១៩ឆ្នាំ ដល់៣៧ឆ្នាំ ហើយសពរបស់ពួកគេត្រូវបានរកឃើញនៅក្រោមផ្នែកដែលរងការខូចខាត បន្ទាប់ពីក្រុមអ្នកមុជទឹកអាចចូលទៅកាន់កន្លែងនោះ ចំណែកខាងនាវាដឹកទំនិញវិញគ្មាននរណាបាត់បង់ជីវិតឬរបួសឡើយ។


សូមបញ្ជាក់ថា យោងតាមច្បាប់ដែនទឹក នាវាធំៗត្រូវបើកផ្លូវឲ្យនាវាផ្សេងៗទៀតដែលនៅខាងស្តាំដៃរបស់ខ្លួន ជាហេតុធ្វើឲ្យមានការសន្និដ្ឋាននាវាពិឃាត USS Fitzgerald របស់សហរដ្ឋអាមេរិកជាអ្នកខុសនៅក្នុងហេតុការណ៍នេះ៕

ពិពណ៌អន្តរជាតិក្រុងដាម៉ាសបើកឡើងវិញ ក្រោយផ្អាកអស់៥ឆ្នាំដោយសារសង្គ្រាម

v13

ក្រុងដាម៉ាស៖ បន្ទាប់ពីផ្អាកអស់ប្រាំឆ្នាំដោយសារសង្គ្រាម ពិពណ៌អន្តរជាតិក្រុងដាម៉ាសចាប់ផ្តើមបើកឡើងវិញ ដោយជាសញ្ញាបង្ហាញថា ប្រទេសស៊ីរីកំពុងរួចផុតពីសង្គ្រាមជាបណ្តើរហើយ។


បង្កើតឡើងនៅក្នុង១៩៥៤ ពិពណ៌អន្តរជាតិនេះត្រូវបានធ្វើឡើងលើកចុងក្រោយក្នុងឆ្នាំ២០១១ ជាពេលដែលសង្គ្រាមស៊ីវិលនៅស៊ីរីចាប់ផ្តើមផ្ទុះឡើង។


នៅឆ្នាំក្រោយៗមក ពិពណ៌អន្តរជាតិក្រុងដាម៉ាសនេះមិនបានធ្វើនោះឡើយដោយសារសង្គ្រាមចេះតែរាលដាលធំទៅៗស្ទើរគ្រប់ទីកន្លែង។
ប៉ុន្តែទោះជាយ៉ាងណា ឥឡូវពិពណ៌អន្តរជាតិនេះបានបើកឡើងវិញហើយនៅទីតាំងមួយក្បែរអាកាសយានដ្ឋានអន្តរជាតិក្រុងដាម៉ាស ដោយមានការចូលរូមពីក្រុមហ៊ុនចំនូន ១.៦០០ មកពីប្រទេសចំនួន៤៣ រូមមានដូចជាប្រទេសចិន រុស្ស៊ី អ៊ីរ៉ង់ បារាំង អង់គ្លេស និងបែលហ្ស៊ិកជាដើម។


រដ្ឋាភិបាលស៊ីរី ដែលដឹកនាំដោយលោកប្រធានាធិបតីបាសា អាល់អាសាដ បានលើកឡើងថា នេះគឺជាការផ្ញើសារទៅកាន់ពិភពលោកឲ្យដឹងថា សេដ្ឋកិច្ចរបស់ប្រទេសស៊ីរីចាប់ផ្តើមងើបឡើងវិញជាបណ្តើរៗហើយ ហើយថាអ្វីៗទាំងអស់នេះបានមកដោយសារការខិតខំប្រឹងប្រែងដែលមានប្រទេសសម្ព័ន្ធមិត្តជាអ្នកជួយជ្រោមជ្រែង។


លោក Imad Khamis នាយករដ្ឋមន្ត្រីស៊ីរី ដែលបានអញ្ជើញចូលរូមបើកពិធីដ៏ធំនេះបានប្រាប់អ្នកចូលរួមថា ពិពណ៌អន្តរជាតិនេះ គឺជាភ័ស្តុតាងជាក់ស្តែងដែលបញ្ជាក់ឲ្យឃើញពីភាពខ្លាំងរបស់រដ្ឋាភិបាលស៊ីរី និងសមត្ថភាពក្នុងការពន្លត់ភ្លើងសង្គ្រាមឲ្យរលត់ទៅវិញជាបណ្តើរៗដើម្បីឆ្ពោះទៅរកឧស្សាហកម្មលូតលាស់ឡើងវិញ។


រីឯលោក Ramez Tourjman រដ្ឋមន្ត្រីក្រសួងព័ត៌មានស៊ីរី បានថ្លែងថា ថ្វីត្បិតតែនៅតំបន់ខ្លះនៅមានសង្គ្រាមនៅឡើយក្តី តែព្រឹត្តិការណ៍អន្តរជាតិដ៏ធំនេះជាសារបង្ហាញថា ក្រុមហ៊ុននានាមានជំនឿចិត្តមកលើរដ្ឋាភិបាលដែលមានលោកអាសាដ ជាអ្នកដឹកនាំ ហើយក៏ជាសារបង្ហាញឲ្យឃើញពីជ័យជម្នះលើក្រុមបះបោរផងដែរ។


ចំណែកឯក្រុមអ្នកវិភាគវិញជឿជាក់ថា ពិពណ៌នេះកើតមានឡើងចំពេលដែលកិច្ចព្រមព្រៀងនយោបាយនៅក្នុងប្រទេសនេះជិតឈានដល់ការឯកភាពគ្នា ដែលជាហេតុធ្វើឲ្យរដ្ឋាភិបាល ក៏ដូចជាបណ្តាក្រុមហ៊ុននានាទាំងក្នុងស្រុកនិងក្រៅប្រទេសចាប់ផ្តើមផែនការវិនិយោគឡើងវិញ។


សូមរំឮកថា សង្គ្រាមស៊ីវិលក្នុងរយៈពេលប្រហែល៦ឆ្នាំមកនេះ បានធ្វើឲ្យប្រទេសស៊ីរីខាតបង់សេដ្ឋកិច្ចសរុបប្រហែល២២៦ពាន់លានដុល្លារឯណោះ នេះបើយោងតាមការប៉ាន់ប្រមាណរបស់ធានាគារពិភពលោកដែលចេញកាលពីខែមុន៕

នគរបាលហ្វីលីពីនសម្លាប់មនុស្ស១៣នាក់បន្ថែមទៀតនៅយប់ទីបីនៃយុទ្ធនាការចុះបង្ក្រាបគ្រឿងញៀន

v2

ហ្វីលីពីន៖ នគរបាលហ្វីលីពីនបានសម្លាប់មនុស្ស១៣នាក់បន្ថែមទៀតក្នុងទីក្រុងម៉ានីលនៅយប់ទីបីនៃយុទ្ធនាការចុះបង្ក្រាបគ្រឿងញៀន ដោយធ្វើឲ្យតួលេខអ្នកស្លាប់បានកើនឡើងដល់៨០នាក់អំឡុងនគរបាលបង្កើតការបង្ក្រាបបទល្មើសគ្រឿងញៀនក្នុងរយៈពេល១សប្តាហ៍មកនេះ។


យោងតាមទីភ្នាក់ងារព័ត៌មានរ៉យទ័របានឲ្យដឹងថា តួលេខនៃអ្នកស្លាប់១៣នាក់នេះ បានបន្ថែមលើតួលេខនៃមនុស្សចំនួន៦៧នាក់ដែលត្រូវបាននគរបាលបាញ់សម្លាប់កាលពីដើមសប្តាហ៍ ខណៈ មានមនុស្សជាង២០០នាក់ផ្សេងទៀតត្រូវបានចាប់ខ្លួននៅក្នុងទីក្រុងម៉ានីល និងខេត្តមួយចំនួនទៀតនៅក្បែរៗនោះ។


នគរបាលហ្វីលីពីនបានចាតុទុកយុទ្ធនាការថ្មីៗនេះថា ជាយុទ្ធនាការទ្រង់ទ្រាយធំឈ្មោះ "One-Time, Big-Time" ដែលមានគោលបំណងបោសសម្អាតបទល្មើសគ្រឿងនៅតាមផ្លូវឲ្យអស់ក្នុងពេលឆាប់ៗ។


នៅក្នុងតំបន់និងស្រុកដែលល្បីខាងសម្បូរបទល្មើសគ្រឿងញៀនក៏ត្រូវបានអនុវត្តយុទ្ធនាការ "One-Time, Big-Time" នេះដែរ ដោយរដ្ឋាភិបាលបានដាក់ពង្រាយនគរបាលច្រើនជាងមុន។


លោកប្រធានាធិបតី រ៉ូទ្រីហ្គោ ឌុយទើតេ បានសំដែងការគាំទ្រយ៉ាងពេញទំហឹងចំពោះយុទ្ធនាការដែលសម្លាប់មនុស្សអស់យ៉ាងច្រើនបំផុតក្នុងរយៈពេលត្រឹមតែមួយសប្តាហ៍ ដោយលើកឡើងថា លោកនឹងមិនយកទោសពៃរិ៍មន្ត្រីនគរបាលដែលសម្លាប់ជនមានជាប់ពាក់ព័ន្ធបទល្មើសគ្រឿងញៀនទេ ហើយក្នុងកាលៈទេសៈខ្លះអាចថែមទាំងដំឡើងឋានន្តរស័ក្តិឲ្យមន្ត្រីទាំងនោះថែមទៀតផង។


ទោះបីមានការបកស្រាយយ៉ាងណាក៏ដោយ ក្រុមអ្នករិះគន់នៅតែបន្តរិះគន់ធ្ងន់ៗធ្ងន់ៗលើសង្គ្រាមប្រឆាំងគ្រឿងញៀនរបស់លោក រ៉ូទ្រីហ្គោ ឌុយទើតេ រហូតមកទល់ពេលនេះ ដោយចោទប្រកាន់ថា នគរបាលជាតិហ្វីលីពីនបានសម្លាប់មនុស្សនៅក្រៅប្រព័ន្ធតុលាការដោយមិនខ្វល់ពីសិទ្ធិមនុស្សនោះទេ ៕

នគរបាលអេស្ប៉ាញបញ្ឈប់ការវាយប្រហារទីពីរទាន់ពេល បន្ទាប់ពីហេតុការណ៍បើករថយន្តបុកស្លាប់១៣នាក់នៅបាសេឡូណា

v1

អេស្ប៉ាញ៖ នគរបាលអេស្ប៉ាញបញ្ឈប់ការវាយប្រហារលើកទីពីរទាន់ពេលដោយសម្លាប់បានជនសង្ស័យប្រាំនាក់នៅក្រុង Cambrils បន្ទាប់ពីហេតុការណ៍បើករថយន្តបុកចូលក្នុងចំណោមមនុស្សបណ្តាលឲ្យ១៣នាក់ស្លាប់នៅទីក្រុងបាសេឡូណា។


នគរបាលអេស្ប៉ាញបានឲ្យដឹងថា ជនសង្ស័យដែលសម្លាប់បានអំឡុងការវាយប្រហារលើកទីពីរនៅពេលទៀបភ្លឺឈានចូលព្រឹកថ្ងៃសុក្រនេះ គឺសុទ្ធតែមានពាក់ខ្សែក្រវ៉ាត់គ្រាប់បែកអត្តឃាតជាប់នឹងចង្កេះ។


មនុស្ស១៣នាក់បានស្លាប់ និងប្រហែល១០០នាក់រងរបួស ពេលបុរសម្នាក់បើករថយន្តមួយគ្រឿងបុកចូលក្នុងចំណោមមនុស្សនៅតំបន់ Las Ramblas ក្នុងទីក្រុងបាសេឡូណាកាលពីរសៀលម្សិលមិញ ហើយភ្លាមៗនោះអ្នកបើករថយន្តមួយគ្រឿងនេះបានរត់គេចបាត់ស្រមោលតែម្តង។
លោក Mariano Rajoy នាយករដ្ឋមន្ត្រីអេស្ប៉ាញ បានលើកឡើងថា ហេតុការណ៍នេះ គឺជាការវាយប្រហារភេរវកម្មដោយស្នាដៃរបស់ក្រុមរដ្ឋអ៊ិស្លាមជីហាដ។


អាជ្ញាធរអេស្ប៉ាញ បានភ្ជាប់ហេតុការណ៍នៅក្នុងទីក្រុងបាសេឡូណា និងក្រុង Cambrils ទៅនឹងការបំផ្ទុះលើផ្ទះមួយក្នុងក្រុង Alcanar ដែលបណ្តាលឲ្យមនុស្សម្នាក់បានស្លាប់កាលពីល្ងាចថ្ងៃពុធ។


សាក្សីដែលបានឃើញហេតុការណ៍ក្នុងទីក្រុងបាសេឡូណាផ្ទាល់ភ្នែកបានរៀបរាប់ថា រថយន្តបង្កហេតុ មានចេតនាសំដៅរកមនុស្សតែម្តង ដោយបើករេពីម្ខាងទៅម្ខាងរហូតបុកមនុស្សបានសម្រេច។


អាជ្ញាធរអេស្ប៉ាញបានឲ្យដឹងបន្តទៀតថា មានជនសង្ស័យពីរនាក់ត្រូវបានចាប់ខ្លួនក្រោយមកបន្តិច ហើយថាតួលេខអ្នកស្លាប់អាចលើសពី១៣នាក់ ព្រោះនៅមានមនុស្សមួយទៀតកំពុងស្ថិតក្នុងស្ថានភាពធ្ងន់ធ្ងរ។


ក្រោយហេតុការណ៍កើតឡើងរួចមិនយូរប៉ុន្មាន ក្រុមអាយស៊ីសបានចេញមុខមកប្រកាសថា វាជាស្នាដៃរបស់ខ្លួន នេះបើយោងតាមទីភ្នាក់ងារព័ត៌មាន Amaq ដែលមានទំនាក់ទំនងជាមួយក្រុមរដ្ឋអ៊ីស្លាមជីហាដមួយេនះ៕

សមាជិកព្រឹទ្ធសភាអូស្ត្រាលីមួយរូបពាក់ស្បៃបាំងមុខជិតពេលចូលប្រជុំដើម្បីទាមទារឲ្យដាក់បម្រាមលើទម្លាប់បែបនេះ

v19

អូស្ត្រាលី៖ លោកស្រី Pauline Hanson សមាជិកព្រឹទ្ធសភាអូស្រ្តាលីដែលប្រកាន់និន្នាការស្តាំនិយមជ្រុល បានពាក់ស្បៃបាំងមុខជិតពេលចូលរួមសម័យប្រជុំដើម្បីទាមទារឲ្យមានការដាក់បម្រាបលើទម្លាប់បែបនេះ។


ការទាមទាររបស់លោកស្រី Pauline Hanson គឺជាផ្នែកនៃយុទ្ធនាការដែលអំពាវនាវឲ្យរដ្ឋាភិបាលអូស្រ្តាលីចាត់វិធានការដាក់បម្រាមហាមមិនឲ្យស្ត្រីកាន់សាសនាអ៊ិស្លាមទាំងអស់ពាក់ស្បែបាំងមុខជិត ដោយលោកស្រីលើកឡើងពីមូលហេតុរក្សាសន្តិសុខជាតិ ប៉ុន្តែបែរជារងការរិះគន់ភ្លាមពីរដ្ឋាភិបាលនិងអ៊ិស្លាមសាសនិកផ្ទាល់តែម្តង។


សមាជិកព្រឹទ្ធសភានិយមស្តាំជ្រុលរូបនេះ បានបន្តសកម្មភាពពាក់ស្បៃបាំងមុខជិតបែបនេះរយៈពេលប្រហែល២០នាទី មុនពេលសម្រេចទាញចេញវិញ។


លោកស្រី Pauline Hanson ដែលលេចធ្លោខ្លាំងនៅក្នុងទសវត្សរិ៍ទី៩០ ដោយសារធ្វើយុទ្ធនាការប្រឆាំងនឹងជនអន្តោប្រវេសន៍មកពីតំបន់អាស៊ី នោះ បានធ្វើយុទ្ធនាការប្រឆាំងនឹងទំនាមទម្លាប់ស្លៀកពាក់និងការសាងសង់ព្រះវិហាររបស់អ៊ិស្លាមសាសនិកក្នុងរយៈពេលប៉ុន្មានឆ្នាំចុងក្រោយនេះ ស្របពេលប្រទេសអូស្រា្តលីរងការគំរាមកំហែងកាន់តែខ្លាំងឡើងៗពីសំណាក់ក្រុមភេរវករ។


គណបក្សប្រកាន់ស្តាំជ្រុលរបស់លោកស្រី មានអាសនៈចំនួន៤នៅក្នុងព្រឹទ្ធសភា ដោយធ្វើឲ្យគណបក្សនេះមានឥទ្ធិពលក្នុងការជំទាស់ ពេលមានការបោះឆ្នោតម្តងៗ។


ទោះបីជារងការរិះគន់យ៉ាងណាក៏ដោយ តែលោកស្រី Pauline Hanson នៅតែទទួលបានការគំាទ្រខ្លាំងក្នុងចំណោមគណបក្សប្រឆាំងផ្សេងៗទៀតដដែល៕

មនុស្ស៧នាក់ស្លាប់ដោយខ្មាន់កាំភ្លើងវាយប្រហារមន្ទីពេទ្យក្នុងប្រទេសក្វាតេម៉ាឡា

v18

យ៉ាងហោចណាស់មានមនុស្ស៧នាក់ស្លាប់ និង១២នាក់ផ្សេងទៀតរងរបួស បន្ទាប់ពីជនសង្ស័យ ជាខ្មាន់ កាំភ្លើងបានបើកការវាយប្រហារទៅលើមន្ទីពេទ្យមួយ នៅក្នុងប្រទេសក្វាតេម៉ាឡា ដើម្បីបង្ខំអោយមានការដោះលែងអ្នកទោស ដែលត្រូវបានប៉ូលីសនាំទៅពិនិត្យសុខភាព។


សមាជិកខ្មាន់កាំភ្លើងម្នាក់ឈ្មោះ Anderson Daniel Cabrera មកពីក្រុមជនពាល Mara Salvatrucha ត្រូវបាននគរបាលនាំទៅមន្ទីពេទ្យដើម្បីពិនិត្យសុខភាព ហើយនគរបាលបានសង្ស័យថាក្រុមខ្មាន់កាំភ្លើងទាំងនោះ ធ្វើការវាយប្រហារគឺចង់រំដោះសមាជិករូបនេះ។


នគរបាលឃាត់ខ្លួនបានសមាជិកជនពាលចំនួន៥នាក់ក្នុងចំណោម៧នាក់ ដែលមានប្រដាប់ដោយកាំភ្លើង ពេលធ្វើការឆ្មក់ចូលវាយប្រហារទៅលើមន្ទីពេទ្យ ប៉ុន្តែ Cabrera ដែលជាប់ពន្ធធនាគារតាំងពីឆ្នាំ២០១៣មកនោះ បានគេចខ្លួនរួច។


បើយោងតាមលោក Edwin Bravo ប្រធានមន្ទីពេទ្យ San Juan de Dios បានអោយដឹងថា ក្នុងចំណោមអ្នកស្លាប់ ទាំង៧នាក់មានបីនាក់ជាកងសន្តិសុខ និងម្នាក់ទៀតជាឆ្មាំពន្ធធនាគារ។


អ្នកជំងឺនៅក្នុងមន្ទីពេទ្យ San Juan de Dios នេះត្រូវបានជម្រៀសចេញភ្លាមៗ អំឡុងមន្ត្រីនគរបាល ធ្វើការស្វែងរកខ្មាន់កាំភ្លើងផ្សេងទៀត។


ប្រទេស អ៊ែលសាវ៉ាឌ័រ ហុងឌុយរ៉ាស់ និងក្វាតេម៉ាឡា សុទ្ធតែជាប្រទេសកំពុងតស៊ូប្រយុទ្ធប្រឆាំងនឹងក្រុមជនពាល ដែលតែងតែបង្ករអំពើហឹង្សា ក្នុងនោះភាគច្រើនកើតចេញពីក្រុមជនពាល Mara Salvatrucha ហៅថា MS-13 និងក្រុមប្រជែងមួយទៀតឈ្មោះ Calle 18 ជាក្រុមដែលតែងតែបង្ករអំពើរភេវកម្មនៅទូទាំងអាមេរិកកណ្តាល។


ស្រពេលដំណាលគ្នានេះ លោក Jimmy Morales ប្រធានាធិបតីក្វាតេម៉ាឡា បានបញ្ជាក់ថា ប្រទេសទាំងបីនឹងរួមដៃគ្នាជាមួយសហរដ្ឋអាមេរិកដើម្បីប្រយុទ្ធប្រឆាំងទៅនឹងក្រុមឧក្រិដ្ឋជនទាំងនេះ៕

ដូណាល់ ត្រាំ សរសើរលោកគីម ជុងអ៊ុនថា ធ្វើការសម្រេចដ៏ឆ្លាតវៃដែលផ្អាកគម្រោងបាញ់មីស៊ីល

v12

លោកប្រធានាធិបតី ដូណាល់ ត្រាំ បានសរសើរលោក គីម ជុងអ៊ុនថា ធ្វើការសម្រេចដ៏ឆ្លាតវៃ ដែលបានផ្អាកផែនការគំរាមបាញ់មីស៊ីលរំលងទ្វីបសំដៅមកក្បែរដែនកោះ Guam ដែលជាទឹកដីដែនកោះគ្រប់គ្រងដោយសហរដ្ឋអាមេរិក។


លោក ដូណាល់ ត្រាំ បានធ្វើការសរសើរដល់មេដឹកនាំកូរ៉េខាងជើងយ៉ាង ដូច្នេះនៅ ក្នុង សារដែលលោកបានបង្ហោះលើបណ្តាញទំនាក់ទំនងសង្គម Twitter កាលពីព្រឹកម្សិលមិញ ប៉ុន្តែទន្ទឹមនឹងការសរសើរលោកក៏បានគំរាមបន្ថែមផងដែរថារាល់ការផ្លាល់ប្តូរណាមួយអាចនឹងជួប “មហន្តរាយ”។


កាលពីថ្ងៃអង្គារ ប្រព័ន្ធផ្សព្វផ្សាយរដ្ឋកូរ៉េខាងជើងបានរាយការណ៍ថា លោកគីម ជុងអ៊ុន បានពិនិត្យផែនការបាញ់មីស៊ីលបួនគ្រាប់ដោយហោះរំលងពីលើប្រទេសជប៉ុនទៅធ្លាក់ក្បែរដែនកោះ Guam នៅពាក់កណ្តាលខែនេះ ប៉ុន្តែក្រោយពិនិត្យរួច លោកបានសម្រេចប្រកាសផ្អាកផែនការនេះភ្លាម ដោយលើកឡើងពីមូលហេតុថា ទុកពេលតាមដានសកម្មភាពរបស់សហរដ្ឋអាមេរិកបន្តិចទៀតសិន។


កូរ៉េខាងជើងប្រកាសផែនការបាញ់មីស៊ីលមកក្បែរដែនកោះ Guam នេះ បន្ទាប់ពីលោក James Mattis រដ្ឋមន្ត្រីក្រសួងការពារជាតិសហរដ្ឋអាមេរិក បានព្រមានកាលពីថ្ងៃច័ន្ទថា បើប្រទេសនេះបាញ់មីស៊ីលមកលើដែនដីរបស់សហរដ្ឋអាមេរិក សង្គ្រាមនឹងចាប់ផ្តើមហើយ។


ដោយឡែកងាកទៅមើលស្ថានភាពនៅលើដែនកោះ Guam ក្នុងថ្ងៃព្រហស្បតិ៍នេះ គេឃើញថា កងទ័ពសហរដ្ឋអាមេរិកបានបើកឲ្យប្រព័ន្ធផ្សព្វផ្សាយបានចូលទស្សនាមូលដ្នានរបស់ខ្លួន ដោយក្រុមអ្នកវិភាគលើកឡើងថា សហរដ្ឋអាមេរិកធ្វើដូច្នេះទំនងជាចង់បង្ហាញឲ្យឃើញពីយន្តហោះទម្លាក់គ្រាប់ B-1B Lancer ដ៏មានអនុភាពរបស់ខ្លួន ក្នុងគោលបំណងផ្ញើសារដល់កូរ៉េខាងជើងថា ដែនកោះនេះមិនអាចប៉ះពាល់បានទេ៕

លីបង់លប់បំបាត់ច្បាប់ដែលតម្រូវឲ្យ “ជនចាប់រំលោភយកជនរងគ្រោះធ្វើជាប្រពន្ធ”

v2

លីបង់៖ សភាលីបង់បានសម្រេចលុបបំបាត់ច្បាប់ដែលលើកលែងទោសឲ្យជនចាប់រំលោភ ប្រសិនបើពួកគេព្រមរៀបការជាមួយជនរងគ្រោះ ដោយចូលរួមជាមួយប្រទេសផ្សេងៗទៀតដែលលុបចោលច្បាប់ដូចគ្នានេះកាលពីពេលថ្មីៗ។


លោក Elie Kayrouz ជាសមាជិកសភាលីបង់ដែលគាំទ្រការបញ្ចប់ច្បាប់នេះ បានលើកឡើងថា មាត្រាផ្សេងៗទៀតក៏ត្រូវធ្វើវិសោធនកម្មដែរដើម្បីការពារស្ត្រីនិងកុមារ។


ប្រទេសហ្សកដានី បានលុបចោលច្បាប់ដែលលើកលែងទោសឲ្យជនចាប់រំលោភ ប្រសិនបើពួកគេព្រមរៀបការជាមួយជនរងគ្រោះនេះ កាលពីខែមុន រីឯទុយនីស៊ី បានលុបចោលមាត្រាស្រដៀងគ្នានេះកាលពីខែមិថុនា ហើយបានបង្កើតច្បាប់ថ្មីមួយដើម្បីការពារស្ត្រីពីការប្រើអំពើហិង្សា។


ចំណែកប្រទេសអេហ្ស៊ីប បានលុបចោលច្បាប់របស់ខ្លួនកាលពីឆ្នាំ១៩៩៩ ហើយម៉ារ៉ុក បានជំនួសច្បាប់ថ្មីកាលពីឆ្នាំ២០១៤ បន្ទាប់ពីក្មេងស្រីអាយុ១៦ឆ្នាំម្នាក់បានធ្វើអត្តឃាត និងមានក្មេងស្រីអាយុ១៥ឆ្នាំម្នាក់ទៀតបានប៉ន់ប៉ងធ្វើអត្តឃាត ក្រោយពេលត្រូវបានបង្ខំឲ្យរៀបការជាមួយជនចាប់រំលោភ។


យោងតាមអង្គការ Equality Now ដែលធ្វើយុទ្ធនាការទទូទាំងពិភពលោកបានឲ្យដឹងថា នៅក្នុងប្រទេសបារ៉ែន អ៊ីរ៉ាក់ គុយវ៉ែត តាជីគីស្ថាន និងសូម្បីហ្វីលីពីន ក៏មានច្បាប់ស្រដៀងនេះដែរ។


អង្គការសហប្រជាជាតិបានលើកឡើងថា មួយភាគបីនៃស្ត្រីទូទាំងពិភពលោក បានទទួលរងការរំលោភបំពានលើរាងកាយ និងរំលោភបំពានផ្លូវភេទ ហើយក្នុងចំណោមក្មេងស្រី១០នាក់ មានម្នាក់ហើយដែលរងការចាប់រំលោភ។


សូមបញ្ជាក់ថា នៅក្នុងប្រទេសលីបង់ ច្បាប់ដែលលើកលែងទោសឲ្យជនចាប់រំលោភ ប្រសិនបើពួកគេព្រមរៀបការជាមួយជនរងគ្រោះនេះ មានចាប់តាំងពីឆ្នាំ១៩៤៣មកម្ល៉េះ៕

ត្រឹមតែ២៤ម៉ោង មានមនុស្សរហូតដល់៣២នាក់ស្លាប់នៅហ្វីលីពីនអំឡុងអាជ្ញាចុះបង្ក្រាបគ្រឿងញៀន

v1

ហ្វីលីពីន៖ អាជ្ញាធរហ្វីលីពីនបានសម្លាប់មនុស្សអស់ចំនួន៣២នាក់ ពេលចុះបំពេញបេសកកម្មបង្ក្រាបគ្រឿងញៀនក្នុងពេលថ្មីៗ ជាតួលេខដែលមានមនុស្សស្លាប់ច្រើនបំផុតក្នុងរយៈពេលត្រឹមតែ២៤ម៉ោង ចាប់តាំងពីសង្គ្រាមបង្ក្រាបគ្រឿងរបស់លោក រ៉ូទ្រីហ្គោ ឌុយទើតេបានចាប់ផ្តើមកាលពីឆ្នាំមុនមក។


ការចុះបង្ក្រាបនេះធ្វើឡើងកាលពីថ្ងៃអង្គារនៅក្នុងខេត្ត Bulacan នាភាគខាងជើងទីក្រុងម៉ានីល ដោយចាប់ផ្តើមពីពាក់កណ្តាលអាធ្រាត្ររហូតដល់ពាក់កណ្តាលអាធ្រាត្រវិញ។


នគរបាលហ្វីលីពីនបានលើកឡើងថា អ្នកដែលត្រូវបានសម្លាប់គឺសុទ្ធជាជនជួញដូរគ្រឿងញៀន ដែលមានអាវុធក្នុងដៃ ហើយតដៃពេលអាជ្ញាធរចុះចាប់ខ្លួន។


មានមនុស្សរាប់ពាន់នាក់បានបាត់បង់ជីវិត ចាប់តាំងពីលោកប្រធានាធិបតី រ៉ូទ្រីហ្គោ ឌុយទើតេ ចាប់ផ្តើមសង្គ្រាមប្រឆាំងគ្រឿងញៀនកាលពីឆ្នាំ២០១៦មក ហើយយុទ្ធនាការនេះ ដែលមានបំណងបោសម្អាតការជួញដូរគ្រឿងញៀនឲ្យអស់ពីប្រទេសហ្វីលីពីន បានរងការរិះគន់យ៉ាងខ្លាំងពីអន្តរជាតិ រីឯលោក រ៉ូទ្រីហ្គោ ឌុយទើតេ ផ្ទាល់ក៏រងទណ្ឌកម្មដែរដោយសារការសម្លាប់មនុស្សនៅក្រៅប្រព័ន្ធតុលាការ។


អាជ្ញាធរហ្វីលីពីនបានឲ្យដឹងបន្តថា ក្រៅពីអ្នកស្លាប់ទាំង៣២នាក់ នៅមានមនុស្សជាង១០០នាក់ទៀតត្រូវបានចាប់ខ្លួន ហើយថាមន្ត្រីនគរបាលក៏រឹបអូសបានថ្នាំញៀននិងអាវុធមួយចំនួនផងដែរ។


នៅក្នុងសុន្ទរកថាដែលប្រើពាក្យធ្ងន់ៗកាលពីខែមុន លោក រ៉ូទ្រីហ្គោ ឌុយទើតេ បានព្រមានអ្នកប្រើប្រាស់គ្រឿងញៀនថា លោកនឹងចាប់ពួកគេបញ្ជូនទៅ “មាត់ទ្វារនរក” បើនៅតែបន្តសកម្មភាពនេះតទៅមុខទៀត ជាសញ្ញាបង្ហាញថា យុទ្ធនាការបង្ក្រាបគ្រឿងញៀនរបស់ប្រធានាធិបតីកណ្តាប់ដៃដែករូបនេះ ប្រហែលជាមិនងាយចប់ឡើយ។

 

លោក រ៉ូទ្រីហ្គោ ឌុយទើតេ បានផ្អាកយុទ្ធនាការបង្ក្រាបគ្រឿងញៀននេះ កាលពីខែមករា ដោយសន្យាថា នឹង "បោសសម្អាត” មនុស្សអាក្រក់ក្នុងជួរនគរបាល ហើយរៀបចំអង្គភាពប្រឆាំងគ្រឿងញៀនឡើងវិញ ប៉ុន្តែយុទ្ធការនេះបានចាប់ផ្តើមវិញកាលពីខែមីនា។
សូមបញ្ជាក់ថា ទោះបីជា លោកប្រធានាធិបតី រ៉ូទ្រីហ្គោ ឌុយទើតេ រងការរិះគន់យ៉ាងខ្លាំងពីអន្តរជាតិក៏ដោយ តែលោកនៅតែទទួលបានការគាំទ្រខ្លាំងក្នុងចំណោមពលរដ្ឋហ្វីលីពីនភាគច្រើនដដែល៕

ចិនបង្ហាញរថក្រោះនិងរថពាសដែកជំនាន់ថ្មីដែលផលិតក្នុងស្រុក

v12

ចិន៖ ប្រទេសចិនបានបង្ហាញរថក្រោះនិងរថពាសដែកជំនាន់ថ្មីរបស់ខ្លួន ដែលមានបំពាក់បច្ចេកវិទ្យាមិនចាញ់រថក្រោះនិងរថពាសដែករបស់ប្រទេសមហាអំណាចមួយចំនួនទៀត។


រថក្រោះនិងរថពាសដែកជំនាន់ថ្មីនេះ គឺប្រទេសចិនផលិតដោយខ្លួនឯងផ្ទាល់តែម្តង ហើយវាត្រូវបានបង្ហាញនៅជាយក្រុង Baotou ក្នុងតំបន់ស្វយ័តម៉ុងហ្គោលីខាងក្នុងនៅព្រឹកថ្ងៃពុធនេះ។


យោងតាមទីភ្នាក់ងារព័ត៌មានរ៉យទ័របានឲ្យដឹងថា នេះគឺជាលើកទីមួយហើយដែលរថក្រោះនិងរថពាសដែកជំនាន់ថ្មីទាំងនេះត្រូវបានបង្ហាញឲ្យសាធារណជនបានឃើញ។


ក្នុងចំណោមរថក្រោះនិងរថពាសដែកទាំងនេះ គឺរថក្រោះចម្បាំងជំនាន់ទីបីប្រភេទ 99 រថពាសដែកប្រភេទ ZBD05 ដែលបើកលើគោកក៏បានក្នុងទឹកក៏បាន រថពាសដែកដែលសម្រាប់បើកតែលើគោក និង និងរថក្រោះមានបំពាក់ប្រព័ន្ធប្រឆាំងមីស៊ីល ដែលស្រដៀងទៅនឹងរថក្រោះដែលរុស្ស៊ីទើបតែបង្ហាញកាលពីប៉ុន្មានខែមុន។


ក្រៅពីចង់ឲ្យពិភពលោកបានឃើញ ការបង្ហាញនេះក៏ជាផ្នែកនៃសកម្មភាពដើម្បីរំឮកទិវារថក្រោះ Norinco ឆ្នាំ២០១៧ ដែលទទួលបានការឧបត្ថម្ភពីក្រុមហ៊ុន China North Industries Corp ផងដែរ៕

ព័ត៌មានផ្សាយ​ផ្ទាល់​ទាន់​ហេតុ​ការណ៍​(video)


អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

ព័ត៌មានជាតិ​ពេល​យប់​


អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

អន្តរជាតិ

Angkor-10-7-2015

chipmong-lang-10-07-2015

Cambodia-10-07-2015-new

MC-col-10-7-2015

angkor-puro-10-07-2015

Pepsi-10-07-2015

22-10-2015-flora

santana-22-10-2015

8-4-2016-banner

GreenICT Technology Co., Ltd

gps-new

verte2